唔少香港家長喺幼稚園、小學、中學選校嘅時侯都會對國際學校情有獨鐘，而國際學校每年嘅學額都供不應求。為人父母永遠都想俾最好嘅嘢仔女，而吸引一眾家長即使爭崩頭都要仔女入去國際學校讀書嘅當中一大原因係因為俾國際學校嘅雙語學習環境吸引。但每間國際學校都各有特色，睇到眼花暸亂唔知應該揀邊間好？小編今日就為大家整合咗有關本港國際學校嘅資訊，睇落去一定幫到你！
目錄
香港國際學校入學條件
國際學校主要係外籍人士嘅仔女，不過好多都歡迎本地學生申請。但如果想喺國際學校讀書，家長就要特別留意小朋友嘅英語能力，因為唔少國際學校都期望自己嘅學生不論係國際生定係本地學生嘅英語能力要接近流利(native)。為咗測試面試學生嘅英語水平，大部份嘅國際學校都會有英文入學筆試同即場面試，學生必須要通過咗先可以入讀，所以家長幫仔女報讀國際學校嘅時候要特別留意同儘早要訓練吓佢哋嘅英語水平啦。
英文能力固然重要，但家長同仔女都要留意翻每間國際學校各自嘅收生要求甚至係優先取錄條件。例如耀中國際學校，如果有兄弟姐妹喺耀中就讀或者係耀中校友嘅仔女，都會有被優先取錄。而某啲國際學校都會有地域收生要求，就好似沙田學院要求學生要居住喺新界同少部份九龍地區，住喺港島嘅家長就可能要另覓一間心儀嘅學校啦。
香港國際學校招生程序
唔少國際學校都有自己一套嘅收生時間表，當中主要會分咗循環招生同下一學年招生。循環招生一般係指全學年只要有任何年級有空餘學位，都會接受入學申請同進行分班測試或者面試（如啟歷學校同弘立書院），如果通過咗就可以入學啦〜
而新學年招生亦都係國際學校最常見嘅收生方法，就好似英基學校協會(ESF)，新學年將會喺9月接受入學申請 (留意翻Grade1同Grade7報名同截止日期都有唔同㗎)，並會喺10月截止報名，如果逾期申請嘅話更加會排喺輪侯名單(waiting list)。要特別留意有啲國際學校更加係唔會接受逾期申請㗎，唔小心錯過咗報名日子就唔抵啦！
雖然唔同學校都會有自己一個嘅收生日程，但一般都係跟以下嘅時間，家長記得要密切留意心儀國際學校嘅網頁啦。
| 9月至11月 | 接受申請及截止 |
| 12月至3月 | 面試及測試 |
| 3月至4月 | 公佈結果、交訂金/留位費 |
國際學校學制
唔少家長喺揀國際學校嘅時候都唔喺好清楚唔同學校所行嘅學制，而且都會對入學年紀同國際學校銜接嘅年級有所疑惑㗎！其實香港國際學校所行嘅主流學制有英國、美國同加拿大。行英國學制嘅學校要五歲先可以就讀一年級，而中學會讀七年，所以由小學到讀完中學一共要十三年。而行英國學制嘅國際學校都有分唔同考試類型㗎，例如公開試考IBDP（亦稱IB）嘅有英基、德瑞國際學校等；亦都有國際學校會考A-Level例如啟歷國際學校。
而美國同加拿大學制同香港學制一樣都係要六歲先可以讀一年級，小學同中學一樣都要讀十二年。美國學制考嘅考試類型係SAT，而行呢個考試制度嘅學校有香港國際學校、基督教國際學校；行加拿大學制嘅國際學校主要會行OECD同Alberta，而行呢兩個考試制度嘅學校例子分別有地利亞加拿大學校同宣道國際學校等等。家長喺揀國際學校嘅時候記得要考慮埋佢哋嘅學制同入學年紀呀！
2024年度9月入學適齡表
| 學生年齡 | 英國學制 | 美國/加拿大學制 | 香港學制 |
| 三歲至四歲 | 幼稚園 | 學前班 | 幼稚園中班（K2） |
| 四歲至五歲 | 一年級 | 幼稚園 | 幼稚園高班（K3） |
| 五歲至六歲 | 二年級 | 一年級 | 小學一年級 |
| 六歲至七歲 | 三年級 | 二年級 | 小學二年級 |
| 七歲至八歲 | 四年級 | 三年級 | 小學三年級 |
| 八歲至九歲 | 五年級 | 四年級 | 小學四年級 |
| 九歲至十歲 | 六年級 | 五年級 | 小學五年級 |
| 十歲至十一歲 | 七年級 | 六年級 | 小學六年級 |
| 十一歲至十二歲 | 八年級 | 七年級 | 中學一年級 |
| 十二歲至十三歲 | 九年級 | 八年級 | 中學二年級 |
| 十三歲至十四歲 | 十年級 | 九年級 | 中學三年級 |
| 十四歲至十五歲 | 十一年級 | 十年級 | 中學四年級 |
| 十五歲至十六歲 | 十二年級 | 十一年級 | 中學五年級 |
| 十六歲至十七歲 | 十三年級 | 十二年級 | 中學六年級 |
滑動查看更多
國際學校學額
隨著家長對於國際學校嘅需求不斷咁上升，學校學額嘅競爭都非常激烈。其實唔少國際學校都會加開學額，截止 2022/23 年數據，國際學校中小學嘅學額合共有 45587 個，當中中學係有 20864 個，而每一間學校的位置都不一樣嘅，家長要睇翻心儀學校每一年調整嘅學位數量啦。
學費同債券制度
相信唔少家長都有聽過要讀國際學校除咗每年都要交學費同留位費之外，係要買佢哋機構嘅私人債券/企業債券/本金券去作為優先取錄機會，咁係因為大部份嘅國際學校都係以私人機構營運，係冇接受任何政府的資助嘅，所以發行債券係為咗學校基建或發展新課程項目而自行籌資之用。但要留意每間國際學校嘅收費形式同政策都會有所不同，例如債券嘅價錢、係咪可以喺二手市場轉手、債券係咪可以歸還、變賣債券嘅利潤係咪要同學校對分等等。家長亦要注意買咗債券唔代表校方一定會錄取學生而可能只代表會優先考慮仔女，所以家長喺買債券之前記得要好好衡量自己嘅經濟能力呀！其實本港仲有好多國際學校唔需要買債券而只係考慮入學成績，名聲都唔錯㗎，家長㩒落去「全港國際學校比較」就可以知得一清二楚啦！
香港十大國際學校排名
（排名以公開試成績大約評估）
德瑞國際學校
德瑞位於太平山，分別設有幼兒教育、小學、同中學。德瑞都係行英國學制，提供英國式同德國式教育，不過就係考 IB，而德瑞嘅 IB 成績十分之優異，喺 2021 年公開試成績當中，學生 100％ 合格，並且有 7 個學生攞到 45 分滿分，所以唔少學生都可以考入名牌大學，令到德瑞一直成為國際頂級 IB 學校。詳情查閱學校網站。
法國國際學校
法國國際學校位於灣仔跑馬地，提供幼兒教育至十二年級的課程。佢有得揀考 IB、IGCSE、DNB同 BAC 考試體制嘅學校，2021 年成績當中，考生係 IB 同 IGCSE 入面都獲得 100% 合格率，IB平均分係 37.8 分，而 IGCSE 更加有超過9成人有A*-C嘅成績添！
滬江維多利亞學校
滬江維多利亞學校係位於香港仔，提供幼兒教育至十二年級的課程，同大部份國際學校一樣都係行IB制，而且公開試成績都好頂尖，2021 年 IB 成績入面有 3 位同學考獲滿分 45分，2 位同學考獲 44 分。
而滬江維多利亞學校係全香港第一間取得國際文憑小學、中學同埋預科項目認證嘅「 一條龍 」國際學，唔少家長都會慕名而幫小朋友揀呢個學校。而且呢間學校亦好注重雙語教學，每一堂都會有兩位老師，一位負責英語教學；一位用普通話授課，所以同學仔嘅語言能力都係十分之好嘅！詳情查閱學校網站。
沙田學院
沙田學院位於火炭，佢係英基學校協會旗下一學校，而只係提供中學程度課程，同其他英基學校一樣都係行英國學制同考IB、IGCSE制。而佢地每年嘅IB成績都非常標青，係2021年公開試成績入面係足足有8個45分狀元，成績認真犀利！
漢基國際學校
漢基國際學校校址位於北角寶馬山校園徑1號，設有幼稚園、小學及中學部。而同其他國際學校唔同，漢基更為注重中國語言同中華文化教學，全校學生由小學到中學課程都要學習中英雙語，統一接受普通話同英語訓練，不過學校會提供一定嘅幫助，即使係無中文學習背景嘅學生一樣可以申請㗎。
香港李寶椿聯合世界書院
香港李寶椿聯合世界書院位於馬鞍山，而呢間學校只係提供中學課程，全校只係得兩級㗎咋，採用嘅考試制度都係IB，並且成績一向都好標青，2021年畢業生更加係有唔少入讀咗劍橋、香港大學同其他Ivy Leagues嘅大學㗎！
而李寶椿有多元化嘅學生背景同組合，學生來自全球80個國家，加上佢哋班級人數好少，一斑通常平均大約有16人，可以令到學生可以深入對世界上唔同文化。另外，李寶椿作為一間寄宿學校，老師同學生都係住喺校園入面，可以訓練學生獨立生活。詳情查閱學校網站。
弘立書院
弘立書院中學部位於薄扶林，一間以中西文化合璧嘅國際學校，提供一至十二年級的課程，主要係以普通話及英語沉浸式教育。弘立都係一間行IB考試體制嘅學校，2021年成績當中，考生獲得100% 合格率，平均分係40分仲有三位同學攞到得 45滿分佳績添！
哈羅香港國際學校
香港哈羅係2012年建校位於屯門掃管笏，係第一間提供宿位嘅寄宿學校，學生可以由幼稚園K3讀到十三年級(Grade 13)，不過要去到六年級(Grade 6)先可以寄宿。哈羅亦都係一間行英國學制同考試制度嘅國際學校，喺九年級(Grade9)至十一年級(Grade 11)會先考咗IGCSE；而十二年級(Grade 12)到十三年級(Grade 13)就會考A-Level。
哈羅近年公開試成績十分優異，喺舊年A-Level成績入面超過6成同學有A*-A成績，而9成同學仔都考到A*-B成績，有5位學生更加係俾劍橋收咗添！作為全球四間哈羅分校之一，教學質素有一定保證㗎！詳情查閱學校網站。
香港加拿大國際學校
香港加拿大國際學校位於黃竹坑，提供幼兒教育至十二年級的課程。佢哋行嘅係加拿大學制，而特別嘅位係佢哋係加拿大以外唯一一間學生可以同時獲得OSSD (安大略省中學文憑) 同IB文憑嘅學校。而佢哋2021年嘅IB公開試成績亦都非常好，同樣都係100％合格，而當中有6位同學攞到滿分45分添。
香港國際學校
香港國際學校位於大潭，提供幼兒教育至十二年級的課程，行嘅係美國學制。香港國際學校考嘅公開試類型係SAT，平均分係1350分，而且有八成的中學畢業生能考入美國大學，成績十分之優異！
香港國際學校提供咗好少有嘅美式教育，佢哋會舉辦好多課外活動，例如有實習(internship programme)、跨學科研究、社區服務等，適合各種能力嘅同學仔。詳情查閱學校網站。
全港國際學校比較
以下資訊只包括國際學校中學/中學部
| 學校名稱（中文） | 學校名稱（英文） | 地區 | 全年學費 | 債券/個人提名權/本金券 |
| 德瑞國際學校 | German Swiss International School | 太平山 | $161,450 - 203,420 | $475,000 |
| 聖保羅男女中學(IB班) | St. Paul's Coed (IB Class) | 中環半山 | $96,500 | - |
| 漢基國際學校 | Chinese International School | 北角寶馬山 | $222,300 - 260,800 | $5,000,000 |
| 香港李寶椿聯合世界書院 | Li Po Chun UWC | 馬鞍山 | $300,000 | - |
| 哈羅香港國際學校 | Harrow Int'l School | 屯門 | $171,671 - 203,868 | $6,000,000 |
| 香港國際學校 | HKIS | 大潭 | $206,200 - 235,950 | $3,000,000 (家庭債券)/$5,000,000 (企業債券) |
| 弘立書院中學部 | Independent Schools Foundation | 薄扶林 | $229,950 - $249,970 | $7,000,000 |
| 拔萃男書院(IB班) | Diocesan Boys' School (IB) | 旺角 | $50,000 - $102,000 | - |
| 法國國際學校 | French International School | 灣仔跑馬地 | $125,794 - 189,580 | $90000 (私人債券) /$250,000 (企業債券) |
| 啟歷學校 | Kellett School | 九龍灣 | $172,600 - $220,800 | $100,000 |
| 南島中學 | ESF South Island School | 黃竹坑 | $115,800 - $140,700 | $500,000 |
| 香港加拿大國際學校 | Canadian International School | 黃竹坑 | $157,300 - 180,000 | $300,000 |
| 港島中學 | ESF Island School | 沙田 | $115,800 - $140,700 | $500,000 |
| 英皇佐治五世學校 | ESF King Geroge V School | 何文田 | $115,800 - $140,700 | $500,000 |
| 新加坡國際學校 | Singapore International School | 黄竹坑 | $131,200 - 198,800 | $200,000 (私人債券) /500,000(企業債券) |
| 西島中學 | ESF West Island School | 薄扶林 | $115,800 - 140,700 | $500,000 |
| 耀中國際學校 | Yew Chung | 九龍塘 | $220,820 - 225,710 | $470,000 |
| 滬江維多利亞學校 | Victoria Shanghai Academy | 香港仔 | $158,900 - $201,420 | $4,800,000 (私人債券) /6,500,000 (企業債券) |
| 美國國際學校 | American International School | 九龍塘 | $135,680 - 160,200 | - |
| 沙田學院 | Shatin College | 火炭 | $115,800 - $140,700 | $500,000 |
| 啟新書院 | Renaissance College | 馬鞍山 | $166,000 - $167,900 | $50,000 (建校費) |
| 香港澳洲國際學校 | Australian International School | 九龍塘 | $153,400 - 223,100 | $120,000 |
| 基督教國際學校 | International Christian School | 沙田 | $125,100 - 169,900 | $250,000 |
| 智新書院 | Discovery College | 愉景灣 | $173,500 - $175,400 | $400,000 |
| Nord Anglia 國際學校 | Nord Anglia International School | 藍田 | $182,000 | $500,000 |
| 香港猶太教國際學校 | Carmel School | 半山 | $166,900 - 195,500 | - |
| 愉景灣國際學校 | Discovery Bay International School | 愉景灣 | $122,800 - 185,500 | $450,000 / $50,000 |
| 香港學堂 | Hong Kong Academy | 西貢 | $194,000 - 231,700 | $630,000 |
| 香港墨爾文國際學校 | Malvern College Hong Kong | 大埔白石角 | $169,600 - 192,920 | - |
| 港灣學校 | The Harbour School | 堅尼地城 | $196,000 - 210,000 | $400,000 |
| Stamford American School Hong Kong | 何文田 | $196,000 | $500,000 | |
| 韓國國際學校 | Korean International School | 西灣河 | $105,000 | - |
| 協同國際學校 | Concordia International School | 又一村 | $117,500 - $131,700 | - |
| 宣道會劉平齋紀念國際學校 | Christian Alliance P.C. Lau Memorial International School (CAPCL) | 九龍城 | $123,190 - $160,260 | $208,000 - $260,000 |
| 宣道會國際學校 | Christian Alliance International School | 荔枝角 | $102,990 - $180,100 | $476,000 - $560,000 |
| 地利亞加拿大學校 | Delia School of Canada | 鰂魚涌 | $117,150 - $133,130 | - |
| 聖道弘爵國際學校 | Saint Too Sear Rogers International School | 石硤尾 | $79,000 - 107,000 | - |
| 漢鼎書院 | Han Academy | 黃竹坑 | $208,000 - $218,000 | $6,000,000 |
滑動查看更多
讀International School嘅好處
隨著社會對大眾嘅英語能力要求不斷提高，而讀國際學校一個好大嘅優勢就係學生可以長時間沉浸喺英語環境，老師嘅雙語教學可以令到學生由細學識講英文，直接有效咁提升佢哋嘅英語表達能力，不論喺對話、寫作定閱讀能力都會亦相對強，對將來學習、工作、甚至生活都有莫大嘅幫助。
國際學校除了提升仔女嘅外語能力，仲可以加強哋全方位能力同有多元發展。因為國際學校所提倡嘅學習模式都比較接近外國嘅自主學習並且主張「多理解少硬背」，老師唔會催谷學生學習反而會鼓勵佢哋上堂多啲舉手發問，務求令學生可以完全理解同吸收上堂學過嘅知識，仲可以訓練佢哋嘅獨立思考。正所謂「讀萬卷書不如行萬里路」，國際學校會有好多活動教學，例如漢基會舉辦漢基·哥倫比亞大學商學院暑期夏令營，少啲功課同測驗，學生自然少咗學習壓力，仲會多咗時間去玩同增廣見聞！而且學生少啲壓力底下會有更大嘅自由度去發展和主動學習自己有興趣嘅事物，例如係閱讀同玩運動。
希望咁多位家長睇完以上嘅資料，都了解更多關於香港嘅國際學校，儘早準備，可以順利入到心水嘅學校！
