【2019 DSE中文作文】《這一句話,我會記上一輩子。》題目+範文分析

靜研中文
靜研中文 2020-10-27 61,176
AfterSchool 幫你整理咗 DSE 2019 中文卷二寫作能力題目一《這一句話,我會記上一輩子。》嘅評分參考同結構分析,入面仲有範文例子,同埋作文格式添!
有同學仔話做中文卷二作文嗰陣,成日搵唔到方向。唔知點解,喺收到題目之後,又或者要寫大綱嘅時候,個腦就會一片空白。
點解有咁樣嘅情況?其實原因好簡單:就係同學未掌握到中文寫作卷會用到嘅思維技巧,導致作文嘅時候,唔識點樣有條理有組織咁思考,令文章組織十分混亂,最終影響 marker 對篇文嘅觀感。
另外,亦有好多同學覺得卷二嘅評分標準好難捉摸,成日好迷惘,唔知點樣寫先可以達到上品嘅要求。所以,今次就會同大家一齊分析下 DSE 中文卷二嘅評分標準,等大家唔使再估估下。
為咗令大家更容易理解,AfterSchool 會以 DSE  2019 年中文作文卷第一題「這一句話,我會記上一輩子。」為例,再配合一啲中文作文範文例子,教教大家點樣穩到寫作文嘅思維,輕鬆拎到高分。

DSE中文卷二考試評分準則

DSE 中文作文卷主要評分項目有四項,四項滿分皆為 10 分,但當計算總分嘅時候,呢四大項所佔嘅權重都會有所分別。
根據考評局嘅報告,以下係 DSE 中文卷二嘅評分項目同埋所佔全卷嘅比例。
評分項目最高得分全卷總分
內容40分(40%)103分
表達30分(30%)
結構20分(20%)
標點字體10分(10%)
錯別字3分

內容

  • 立意、內容是否合乎寫作要求;是否豐富、深刻。
  • 取材是否恰當;是否能夠彰顯立意。
  • 闡述是否合理、飽滿。
大家要記得行文內嘅解說同描述一定要充分,但咁唔代表要寫一啲廢話去湊字數,或者寫與文章內容唔相關嘅內容
中品評分嘅普遍描述就係文章能夠回應寫作要求,但係內容有沙石。如果寫一啲唔關文章主線或者表達唔到立意嘅內容,會被認為係文章行文嘅沙石,令文章內容嘅評分被降為中品

表達

「表達」會睇同學行文中嘅用詞同埋文句,例如可唔可以準確咁樣運用成語,或者引用名言名句等等。
另外,亦會考慮埋表達手法,例如多樣嘅修辭手法,人物描寫手法,間接描寫,直接描寫以及細描、白描等等。

結構

「結構」主要考慮文章段落區分是否明晰,起承轉合是否自然,輕重詳略是否恰當,是否有助表達立意和主題。

標點字體

考慮入品時以字體為主,標點為輔;標點使用在於準確同靈活,而非數量嘅多少。

錯別字

  • 0 -1個給 3 分;2 - 4 個給 2 分;5 - 7 個給 1 分;8 個或以上不給分。
  • 重錯不計
由於錯別字嘅分數係會直接加入你作文嘅總分度,所以同學一定要喺行文中盡量減少錯別字。高分段嘅作文分數往往相差唔多,而呢 3 分,好有機會就係判斷你有冇多粒星嘅關鍵。
 

分析考評局中文卷二作文題目「這一句話,我會記上一輩子。」

credit: unsplash @dariuszsankowski
credit: unsplash @dariuszsankowski
當年嘅原題係:
試以「這一句話,我會記上一輩子。」為首句,續寫這篇文章。
考評報告中比嘅題解如下:
「贈人以言,重於珠玉;傷人以言,重於劍戟。」可見話說得好,即如晨鐘暮鼓,令人幡然大悟,一生銘記;可是說話傷人,往往比肌膚之痛楚更令人痛苦、難受。
本題要求考生以一句令人刻骨銘心的話為線索,抒述 個人對人生的體會。
從考評局嘅題解可以睇得出,大家所引用嘅說話未必一定係鼓勵性或者正面嘅表述,亦都可以係傷人嘅惡言,例如同學可以由惡言中得出,往後唔應該再講出類似言論之類嘅啟示。
咁嘅做法會拓闊咗同學嘅寫作空間,因為句子嘅選取並不僅限於鼓勵正面嘅語句。其實,由反面角度書寫,所得出嘅啟示亦可以十分深刻。
 

關鍵概念說明:「一句話」

同學應該留意,「一句話」係文章嘅重要線索。呢句話可以係抒情線索,亦可以係敘事線索,甚至係議論線索,但要注意,文章往後嘅內容都應該圍繞呢句說話展開
呢句說話可以係單句,例如「加油。」,亦可以係一句複句,例如「一心,記得要努力。」
呢句說話應該簡潔有力意涵明確,先容易啟發到思考,例如「六國破滅,弊在賂秦。」;又或者係情感豐富,先可以觸動人心,例如「但願人長久,千里共嬋娟。」等等。
同學要留意返,題目嘅要求係「一句話」,唔係一段話,你可以喺文章行文入面對呢句話有所詮釋,但所引用嘅呢句說話本身一定要簡潔避免篇幅冗長語意不清
呢句說話嘅來源可以係多樣嘅:
  • 可以係人哋講嘅說話,例如父母對你嘅叮囑,老師對你嘅教導,甚至係別人對你講帶有傷害性嘅嘲諷
  • 亦可以係書本摘錄,例如歷史名人嘅名句古詩詞,或者係現代名人語錄
  • 甚至可以係你自己同自己講嘅說話,例如對自己嘅鼓勵,或者係對自己唔好再重蹈覆轍嘅警告。
  • 仲可以係你自己對人哋講嘅話語,例如令對方振作嘅安慰,或者係對同學嘅欺凌產生嘅嘲笑。
 

關鍵概念說明:「記上一輩子」

credit: unsplash @we_are_rising
credit: unsplash @we_are_rising
同學需要留意,「一輩子」係一段好長嘅時間,而且「記上一輩子」係指呢句話係會令人刻骨銘心,令人牢記在心底,又或者係對你嘅人生影響深遠
雖然題目無寫到要為何要記上一輩子,但同學喺行文入面一定要寫到呢句說話點解會令你刻骨銘心
例如:
  • 話語嘅內容觸及到我嘅遭遇、處境,因而牽動情感,啟發思考;
  • 說話內容雖然簡單平常,但係說話者嘅感情十分真摯或沉痛,令人感慨動容;
呢個部分喺文章入面需要著重論述嘅部分,因為呢個部分嘅論述可以作為文章抒情或者議論嘅部分,係文章嘅得分點
呢個部分要寫得詳盡,要注意對感情嘅描寫,同埋要寫清楚各種感情產生嘅原因。
 

寫作要求:

文章必須合乎以下要求
  • 交代「這一句話」嘅內容同埋有關情境(取材)
  • 抒發情懷,說明或描述「這一句話」對自己有何影響,為什麼永不忘記。(立意)
  • 同學應該以「第一人稱」身分寫作
  • 同學可以用記敘文體記敘事情;
  • 亦都可以論述「這一句話」對自己嘅深遠影響
  • 本篇以敘事、描寫、抒情為主,但亦可以夾雜議論;
  • 事件先後嘅鋪排同埋交代、情節嘅變化同埋發展都需要有條不紊、輕重有致,詳略得宜;
  • 角色、人物同環境嘅描寫都要細緻傳神,先能夠將情感同思想具體呈現
  • 同學既可以喺記事後以一整段抒懷議論,亦可以係記敘時把情思夾雜其中,逐步渲染。
 

《這一句話,我會記上一輩子。》範文佳作例子

credit: unsplash @drewtilk
credit: unsplash @drewtilk
寫好呢篇文章嘅重點在於,如何將嗰一句說話與文章嘅敘事、抒情、議論等部分緊緊扣連起嚟,仲有點樣安排抒情段落嘅比例同位置
點樣叫做一個有效抒情?好多同學對於抒情嘅理解都係覺得寫到人物嘅心情係咩就得,例如開心,悲傷,難過,懷念,然後不斷咁樣堆砌好多描述心情嘅詞語。
考官會將呢種堆砌描述心情詞語嘅抒情定義為流於表面嘅無效抒情
有效嘅抒情係應該寫出感情發展嘅層次,同埋感情存在嘅層次。因為即使係悲傷,都會有分唔同程度,而產生嘅原因都要寫清楚。
文章對於感情發展嘅鋪墊都要寫得清晰,尤其係感情嘅轉折位一定要留意,感情嘅轉變唔可以嚟得突然,感情嘅轉變都唔可以突然由一變到一百,套用返落呢條題目度就係你唔會一下子就會將呢句話記一世,同埋你嘅銘記在心係要建立係對呢句說話嘅內涵理解之上嘅。
小編曾經修改過一段抒情文段,而家擺出嚟同大家分享下,點先叫做有效嘅抒情。
原文:
「但願人長久,千里共嬋娟。」
我想起了父親對我說的這句話。是的,是的,我在城市中確實可以千里共嬋娟,但是月亮並不可以映照出父親。我想,但願人長久才是父親要我記著的事,這是人類最卑微的願望,和心愛的人在千里外共賞明月,海上生明月,天涯共此時。這才是父親想說的,無論身在何方,心中有念,即使在萬里之外也可感念。
修改後:
         「但願人長久,千里共嬋娟。」我又想起了父親當年在海邊說的這句話。
望著渾圓的月亮,我又想起了那一年在海邊,月光不但撒在海面上,還撒落在爸爸的身上。皎潔的月光勾勒出爸爸的身形;我也想起了那個安穩的懷抱,那年我還是一個愛撒嬌的小女孩,躺在最愛我的爸爸,堅實的臂彎上,我抬頭仰望,爸爸的面容因為背向月光而變得模糊不清。我現在想來,爸爸的面容,真的在慢慢地模糊,我害怕啊,害怕我在失去了爸爸後,也逐漸忘記了爸爸的面容。這樣,我就真的覺得自己是永遠失去了爸爸了。「但願人長久」,很多時候,身邊人也只能陪我們走一段路,沒有人能夠永遠地陪我們走下去,所以,這個「長久」不是在說永恆,當年爸爸說出來的時候,大概也是想他能夠陪他最珍視的女兒,再久一點,再久一點。我如今才明白爸爸的良苦用心,為什麼我不能陪著我年老的父親再久一點呢?為什麼我不能夠好好地珍視那些只能夠陪我走一段路的人呢?如今,也只剩下我一人,看著那美麗的月亮,懷緬著那不可倒帶的過去。我與在天國的父親也已經是真正的「相隔千里」,我希望,在遙遠極樂世界的父親,能夠和想念他的女兒,一起望著同一個月亮,他想起的,是在他懷裡撒嬌的女兒;我想起的,是背著月光,高大但模糊的父親形象。爸爸,我想你了。
原文作者係想帶出自己對父親嘅思念,同埋想藉「但願人長久,千里共嬋娟」呢句話去帶出要珍惜同親人相處嘅時光,但係原文嘅抒情寫得好單薄,無渲染到佢同父親嘅相處點樣反映到佢哋兩個人嘅感情深厚,令到抒情嘅內容缺乏說服力。
另外,佢仲無詳細解釋「但願人長久,千里共嬋娟」嘅深層含義,冇講佢同文章內容扣連,反而係再引多一句張九齡嘅「海上生明月,天涯共此時」嘅詩句,起到喧賓奪主嘅觀感,令文章同埋「這一句話」嘅關係更加疏遠。
 

如何選擇記敘文題材

分段格式範例

記敘文嘅大綱一般會希望大家寫到嘅起承轉合嘅基本內容,同埋比到自己一個審視文章嘅機會,睇下內容發展合唔合乎情理。
何謂起承轉合?
起就係事情嘅起因,即係件事點解會發生;承同埋轉都係件事發生嘅過程,承就係承接起因嘅描述,轉就係轉折;合就係結果。
同學寫記敘文嘅時候要留意,要喺一開始就確定人物性格。建構段中對話嘅時候,要根據人物嘅性格嚟寫,咁先可以令文章合乎情理。
舉個例子,比如你講一件同期末考試相關嘅事件,個起因可以係因為你上次考試成績好差,所以立志努力學習;個承就係你開始努力學習嘅細節,例如一日溫十個鐘書;個轉折可以係,你突然迷上咗一個遊戲,日日都係度玩,但係突然又比人提醒你要認真讀書,令你再次認識到學習嘅重要性,結果就記敘你努力學習,最終係考試入面取得好好嘅成績。
同學喺寫記敘文大綱嘅時候,不妨參考下呢種寫法。
 

5** 級中文作文技巧 - 「結尾昇華」

credit: unsplash @mahiruysal
credit: unsplash @mahiruysal
老生常談嘅「結尾昇華」係咩呢?
其實就係要求大家喺文章嘅結尾根據返所寫嘅事件,從更大嘅層面講下可以喺呢件事度得到啲咩其實,例如同整個年齡階層甚至係整個社會有關嘅啟示。
簡單啲嚟講,就係「以小見大」嘅寫法,由一件小事上睇到社會層面所存在嘅問題,並得到相關啟示,仲可以係結尾度表達對於未來嘅展望或者提出應該嘅做法。
免費 DSE 電子報
定期為 30,000+ 中學生送上實用 DSE 資訊和資源
靜研中文

靜研中文

👩🏻‍🎓 中文科碩士級導師.專科專教👩🏻‍🏫 多年中文補習經驗.無數學生好評⭐ DSE 中文5**.真正實戰狀元📚 當代影視文學、韻文習作、儒家經典、楚辭奪A/A-成績