【U Life迷思】個嗰都話上莊，上莊係咪真係想像中咁正？

大學五件事有: 上莊、搵補習、讀書、住hall、拍拖。大學五件事之一嘅上莊，亦即係指擔任學會內閣嘅幹事，為學會嘅基本會員服務，例如 marketing society 嘅「基會」就係 marketing major 嘅同學，上莊會定期籌備活動及聚會等等。有人話呢件事好熱血，識到一班 friend，唔上莊就唔算享受 U Life。上莊嘅好處上次已經話過比大家知，今次就話你知上莊究竟有啲咩「辛酸史」，希望你可以諗清諗楚，好好衡量先再決定自己 hand 唔 handle 到上莊。

上莊真係好需要錢，雖然學校係會 claim 番，但係 budget 有限，有啲要自己俾，再加上如果枝莊嘅財務秘書無寫好份 financial report，分分鐘到你畢業嗰日都 claim 唔番啲錢。如果係一兩千可能都無咩嘢，而事實係講緊萬萬聲，好似搞 ocamp 咁，你就要同莊員夾萬幾蚊出嚟落訂 book camp site，買 souvenir。如果最後唔夠人參加，導致蝕錢，係要自己硬食。一年莊期搞好多唔同嗰活動，洗費真係好大。

上莊係需要投放大量時間，唔好話上堂，見屋企人、朋友，就連沖涼瞓嘅時間都無。因為你要籌備唔同活動，準備功夫唔少，例如 Inaug (就職典禮)，你除咗要彩排，佈置場地，請嘉賓外，仲要準備好多宣傳品，例如巨型展板，單張，紀念品，宣傳片...由設計到製作，都幾費時。所以好可能要經常留係學校，同莊員一齊 chur。所以，上莊嘅你應該好快會戒咗瞓覺呢個習慣。

我諗依個唔駛多講，因為所有嘅心血都放曬係莊務，走堂已經係家常便飯。溫書做 assignment 嘅時間都唔會多，就算有時間，通完頂嘅你都溫唔到啦，就算你真係超人，有精神溫，走咗咁多堂都好難 catch up 番。出席率低，assignment無交齊，考得差導致最後嗰 GPA... 正常大學生希望自己過 3 爆 4，上莊嘅同學希望自己過 1 爆 2。

大家有無聽過俗稱 con day 嘅資訊大會？就是一個比候選內閣好好向現莊，甚至畢業嘅老鬼「學習嘅機會」。屆時，一班有經驗嘅舊莊員就會滔滔不絕咁分享佢哋以前嘅經驗，同埋，毫不留情咁指出你枝莊有咩問題。好多時候，佢哋都係為鬧而鬧，提出一啲超現實嘅建議及無理嘅指控。唔知大家有無聽過幾年前，城大反檯一事？未聽過嘅可以睇吓下面條片，相信大家就會有多啲體會。

Ocamp 對好多 freshmen 嚟講可謂一場盛事，其實對於上緊莊嘅同學都同樣重要，因為佢哋 ocamp 搞得好唔好，同佢哋有無下莊有好大關係。雖然有好多人都話想上莊，但係當了解到上莊有幾 chur，最後肯上莊嘅同學其實唔多，有啲學會更可能因為想上莊嘅同學meet唔到一枝莊 minimum 人數，而導致斷莊。如果不幸斷莊的話，現莊就要再搞多年活動，再 chur 多一年啦，所以每一個上莊嘅同學都會為有無下莊而擔心，為搵下莊而頭痛。

仲想知道多啲關於大學五件事嘅傳聞？！咁就要睇下《【大學五件事】香港大學生必做？》啦！