【TOEFL整合】托福考試係咩嚟？考生必知的事！

一年365日都有好多人都想出國留學、讀書同移民。大部份國家嘅政策都要求申請者透過國際測試證明自己嘅英語能力水平，上篇blog就同大家介紹咗IELTS，今次AfterSchool小編就繼續同大家介紹另一個好多人都會考嘅英語能力測試-----TOEFL啦！

• TOEFL係咩嘢嚟？
• 海外留學、移民、本地升學TOEFL分數要求
  • 海外留學
  • 移民
  • 本地升學
• 英語能力測試大比拼：TOEFL同IELTS分別？
• TOEFL test 唔同模式
• TOEFL test考試內容同分數標準
  • Reading
  • Listening
  • Speaking 
  • Writing
• TOEFL同其他國際英語能力測試成績對照表
• 香港應考TOEFL考試流程
• 香港報考托福測驗同費用
• 托福測驗準備功夫

TOEFL係咩嘢嚟？

英語能力係去海外升學以及移民嘅先決條件，而為咗測試申請者嘅英語水平，唔少學府同國家都會用託福TOEFL(Test of English as a Foreign Language)為基準試。TOEL係由美國教育測驗服務社(ETS)喺1964年所創辦嘅英語能力測驗，50年嚟已經有超過二千萬人報考過㗎啦。呢個考試主要係適合一班想去美加地區留學或者係去澳洲移民嘅人士，由於TOEFL測驗被大部份北美地區嘅學府以及澳洲當地政府認可為高等教育人士英語能力嘅指標，所以好多美國大專院校都會要求外籍學生喺申請入學嘅時侯交上合格嘅TOEFL test score。

海外留學、移民、本地升學TOEFL分數要求

由於海外升學會比海外移民更加重視學生嘅英文能力，所以佢哋對TOEFL分數要求相對會比海外移民高分，大家要因應自己嘅情況而參考翻唔同分數要求。

海外留學

由於學生喺大學會用到較高程度嘅學術英文，所以大專院校一般都會有較高嘅TOEFL成績要求，唔少熱門嘅美加大學喺收生標準上面都會提到最低錄取分數（總分120分）。就好似麻省理工學院 Massachusetts Institute of Technology（MIT）的TOEFL最低錄取錄取分數為90分；耶魯大學Yale University收生要求其中一樣係TOEFL分數最少要有100分；而多倫多大學University of Toronto要求申請者除咗總分要有100分之外，寫作卷唔可以低過22分（30分為滿分）。

雖然在唔少名牌大學要求申請者提交TOEFL成績，但都有大學唔係強制要求托福成績，就好似哈佛大學 Harvard University對英語水平雖然冇硬性要求，但就需要考另一個試SAT去證明自己嘅語言水準。所以大家係揀心儀大學嘅時侯記得要睇吓佢哋嘅英語水平要求啦。

移民

同留學唔同，美國同加拿大移民政策唔需要睇TOEFL成績（加拿大喺睇IELTS成績）。不過都有其他國家係要求申請者遞交TOEFL成績作審核之用。就好似新西蘭所簽發嘅永久技術移民簽證要求TOEFL iBT成績。如果想技術移民類居民簽證，申請者需要喺申請日期前兩年之內通過考試並獲得總分79分以上。想知道更多移民政策嘅資訊，可以去新西蘭移民局網站睇睇。

而澳洲亦都接受用TOEFL成績申請各種臨時同永久簽證，包括技術移民、課後工作、商業甚至係working holiday等等。而唔同專業例如工程師、護士、翻譯等等都有唔同嘅TOEFL iBT成績要求，詳請可以撳呢到睇〜

本地升學

除咗用TOEFL測驗嚟申請美加地區留學同移民之外，仲可以用作本地升學用途㗎喎。除咗DSE英文科成績之外，香港每間大學都接受TOEFL test成績作為申請學生嘅英語能力評核。以香港大學同香港科技大學為例，港大對於申請者英語成績嘅最低要求是TOEFL測驗要攞到80分；而科大所要求嘅英語成績要求TOEFL測驗最少要攞到60分，各位喺申請大學之前記得要留意自己達唔達到心儀學校嘅分數要求啦。

英語能力測試大比拼：TOEFL同IELTS分別？

相信大家呢個時侯都會有一個疑問，「咁TOEFL同IELTS分別係咩？」其實托福同雅思分別唔大，同樣都有四份試卷；閱讀、寫作、聆聽同說話。只不過大家成日聽到嘅IELTS（雅思）主要係為咗申請去歐洲地區升學或者係移民。如果想知道更加詳細嘅IELTS資訊可以可以睇吓AfterSchool嘅【IELTS全攻略】點先拎到7分？考生必備嘅雅思past paper同課程報名資訊〜

TOEFL test 唔同模式

唔少學生喺做關於TOEFL測驗嘅資料搜集嘅時候都會見到iBT、CBT、PBT同iTP呢啲terms但又唔知係咩嚟。其實呢啲全部都係TOEFL嘅考試模式，但隨著科技嘅進步，被TOEFL  iBT（TOEFL Internet-based Test，網上托福考試）取代咗TOEFL PBT（TOEFL Paper-based Test，紙筆托福考試）同埋TOEFLCBT（TOEFL computer-based tests，電腦托福考試），所以而家坊間可以考嘅只係得翻TOEFL iBT。

除咗上面嘅幾種嘅考試形式之外，TOEFL托福測驗仲有另一款英語能力測試叫做TOEFL  iTP（TOEFL Institutional Testing Program，紙筆測驗）。而呢個TOEFL test主要係針對16歲以上而且正接受大學程度的學生，國際交換生，獎學金計劃嘅申請者等等都適合考呢個試㗎。TOEFL iTP其實係由TOEFL PBT演變出嚟，所以出題基本上會以PBT嘅試題庫為基礎，再用筆試模式去考核學生學術英文能力。TOEFL iTP同普通嘅TOEFL CBT其中一個最大嘅分別就喺佢哋嘅考試費用，TOEFL iTP每位考生只需要交$730，平過普通TOEFL IBT超過一半嘅價錢，如果同學仔冇乜經費而又想出國exchange嘅話可以考慮吓考呢個英語能力測試。

TOEFL考試內容同分數標準

TOEFL test一共分咗閱讀、聽力、說話同寫作4份試卷，而每份卷各佔30分，總分120分。不過其實每份卷喺加乘變30分前嘅計分方法同考試內容原來各有不同㗎喎，以下就會為大家介紹吓幾份卷嘅考試形式同分數標準啦！

（以下 TOEFL score以TOEFL iBT為標準）

Reading

試卷分數範圍：0-45（滿分）

閱讀卷主要有2種題型，分別係多項選擇題同”Reading to Learn”題。

試卷基本上所有問題都係多項選擇題（MC題）大部分都係單答案選擇題，考生會有四個答案選擇，當中只有一個係正確答案，每個正確答案值一分。

除咗MC題之外，每篇文章末尾都會有一條”Reading to Learn”題。呢種題型要求考生以圖表或摘要嘅形式組織段落要點。同多項選擇題唔同，一條”Reading to Learn”題值2-3分，而題目容許部分得分，換句話講即使答唔中所有points都唔驚0分，所以考生其實唔需要太擔心呢個新題型〜

Listening

試卷分數範圍：0-34（滿分）

一共有兩個部份，錄音內容分別有講座和對話，會以校園對話為主。另外，同閱讀卷一樣，聆聽卷所有問題都是多項選擇題，並且大多數都係得一個正確答案，但都有機會有啲題目有兩個正確答案，所以考生要透過錄音內容去快速組織事件或事實嘅問題。同閱讀卷唔同，每個正確答案只係值一分，考生就要小心作答啦。

Speaking

試卷分數範圍：0-24（滿分）

說話卷有六個部份，每個部份滿分為4分。以下係一個分數指標

0 =沒有回答，用英語以外1其他語言回答，或者口音令人無法理解。

1 =講話內容同主題相關性低並且有好多錯誤，斷斷續續或難以理解。

2 =講話內容基本上有貼題，但冇完整回答問題或按照提示進行。內容基本上可以理解，但是在發音，grammar上有啲錯誤，或者詞彙上太簡單。

3 =講話大致可以完成主題。就算考生喺發音，語法或詞彙方面有啲小瑕疵都唔緊要，只要整個演講內容係可以理解並且講得流暢，考生可以表現出對英語有流暢嘅掌握。

4 =演講內容可以完全滿足主題。考生說話流暢而且節奏快，只係喺發音或語法上只有很細嘅失誤。但整個說話過程都係連貫，清晰，完整，並顯示出自動而流暢的英語水平。

Writing

試卷分數範圍：0-10（滿分）

有兩個寫作任務，Independent Writing Task（獨立寫作）同 Integrated Writing Task（綜合寫作），每篇文各佔5分。Independent Writing Task嘅要求係考生要閱讀一小段文字並聽一段簡短嘅演講，然後根據你所閱讀同聽到嘅內容進行寫作。而Integrated Writing Task就係根據個人經驗或觀點針對寫作主題寫論文。以下係一個分數指標

0 =文章與主題無關，或者文章唔係用英文作。
1 =冇回應題目，或者文章難以理解。
2 =文章有回應主題，但是在語言同組織方面有好大嘅不足，甚至使用好少題目嘅例子。
3 =文章有回應主題，並具有一定的組織，亦有使用題目示例，但可能遺漏咗題目重點，而喺語法或詞彙上有啲錯誤。
4 =文章有回應主題，亦都有使用了相關示例，但示例與論文陳述之間缺乏清晰性或聯繫。
5 =文章有回應主題，文章亦都有經過精心設計同組織，並使用了題目相關示例。考生能明確地將例子同題目聯繫起來。散文展示了詞彙，語法和句子結構嘅正確使用。

下面嘅TOEFL分數表可以將考生係每份卷嘅分數成績大約轉換為考試各部分嘅比例得分。在知道自己每份卷幾多分之後，可以通過查看最左個列嚟搵出每個分數對應嘅分數。

（每次考試TOEFL iBT score都會略有不同）

 

TOEFL同其他國際英語能力測試成績對照表

全球有好多好重要嘅國際英語能力測試，但喺TOEFL score等於DSE英文科Level幾？IELTS攞咩分級等於咩TOEFL score呢？小編就幫大家整合咗4種香港最熱門嘅英文試，分別係TOEFL iBT、IELTS Academic、DSE、多益 TOEIC嘅分數對照，等大家可以比較到唔同考試嘅分數！

 

香港應考TOEFL考試流程

TOEFL嘅開考時間係喺上午9點鐘開始，下午1點鐘完卷，所以一場考試大約係4個鐘頭左右。考生需要提早半個鐘頭入去考場報到，到時會檢查考生嘅證件，記得要帶兩張ETS認可嘅證件呀，以下係證件要求：

• 正本證件（複印版本並不接受）
• 有效而且係未過期嘅證件
• 證件嘅英文姓名同報考嘅英文姓名完全一致
• 附有一張清晰的考生近照
• 附有考生簽名

入到考場之後，考生會有指定嘅電腦應考，呢個時侯要核對顯示器上你嘅相片、註冊號、姓名等等嘅個人資料是否相符，如果相符，考務人員就會幫你點擊螢幕上嘅確定，然後就會進入介面，考生都會先讓戴上耳機試音同試吓個咪高峰係咪正常，如果兩樣都冇問題就可以開始考試啦。

考生需要知道喺TOEFL係有機會出現加試，托福考試加試係指有部分場次嘅考生喺測驗中被要求額外做多一部分題目，而一般加試嘅情況會出現喺聆聽或者閱讀試卷。由於加試場次係ETS隨機抽取的，所以考試前無法預測到邊一場邊一科考試會出現加試。以下小編幫大家整理咗當日大約嘅流程，等大家可以有個心理準備〜

 

香港報考TOEFL測驗同費用

 

香港考試及評核局（考評局）係香港主辦托福考試嘅機構，佢哋每個星期六日都會提供TOEFL iBT，而收費係US$210 (大約HK$1,630)。如果考生想喺香港考TOEFL嘅話可以透過以下方法報名：信用卡網上報名、信用卡電話報名以及郵遞報名。

信用卡網上報名

學生可以透過美國考試服務中心網上報名系統報名，大家可以不定時喺網上報名系統查閱到最新嘅考試資料（例如係考試日期同埋考場位置）。提提大家如果係第一次使用托福網上報名系統嘅話記得要首先登記註冊成為用戶，然後用你嘅個人用戶號碼同密碼，登錄翻個人嘅區域去登記報名。學生記得要喺考試前登錄個人嘅區域而且要列印報名確認書呀。

信用卡電話報名

學生亦可聯絡Prometric區域報名中心 （RRC） 以電話報名考試。報名後，學生就會獲派一個報名編號。記得要記低呢個報名編號並喺考試當日帶入考場。學生喺電話報名嘅時侯都會同時知道考試日期﹑地址同埋當日報到時間。所以大家喺致電區域報名中心報名之前，要參閱網上TOEFL考試資料同埋報名手冊內夾附嘅網上托福考試報名表格，咁就唔驚唔清楚喺報名個陣要提供嘅資料啦。

郵遞報名

學生要將已填妥嘅網上托福考試報名表格喺所選考試日期前四個星期郵寄到Prometric區域報名中心。而網上托福考試報名表格已附夾於網上托福考試資料手冊同可以喺TOEFL網站下載。考生記得一定要填妥報名表格上面所有資料，例如係信用卡資料啊！

*考試日期已經詳細列明喺美國考試服務中心網站，提提大家信用卡網上同埋電話報名截止日期係考試日前七天）。而逾期報名嘅截止日期為考試日前三天。上文都有提過郵遞報名嘅學生，報名表格必須喺所選最早嘅考試日期前四個星期交到去報名中心。詳細報考流程可以到考評局網頁參考〜

領取考試成績

考試成績會於考試結束後約 10 天在網上公佈。考生要登錄自己嘅TOEFL 網上帳戶，並輸 入已登記嘅 ETS ID 後按“View Score”便可查閱。 各項考試日期的成績發佈時間表可瀏覽 TOEFL iBT 網頁。而喺網上成績公佈後三天內，考生可在 TOEFL iBT 網頁下載同列印考試成績嘅 PDF 版本。

托福測驗準備功夫

 要考好TOEFL，做足試前準備係非常重要㗎，坊間都有唔少參考書籍都可以幫大家打好TOEFL基本功，小編喺呢到強烈推薦各位可以去圖書館借或者去書局買一本practice paper叫《Cambridge preparation for the toefl test》。除此之外，其實都有唔少網站例如ETS官方網頁同都有提供免費嘅practice paper俾大家熟習吓TOEFL嘅考試模式。小編為咗方便大家亦隨blog附上一啲link等大家可以去做多啲practice paper，咁就唔洗驚考試個陣騰哂雞啦！

ETS TOEFL 台灣托福資源中心：

http://www.toefl.com.tw/learn_Sample_test.jsp  

ETS The TOEFL® Test

https://www.ets.org/s/toefl/free-practice/start.html?_ga=2.13493941.320431366.1593752083-1073949223.1593752082

Exam English

https://www.examenglish.com/TOEFL/TOEFL_reading1.htm

Best My Test

https://www.bestmytest.com/toefl/practice-test

希望呢篇blog可以幫到大家更加清楚咩係TOEFL啦〜