【U Life迷思】嗰嗰都話上莊,上莊係咪真係想像中咁正?

有心無力
有心無力 2020-1-23 4,645

大學五件事有: 上莊、搵補習、讀書、住hall、拍拖。大學五件事之一嘅上莊,亦即係指擔任學會內閣嘅幹事,為學會嘅基本會員服務,例如marketing society嘅「基會」就係marketing major嘅同學,上莊會定期籌備活動及聚會等等。有人話呢件事好熱血,識到一班friend,唔上莊就唔算享受U Life。上莊嘅好處上次已經話過比大家知,今次就話你知上莊究竟有D咩辛酸史,希望你可以諗清諗楚,好好衡量先再決定自己hand唔handle到上莊。

1.錢

上莊真係好需要錢,雖然學校係會claim番,但係budget有限,有D要自己比,再加上如果枝莊嘅財務秘書無寫好份financial report,分分鐘到你畢業嗰日都claim唔番D錢。如果係一兩千可能都無咩嘢,而事實係講緊萬萬聲,好似搞ocamp咁,你就要同莊員夾萬幾蚊出嚟落訂book camp site,買souvenir。如果最後唔夠人參加,導致蝕錢,係要自己硬食。一年莊期搞好多唔同嗰活動,洗費真係好大。

2.時間

上莊係需要投放大量時間,唔好話上堂,見屋企人、朋友,就連沖涼瞓嘅時間都無。因為你要籌備唔同活動,準備功夫唔少,例如Inaug (就職典禮),你除咗要彩排,佈置場地,請嘉賓外,仲要準備好多宣傳品,例如巨型展板,單張,紀念品,宣傳片...由設計到製作,都幾費時。所以好可能要經常留係學校,同莊員一齊chur。所以,上莊嘅你應該好快會戒咗瞓覺依個習慣。

3.爛grade

我諗依個唔駛多講,因為所有嘅心血都放曬係莊務,走堂已經係家常便飯。溫書做assignment嘅時間都唔會多,就算有時間,通完頂嘅你都溫唔到啦,就算你真係超人,有精神溫,走咗咁多堂都好難catch up番。出席率低,assignment無交齊,考得差導致最後嗰GPA...正常大學生希望自己過3爆4,上莊嘅同學希望自己過1爆2。

4.受氣

大家有無聽過俗稱con day嘅資訊大會?就是一個比候選內閣好好向現莊甚至畢業嘅老鬼學習嘅機會。屆時,一班有經驗嘅舊莊員就會滔滔不絕咁分享佢哋以前嘅經驗,同埋,毫不留情咁指出你枝莊有咩問題。好多時候,佢哋都係為鬧而鬧,提出一D超現實嘅建議及無理嘅指控。唔知大家有無聽過幾年前,城大反檯一事?未聽過嘅可以睇吓下面條片,相信大家就會有多D嘅體會。

https://www.youtube.com/watch?v=zGDIRTQ-xWY

5.搵下莊

ocamp對好多freshmen嚟講可謂一場盛事,其實對於上緊莊嘅同學都同樣重要,因為佢哋ocamp搞得好唔好,同佢哋有無下莊有好大關係。雖然有好多人都話想上莊,但係當了解到上莊有幾chur,最後肯上莊嘅同學其實唔多,有D學會更可能因為想上莊嘅同學meet唔到一枝莊minimum人數,而導致斷莊。如果不幸斷莊的話,現莊就要再搞多年活動,再chur多一年啦,所以每一個上莊嘅同學都會為有無下莊而擔心,為搵下莊而頭痛。



仲想知道多啲關於大學五件事嘅傳聞?!咁就要睇下《【大學五件事】香港大學生必做?》啦!

免費 DSE 電子報
定期為 30,000+ 中學生送上實用 DSE 資訊和資源
有心無力

有心無力