嗱嗱嗱，我知你一定試過坐低溫習嘅時候，突然又比其他嘢影響或搞到你分心，例如係手機嘅提醒（Notification）。
而好多時你都會同自己講「休息多十分鐘就認真溫習！」，而通常呢十分鐘係無窮無盡，不斷延伸落去，最後你就會發現自己hea足成日，但係咩都無做到?早前就同大家介紹咗Pomodoro Technique（蕃茄工作法），有興趣可以睇翻！
而今次想同大家介紹嘅係一個叫做Time Blocking嘅小技巧！
何謂Time Blocking
簡單嚟講，假設你已經清楚了解今日嘅目標，知道每個tasks所需嘅時間，你應該係自己嘅calendar上面mark翻低幾點到幾點要做咩，最好就幫自己Block埋食飯同玩嘅時間，然後儘量跟住自己安排嘅時間表做嘢。
但喺我可以100%肯定一開始用呢個方法你係會跟唔到個時間表，例如個task所需嘅時間比你預計嘅長，又或者你啊媽突然叫你幫手收衫。
出現呢啲突發情況？唔緊要！只要即刻調教翻個時間表，再重新開始，久而久之用呢個方法用得多嘅時候，你嘅time blocking就會越黎越準，而當你越黎越依賴你嘅calendar嘅時候，亦都係幫你build up緊一個習慣—係適當時間做適當嘅嘢，而唔係隨心所欲做咩就做咩。
電子定實體嘅Calendar好？
呢樣嘢真係因人而異，我自己就鍾意電子，因為電腦手機都可以即時同步睇到，而且有咩變動嘅時候都可以輕鬆拉黎拉去。當然啦，有啲人都係鍾意自己有本靚靚嘅記事薄去做Calendar，最緊要都係你開心！
