【溫書好地方】香港各區溫書Cafe、樓上自修室Cafe介紹

AfterSchool
AfterSchool 2020-10-5 154,496
AfterSchool搵咗香港溫書好地方推介,包括溫書Cafe、樓上自修室Cafe、新型共享空間等等,地點有旺角、銅鑼灣、觀塘、沙田、油麻地。
每當臨近測驗考試,相信唔少同學都會好頭痕邊到有溫書好去處,其實每個溫書地方都各有特色以及優缺點,揀選一個合適嘅溫書地方,溫書效率定必大大提高!AfterSchool 為大家介紹全港唔同嘅溫書好去處,由屋企、圖書館自修室、溫書Cafe 到新型樓上自修室,務求幫大家搵到最適合自己嘅溫書/工作空間!

溫書 Cafe/自修室 Cafe

圖片來源:Pixabay
圖片來源:Pixabay
雖然自修室環境寧靜,適合同學集中精神專心溫書。但如果同學覺得喺自修室環境太過安靜,覺得壓力好大嘅話,相信喺cafe溫書會更加適合你!
Cafe 嘅氣氛相對輕鬆、自由,仲可以一邊飲住咖啡食住蛋糕一邊溫書𠻹!就算約埋一兩個朋友一齊溫書,間唔中討論課題都唔怕俾人投訴(當然唔好太大聲~)。
現時市面上較受同學歡迎嘅連鎖咖啡廳分別有 Starbucks 同埋 Pacific Coffee。前者較容易滿座,顧客可以憑單據上嘅密碼享用無限時嘅 WiFi;而後者嘅 WiFi 則只有 20 分鐘時間,但滿座情況不常見。
不過等小編介紹啲更正嘅地方畀大家!唔知你有冇停過 Coffee Academics 呢?Coffee Academics 喺全港設有十三間分店(銅鑼灣、尖沙咀、九龍塘等等),啲環境都幾好㗎!
除咗連鎖 Coffee Shop,港九新界都有唔少小型 Cafe 畀大家溫書喎,小編今日就精選咗幾間 Cafe 畀大家作參考〜

港島區溫書 Cafe & 自修室 Cafe 推介

  • 銅鑼灣:Desk One溫室、Moment
  • 堅尼地城:Ethos

九龍區溫書 Cafe & 自修室 Cafe 推介

  • 深水埗:Dog99 Coffee(通宵24小時營業)
  • 旺角:神經餵飼
  • 佐敦:Cafe Rovel
  • 油麻地:Kubrick 
  • 觀塘:木讀 Wooder Space

新界區溫書 Cafe & 自修室 Cafe 推介

  • 大圍/沙田:屋子空間、Whitewood Coffee
  • 天水圍:博愛Cafe
  • 荃灣:咖啡賞館
  • 元朗:ACCRO COffee
以下係小編喺 Cafe 溫書心得,可以幫助同學溫習更有效率:
貼士1: 揀人流少時間先去 Cafe
同學亦應該儘量揀人流較少嘅時間先去 Cafe 溫書,一來喺安靜少人嘅環境下可以專心溫書,二來亦唔會因為繁忙時間而被趕走。
貼士2: 唔好食太飽
小編都明白美食當前好吸引,但記得去 Cafe 溫書唔好食得太飽,以免飯氣攻心集中唔到精神溫書!溫書溫到有啲攰嘅時候可以食咩好呢?除咗飲咖啡提神之外,建議同學可以喺 Cafe 揀啲有雞蛋嘅食物,提供到能量之餘亦有助提神嘅效果。
 

新型樓上自修室

圖片來源:unsplash
圖片來源:unsplash
雖然 Cafe 可以一邊飲咖啡一邊溫書,但喺 Cafe 逗留得太耐又驚被人望望下咁,而且 Cafe 原意唔係畀學生溫書,所以未必有完善嘅設施配套。例如張枱太細放唔到太多筆記,WiFi 有設時限,搞到啲溫書時間變得好倉促......
如果同學想有個闊啲嘅溫書地方,但同時又可以長坐嘅話,相信樓上自修室會更適合你。
近年新興嘅樓上自修室專為學生溫習而設,自修室內會提供無限 Wifi、獨立充電位、影印同掃瞄服務、當然仲有必備嘅零食飲品,有啲樓上自修室仲會有手沖咖啡飲𠻹!
樓上自修室店內主要分為幾個區,例如有私人會議室、共享空間、靜音自修區等等,想幾個朋友研究課題又得,想自己一個靜靜地溫書都得。而且相比圖書館自修室,樓上自修室採光優良,環境闊落環境清靜,令到整體氣氛放鬆冇咁大壓力,絕對幫到一班想喺自修室專心溫書嘅同學!
現時市面上比較出名分別有 focus, My Base, Deskone, Apsire Upper Room, Andotherspace。

focus - 旺角自修室

focus 位於旺角彌敦道,同油麻地地鐵站只有 1 分鐘嘅步行距離,所以非常方便 !!!
focus 可以話係旺角鬧市入面嘅一點寧靜。呢個共享空間為大家提供咗一個靜靜哋嘅地方,集中工作、自修,又或者放鬆休息下。
小編自己覺得 focus 場地設計都幾特別。呢個自修室主要分為 Immerse Zone (獨立座位配合高私隱度嘅間隔設計,可以專注溫習)、Imagine Lounge (畀大家享受自然光嘅靠窗座位)、Hot Desk (適合 2 - 4 人的工作及學習交流)同埋 Meeting Room,成個地方啲都幾有 feel~
佢有基本嘅設施同服務,例如會提供免費小食、飲品、咖啡同埋收費打印服務
話說小編發現到佢哋有學生優惠,而且學生全日收費都只係 $115。(如果大家勤力嘅話,計返條數其實唔使 $10 一個鐘,非常適合需要集中溫書嘅同學仔!)
另外,如果你係打算長期喺自修室作戰,其實佢哋有 5-day Pass 同 Monthly Pass 計劃,再加埋學生優惠,咁就抵上加抵!非常推介!(詳情可以去 focus 官網睇睇)
小貼士:如果想用學生優惠,大家要先去下面呢條 link book 時間。到時去 focus 嗰陣,show 封 confirmation email 畀啲 staff 睇,順便講埋自己想用「學生全日優惠」就 ok 㗎啦!

My Base

My Base 位於旺角,位置方便之餘空間亦寬敞舒適,有共享工作桌、會議室並且有多款座位空間選擇!My Base 間唔中亦有舉辦 workshop,可以約埋三五知己去整吓手工藝。場內收費$98/三小時,或可逗留全日$135,亦有月票計劃,詳請可以去My Base官網詳閱。

Deskone

Deskone 位於銅鑼灣、旺角以及荃灣,分別都有大約1,400呎嘅共享空間,店內有提供影印服務、充電位、零食區等等基本服務。Deskone場地主要分為 Reading Lounge, Quiet Focus Zone, Private Room,方便唔同用家嘅需要。場地以時租、日租和月租計算,最低消費一小時 $44,平日的收費三小時的價錢是 $88,1天則是 $128,亦設有平日三小時券、平日全日券以及月費計畫,詳請可以去Deskone官網詳閱。

Apsire Upper Room

Apsire Upper Room 位於炮台山,同樣設有獨立溫習空間以及共享空間,場內除咗提供基本 WiFi 以及充電插座服務外,亦有提供養生湯水、精品花茶咖啡。Aspire Upper Room 亦定期舉辨活動,例如有大專生 Mentorship 計劃等等。收費方式分別有 Credits 收費(Credits Plan)或  按月收費(Monthly Plan),詳請可以去 Apsire Upper Room 官網詳閱。

Andotherspace

Andotherspace 位於中環,場內分為五個區域,靜音區、休閒區、會議室等等。服務亦同以上查上自修室相若,收費方面有按每小時、每三小時、每日、每月計,學生亦有優惠。詳請可以去 Andotherspace 官網詳閱。

圖書館自修室

圖片來源:香港特別行政區新聞公報
圖片來源:香港特別行政區新聞公報
若然覺得喺屋企容易分心,無法專注溫書,小編建議同學可以選擇到附近嘅公共圖書館自修室溫習。環境安靜而且充滿學習氛圍,絕對係一個可以專心溫書嘅地方。同學亦可以免費享用政府嘅 WiFi 以及一個小型嘅工作空間,相當符合經濟效益。不過提提大家每年一到 DSE 或考試嘅季節,各自修室門前定必大排長龍,同學記得要早啲起身排隊等位,雖然溫書時間相對上較少彈性,但亦係一個強迫自己早啲起身溫書嘅方法。
若同學係應屆中學文憑試考生嘅話,不妨等年頭嘅時候申請「學生自修室考試期間入座證」。喺每年嘅三月初至五月初,亦即係各 DSE 考生分秒必爭之時,同學只要喺各入座時段前準時到達,即可憑證 skip-the-line 直接入座,慳翻唔少寶貴時間。
以下係小編嘅自修室溫書心得,可以幫助同學溫習更有效率:
貼士1: 遠離電子產品
雖然自修室有免費 WiFi,但同學唔可以因為咁而去打機、碌 IG、睇片,否則會嘥哂溫書時間,大大降低學習效率。同學喺自修室溫習期間應該將電話關機或者調至飛行模式,專心溫書,直至小休時間先玩 10 分鐘電話。
貼士2: 早啲去霸位 + 帶齊所需物品
霸個靚位置溫書人都精神啲!如果想搵到有海景位、窗邊位、單人位呢啲靚位,記得要盡早出發去霸位唔係就會畀人坐咗㗎啦。同埋計劃咗去自修室溫書,記得前一日要 check 清楚自己有冇帶齊溫書要用嘅嘢,萬一帶漏文具、筆記、Past Paper 到時溫唔到書就唔好啦。
 

社區中心/青年中心/青年廣場自修室

圖片來源:Pixabay
雖然公共圖書館嘅自修室配套完善,一向係不少同學溫書地方嘅首選,但考慮到某啲同學嘅屋企同自修室嘅距離較遠,同學可以考慮去設有自修室嘅大型社區中心丶青年中心或者係青年廣場,慳翻排隊同埋搭車嘅時間。而且大型社區中心滿座嘅情況較少見,同學唔洗擔心要趕住搭車出去自修室排隊,週末亦可以瞓晏少少先再去社區中心自修室溫習,溫書時間更加彈性之餘仲可以享有舒適空曠嘅學習空間。
一般嚟講,同學只要辦理簡單入會手續並繳交會費則可使用。想知道自己地區嘅自修室位置? 可參考教育局嘅社區中心/青年中心/青年廣場自修室名單
 

屋企

圖片來源:Pixabay
出去以上地方溫書,每次溫書之前都要拎一大堆書丶補習筆記同埋文具出嚟「擺陣」,因為所需嘅物品實在太多。但若然同學屋企有一個寧靜舒適嘅私人空間溫書,其實留係屋企溫書都係一個唔錯嘅選擇。一來可以慳翻去圖書館自修室、cafe 嘅行路或搭車時間;二來溫書時間亦更加有彈性,三來屋企有水有糧食、有 WiFi,唔驚肚餓同上唔到網。所以屋企都係其中一個溫習好去處。
唔少同學都會擔心喺屋企容易分心,以下係小編在家溫書嘅小心得,幫你更有效率地溫書:
貼士1: 制定溫習時間表
制定時間表係幫自己好好規劃溫書嘅時間。譬如暑假逢星期一溫中文科,朝早溫 12 篇範文,食完 lunch 就作文同溫綜合能力,然後食晚飯休息。同學應該每一日溫唔同嘅科目,咁就可以平均分配每一科嘅溫習時間。另外休息時間都好重要,溫習時間太長會令到專注力下降,有一段短暫嘅休息時間都可以令溫習效率提高。但同學應記住休息時間不宜過長,否則會變得懶散,提唔起精神繼續溫習。想知點樣規劃一個好嘅備戰溫書時間表?大家不妨入嚟睇下《【DSE溫習時間表】中六備戰時間管理 Time Management 攻略》啦!
貼士2: 避免喺房間溫書
喺屋企溫書最大誘惑就係屋企張床,當溫到有啲攰,見到張床就想瞓覺,點知一起身就已經係夜晚,咁就白白嘥咗同學寶貴嘅溫習時間。 所以千祈唔可以喺睡房溫書!
揀完溫習地方,下一步就可以諗下點樣提升學習效率,想掌握一招可以輕鬆Double學習效率嘅方法就入嚟呢度喇!
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool

AfterSchool 是一個針對DSE而設的網上補習平台,課程涵蓋多個 DSE 科目,讓同學足不出戶就可以享有優質教學。註冊用戶人達 50,000 人,當中超過四分之一學生為應屆文憑試考生,是全港最大型網上補習平台。