【中文SBA】校本評核高分閱讀報告(包示例、推薦書籍及作家)

吾同中文 | Maychu
吾同中文 | Maychu 2020-9-17 22,801

SBA,即係「校本評核」,係每一位準備應考 DSE 中文科嘅日校同學都需要面對嘅事。SBA 嘅重要性在於,老師呈交比考評局嘅分數係會直接跟返比例加入 DSE 中文科總分入面。如果 SBA 嘅表現出類拔萃,就等於喺呢個比賽入面,比身邊嘅同學行先一步;同樣道理,如果 SBA 嘅表現差強人意,就會對中文科嘅考試結果造成唔細嘅負面影響,對於高分段嘅成績嚟講,有時會令你失去一粒甚至係兩粒星星添!為咗等大家喺 SBA 嘅道路上可以輕鬆啲,唔好行差踏錯,我決定整一份「中文 SBA 攻略」俾大家!

 

中文校本評核 SBA 簡介

中文科校本評核包括咗兩個部分,分別係必修部分同埋選修部分

必修部分

即為閱讀活動,老師會根據同學嘅「閱讀紀錄」以及喺「閱讀活動」時嘅表現進行評核。

「閱讀紀錄」係指同學紀錄平日閱讀嘅心得,任何中文書籍、報刊、雜誌都可以作為閱讀材料。「閱讀紀錄」要求同學扼要記述讀後嘅感受或者對於閱讀材料嘅評論

「閱讀匯報」係指同學必須喺課堂上(亦包括喺老師監察下嘅課外時間)完成一份口頭匯報或者文字報告。閱讀報告嘅撰寫過程,唔同學校會有唔同嘅做法,有啲學校會允許同學喺屋企完成全部閱讀報告,但亦有學校會要求同學喺嘅課堂上完成全部或者部分嘅閱讀報告。

選修部分

同學需要喺中五同中六兩個學年之內,喺中文科課程建議嘅選修單元或者學校嘅自擬單元入面,選修二至四個單元 (其中一個可以係自擬單元)。當然,選擇邊個選修單元,係由學校嘅老師決定。

選修部分嘅評核方法比較多樣,老師可能會選擇文字形式,例如專題介紹、文學創作、評論等;亦都可以係以非文字形式進行,例如口頭匯報、小組討論、演出等。同學可以以個人或者小組形式呈交課業,一切視乎學校老師嘅安排。

(備註:2021 DSE 校本評核嘅選修部分被取消,但係根據考評局出比老師有關2022年同埋2023年嘅校本評核指引可以睇到,喺之後嘅評核入面,都係會出現返選修部分,所以呢個取消應該就係暫時性嘅。)

 

中文 SBA 佔分比重 (2021年9月修訂版)

中文SBA

由於考評局修訂咗今年 SBA 喺中文科考試入面嘅比重,所以以下會分成2021年 DSE 嘅佔分比重同埋2022/2023年嘅 DSE 佔分比重嚟講。

2021年中文 DSE

校本評核喺 DSE 中文科總分所佔嘅比例調整為10%,只需要提交一個必修部分,亦即係閱讀活動嘅分數。

學校只需要提交一個分數,20分為滿分,閱讀紀錄同埋閱讀匯報各以10分為滿分。

2022年/2023年中文 DSE

校本評核喺 DSE 中文科總分所佔嘅比例為20%,必修部分閱讀活動佔6%,選修部分佔14%。

必修部分閱讀活動嘅滿分係20分,閱讀紀錄以及閱讀匯報各以10分為滿分,學校只需喺呢部分呈交一個分數。

選修部分需包含兩個選修單元,每個單元嘅分數以10分為滿分,學校需要呈交兩個單元嘅分數。

 

中文 SBA 閱讀報告書本

閱讀書籍

我成日都會收到同學對於中文 SBA 嘅疑問

「我究竟要揀本乜嘢書嚟做 SBA 好呢?」

「邊啲書先岩拎嚟做 SBA?」

對於我嚟講,除咗太過負面或者有明顯反社會傾向嘅書籍之外,其實乜嘢類型嘅書都可以拎嚟做閱讀報告。

就比如推理小說呢啲比較冷門嘅書籍,我就可能會選用東野圭吾嘅《白夜行》(呢本書真係好好睇,我到而家仲記得自己睇到結局時個種震撼嘅心情)。閱讀報告嘅主題可以擺係東野圭吾對於人性嘅探討,探討到底令到男主角甘於墮於黑暗,成為女主角背後嘅「清道夫」,男女主角「共生」關係嘅根本係咩,然後帶出童年嘅經歷會對我哋嘅人生造成乜嘢巨大嘅影響。同時,亦可以講下呢本書嘅寫作手法,例如「白夜」係象徵緊啲咩,男女主角嘅關係點符合作者提出「槍蝦」與「蝦虎魚」共生關係嘅比喻。

所以,其實揀乜嘢書唔係一個重點,乜嘢書都可以寫到一篇好嘅閱讀報告,重點係在於你識唔識得搵一個切入點進行探討,同埋你嘅論述夠唔夠飽滿深入

「咁點解我哋仲要揀書啊?」

揀書嘅目的在於你可以穩到一本你感興趣嘅書籍。你有興趣去睇多啲,感受就自然會深刻好多。同埋,你可以根據自己嘅論述能力,搵到自己比較熟悉同容易掌握嘅題材。

 

以下係我對於SBA書籍嘅一啲私心推薦:

散文集

梁實秋先生嘅《雅舍小品》

雅舍小品

梁實秋先生嘅文章係我嘅最愛之一,文筆幽默,又語帶諷刺,令你喺閱讀之後,好容易就會產生到共鳴,然後會心一笑。佢喺文章入面諷刺嘅社會現象好多都仲喺現今社會發生緊,所以寫佢文章嘅閱後感好容易就可以同今日社會現象連結起嚟,講到相關嘅經驗點樣令現今嘅社會更加好,或者點解決當今社會問題。

 

汪曾祺先生嘅散文集

汪曾祺

汪曾祺先生嘅文章係啲好療癒嘅作品,而且文筆恬淡溫柔,非常推薦大家睇下。話說最近睇緊佢嘅《自得其樂》,講嘅係佢喺西南聯大時嘅生活點滴,文中亦有講述到當時學生同埋教授嘅特性。寫閱讀報告時,各位可以以求學態度同埋汪曾祺先生嘅人生態度為出發點,將文中所提及嘅內容,同當今學生嘅學術態度,又或者學術風氣進行比對。另外,其實佢寫嘢食嘅文章都好好睇,啲文仲可以聯繫到佢嘅生活態度,所以同學亦可以將文章內容同當今人們忙碌又無美感嘅生活態度進行對比

 

也斯先生嘅散文集

也斯

也斯先生同埋汪曾祺先生比我嘅感覺都好似。想同大家分享也斯先生嘅原因其實係,想更多人可以記住舊香港嘅樣子。寫閱後感嘅時候可以同當今香港嘅狀況進行對比探討發生變化嘅原因。佢嘅文筆都好好,大家不妨探討下佢嘅寫作手法有咩特別

 

人物專訪/傳記

《喬布斯傳》以及一眾成功人士以及名人嘅傳記

喬布斯

同學可以透過睇唔同嘅名人傳記,領悟點樣應對人生嘅挫折,了解到底咩係獲得成就必備嘅性格品質,然後再將呢啲嘅品質應用去我哋嘅生活入面。

 

羅曼羅蘭《名人傳》

羅曼羅蘭

呢本書可以話係好多個名人故事嘅合集,文章入面有唔少嘅藝術加工,加入咗作者主觀嘅睇法,所以同之前講嘅成功人士傳記相比,可能會無咁寫實。雖然係咁,但佢喺入面所選取嘅名人事例,會比到各位同學喺寫報告嘅時候,有充分發揮空間。

 

中國文化

《世界五千年》/《上下五千年》

《世界五千年》/《上下五千年》

有好多同學會覺得呢啲科普類嘅文章無嘢好寫,又或者唔知點搵個側重點出嚟。喺咁嘅情況之下,我會建議大家參考返蘇洵《六國論》嘅思維方式,抽取其中一件歷史事件,然後分析佢產生嘅原因,從中搵到一啲啟示,寫下可以點應用到喺當今社會,避免社會再重蹈覆轍。

 

《古文觀止》、《世說新語》註釋本

古文觀止

呢啲文言文合集,相信同學都唔會好感興趣。但係,同學可以選擇睇帶有註釋嘅版本。其實,呢類書入面嘅故事都幾有趣,可以喺完成閱書報告嘅同時,順便增進下自己對於文言文嘅理解能力!

 

現代文學/小說

楊絳《我們仨》,龍應台嘅作品

我們仨

現代小說會有好多選擇,但我傾向選擇同親情相關嘅題材,因為喺寫閱書報告嘅時候會比較容易發揮。寫呢類書嘅時候,我哋可以探討返當代嘅親子關係、可以點處理父母同子女之間嘅衝突,同埋可以定義乜嘢係好嘅或者親密嘅親子關係,回應返當今親子關係淡漠嘅社會問題

 

中文 SBA 校本評核閱讀報告格式

閱讀報告格式

格式方面,我會建議同學將閱讀報告分成三部分咁寫:

第一部分:

「引入部分」,即係對於書本內容嘅簡單重述。大家喺呢部分要指出書本主要內容

如果係小說,就要寫下故事發展嘅時間線,同埋登場嘅主要人物

如果係散文集或者好多篇文章嘅合集,就要概括書本所涵蓋嘅層面,例如講親情、親子關係,或者係主要揭露社會醜惡嘅一面。

呢一個部分要注意唔好寫太長200字左右就已經足夠。尤其係 SBA 要喺課堂上完成嘅同學,呢一部分要寫得短小精悍,縮短自己喺呢部分用嘅時間。

第二部分:

「閱後感」嘅主體,即係你睇完本書之後嘅感受。寫呢部分嘅時候,要先引用書籍入面嘅相關內容,然後就住你引用嘅內容,寫出自己從中悟出嘅人生道理,例如當處喺某種情況之下我哋應該點做,又或者係你從呢本書得到嘅教訓。然後,將呢啲感悟同當今社會嘅相關現實聯繫埋一齊,指出所學到嘅啟示可以點樣應用喺社會入面,又或者講下佢同當今社會現實有咩相似之處。同學可以根據老師比嘅字數限制,寫二至三個論述飽滿嘅啟示就已經足夠。

第三部分:

「總結部分」就係重述返你喺書本入面得到咗啲咩啟示,然後你往後會點樣將呢啲啟示應用喺你嘅生活中。你亦都可以講下呢個世界可以點樣應用呢啲啟示,去改善社會現實,避免犯下類似嘅錯誤。

 

中文閱讀報告分享及例子

中文閱讀報告分享及例子

其實我自己睇完書之後都會習慣寫讀後感,以下就分享下我睇完祝勇先生《在故宮尋找蘇東坡》之後寫低嘅一篇比較隨性嘅讀後感,大家可以當係示例 sample 咁睇下。

很久沒有那麼快,那麼酣暢淋漓地看完一本書了。

對於蘇軾,是景仰,是喜愛,更多是羨慕他灑脫豪放的人生態度。

所謂,一簑煙雨任平生。我很喜歡這一句詞。他的人生,也是如此。

看完此書,有千言萬語想要訴說。但,在我腦海裡,首先出現的,竟然是那一座宮殿的名字,故宮與紫禁城。

我向來是喜歡紫禁城這個名字多於故宮的。有一句很出名的話,下雪的時候,北京就成了北平,故宮也變回了紫禁城。我現在覺得,其實故宮這個名字也很好。故,意為舊,代表著過去。而如今,那些燦爛,那些被稱道的歷史,也成為了過去,回不去了。我並不喜愛現在的故宮,大概是因為它被賦予了太濃重的政治象徵,還有天安門前在五月三十五日裡發生的事情過於慘烈。

這一座皇城,是屬於過去的,它並不屬於任何人,也不應該成為現在這個自稱創造了新時代的政權的象徵,這是對於它的褻瀆。我是嚮往故宮的,嚮往那些璀璨的文物,也嚮往那種屬於舊時代的優雅。曾經的紫禁城,紫色是皇權的顏色,禁,代表著禁止,代表著皇權的不可觸碰,時光帶走了那一份禁止,留下給我們的是那段啟封的歷史,讓我們有機會走進那座皇城,看看那一段輝煌。

所以,故宮也好,紫禁城也好,我所熱愛的,也只是那一段過去而已。

***記:呢一段只係閲書報告嘅其中一個段落,以故宮呢個意象作為討論嘅中心,表達自己對於故宮呢個意象嘅睇法,同埋嘗試同當今嘅社會現實聯繫起嚟,講述返我眼中故宮呢個意象喺當今社會嘅意義。其實,同學亦可以喺網上搜索一啲閱書報告嘅格式作為參考,學習對方佈局謀篇嘅方法。

 

中文 SBA 閲讀報告抄襲定義

SBA 閲讀報告抄襲定義

大家有時可能會因為睇唔切書等等嘅原因,去網上查找同你睇緊個本書有關嘅內容,甚至可能會貪圖一時之快,抱住僥倖心理,覺得唔會比人發現嘅,就直接將網上嘅內容轉抄到自己嘅閱書報告內。

但係,呢種行為真係唔可以做!每年,日校老師都會將學生嘅閱讀報告習作上交到考評局,然後考評局會進行抽查,除咗去評核老師嘅評分標準是否足夠公正,仲會睇下同學嘅習作係唔係出自同學原創嘅作品。

往年都有出現過同學因為SBA抄襲,而被考評局斥責佢哋缺乏誠信,最後被取消中文科考試成績,最後失去咗升讀大學嘅機會

所以,做閱書報告嘅時候,千祈唔好貪圖一時之快而選擇去抄襲網上嘅內容。正所謂,「天網恢恢,疏而不漏。」我哋都係唔好去挑戰自己嘅運氣啦,如果唔係就會得不償失㗎啦!

 

中文 SBA 文化專題探討例子

中文 SBA 文化專題探討例子

文化專題探討嘅評核方法比較多樣,呢樣係取決於你日校老師嘅決定同埋選擇。最普遍嘅做法就係喺課堂上進行文化專題選修單元內容嘅測驗,可能係閱讀理解,亦都可能係要求同學寫下文學鑑賞文章,同閱書報告

以我自己嘅經歷為例:

我當年嘅兩個選修單元分別係「中華文化」同「小說與戲劇」。

「中華文化」呢個選修單元嘅評核方法就係同閱讀理解嘅考試類似,老師比咗同單元內容相關嘅閱讀理解我哋做,好似一個課堂考試咁。

「小說與戲劇」嘅評核方法就比較有趣,「小說」部分嘅評核方法就係寫一篇文學批評嘅文章,「戲劇」部分就係改寫一個故事為劇本,然後再演出比老師睇,而家諗返覺得其實 SBA 都唔係咁無聊,幾好玩啊!

 

小結語:

其實 SBA 對於同學中文科文憑試嘅重要性係不容忽視嘅,所以我會幫助參加我《吾同中文:常規課程》嘅同學批改佢哋嘅閱書報告,比下相關嘅修改建議,務求令同學可以喺 SBA 呢場比試入面取得更高成績,喺文憑試未開考之前,已經可以領先身邊嘅其他同學!

 

P.S. 嚟緊我會每個月都會開放「免費課堂」俾大家!等我用 75 分鐘,教你實戰寫好議論文,令你文筆唔好都可以穩奪作文 Lv 5+!

報讀仲會再送《議論文實戰攻略》,入面有 7 大搶分論證法教學,幫你分析 5** 議論文結構鋪排,仲有實戰分析自擬範文例子添!

立即報讀《議論文實戰攻略班》

 

 

***小編私心介紹「溫書好地方

唔知大家對溫書嘅環境有冇要求呢?小編自己就幾高要求嘅!想當年,為咗享受一個安靜舒適嘅溫書環境,小編真係行遍港九新界。

不過大家唔使學小編周圍走啦,因為你哋好好彩,小編近排發掘到一個非常正嘅溫書地方,準備同大家開心 share 下!(慳翻啲時間溫書啦~)

除咗去圖書館自修室、cafe 之外,大家其實可以去 focus 溫書!focus 位於旺角彌敦道,交通位置非常方便。除咗基本設施同服務 (e.g. 無限 Wi-Fi、獨立充電位),佢哋仲會提供打印服務、零食、飲品同埋即磨咖啡!呢個共用空間為大家喺旺角鬧市入面,提供一個寧靜嘅空間集中工作、自修,又或者放鬆休息下

P.S. 佢哋而家做緊「首次體驗優惠」,平時仲有學生優惠,價錢非常抵,大家真係要去試下!(詳情可以去 focus 官網睇睇)


獲取首次體驗優惠

免費 DSE 電子報
定期為 30,000+ 中學生送上實用 DSE 資訊和資源
吾同中文 | Maychu

吾同中文 | Maychu

教學與我並生,吾同中文齊一