數數手指，原來得返唔夠幾個月已經DSE啦... 唔知你又準備好迎戰未？
定仲係懶懶閒、冇咩規律、時間安排得唔好、Past Paper又未掂過？
如果仲係唔知可以點安排自己嘅溫習，
咁呢篇由dsefreegiveaway寫嘅《中六開學備戰須知》教你調整心態、制定策略就啱哂你啦！
(1) 心態篇
放咗兩個幾月暑假，有唔少人嘅心情已經放鬆咗，所以仲未進入狀態。如果你係上述嘅人，就必須立刻調整心態。另外，有好多同學喺暑假之前plan咗自己要做好多嘢，但去到最後一日，發現自己跟本冇做過，完全behind schedule，我舊年就plan好暑假要做哂pastpaper，但最後完全冇做過咁滯，所以極度自責加內疚。
不過反正暑假都過咗去，與其自責點解自己冇做哂啲嘢，不如快啲開始清返佢地。
首先搵返自己暑假有咩未完成，再排好優次，喺九月嘅時候做返哂。其實開學後仲有好多時間，例如上堂、小息等，只要每段時間做少少，都可以好快清哂。記住：只好望前，唔好望後！過咗去就唔好後悔啦，搵返最應該做嘅嘢，即刻開始做！
開學之後，每個人都會爭分奪秒，用有限嘅時間做最多嘅嘢，升最多嘅分，所以你要訂好目標，再估計吓自己唔同科目嘅Level。之後會再開一個Post再講詳細點做！😉😉
(2) 策略篇
有咩策略去plan自己嘅時間？跟住以下嘅步驟plan出最好嘅時間表！
1. 認清目標
第一步當然係要訂立一個目標，即係搵出自己想入嘅科，再睇吓佢收分同Weighting，例如我果時想入三大嘅Global Business，而UST Gbus英數係有加成。
訂立目標唔單止係搵出最想入嘅科，仲要諗定一旦失手，或者低分時想入嘅科，我果時訂咗如果考得比預期好就搏Gbus (Best 5 32-33)，如果係預期就入到CU Social Science (Best 5 26-27) ，如果係預期差就可以揀Sociology 等。
所以，第一步就係要諗定自己想入啲咩科，同自己個分夠入咩科。
當然，依家仲係九月，我絕對建議大家可以aim high啲，我學校九月predict我27分，但我最後33分，所以唔好睇少依7個月，佢可以幫你升到好多分！🤣
2. 認清自己能力
開學前有一樣極緊要嘅嘢要做：就係要睇吓自己唔同科依家大約喺咩Level，再藉此選定自己嘅投資組合。
首先睇吓自己咩科相對成績較好，我果時就知自己中文、通識同Econ係穩5*或以上，而數學同Chem就係我嘅弱項，只係得Level 4-5左右，咁我就要放多啲時間落差嘅科到。
要認清自己咩Grade有好多方法，首先係計時做一份完整嘅pastpaper，再跟返Cutoff比對自己嘅能力，第二就係參加出面嘅Mock exam。
3. 決定投資組合
2019年開始，HKU同CU轉咗計分方法，攞星同星星嘅話會有bonus分，所以如果你aim high嘅，我會建議搵1-2科衝5**，同時將所有科衝上5或以上。
如果你想入大學嘅，我建議你將時間平均分配比每一科。而我果時就係要中文、通識同Econ穩5**（其實舊年暑假水平大約已經到），所以都投放咗唔少時間落去，例如即使依三科好好，都依然有補習同有操卷。但相對而言，投放喺依三科嘅時間少過投放喺英文、Chem同Bio。最後前三科有**，後三科都衝到上*。
決定咗要衝咩科後，就要搵吓點樣進步同分配時間，例如有人會去補習，有人會自己讀。
4. 制定時間表
最後就係制定開學嘅時間表，時間表唔係指幾點到幾點都做咩果種，而係為自己在一個時段內訂立目標，例如喺九月內要做完幾多pp，背完幾多範文，依種宏觀嘅時間表可以幫助你監察自己進程。
同時，你都要計劃好補習時間同地點，因為開學後有好多人都有好多科補習，所以記得plan好每日嘅行程，到時先plan就會太遲架啦！
— 睇完dsefreegiveaway嘅分享，仲想知多啲點樣利用放假嘅時間溫書？即刻去睇吓《DSE時間管理法 | 中六假日Timetable》，包保你睇完發覺原來自己嘅一天可以多出咁多時間，將溫書時間發揮得淋漓盡致！
