【E-APP 2024 報名全攻略】申請報讀專上課程前必睇

AfterSchool
AfterSchool 2024-1-2 125,189
E-APP究竟係乜?你又需唔需要報呢?AfterSchool 為你整合 2024 最新版本嘅報名全攻略,即刻了解課程丶截止日期丶交錢等資料。應屆學生嘅你仲唔快啲禁入嚟睇!
臨近 2024 DSE (中學文憑考試 / 文憑試) ,相信各位學生都已經全心投入溫習,努力備戰!但除咗公開試,有一樣嘢學生唔可以忽視⋯就係報課程啦!
有好多同學都只會留意 JUPAS (大學聯合招生辦法 / 聯招) 報讀學士學位,以為只係排完課程優先次序後就唔使擔心,但係絕對唔係架!
有啲學生因為無預先喺 E-APP 報名所以放榜時非常徬徨,四處搵大專排隊報名。就算溫書溫得幾辛苦都好,都要有兩手準備架!
咁 E-APP 究竟係咩嚟呢?報名嘅流程又係點?AfterSchool 就為咗大家準備咗呢份《E-APP 報名全攻略》,助你輕鬆升學!

E-APP 是什麼?

E-APP 係由教育局設立嘅網上報名服務,俾應屆 DSE 嘅考生預先報讀 JUPAS 以外嘅專上課程 (學士學位 及 副學士等)。
E-APP 同 JUPAS 嘅流程都大致相似。同學仔只要喺 E-APP 填妥一份網上申請表,就可以報讀多間院校嘅專上課程。有一啲同學喺 DSE 放榜前就已經收到院校面試嘅通知,甚至可以收到 conditional offer (條件取錄資格) 添。
喺 DSE 成績公布當天,E-APP 同 JUPAS 一樣,會將申請人嘅 DSE 成績從考評局 send 俾你報讀嘅院校,唔駛申請人親自到院校遞交成績,減少不便。除咗 E-APP 外,個別課程同院校都有提供佢哋自己嘅網上報名系統,仲可以親身遞交申請添。但係經 E-APP 一次過報晒梗係方便好多啦。

報完 JUPAS 仲洗唔洗報 E-APP?

Photo by Ben White on Unsplash
Photo by Ben White on Unsplash
有唔少人都會問,「吓,我需要報 E-APP 咩?」。小編認為除非你真係好有自信啦,否則 E-APP 都幾值得報架。對於成績唔錯但係又有啲緊張自己入唔入到U嘅同學仔,E-APP 其實除咗係一個兩手準備外,更係一個定心丸俾你無後顧之憂努力應付公開試!
事關好多時學生喺 DSE 放榜前已經受到 conditional offer,只要達到某個 DSE 成績就可以入學。比起考完 DSE 又要等成績同JUPAS放榜個種忐忑不安,有 conditional offer 喺手感覺會輕鬆好多。
除此以外,對於認為自己未必入到U嘅同學仔,E-APP 絕對可以避免你放榜後東奔西跑只為求一個 Offer 嘅煩惱。只要事前利用 E-APP 登記同報名,就可以輕鬆升學!

E-APP 截止日期

  • 首輪申請 (Main Round):2023年12月7日 - 2024年5月20日
  • 次輪申請 (Second Round):2024年5月24日 - 2024年7月8日
各位要睇清楚highlight咗嘅截止日期,唔好過 deadline 啊!如果未過嘅話,就趕緊把握時機報名啦~

E-APP 報名流程

1) 你符合收生成績同要求嗎?
每個課程嘅要求同收生成績都唔一樣,但係普遍嚟講,差唔多全部都係同一個入學門檻。 如果希望報讀學士學位,你必須達到「332A22」要求 (中英數至少有 Level 3、公民與社會發展科達到合格 A 的成績、1-2科選修科至少有 Level 2);而如果你想報讀副學士,就要有至少 222A2 嘅成績。
2) 了解課程資料
報名前梗係了解下啲學位課程先啦!同學仔可以按此進入 E-APP 課程搜尋網頁,然後可以根據你鍾意嘅院校丶學習範疇 同 課程類別搵適合你嘅課程。
3) 建立 E-APP 帳戶
了解課程資料後,你就可以按此進入E-APP系統頁面,並按「建立帳戶」。
輸入個人資料丶用戶名稱 同 密碼後,你會收到確認 email。打開 email 確認申請後就可以 login 登入架啦~然後,您需要繼續輸入更多個人資料同授權 E-APP 同院校分享資料。
4) 提供校內成績
你之後需要提供你嘅中學資料,同埋你中四至中六嘅考試成績。同埋你要準備中四、中五及中六嘅考試成績表,以PDF檔案形式上載。如果無嘅都唔緊要,可以遲啲先upload~
5) 填寫比賽或活動的經驗及成就 (OEA) 同 學習概覽 (SLP)
之後就係填 OEA 同 SLP,呢啲資料之前填 JUPAS 都應該有準備所以都係直接抄返就可以~最緊要就係記得上載你嘅 SLP 檔案,PDF/JPEG 檔案都可以。
6) 過往的公開考試成績 (如有)
如果你曾經參加其他嘅公開考試,你都可以寫埋架。無論係香港中學文憑考試成績 (HKDSE) 或 香港中學文憑考試以外嘅其他考試成績都可以。
如無嘅話,你要剔選「我沒有過往香港中學文憑考試成績」同「我沒有香港中學文憑證書檔案/我會稍後上載」。
7) 確認申請
去到開帳戶嘅最後一步啦!只要睇清楚資料冇問題就可以確認資料。系統會俾一個申請人編號你,之後你就可以進入報讀課程嘅頁面。
8) 報讀E-APP課程
去到報讀課程嘅頁面後,你可以㩒左邊嘅「報讀課程」開始。
您可以搜尋你之前睇過而且有興趣嘅課程,之後㩒課程名稱左邊嘅 「+」加號 選擇課程。揀好後就可以㩒「下一步」排好優先次序,再㩒「遞交」。見到綠色字「已遞交」就搞掂架喇!恭喜~ 
9) 畀錢!
E-APP 嘅服務係免費嘅,但係唔同院校有唔同嘅申請費同報名費。以 HKU SPACE Community College 為例,每一個申請本地學生需要交HK$150,非本地嘅就要HK$500。同學仔要喺個別嘅院校網站check清楚啦~ 小編為咗方便大家,係下邊整咗個表可以參考下,入邊有熱門院校嘅基本資料,可以入嚟睇下。

有關登記 E-APP 嘅常見問題

Photo by Curtis MacNewton on Unsplash
Photo by Curtis MacNewton on Unsplash
1. 我可唔可以同時申請 JUPAS?
可以,E-APP 同 JUPAS 係分開嘅報名系統,E-APP 係唔會影響你嘅 JUPAS 申請。
2. 首輪申請 (Main round) 和次輪申請 (Second round) 有咩分別?
無咩分別,只係院校會優先處理首輪申請嘅申請先。但係亦有一啲院校表示只有 Main round 先有 conditional offer。為咗避免課程已經達到收生要求,記得早啲申請啦。
3. 有無申請嘅數目上限?
E-APP 無數目上限,但係個別院校可能會有。
4. 幾時知結果?
每一間院校都有唔同嘅公布結果日期,所以要問返佢哋~
5. 我錯過咗 E-APP 嘅 deadline!點算?
唔駛擔心,你仲可以嘗試去個別院校查詢。有一啲院校提供「放榜後剩餘學額」俾本地嘅應屆學生。
小編建議你即刻打電話去心儀院校嘅office問下入學資料啦。
6. 假如收到有條件取錄( Conditional Offer )需要交留位費,我應該交幾多個課程?留完位之後會唔會影響到 JUPAS ?之後仲可唔可以報其他課程?
首先,一般而言每個課程嘅留位費約為 5,000 元至首期學費不等,我哋建議每一個學生只需要留一個課程嘅位,畢竟每個人同時間只係讀到一個課程,留幾個位只會浪費金錢!所以喺留位之前,請考慮清楚自己係咪真係想讀呢個課程啦。

其次,留任何課程嘅位,包括自資學士、副學士、高級文憑或基礎文憑等,都唔會影響到 JUPAS 嘅收生,而假如你未來被政府資助課程( UGC-Funded)取錄嘅話,更可以憑取錄證明到原先留咗位嘅學院申請退還留位費!不過記得只有被 UGC 課程取錄先可以申請退款,其他課程係唔得㗎!

最後,縱使你已經俾咗某個課程嘅留位費,其實你都仲係可以申請其他課程及留位,不過正如上述所講,每個人同一時間淨係可以讀一個全日制課程,所以最好都係俾留位費之前仔細考慮清潔先,免得浪費金錢啦!

熱門院校申請資訊概覽

資料只供參考,所有資料以院校官方網站資料為實

所有參與 E-APP 嘅專上院校

大學 或 旗下專上學院

其他專上學院

唔知我哋整嘅《E-APP 報名全攻略》有無幫到你呢?小編喺度祝大家可以順利升學!搞掂報名嘅麻煩嘢就可以放心溫書啦~ 想知 DSE Past Paper 點出?即刻去 AfterSchool 整嘅《【全港最齊】歷屆 DSE Past Paper 資源庫 》啦!
以上資料只供參考,詳情一切以各院校網站資訊作準。
其他DSE資料庫
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool

AfterSchool 是一個針對DSE而設的網上補習平台,課程涵蓋多個 DSE 科目,讓同學足不出戶就可以享有優質教學。註冊用戶人達 50,000 人,當中超過四分之一學生為應屆文憑試考生,是全港最大型網上補習平台。