到底邊科需要寫筆記？寫筆記又應該用咩方法？寫完之後又要點用？相信呢啲都係大部分同學面對嘅難題。
其實我哋AfterSchool 嘅小編同大家一樣都係咁，所以今次DSE中文 straight 5**嘅 dsefreegiveaway 就有啲tips送俾你！溫書係咪真係一定要寫筆記呢？狀元又會唔會有「特別」抄筆記嘅技巧呢？準備考DSE嘅你哋！係時候學下點寫notes先係最有效喇！
有啲人溫書嘅時候好鍾意寫筆記，尤其是溫一啲選修科嘅時候，就會將唔同嘅科目入邊每一課嘅內容用一本筆記簿好靚咁樣抄晒一啲重要嘅概念係上面。但究竟呢種寫筆記嘅方法係咪真係咁有效呢？
我自己比較少用呢種方法，又或者我係高中嘅時候，完全係冇寫筆記，但係初中嘅時候就有用呢一種方法去溫書。咁點解我冇寫筆記呢？唔寫筆記嘅人會唔會令到自己溫唔熟一啲內容呢？
思考寫筆記嘅必要性
首先想講下寫筆記係咪真係必要。
好多人寫筆記嘅原因係因為覺得本書太厚，唔想每次溫書嘅時候攞返本書出嚟慢慢睇，想一次過睇晒每一課嘅重點，如果有筆記就會方便好多。
但其實去到中六，好多時候係唔需要自己親手整筆記㗎！
中六已經有好多精華筆記
去到中六，好多時都會喺唔同嘅地方攞到一啲精華筆記，所以唔再需要寫筆記。
如果你經常性出去補習，而且係會從唔同嘅補習老師拎到科目嘅筆記嘅人，寫筆記對你黎講係完全多餘嘅。因為你無論點寫，你嘅筆記嘅內容都唔會有補習老師出得咁好同埋咁準。
例如經濟同生物等等嘅選修課，我自己都係淨係溫補習老師嘅筆記，唔會自己額外去用一本簿寫筆記，更加唔會睇教科書。
DSE要準備七科，冇時間再整筆記
對於中六來講，時間就等同於你嘅分數，寫筆記其實係一件少少浪費時間嘅事。因為你有七科要溫，而有一啲選修科其實佢哋每一課嘅內容都好多，而要既或者要背嘅重點亦都係非常多，所以如果你要做晒全科嘅筆記其實要花都唔少嘅時間。比起慢慢咁樣寫呢本筆記，不如用呢個時間操多幾份卷好過。
——咁係咪即係寫筆記一定係多餘，係咪唔好寫比較好？
限制筆記嘅長度
如果真係要寫筆記，我會限制自己每一課嘅筆記只會用一張紙只去寫晒，而且唔係啲字寫到好細隻嗰種。例如我嘅chem會用呢種嘅寫筆記嘅方法，主要淨係攞嚟記一啲定義，同埋一啲只可以死背嘅資料。
——咁仲有幾時建議使用呢種寫筆記方法？
如果一啲補習社嘅筆記太多，例如Yylam 最重要嘅技巧會散布喺筆記既嘅唔同位置，而且佢嘅筆記相對較厚，較多練習等等相對不太重要嘅資料，咁嘅話我就會用上述做筆記嘅方法，將一啲重要嘅技巧抄落張紙或者落本簿度，咁溫書嘅時候就會快好多。
編者後記
講到最後，就好似dsefreegiveaway噤講。筆記？唔係唔比你寫，係必要嘅先去寫；寫都好，係要寫出重點，唔係無條件由本書抄寫出黎。
你寫成本筆記嘅時間，其實已經冇咗可以操卷嘅時間。所以各位同學要衡量下時間再決定係咪一定要親手「寫筆記」先得！
如果你覺得自己嘅溫書法唔係「手抄」，想變但係又唔知點做？或者你可以嘗試一下睇《三文治記憶法》同埋向DSE狀元偷師，溫習之前先訂立一個溫習時間表喇！
