「鈴鈴鈴鈴鈴」「放Lunch啦，去邊到食啊？」
中學生返學最期待嘅除咗放學，睇怕就係放Lunch — 每次Lunchtime前個堂，都會設法Ready定一打鐘即刻衝出校口，務求以最快嘅速度去心儀嘅餐廳攞位！
今次小編就帶大家去東區搵食，睇吓有咩又平又正嘅學生餐，西餐、韓燒、台灣菜、泰國菜、印度菜、小食、甜品，咩都有！
【天后區】
1. 高質平價西餐之選｜雅仕餐廳 Cafe Essex
(圖片來源：Instagram @clorisqi)
呢間餐廳嘅西餐Lunch Set有學生優惠，只需要$40-$50就有齊牛扒、意粉/飯/薯菜、餐飲，而且唔會因為你係學生就比少啲你，醬汁都淋到滿一滿個碟咁比你，鋸扒嚟講真係好抵食！而且除咗肉眼扒、豬扒、雞柳等扒餐之外，呢到嘅焗飯質素都非常有保證！
位置嚟講，對於附近學校例如皇仁、庇利羅士、金文泰、張祝珊等等，都好就腳，放Lunch嘅時候慢慢行過嚟，再行返返去都應該唔會遲到，不過Lunch Hour時好多學生嚟食，尤其係最近嘅皇仁學生，甚至有人話呢到其實係「皇仁飯堂」XD，所以要小心嚟到冇位啊！
雅仕餐廳
- 價錢：午市 學生優惠$40-50（正價$60-70）
- 地址：天后琉璃街17號
2. 平價食車仔麵｜鍾記粉麵店 Chung Kee Noodle
(圖片來源：@杜宛樺)
呢間喺天后內街嘅粉麵店係唔少學生食車仔麵嘅首選，因為份量夠多，要乜有乜，餸多麵多，好抵食，不過差在鋪面係細啲，會坐得比較逼，不過食車仔麵就係咁㗎啦，係咪~
鍾記粉麵店
- 價錢：$32兩餸麵，加餸每款$7
- 地址：天后電氣道65號
3. 學生之選人氣甜品鋪｜甜姨姨 Auntie Sweet
(圖片來源：OpenRice @Percytsw)
其實小編以前都係喺東區學校讀，呢間甜姨姨簡直就係小編中學時期嘅回憶，由中一食到中六，就算期間天后開過幾多間新嘅甜品鋪，最常去嘅始終係甜姨姨。通常星期五放學或者附近中學有咩活動完咗，即使鋪頭已經有兩層，學生都會多到逼爆鋪面。
而呢到最出名嘅就係佢嘅「即撞木桶豆腐花」，嚟到嘅時候會比埋個計時器你，記住要夠3分鐘等佢凝固先好開嚟食，咁樣先會夠滑嫩有彈性㗎！
(圖片來源：OpenRice @Percytsw)
除咗豆腐花出名之外，芒果系列嘅甜品都係包無伏之選，例如「芒果大合奏」、「芒果二重奏」等等，學生哥平時去都係嗌呢幾款，夠好味、口感正又唔算貴~
(圖片來源：OpenRice @sophiawong0127 )
而且近年嘅Menu都新加咗好多唔同新花款，例如厚多士、芋圓等，更加新增咗鹹食—咸蛋/咖哩味魚蛋，等大家去到可以試吓新嘢，不過好似小編呢啲老顧客去親嚟嚟去去都係嗌返最經典個幾款糖水~
甜姨姨
- 價錢：$30-60
- 地址：天后清風街13號地下
【北角區】
4. $50學生特價燒烤餐｜高麗韓國餐廳 Korea Restaurant
(圖片來源：Instagram @gladysonon)
Lunch Hour都有得食燒肉真係好幸福，仲要好平好抵$50咋！高麗嘅午市特價燒烤餐比你可以揀一款肉類自己燒，唔想食肉都有墨魚仔、魚柳、秋刀魚揀，全部都係$53！
呢個Lunch Set最正嘅除咗有得燒肉外，仲有就係佢嘅飯、小菜、湯，仲包埋飯後甜品花奶啫喱，豐盛到以為有咩特別Event XD
其實早一兩年，以前天后仲有間分店，就喺雅仕餐廳隔離，不過唔知係咪夜晚冇咩生意就執咗，小編到依家都好懷念中學個陣，衝落去霸位快快手燒完走嘅回憶~
高麗韓國餐廳
- 價錢：午市特價燒烤餐 學生$53（正價$59）
- 地址：北角和富道20-36號明暉大廈1樓
5. 學生「免費餐蛋麵」連飲品｜龍門冰室 Lung Mun Cafe
(圖片來源：OpenRice @mkbowfoodies)
相信香港人對龍門冰室都唔陌生，小編都唔洗多講廢話，喺到就講吓其實早排9-10月，餐廳就推出咗學生免費餐，只要出示有效中學/大專學生證，可以得到免費餐蛋麵一碗連飲品，而且間唔中亦會送其他嘢食比學生，對學生好好，相信幫到好多有困難嘅學生~
而且食物質素有保證，份量足，價錢相宜，係學生哥首選，除咗學生，亦有中年至老年人幫襯，老中青通殺，證明龍門係真．高質！
龍門冰室
- 價錢：$40-60（不定時有學生優惠/免費餐）
- 地址：北角炮台山電氣道254-280號華凱大廈地下I舖
6. 受學生愛戴小店食正宗咖哩｜雙辣屋 Chillie Garden Restaurant
(圖片來源：OpenRice @Cookie28)
呢間食咖哩嘅小店開喺一間好噏耷嘅商場入面，所以如果唔係熟北角基本都唔會唔知有呢間咁正嘅印度餐廳喺到，係小編學生時代另一喜愛食堂！「一人精選午餐」有餐湯、主菜（即揀想食咩肉配咖喱，有牛羊雞豬等）、烤餅/飯、餐飲，小編超鐘意食呢到嘅烤餅，唔會太冧/太脈，有陣特別嘅香草味道，沾埋咖喱汁食超滿足，而且好飽肚~
(圖片來源：OpenRice @Cookie28)
呢到嘅燈光係比較昏暗，配合返印度神秘嘅形象，而且Lunch Hour時候好多人，不論係學生哥還是大人都好鐘意嚟食，所以通常想食就要喺學校衝過嚟攞位啦，而且每次食完返到學校個個都會知你食完雙辣屋，因為食完全身都會好大唚咖喱味XD
雙辣屋
- 價錢：一人精選午餐 學生價$55（正價$65）
- 地址：北角英皇道294號五洲大廈C地下
7. 高質平民化泰國菜｜泰金香小廚 Thai Cuisine
(圖片來源：OpenRice @charmiannn999)
呢間喺城市花園入面嘅泰國餐廳係要上樓梯再過小小先見到，所以都唔多人知，但就好多學生幫襯，小編覺得好食嘅有馬拉盞炒飯、辣椒膏炒飯、蝦膏炒飯、金邊粉、冬陰功等等，尤其係佢嘅炒飯係幾有質素，加上餐廳個啲醬汁就非常perfect。除此之外，餐廳老闆對學生都好nice㗎！
泰金香小廚
- 價錢：$50-$70 星期一至五學生穿著校服減 $3
- 地址：北角電氣道233號城市花園14座1樓94號舖
【西灣河區】
8. $35一大碗抵食海南雞｜海南雞專門店
(圖片來源：OpenRice @sophiawong0127)
一間街坊一定識嘅海南雞店，事因佢夠平夠抵食，$35就有大大碗海南雞飯，雞肉滑嫩，雞皮夠香，而且仲送埋冬瓜粒湯，可以解膩，嗌一碗你正常食量嘅話都一定夠飽，而且加多$13就有得食雞脾；而且聽人講話常客通常會單點雞腎，仲有驚喜！不過小編就唔係好鐘意食內臟冇試過~
海南雞專門店
- 價錢：海南雞飯 $35、海南雞脾飯 $48
- 地址：西灣河筲箕灣道57-87號 太安樓地下A32B舖
9. 小食之選 - 台式脆皮「手抓餅」｜+5ºC 手抓餅專門店
(圖片來源：Instagram @piggingout_diary)
又係一間喺太安樓入面大排長龍嘅小食店，主打手抓餅起家，依家仲賣埋鹽酥雞、大魷魚等：不過最好賣都係最出名嘅手抓餅；餅底煎得脆脆嘅，有淡淡嘅蛋香味，淨餅底$16，另外有20幾款唔同價錢嘅配料比你揀，例如芝士、蘑菇、煙鴨胸等，食完成塊其實都幾飽，所以最好就係同幾個friend一齊嚟就有得share食唔同款啦~
+5ºC 手抓餅專門店
- 價錢：$20-40
- 地址：西灣河筲箕灣道57-87號 太安樓地下A34-B號舖
10. 太安樓必食芋圓｜來來小吃店
(圖片來源：OpenRice @sophiawong0127)
嚟到太安樓搵嘢食，就梗係入太安樓掃街，而呢間喺港島小有名氣嘅「來來小吃店」專賣芋圓糖水，深受附近學生、「上班族」歡迎，成日都排長龍；因為男老闆來自台灣，芋圓地瓜圓都係自家人手製造，味道同口感都好地道，$20-30大大碗都幾抵食，而且依家加入咗仙草、黑糖飲品同甜品，多咗選擇可以食多幾樣，而且質素依然好高，所以即使即場整要等耐少少都值得啦~
來來小吃店
- 價錢：$20-30
- 地址：西灣河筲箕灣道57-87號 太安樓第二街A33B號舖