【DSE VA】 VA操卷、前期準備大揭秘，仲有歷屆題目庫！

DSE修讀VA嘅同學仔可能會覺得視覺藝術呢一科網上嘅資源好少，甚至連題目都會搵唔到。所以今日，我呢個AfterSchool嘅小編過來人嘅身份為大家寫咗一個「文憑試視覺藝術科」懶人包，由認識DSE VA開始，去到應試前要帶啲咩工具，最後教埋你點樣操va卷，一步一步幫你準備DSE VA！

1. 認識VA DSE
2. DSE VA 卷一 視覺形式表達主題—Painting卷
3. DSE VA 卷二 設計—Design卷
4. DSE VA SBA 校本評核
5. 有關視覺藝術科應試嘅3個常見疑問
6. DSE VA 歷屆題目 2012 - 2019
7. 小結

1.     認識DSE VA

無論你喺啱啱修讀視藝嘅中四學生、已經忙緊做SBA作品集嘅中五生，或者係仲有一個月就打頭陣考VA嘅中六學生，小編相信你哋都會覺得視覺藝術可以話係最唔穩定嘅一個選修科，由喺考場嗰一刻可能會受臨場表現影響，考完之後份作品去到考官度仲要考慮埋佢嘅主觀感受（運氣）等等嘅因素都令到你嘅DSE VA成績「危危符」。再加上Visual Arts唔似其他科有咁多網上資源比咁多位同學仔討論，所以如果你有心想考好VA嘅話，真係要特別比心機做足功課！

DSE VA成績比重

第一步就當然係要知道DSE VA成績嘅比重，咁先可以好好咁做好時間分配。先由兩大部分佔分比重講起：

• 公開考試 50%
• 校本評核（SBA, School-based Assessment） 50%

SBA方面，小編記得自己喺中四下學期開始準備自己嘅作品集，做到中五升中六嘅暑假（都好似未做完？），不過佢佔VA足足一半分數！花多啲時間都唔過分！特別要注意嘅係part b𠴱度，你四份作品（藝術作品／評賞研究）都係估成個DSE VA 30%，但係單單一本workbook（研究工作簿）就佔咗20%！經常有同學忽略workbook，以為努力做好藝術作品就得，點知原來你workbook嘅佔分都好重，同學做作品時記住記住記住留過程相！唔係就翻唔到轉頭㗎喇！

DSE應試𠴱方面，無論你係揀Paper1（視覺方式表達主題）定係Paper2（設計），乙部都盡量畫多啲。甲部評賞𠴱方面，記住做多啲練習！做一次評賞練習都係45分鐘，好快姐！

作為一位VA學生，你應該要知道每年嘅考生人數同埋成績比率，方便自己學師！呢個係咩意思？考評局2019考評報告就指出2019 DSE報考VA嘅同學仔只得3475人，而2019成績統計就話比我哋知，視藝拎到5**嘅同學仔只有0.8%，即係一年得27個人攞到，所以如果你認識有人係VA 5**嘅話，試下問佢攞多啲意見！

 

2.     DSE VA 卷一 視覺形式表達主題 — Painting卷

DSE VA卷一事前準備：

1. 本身對畫畫有興趣嘅話，閒時多啲睇畫畫論壇/網站，例如Pixiv，DeviantArt，ArtStation，CGSociety，呢一類嘅平台都會比人上載自己嘅繪圖，睇得多嘅話對自己審美觀有大大嘅幫助！畫畫講求無盡嘅練習同技巧，但有好多人都唔知，要畫一幅好畫，審美觀絕對係一樣唔可以缺少嘅元素！
2. 簡單嘅視覺評賞練習：想分辨作品嘅水平係好定壞？去睇下唔同平台嘅作品，講出作品優缺點。
   eg DeviantArt上面嘅好多人放電腦繪圖，但用色好污糟
   想要啲更藝術嘅講法？→ 彩度過高（熒光色），配色唔和諧（對比色，熒光色，灰色）
   原因？→ 可能係筆刷數值（混色）問題 / 非常唔成熟嘅灰階上色法/ 審美觀未成熟，唔識思考配色 / 整體畫面色調
   解決方法 → 試吓用唔同數值嘅筆刷 / 練習/ 邀請外人比意見（例如擺上呢啲分享平台）/ 買配色指南直接用配好嘅顏色。

3. 藝術評賞方面，好多人都對藝術史、藝術評賞用詞好少認識，覺得好難入手。如果你真係頗hardcore（好似我咁），可以買本類似《500幅你不可不知嘅世界名畫》慢慢刨。如果你覺得都係太悶（例如我），現時市面上有啲作者會用講故事嘅形式，將藝術家生平同佢嘅作品貼地又輕鬆幽默咁分享岀黎，就算你睇完都係唔記得名畫要點鑒賞，至少可以記個有趣嘅故仔，用落去中文作文丫！
   例如杜勒無睇過犀牛實物就整咗《犀牛》呢福版畫，仲要賣咗過千幅出去，到好耐之後人們先發現呢隻《犀牛》其實係畫錯咗，呢個故事教訓我哋唔好輕信所謂專家所言，眼見未為真，要fact check啊~
   

操卷實戰：

1. 文憑試時間分配：用15-20分鐘起草稿絕對係值得，畢竟清晰嘅構圖同輪廓線可以省卻之後上色後再勾線嘅麻煩，但如果你平時起草稿要30分鐘就要調整時間分配，注意虛實！
2. 之後就好睇每個人嘅風格，我比較善用筆觸，唔會係一個地方花太耐時間，如果你鐘意好仔細咁畫就要注意喺視覺焦點先仔細畫！一般例如重點，中央位置，人臉都值得詳細畫，你都可以問下你視藝老師嘅意見。

臨場裝備：

1. 參考書，呢啲喺我嘅書單，都係好實用嘅參考書

 

2. 十二色塑膠彩一盒、大樽塑膠彩紅黃藍白各一支、調色盤 / 雜誌紙、水杯、一set畫筆、鉛筆刷膠刨筆機等等，唔同顏色嘅勾線筆（通常唔需要）
3. 2019題目比較有趣（ie 辣辣的直線在旋轉、上課時，突然爆水管！），雖然唔肯定往後題目走勢，但同學可以盡情發揮創意！不過構圖一定要靚啊！

 

3.     DSE VA 卷二 設計 — Design卷

DSE VA卷二事前準備：

1. 有人話考設計嘅好處係包你合格但難高分，咁想攞高分可以點？讀緊Poly Design嘅同學表示最好喺幾個題目入面排定一個優先順序，平時睇資料嘅時候就集中喺嗰個題目（eg Fashion design/ Package design），可以睇pinterest，search creative package design，睇HOKK fabrica等等專係為文青、「藝術家」嘅網上Blog。
2. 雖然Design卷嘅評賞唔駛睇咁多幾個世紀前嘅畫，不過唔代表完全唔駛做功課架！可以嘅話，平時多啲睇新聞，喺生活入面發掘一啲新奇有趣嘅設計再記喺個腦入面！
3. 入考場已經唔會有時間睇參考書，如果應考嘅時候要用到書嘅話，記得喺DSE前睇曬表現手法同構思，之後Label備用。
4. Marker、色卡必須準備齊全
5. DSE前準備好百搭配色，或者帶配色書入場， 例如可以試下薑黃色加藍色用咩色號，溫柔嘅pastel色系應該用咩色號。
6. 試埋唔同材質嘅表現手法，eg半透明嘅紗、金屬、玻璃等等，方便你入考場即刻諗到用點樣嘅手法表現。

操卷實戰：

1. 比例好重要！比例好重要！比例好重要！草稿唔可以懶，幾何圖形一定要畫得好好睇睇。
2. ps 有指Fashion通常比較難攞高分

臨場裝備：

1. 痴滿Label嘅參考書
2. 好大盒marker（100色以上） 、乾粉彩（12色）、木顏色（越多色越好，油性/水溶）、水彩、勾線筆（0.05、0.1、0.2、Brush頭）
3. Marker同木顏色畫細野，水彩/乾粉彩係喺畫大面積用，針筆之類描線工具可以喺畫完之後再係外面框多層。
4. Notes買一頁頁透明可以入落去12蚊店嗰種嘅file😂然後大概分下啲notes係咩topic咁

 

4.      DSE VA SBA 校本評核

VA SBA事前準備：

1. 好多樽咖啡
2. 堅毅不屈嘅心

操卷實戰：

1. 成日趕deadline，通頂，通好多晚頂，頂峰時期一星期有三四日都凈喺瞓三四個鐘就翻學，仲要留堂，樓下有社籃無得落去睇凈係可以聽聲都係常事……
2. 評分嗰個係你嘅學校老師！一定要聽實你老師所講嘅嘢，跟足老師嘅Instruction，要經常性唔好怕麻煩咁問老師你做嘅步驟啱唔啱規矩，問得越詳細越好，希望老師比埋努力分你……
3. 任何步驟都要留過程圖供之後做Workbook（研究工作簿）。
4. 大原則係清晰、唔Hea做、盡力、一步一步跟足老師比你嘅程序做（來自Workbook 20分全取嘅小編），其他就每個人嘅風格都唔同，隨緣啦~
5. 

 

5.      有關視覺藝術科應試嘅3個常見疑問

① 到底我可以帶咩參考資料或者素材入試場？

考生手冊係咁寫嘅
❌ 不可使用物品 ：
英文及中文字典（包括字典摘錄）、慢乾性材料（ 如：油畫顏料）、慢乾劑、危險性物料（如：罐裝噴漆、噴筆、噴裝固定液等）、火燒及煙薰技法的器材。

✅可使用物品 ：
卷一
繪畫用的美術材料及工具（如：鉛筆、畫筆、顏料、調色碟、畫板、夾、圖釘、擦膠、膠貼條、紙張等）、少量拼貼材料、參考資料（如：書本、雜誌、美術字典 等）。

卷二
設計用的材料及工具、器材及輔助用品（如：鉛筆、畫板、顏料、調色碟、尺、畫板、夾、圖釘、圓規、膠擦、色（貼）紙、現成移印紙 字、移印版等）、拼貼或剪貼技巧的材料、參考資料（如：書本、字體樣本的書籍、雜誌、搜集簿、美術字典等）。

② 我跟住參考資料嚟畫嘅話會唔會被報告抄襲？

其實呢方面嘅資料真喺好模糊，但係同學仔可以參考呢篇2018年11月嘅新聞《DSE視藝佳作被指侵權　涉事考生：二次創作非抄襲》

③  學校老師SBA評分偏頗點算？

校本評核分數會參考專家判斷而調整。過程中，學科專家按相同的評核準則進行檢視。因此，即使學生的校本評核是由不同老師所評核，他們經調整後的校本評核分數是可比的。再者，如果你真喺有非常充足嘅理由，可以考慮同考評局作出投訴。

 

 6.       DSE VA 歷屆題目 2012 - 2019

• 2019 DSE VA 題目

  • 《辣辣的直線在旋轉》
  • 《人體與數碼世界的結合》
  • 《上課時，突然爆水管》
  • 《山潤月色》
  • 《門裏門外》

• 2018 DSE VA 題目

  • 《震動的三角形》
  • 《魔幻地圖：由家到學校》
  • 《六個攀山的少年》
  • 《快樂充滿了我們的美術室》
  • 《海灘、海龜、潛艇與油污》

• 2017 DSE VA題目

  • 《紅葉森林鳥爭嗚》
  • 《從旋轉木馬出走的馬匹》
  • 《寒夜街道的行人》
  • 《在畢業典體上，我遇到從前和未來的我》
  • 《立體迷宮》

• 2016 DSE VA題目

  • 《舞臺上的一群舞者》
  • 《盛宴過後的餐卓》
  • 《一個英雄的悲哀》
  • 《一條荒廢的村莊》
  • 《正負空間》

• 2015 DSE VA題目

  • 《顏色與形狀的對話》
  • 《一個在花店發生的故事》
  • 《驟雨中的鬧市》
  • 《飛鳥對籠鳥》
  • 《一個興建中的人造島》

• 2014 DSE VA題目

  • 《遊記》
  • 《自畫像》
  • 《烏托邦》
  • 《魚在唱》
  • 《生命樹》

• 2013 DSE VA題目

  • 《天和地》
  • 《居往空間》
  • 《家庭》
  • 《好玩》
  • 《愛》

• 2012 DSE VA題目

  • 《流動的風景》
  • 《空間無限》
  • 《寵物與我》
  • 《自由與約束》
  • 《我有一個夢想》

 

7.      小結

雖然DSE揀VA嚟讀真係一件幾辛苦嘅事，但咁多位同學仔可以咁諗：中四中五做SBA係攰啲嘅，但最後考DSE嘅時候可以溫少一科，其實壓力真係細好多！在此祝各位VA考生運氣爆發，DSE咁啱出中你擅長嘅題目！做SBA嘅同學仔亦都要加油啊！