就開學啦！有咩要準備呢？暑期功課？我緊係唔係想講呢啲啦！今日想講嘅係「目標」！
一．反思｜尋找起點
正所謂「新學年、新開始」，係正式開學前不妨花少少時間回顧下上一年有咩做得好、有咩做得唔好、點解會做得唔好！比個例子你參考下：
- 數學考試拎咗滿分，比預計九成好
- 中文作文得38分，英文作文都係得48分
- 化學暫時仲算follow up到，同預期差唔多
- 上年參加排球隊，最少每星期用咗4個鐘
- 好似花太多時間落數學，搞到無時間去溫其他科目
為自己進行一個年度反思，評價下自己嘅表現！
二．目標｜你的終點
反思完你就可以諗下黎緊呢一年有咩目標，記住唔好吹太大話咩「我要7科5*」，根據翻目前學習進度同你DSE嘅目標，去定立一啲係你能力範圍以內做到嘅事情同目標！
例如我本身中英都係麻麻地，都係求合格拎個3入到大學就得，但係照上年情況黎睇會有D危機，所以其中一個目標可以係「我要中、英作文平均表現有65分或以上」。
三．行動｜交通工具
有個目標之後係唔夠架！呢步係要你諗下點樣可以達成呢個目標，為自己設立一啲具體嘅行動！又用翻上面做例子，你要做咩先可以令自己中文、英文作文去到上面嘅水平呢？
1. 每星期中文、英文最少各作一篇文並交比老師去改
2. 一派作文果陣就問同學拎D佳作黎睇下
咁樣具體話比自己知要做咩先可以幫你達成目標！最好就搵個地方寫低，再放係當眼處日日提醒自己有咩目標同要點樣達成！
總結
上面三步看似簡單，其實真係好簡單，係睇你做唔做！今年有心想改變一下自己嘅，係開學前搵一晚lock自己係間房度，拎支筆同白紙，開始試下寫低你今年嘅目標同點樣去達成！話唔定半年之後你都會比自己嚇親呢！
