DSE 14星狀元教你點抄筆記

DSE 14星狀元教你點抄筆記

DSE 14星狀元教你點抄筆記
Monica Chan
Monica Chan 2019年01月10日

1. 係咪科科都要抄筆記?

我個人絕對唔建議每科都抄筆記,因為你有嘅時間好有限,如果係用黎歸納課本內容嘅筆記,個人建議有雞精就用雞精,好似 Chemistry in 24 Hours呢D雞精書個人好推薦用,因為佢涵蓋左絕大部分要知道嘅內容,如果要再加提醒自己,只需要係旁邊加一D備註就可以,省翻D時間操多D paper攞經驗。

咁係咩情況下要抄筆記呢?我個人覺得最主要係係你特別想記低個人操卷時拎到嘅一D經驗/技巧/錯過嘅野嘅時候就可以 by topic用筆記記低,方便臨近考試嘅時候一次過睇翻;另外有D課本內容如果你覺得用圖表可以有助記憶,我亦會建議自行抄寫筆記,重新組織筆記內容。

2. 如何抄寫

a) Universal format:

無論係邊一科嘅筆記,我通常都會分大標題、小標題同埋主要內容。呢個分類最主要係幫自己係溫習嘅時候容易搵番每一課裡面嘅相關內容,同時亦都令筆記更有組織。而呢個分類我通常會用唔同嘅顏色黎區分,例如大標題用紅色,小標題用紫色,主要內容用藍色筆寫,咁樣望落份notes就一目了然。

b) Tables

對於內容格式化嘅課題,我通常會畫表格幫助記憶。例如BIO ch.19 (biodiversity)可能會逐個逐個同你講每種動物嘅特徵,但係你會發現佢介紹嘅內容都係可以分成幾類,例如皮膚表徵、棲息地,於是你就可以畫一個表格,紀錄D內容,方便有系統咁溫習。

3. 每科內容(參考)

中英文操作文通常我會記低一D常用嘅詞彙,然後再搵同義詞,擴闊詞彙,同時搵D更靚嘅字取替一D經常用嘅字,例如站立有時可以用佇立表示、不認識/熟悉有時可以用不諳取替。

(中文)另外一D可以描寫不同心情/景物嘅靚句我都會mark低,然後每次寫文寫到相關內容都會用翻果D字(最尾DSE都有用翻)。同時都會準備幾個類型嘅故事,例如辯論比賽、舊區重建、融合教育等等,每次作記描舒都盡量用翻差唔多嘅鋪墊,自然減省好多作故仔嘅時間。而議論文我都係會搵一D百撘D嘅例子同名句,黎黎去去都係用番果D

而準備兩科語文科嘅卷三時都可以用筆記記低各種文體/語境常用字眼同百搭開頭及結尾。

通識科而言,我覺得可以自己跟題型mark翻低每個體型嘅注意點,同時記低某D關鍵字眼/議題嘅爆題方法,例如分析政策時可以考慮可行性/長遠可持續性/針對性/全面性等等,另外亦可以記低一D常見嘅推論方向,考試前快速複習,考試時自然更容易寫到靚嘅推論同埋避開大部分考生常犯嘅錯誤,保住D分。

Chem/Bio除左mark低/重新組織要溫嘅內容之外,我亦建議mark低操卷時遇到嘅陷阱同題目關鍵字眼/常見答法,例如genetics dominant/recessive要點deduce、Chem嘅某D reactions/chemicals嘅特徵暗示緊D咩比你聽(e.g. pungent gas evolved 可能imply 有chlorine gas/Sulphur dioxide gas)等等,總之你覺得考試答題時/睇題目時要留意嘅地方都可以寫低。

其實寫唔寫筆記純粹取決於個人需要,如果你覺得整完幫到你溫書,令整個溫習過程更完整同有效率先好寫,如果你覺得無必要嘅就省翻D時間做其他野,信自己就好。

42