瞓覺時間VS溫習時間 為咗應付考試，有唔少同學都會選擇「自chur」，日日溫書溫到兩點幾三點，之後瞓得果四、五個鐘又要起身翻學。到底用睡眠時間去換取溫習時間係咪真係值得呢？今次呢篇文章就會從科學嘅角度去同你探討一下！ 其實瞓幾多先夠？ 根據國際睡眠組織嘅研究，每個人需要嘅睡眠時間係隨著年齡而改變，而作為一個年青人，理想嘅睡眠時間係七至九粒鐘（我諗超過一半同學都無滿足到呢個要求）。但當然啦，唔係話訓夠咁多就得，仲要考慮埋你嘅睡眠質素同埋你起身嘅時間！ 唔夠訓會點先？ 你可能會覺得訓得少飲下咖啡就無事，但其實有唔少研究都指出唔夠訓係會導致以下問題： 反應時間變慢，就好似飲醉左咁 有機會有嚴重健康問題，包括心臟疾病 免疫能力變差，搞到你個人更容易病 記性變差，學習速度變慢 以上後果只係冰山一角，但簡單黎講充足睡眠係人類生存嘅必需品！ 你需要一個規律嘅睡眠習慣 早前一個睡眠健康機構就做左個實驗，研究左61名哈佛同學嘅睡眠習慣，嘗試去了解睡眠時間、睡眠分布、學習表現，三者之間嘅關係。佢地發現無規律作息時間嘅同學(irregular sleepers)釋放melatonin（一種幫助睡眠嘅激素）嘅時間會比正常人延遲足足三粒鐘，從而改變左佢地嘅生理時鐘。亦都因為咁，佢地發現有規律作息時間嘅同學，學術上嘅表現係比起無穩定作息時間嘅同學好。 總結 簡單黎講，作為一個學生七至九粒鐘嘅睡眠時間係走唔甩，個人認為六粒鐘都可以接受。但每日瞓緊四、五粒鐘果D同學，你唔單單係放棄左你平時嘅讀書效率，更加係拎緊自己條命黎「較飛」！ 嗱嗱嗱，記住上面嘅野唔係我講架，全部都係有權威嘅機構花左唔少時間得出黎嘅研究結果！
