根據考評局報告，2019 DSE 中文卷二只有 11% 嘅同學揀「想想別人」呢條作文題目嚟寫，由此可見大部份人都唔係咁清楚呢題嘅評分要求同寫作技巧，所以我而家就同大家全方位咁講解下佢嘅作文要求、立意構思、例子選材等等。我哋仲會順便睇下一啲「想想別人」嘅佳作範文，務求各位同學喺「想想別人」呢題，甚至成份卷二作文輕取 5**！
目錄
DSE 中文卷二考試評分準則
credit: unsplash @jessbaileydesigns
根據考評報告，DSE 中文作文卷計分方式如下：
內容（40分）
「內容」方面，大家喺作文時要充分描述解說主旨同埋各段落，而當中最重要嘅原則係緊扣題目。同時，表達同結構得分都會影響內容分。
表達（30分）
「表達」會睇同學行文中嘅遣詞用句，例如行文係咪通順，可唔可以準確咁引經據典等等，亦會睇埋表達手法，包括修辭手法、人物描寫手法等等。
結構（20分）
「結構」主要考慮文章段落劃分係咪明確、起承轉合係咪自然、文章詳略係咪恰當、全文佈局係咪有助表達立意同主題。
標點字體（10分）
以字體為主，標點為輔；字體在乎係咪清晰美觀，標點使用在乎質量而唔係數量。
錯別字（3分）
0 -1個給 3 分；2 - 4 個給 2 分；5 - 7 個給 1 分；8 個或以上不給分。重錯不計
由於無錯別字嘅分數收穫係會直接加入你篇作文嘅總分，所以同學一定要喺行文中盡量減少錯別字，唔好因為錯別字而跌 grade！！！
由於無錯別字嘅分數收穫係會直接加入你篇作文嘅總分，所以同學一定要喺行文中盡量減少錯別字，唔好因為錯別字而跌 grade！！！
分析 DSE 2019 年中文作文題目二 《想想別人》
credit: unsplash @wilstewart3
完整原題目：DSE 2019 中文寫作能力卷二 《想想別人》
以下段落節錄自詩歌《想想別人》：
當你與人爭鬥時想想別人，別忘了那些想要和平的人。
當你回家，回你自己的家時，想想別人，
別忘了那些住在帳篷裏的人。
當你想到那些遙遠的人們，想想你自己，
然後說「我希望自己是黑暗中的蠟燭。」
試就你對這首詩歌的體會或聯想，以「想想別人」為題，寫作一篇文章。
2019 DSE 考評報告
喺開始分析之前，不如我哋先睇睇 考評報告 講咩：
「萬物相存相依，沒有事物能獨存；人也不能離群獨處，應互相依存，彼此關心。沒有人能自絕於他人，我們就應該想及別人的需要及感受；可惜現今社會人與人的關係疏離，人們只關心自己，少有想及他人。本文希望考生可以反思這個現象，想想別人之不幸、人己關係、個人責任。」
從考評局嘅題解可以睇得出，考官希望考生能夠做到胸懷「先天下之憂而憂，後天下之樂而樂」嘅精神。
關鍵概念說明
credit: unsplash @ryoji__iwata
「別人」：泛指「我」以外嘅人。
「想想別人」：放低自身嘅利益同考慮，並以同理心體諒同關心不幸嘅人。
想想你自己，然後說：「我希望自己是黑暗中的蠟燭。」：句子中「想想自己」並唔係目的，而係推己及人嘅過程。
題目二 - 寫作要求
寫作文體方面，同學可以用記敘文體或者議論文體。
取材方面，同學千祈唔好完全繞過詩歌嘅內容寫作，咁好容易離題。相反，我哋需要不斷咁喺文章入面扣連詩歌寓意。
立意方面，你篇文能夠將「別人」「想想」到咩程度，就係介定同學能否深化主題最決定性嘅因素，程度愈高（例如家國層面），感染力自然愈高。
特別提醒各位同學， 「想想別人」係主導全文內容同結構嘅關鍵詞，必須要對呢個題目字眼有足夠嘅詮釋，「想想別人」嘅定義要直接寫喺文章嘅第一段。
中文作文取材方式
credit: unsplash @jmeyer1220
當你與人爭鬥時想想別人，別忘了那些想要和平的人：
特定情景：因為你發起爭鬥嘅行為會為他人帶嚟傷害，亦都會違背其他人嘅想法，所以要學識減少呢啲唔好嘅行為。
當你回家，回你自己的家時，想想別人，別忘了那些住在帳篷裏的人：
可以理解成：我哋需要為社會上嘅弱勢群體考慮，諗吓佢哋生活上會有咩所需，唔可以理所當然咁認為其他人同我哋一樣幸福，要以惻隱之心主動為他人著想。
當你想到那些遙遠的人們，想想你自己，然後說：「我希望自己是黑暗中的蠟燭。」：
黑暗比喻做：睇唔到希望嘅時候，而我哋應該採取實際行動提供幫助，成為溫暖他人嘅燭光。
文章整體與立意昇華的扣連：
如果大家想了解更多關於「結尾昇華」嘅寫作技巧，可以去睇吓【2019 DSE】題目分析《這一句話，我會記上一輩子。》 呢篇文章，內文會有詳細介紹！
DSE 2019 中文卷二作文「範文佳作例子」
credit: unsplash @alfonsmc10
分段格式 + 每段主旨、內容範例
記敘文作文高分格式技巧：「起承轉合」
記敘文要高分好睇成篇文嘅情節鋪排合唔合理，同埋成件事嘅發展能唔能夠引人入勝。因此，文章入面嘅「轉捩點」係一大要素，做唔做到深化全篇文嘅層次同埋深刻咁帶出立意都係睇個轉捩點靚唔靚。
範文格式例子
| 起：第一段 | 運用倒敘法開頭，透過描寫周遭冰冷凄慘嘅環境嚟帶出同允行友誼破裂嘅慘況。 |
| 承：第二至三段 | 透過描繪自己係個自私自利嘅人，終導致同允行反目。 |
| 轉：第四至五段 | 先描述自己不知悔改，再透過一啲契機而開始反思（例如見到其他同學、親友、社會上嘅衝突），猛然驚醒明白自己嘅行為係幾咁唔要得，並嘗試補救。 |
| 合：第六段 | 喜劇或者悲劇作結都得，視乎邊個更能夠帶出立意。 |
議論文作文高分格式技巧：「層層遞進」
議論文要有說服力不外乎用層遞嘅方式帶出立意，以「總分總」嘅結構同埋例子嚟以小見大，展示出民胞物與嘅人文情操。
範文格式例子
| 第一段：概論 | 定義何謂「想想別人」並揭示全文分論點 |
| 第二段：個人層面 | 論點一：「想想別人」有助改善人際關係。論據：設例、朋友家人例子 |
| 第三段：社會層面 | 論點二：「想想別人」有助社會和諧。論據：新聞、社會現象 |
| 第四段：國家層面 | 論點三：「想想別人」有助世界和平。論據：古人偉人事例，如《廉頗藺相如列傳》 |
| 第五段：駁論 | 分析喺個人、家庭、社會層面唔識「想想別人」嘅禍害。 |
| 第六段：總結 | 總括論點，帶出立意。 |
2019 寫作卷題目二 5** 級作文技巧
credit: unsplash @fabrizioverrecchia
【記敘文：寓情於景 + 倒敘 + 引題法開頭】範文佳作例子：
我獨自坐在空蕩蕩的教室裡，深秋的晚風隨著半開的窗戶鑽了進來，絲絲的寒冷也流進了教室。這寒意似乎是無縫不入，轉眼間，我的身體便感受到了一陣刺骨的寒冷。我不禁裹緊了身上的衣服，但似乎毫無用處，「以後你別再找我了！我不想和你這樣的人合作！」我把允行摔門而去之前說的話又喃喃地重複了一遍。在空無一人的寂靜中，我的聲音好像被無限放大了，彷彿一下又一下的鼓擊，沉重地敲擊著我的耳膜。眼角的餘光見到了座位前被揉成一團的紙團，這好像我和允行的友誼，因為我一次不計後果的脾氣火山爆發，我們的友誼也成了一團揉皺的紙團，再也回不到從前。「當你與人爭鬥時想想別人，別忘了那些想要和平的人。」這句詩突然闖入腦海，如今的我讀來只覺得諷刺，但又覺得這是一個對自我的警醒，人總是需要學會換位思考，在自己爆發脾氣之前，多想想別人的想法以及會對別人造成的傷害，那麼就可以在鑄成大錯之前及時煞停，就不需要在失去了珍貴的關係之後，才空有一腔悵恨，但是再也回不到從前。
「寓情於景」嘅手法用起記敘描寫文嘅開首能夠先聲奪人，就好似大家煲劇或者睇戲咁，精彩刺激嘅開頭會令觀眾印象深刻，DSE 作文都一樣，特別係考官無咁多時間慢慢批改試卷，一個好嘅開頭就能夠吸引考官停喺你份卷上面耐啲，慢慢欣賞你份卷其他精彩嘅地方，寫作卷高分嘅機會都自然多啲啦。
【議論文：情理交融 +文言範文的應用】範文例子：
《廉頗藺相如列傳》中，藺相如在回答門客詢問他是否因為恐懼而對向他惡言相向的廉頗處處避讓時，藺相如的解釋是他不是因為懼怕廉頗而處處避讓，只是從大局作出發點：強大的秦國之所以不敢向趙國進軍，是因為有廉頗於藺相如同時坐鎮趙國。如果他與廉頗相爭，就會如同兩隻老虎爭鬥，爭鬥的結果就是兩隻老虎最後都不能夠生存。他之所以這樣做，是把國家的利益放在了自己的私仇之上。藺相如的想法是出乎意料之外，又在情理之中的。難道藺相如被指罵時不感到羞辱嗎？不想一雪前恥嗎？但他沒有忘記自己身後還有老百姓要照顧，兩位重臣展開衝突最終只會苦了老百姓，故此他選擇忍氣吞聲，不作反擊。在日常生活中，我們常常因為自己的情緒而妄顧別人，與同學吵架而影響課堂秩序、與同事意見不合而影響工作進度，不懂得站在他人的角度和立場來考慮問題，被情緒衝昏頭腦。因此，藺相如的胸襟和兼愛他人的做法絕對值得我們敬佩和效法。
議論文其中一個高分嘅要訣就係投入感情嚟做論證，即係「情理兼備」，以文筆同修辭手法超凡脫俗，因為寫議論文嘅同學大多平鋪直敘咁說明觀點，所以如果大家能為成個論證加啲色彩實會令考官感到眼前一亮。
