【持續進修基金】2萬蚊資助有咩CEF課程可以讀?學車都可以申請!

AfterSchool
AfterSchool 2020-9-3 20,291
由去年起,每位合資格人士嘅持續進修基金提升至兩萬蚊!涵蓋課程範疇仲好多元,連學車、語言都可以申請!終生學習值得推動,所以AfterSchool為有興趣嘅同學仔整合咗CEF嘅申請方法同熱門課程,幫大家自我增值!
由去年起,持續進修基金嘅資助額提升至2萬!涵蓋課程範疇仲好多元化,連學車、學英文、學日文都可以申請!AfterSchool整合咗CEF嘅申請方法同熱門課程,幫大家自我增值!

什麼是持續進修基金(CEF)?

為咗鼓勵本地成年人持續進修、自我增值,政府為合資格嘅申請人提供持續教育和培訓資助,申請者於成功修畢持續進修基金可獲發還款項課程後一年內及年齡屆滿71歲前,可不限次數申領合共最多20,000港元的資助。
透過學歷提升同技能培訓,在職人士可以增加向上流動嘅機會,亦可以向社會推動「活到老,學到老」嘅風氣!自2019年4月1日起,政府更實行優化措施,包括:
  • 金額上限增加至每人2萬元。
  • 申請人年齡限制提升至70歲。
  • 基金課程範疇擴大至所有在資歷名冊登記的合資格課程。
  • 基金帳戶不再設有年期或申領次數限制,申請人可在年滿71歲前,不限次數申領合共最多2萬元資助。
  • 2019年4月1日前已開立持續進修基金帳戶,但未於限期內用盡資助的申請者,可以繼續使用帳戶結餘,同時享有新增的1萬元資助額。
 

申請資格

根據政府網站嘅資料,申請持續進修基金(CEF)有以下申請資格:
  • 申請人的在申請時年齡須介乎18至70歲,屬香港居民並擁有香港居留權、或香港入境權、或有權在香港逗留而不受任何逗留條件限制人士。
  • 申請人必須於於成功修畢課程後一年內(按每項課程獨立計算),年滿71歲前遞交申請。
  • 修畢整個基金課程,並已支付全部學費。
  • 報讀已登記成為持續進修基金課程的持續教育和培訓課程,才符合申請發還課程費用的資格。
  • 在所有獲勞工及福利局局長批核的課程評核方法中取得整體分數嘅50%或課程所規定的較高評核要求的百分比率(以較高者為準)。
  • 申請人必須已出席不少於課程總上課時數的70%或課程所規定的較高出席要求(以較高者為準)。
  • 從未就同一項課程、學習單元或學分獲其他公帑或在其他公帑資助計劃下獲得任何資助。
 

申請方法

如何申請開立帳戶及發還課程款項?

自新措施實行後,申請人可喺成功修畢第一項基金課程後的一年內,遞交開戶申請及第一次申領發還費用的申請:
電子申請
申請人可以透過「香港政府一站通」網上平台填寫及遞交電子申請表格。首先,要成功上載申請表格及所需文件、列印申請表格並在丁部聲明書簽署,之後交返俾就讀的院校 / 培訓機構蓋印,證明你已經成功修畢有關課程。最後,於遞交網上申請表格起計14個曆日內,將已簽署及蓋印的申請表格正本遞交至辦事處。記住呀,辦事處收到申請表格當日,先當作遞交申請日㗎~
紙本申請
首次申請人士,要先向就讀之院校申請修業證明信,再將填妥並已獲就讀學院蓋印的持續進修基金申請表格 [SFO 313 (2020)] ,連同所需文件副本郵寄/親身遞交至持續進修基金辦事處,就可以同時申請開立帳戶及發還課程款項㗎啦!而之前經已開戶嘅申請人,亦可以單一就發還課程款項而作出申請。
辦事處地址: 香港荃灣青山公路388號中染大廈25樓07-11室   持續進修基金辦事處
所需文件副本包括:
  • 香港智能身份證
  • 單程證(如適用)
  • 繳付課程費用的證明文件
  • 成功修畢持續進修基金課程的證明文件。
  • 基準試成績單(修讀語文能力課程的申請人適用)
  • 繳付基準試考試費用的證明文件(修讀語文能力課程的申請人適用)及
  • 載有申請人的姓名、帳戶號碼及銀行名稱 / 銀行編號的銀行存摺首頁或月結單
除咗親身到辦事處交之外,亦可以將表格連同所需文件副本放入長沙灣政府合署指定嘅投遞箱內申請!

如何查詢申請進度?

申請完之後,如果喺10個工作天後仍未收到短訊或書面確認收妥申請通知,就要致電到持續進修基金辦事處3142 2277查詢啦!而辦事處會喺收到申請表格當日起計六星期(適用於已開立帳戶的申請人)或八星期(適用於首次開立帳戶的申請人)內向申請人發出結果通知書。
此外,申請人都可以瀏覽持續進修基金網站查詢持續進修基金戶口狀況,更方便地查看申請進度~
  

計算資助金額方法

喺計劃之下,首1萬元資助額,會用作資助8成課程費用;而新增嘅1萬元資助,則只用作資助課程費用嘅6成。每個人嘅資助額會根據自己課程嘅原來費用而有所不同。如果想估算自己可以獲得幾多資助,可以用政府嘅資助計算器幫手!只要輸入嘅基金帳戶資料和課程資料,就可以知道自己大約嘅資助額啦!

2020年持續進修基金課程

講咗咁耐,究竟有咩CEF認可課程可以申請?自2019年4月1日起,持續進修基金擴闊咗可獲發還款項課程範圍,為所有在資歷名冊下登記的合資格課程,當中包括化妝、攝影及烹飪等。AfterSchool就幫大家歸納咗幾類嘅熱門範疇,俾大家做參考!

學車

好多人都想考個駕駛牌,依家政府就資助你學車啦~持續進修基金嘅資助範圍包括香港駕駛學院嘅私家車駕駛證書輕型貨車駕駛證書課程。獲得最高資助後,每個課程只需要俾$4,815就可以報讀!由於資助係唔包租車費、筆試和學牌等費用,所以最高總自付 $7,833 就可以考牌啦!

語言

CEF亦涵蓋唔同嘅語言課程,包括英文、韓文、日文、德文、西班牙文等,甚至連手語都有!好多學院提供嘅IELTS備試課程都喺資助範圍內~不過要留意返唔同課程嘅有唔同嘅資助條件,好似德文咁,合資格課程只包括初階至A2程度,而韓文就涵蓋至高階課程。
另外,修讀語文能力課程嘅申請人,需要另外喺指定基準試中考到指定嘅成績,先合資格申請發還款項。當中基準試嘅費用可以申領款項,所以如果你係英文課程申請人,要考IELTS都有資助㗎!

副學士學位

除咗短期課程,CEF亦涵蓋好多為期兩年嘅副學士課程。當中學院包括香港理工大學香港專上學院(POLYU-HKCC)香港大學專業進修學院HKU (SPACE)香港城市大學專上學院嶺南大學社區學院香港公開大學香港浸會大學持續教育學院。課程內容亦十分廣泛:工商管理、設計學、健康學、應用社會科學、中醫、理學、文學等等。副學士課程或有機會接駁上大學,獲得學士證書添!?

其他興趣 (如美容、品酒、寶石鑑定等)

CEF仲涵蓋一般大專課程未有提供嘅學科,將你興趣發展成為一門專業技能。例如美容方面,由美髮、化妝到美甲,都有課程任君選擇,甚至連按摩都可以獲得專業認可!另外仲有課程教授品酒知識及技巧、珠寶鑑定/採購/設計等!
而想從事餐飲業嘅你,星廚管理學院提供由中菜、粵式點心、包餅、西式糕點到茶餐廳食品製作嘅證書課程,而香港大學專業進修學院(HKU Space)亦有課程教你製作健康糕點。但要留意返唔同課程對申請人所具備學歷同工作經驗方面要求,部分亦會要求你有志將來從事相關行業先收㗎~
另外,香港理工大學(Poly U)亦有提供多個與數碼和商貿相關嘅證書課程,例如數碼行銷、社交媒體市場推廣、財務策劃等。
除咗上面所提及嘅課程之外,大家都可以參考詳細嘅課程名單培訓機構名單,或者喺課程搜尋器輸入關鍵字,輕鬆搵到心儀嘅進修課程!
 

常見問題 

Q: 如果我申請嘅課程係由本地機構同海外大學合辦,我需要遞交邊一種成功修畢課程證明?A: 申請人於申請時必須遞交由本地代理(院校 / 培訓機構)發出的成功修畢課程證明或證明信件。
Q: 點樣領取資助款項?收款嘅銀行戶口有冇種類限制?A: 發還的款項會直接存入申請人指定接收款項的儲蓄 / 往來帳戶。信用卡帳戶、定期存款帳戶、外幣存款帳戶或貸款帳戶都唔適用。
Q: 如果我同時報讀幾個課程,可唔可以分開申領資助?A: 可以。只要是2019年4月1日或之後開課的基金課程就不再受申領次數和有效期限制。
Q: 我考咗幾次基準試先獲得及格成績,可唔可以申請發還所有考試費用?A: 不可以。申請人只可就取得指定或更高程度的基準試考試費用申請發還款項。而每項語文能力課程只可配搭一個基準試考試費用提出發還款項申請。
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool

AfterSchool 是一個針對DSE而設的網上補習平台,課程涵蓋多個 DSE 科目,讓同學足不出戶就可以享有優質教學。註冊用戶人達 50,000 人,當中超過四分之一學生為應屆文憑試考生,是全港最大型網上補習平台。