SBA，即係「校本評核」，係每一位準備應考 DSE 中文科嘅日校同學都需要面對嘅事。SBA 嘅重要性在於，老師呈交畀考評局嘅分數係會直接跟返比例，加入 DSE 中文科總分入面，佔全卷15％。如果 SBA 嘅表現出類拔萃，就等於喺呢個比賽入面，比身邊嘅同學行先一步；同樣道理，如果 SBA 嘅表現差強人意，就會對中文科嘅考試結果造成唔細嘅負面影響，對於高分段嘅成績嚟講，有時更會令你失去一粒甚至係兩粒星星𠻹！為咗等大家喺 SBA 嘅道路上可以輕鬆啲，唔好行差踏錯，我決定整一份「中文 SBA 攻略」畀大家！
目錄
中文校本評核 SBA 簡介
隨住 2024 中文科改制，校本評核只係得返一part，就係閱讀活動，包括一次文字報告同一次口頭匯報，合共呈交2個分數，分數將由任教老師交俾考評局。
SBA佔全卷15％。
閱讀活動詳解
閱讀活動分為「文字報告」同「口頭匯報」兩part，老師會根據同學嘅表現進行評核。
「文字報告」係指同學記錄平日閱讀嘅心得，任何中文書籍、報刊、雜誌都可以作為閱讀材料。考評局要求同學扼要記述讀後嘅感受或者對於閱讀材料嘅評論。
「口頭匯報」係指同學必須喺課堂上（亦包括喺老師監察下嘅課外時間）完成一次公開說話，取代咗以往嘅卷四說話。唔同學校會有唔同嘅做法，有啲學校會允許同學喺屋企完成好報告再分享，但亦有學校會要求同學喺課堂上即場睇完相關內容並分享見解。
中文 SBA 閱讀報告書本
同學對於中文 SBA 嘅疑問不外乎：
「我究竟要揀本乜嘢書嚟做 SBA 好呢？」
「邊啲書先啱拎嚟做 SBA？」
對於我嚟講，除咗太過負面或者有明顯反社會傾向嘅書籍之外，其實乜嘢類型嘅書都可以拎嚟做閱讀報告。
就比如推理小說呢啲比較冷門嘅書籍，我就可能會選用東野圭吾嘅《白夜行》。閱讀報告嘅主題可以擺係東野圭吾對於人性嘅探討，探討到底令男主角甘願墮於黑暗，成為女主角背後嘅「清道夫」，男女主角「共生」關係嘅根本係咩，然後帶出童年嘅經歷會對我哋嘅人生造成乜嘢巨大嘅影響。同時，亦可以講下呢本書嘅寫作手法，例如「白夜」係象徵緊啲咩，男女主角嘅關係點符合作者提出「槍蝦」與「蝦虎魚」共生關係嘅比喻。
所以，其實揀乜嘢書唔係一個重點，乜嘢書都可以寫到一篇好嘅閱讀報告，重點係在於你識唔識得搵一個切入點進行探討，同埋你嘅論述夠唔夠飽滿深入。
「咁點解我哋要揀書啊？」
揀書嘅目的在於你可以搵到一本你感興趣嘅書籍。你有興趣去睇多啲，感受就自然會深刻好多。同埋，你可以根據自己嘅論述能力，搵到自己比較熟悉同容易掌握嘅題材。
以下係我對於SBA書籍嘅一啲私心推薦：
散文集
梁實秋先生嘅《雅舍小品》
梁實秋先生嘅文章係我嘅最愛，文筆幽默，又語帶諷刺，令你喺閱讀之後，好容易就會產生到共鳴，然後會心一笑。佢喺文章入面諷刺嘅社會現象好多都仲喺現今社會發生緊，所以寫佢文章嘅閱後感好容易就可以同今日社會現象連結起嚟，講到相關嘅經驗點樣令現今嘅社會更加好，或者點解決當今社會問題。
汪曾祺先生嘅散文集
汪曾祺先生嘅文章係啲好療癒嘅作品，而且文筆恬淡溫柔，非常推薦大家睇下。話說最近睇緊佢嘅《自得其樂》，當中講述佢喺西南聯大時嘅生活點滴。寫閱讀報告時，各位可以以求學態度同埋汪曾祺先生嘅人生態度為出發點，將文中所提及嘅內容，同當今學生嘅學術態度，又或者學術風氣進行比對。另一方面，汪曾祺先生嘅作品不乏儒釋道三家嘅融合，由此反映出佢對生活境界嘅嚮往。同學可以就此加以析述，甚至同自己嘅人生觀作比對。
也斯先生嘅散文集
也斯先生同埋汪曾祺先生畀我嘅感覺都好似。想同大家分享也斯先生嘅原因其實係，想更多人可以記住舊香港嘅樣子。寫閱後感嘅時候可以同當今香港嘅狀況進行對比，探討發生變化嘅原因。佢嘅文筆都好好，大家不妨留意吓佢嘅寫作手法有咩特別。
人物專訪/傳記
《喬布斯傳》以及一眾成功人士以及名人嘅傳記
同學可以透過睇唔同嘅名人傳記，領悟點樣應對人生嘅挫折，了解到底咩係獲得成就必備嘅性格品質，然後再將呢啲嘅品質應用去我哋嘅生活入面。
羅曼羅蘭《名人傳》
呢本書可以話係好多個名人故事嘅合集，文章入面有唔少嘅藝術加工，加入咗作者主觀嘅睇法，所以同之前講嘅成功人士傳記相比，可能會無咁寫實。雖然係咁，但佢喺入面所選取嘅名人事例，會畀到各位同學喺寫報告嘅時候，有充分發揮空間。
中國文化
《世界五千年》/《上下五千年》
有好多同學會覺得呢啲科普類嘅文章無嘢好寫，又或者唔知點搵個側重點出嚟。喺咁嘅情況之下，我會建議大家參考返蘇洵《六國論》嘅思維方式，抽取其中一件歷史事件，然後分析佢產生嘅原因，從中搵到一啲啟示，寫下可以點應用到喺當今社會，避免社會再重蹈覆轍。
《古文觀止》、《世說新語》注釋本
呢啲文言文合集，相信同學都唔會好感興趣。但係，同學可以選擇睇帶有注釋嘅版本。其實，呢類書入面嘅故事都幾有趣，可以喺完成閱書報告嘅同時，順便增進吓自己對於文言文嘅理解能力！
現代文學/小說
楊絳《我們仨》、龍應台嘅作品
現代小說會有好多選擇，但我傾向選擇同親情相關嘅題材，因為喺寫閱書報告嘅時候會比較容易發揮。寫呢類書嘅時候，我哋可以探討返當代嘅親子關係、可以點處理父母同子女之間嘅衝突，同埋可以定義乜嘢係好嘅或者親密嘅親子關係，回應返當今親子關係淡漠嘅社會問題。
中文 SBA 校本評核閱讀報告格式
格式方面，我會建議同學將閱讀報告分成三部分咁寫：
第一部分：
「引入部分」，即係對於書本內容嘅簡單重述。大家喺呢部分要指出書本主要內容：
如果係小說，就要寫下故事發展嘅時間線，同埋登場嘅主要人物。
如果係散文集或者好多篇文章嘅合集，就要概括書本所涵蓋嘅層面，例如講親情、親子關係，或者係主要揭露社會醜惡嘅一面。
呢一個部分要注意唔好寫太長，200字左右就已經足夠。尤其係 SBA 要喺課堂上完成嘅同學，呢一部分要寫得短小精悍，縮短自己喺呢部分用嘅時間。
第二部分：
「閱後感」嘅主體，即係你睇完本書之後嘅感受。寫呢部分嘅時候，要先引用書籍入面嘅相關內容，然後就住你引用嘅內容，寫出自己從中悟出嘅人生道理，例如當處喺某種情況之下我哋應該點做，又或者係你從呢本書得到嘅教訓。然後，將呢啲感悟同當今社會嘅相關現實聯繫埋一齊，指出所學到嘅啟示可以點樣應用喺社會入面，又或者講吓佢同當今社會現實有咩相似之處。同學可以根據老師畀嘅字數限制，寫二至三個論述飽滿嘅啟示就已經足夠。
第三部分：
「總結部分」就係重述返你喺書本入面得到咗啲咩啟示，然後你往後會點樣將呢啲啟示應用喺你嘅生活中。你亦都可以講吓呢啲啟示點樣應用到社會之中，由此改善社會現況中腐朽衰敗的一面。
中文閱讀報告分享及例子
其實我睇完書之後都會習慣寫讀後感，以下就分享下我睇完祝勇先生《在故宮尋找蘇東坡》之後寫低嘅一篇比較隨性嘅讀後感，大家可以當係示例 sample 咁睇吓。
很久沒有那麼快，那麼酣暢淋漓地看完一本書了。
對於蘇軾，是景仰，是喜愛，更多是羨慕他灑脫豪放的人生態度。
所謂，一簑煙雨任平生。我很喜歡這一句詞。他的人生，也是如此。
看完此書，有千言萬語想要訴說。但，在我腦海裡，首先出現的，竟然是那一座宮殿的名字，故宮與紫禁城。
我向來是喜歡紫禁城這個名字多於故宮的。有一句很出名的話，下雪的時候，北京就成了北平，故宮也變回了紫禁城。我現在覺得，其實故宮這個名字也很好。故，意為舊，代表著過去。而如今，那些燦爛，那些被稱道的歷史，也成為了過去，回不去了。我並不喜愛現在的故宮，大概是因為它被賦予了太濃重的政治象徵，還有天安門前在五月三十五日裡發生的事情過於慘烈。
這一座皇城，是屬於過去的，它並不屬於任何人，也不應該成為現在這個自稱創造了新時代的政權的象徵，這是對於它的褻瀆。我是嚮往故宮的，嚮往那些璀璨的文物，也嚮往那種屬於舊時代的優雅。曾經的紫禁城，寓帝王宮殿如同天宮般尊榮而不可冒犯，時光帶走了那一份至高無上的威嚴，留下給我們的是那段啟封的歷史，讓我們有機會走進那座皇城，看看那一段輝煌。
所以，故宮也好，紫禁城也好，我所熱愛的，也只是那一段過去而已。
***記：呢一段只係閲書報告嘅其中一個段落，以故宮呢個意象作為討論嘅中心，表達自己對於故宮呢個意象嘅睇法，同埋嘗試同當今嘅社會現實聯繫起嚟，講述返我眼中故宮呢個意象喺當今社會嘅意義。其實，同學亦可以喺網上搜索一啲閱書報告嘅格式作為參考，學習對方嘅佈局謀篇。
中文 SBA 閱讀報告抄襲定義
大家有時可能會因為睇唔切書等等嘅原因，去網上查找同你睇緊個本書有關嘅內容，甚至可能會貪圖一時之快，抱住僥倖心理，覺得唔會被人發現嘅，就直接將網上嘅內容轉抄到自己嘅閱書報告內。
但係，呢種行為真係唔可以做！每年，日校老師都會將學生嘅閱讀報告習作上交到考評局，然後考評局會進行抽查，除咗去評核老師嘅評分標準是否足夠公正，仲會睇下同學嘅習作係唔係出自同學原創嘅作品。
往年都有出現過同學因為SBA抄襲，而被考評局斥責佢哋缺乏誠信，最後被取消中文科考試成績，最後失去咗升讀大學嘅機會。
所以，做閱書報告嘅時候，千祈唔好貪圖一時之快而選擇去抄襲網上嘅內容。正所謂，「天網恢恢，疏而不漏。」我哋都係唔好去挑戰自己嘅運氣啦，如果唔係就會得不償失㗎啦！
中文 SBA 文化專題探討例子
文化專題探討嘅評核方法比較多樣，呢樣係取決於你日校老師嘅決定同埋選擇。最普遍嘅做法就係喺課堂上進行文化專題選修單元內容嘅測驗，可能係閱讀理解，亦都可能係要求同學寫下文學鑑賞文章，同閱書報告。
以我嘅經歷為例：
我當年嘅兩個選修單元分別係「中華文化」同「小說與戲劇」。
「中華文化」呢個選修單元嘅評核方法就係同閱讀理解嘅考試類似，老師畀咗同單元內容相關嘅閱讀理解我哋做，好似一個課堂考試咁。
「小說與戲劇」嘅評核方法就比較有趣，「小說」部分嘅評核方法就係寫一篇文學批評嘅文章，「戲劇」部分就係改寫一個故事為劇本，然後再演出畀老師睇，而家諗返覺得其實 SBA 都唔係咁無聊，幾好玩啊！
