明明已經計劃好今日要做咩，但啲野成日都要拖到最後一刻先有動力做？明明已經決定好曬今日要溫幾多課，但開本書十分鐘就好眼訓，跟著就同自己講：「我都係聽日先開始啦」。最後拖下拖下就搞到考試前幾日先開始溫。
相信你都一定試過拖延(procrastinate)，但你又知唔知原來拖延症都可以分為四種？！
第一種：想去到最後一刻先衝刺嘅人
有啲人可能會鐘意個種在最後重要關頭，先將所有嘢一口氣完成嘅感受。但咁做一定會畀自己帶嚟好多不必要嘅壓力， 而且實際嘅效果都唔可靠！對於呢種人，我強烈建議你可以另外再set一個deadline畀自己（例如係比真正嘅deadline早一星期），咁就可以改善到自己嘅拖延問題啦！
第二種：出自於人嘅逃避心態
呢種人習慣係心面FF事情完成之後會面對嘅批評同失敗，因為恐懼，所以自然唔想完成事情。但係其實幾乎所有人都會對自己應該要完成嘅事情有期望，但唔一定人人都會因此而拖延逃避。所以呢種對結果懷有恐懼嘅拖延症，通常都發生係對自身能力缺乏信心嘅人身上。對於呢種類型嘅拖延，我哋知道自己係驚做得唔夠好，咁就更加應該諗辦法令結果變得更好而唔係逃避！
第三種：選擇困難嘅後果
有啲人本來就對自己嘅決定好容易動搖，每一個選擇好似啱咁，又好像都唔啱！因為無辦法決定應該點樣做事，所以就愈拖愈耐，消耗自己嘅精神！尤其當你因為無法評斷做呢啲事情到底有無價值果陣，拖延自然就發生。
下次當你想拖延嘅時候不妨停一停，問下自己到底想要達成咩目標，問下自己如果揀咗唔同嘅選擇會有咩唔同嘅結果？了解完唔同選擇嘅好與壞之後，就照著原本嘅安排去做啦！跟著就要不斷實踐，改善自己拖延嘅問題！
第四種：特別衝動、尋求刺激
呢類人拖延事情，係因為他們總係將精神喺更好玩或更感興趣嘅事上面。佢哋除咗容易分心，時間觀念一般都比較差。係做自己喜歡嘅事情果陣，就留意唔到時間嘅變化。但對於佢哋唔想做嘅事情，就幾乎唔會放喺心上面。導致事情總係要拖到最後一刻。
呢啲時候你就要嘗試下愛上你要做嘅事喇～當你每日都要做嘅野變左你鐘意嘅野，咁你自自然然就會想做，唔會再拖延架啦！
其實最最最重要都係係在於自己嘅心態！當你諗通左成件事或者件事係你熱愛做嘅時候，你就自自然然唔會拖！了解咗自己係邊種人之後，要點樣改善呢個問題？敬請期待我地嘅下一篇分享啦！
