要完全扣到 2020 DSE 中文作文題目「嚴以律己，寬以待人」嘅難度相當高，唔怪之得只有 29% 嘅同學揀呢條題目嚟寫，等我同大家講下呢條題目嘅作文要求，同埋有咩描寫抒情嘅寫作手法可以用落去啦！入面仲有啲範文例子俾大家參考下，咁就唔使驚自己理解錯誤啦！
目錄
DSE 中文作文考評局評核準則
關鍵概念說明
credit: unsplash @jannerboy62
「嚴以律己，寬以待人」：
用嚴格嘅標準或者嚴謹嘅態度嚟約束自己，但係對待其他人就會用寬鬆嘅標準或者寬容嘅態度。要留意句子前後嘅對比，作文嘅時候記得兩邊都要用差唔多嘅筆墨寫作，唔好淨係講一邊啊。
用嚴格嘅標準或者嚴謹嘅態度嚟約束自己，但係對待其他人就會用寬鬆嘅標準或者寬容嘅態度。要留意句子前後嘅對比，作文嘅時候記得兩邊都要用差唔多嘅筆墨寫作，唔好淨係講一邊啊。
寫作要求
credit: unsplash @2mduffel
基本上係敘事、描寫為主。可以透過敘事嚟呈現人物嘅精神面貌，但重點要放喺對人物言行嘅刻畫描寫。
敘事嘅方式隨意選擇，順敘、倒敘、插敘、散敘都可以用，而記敘、描寫同抒情三部分嘅「詳略輕重」同「表達形式」無硬性規定，只要能夠呈現人物嘅特徵同情感就得喇！言行、情感同體會需要合理咁扣連，千祈唔好穿鑿附會。
中文卷二評分關鍵：取材與立意
credit: unsplash @smartphotocourses
取材一：人物言行
記敍事情可以選擇集中記敍一件事，或者透過記敍多件事嚟刻劃人物嘅說話同行為。作文記住要邊寫邊緊扣題目嘅兩大寫作關鍵：對象（「自己」同「別人」）、標準（「嚴」同「寬」）
取材二：「律己嚴」和「待人寬」
文章想攞到高分，取材方面就要做到兩點：
第一點 - 鮮明咁呈現「律己嚴」同「待人寬」嘅對比關係；
第二點 - 細緻咁刻畫事件嘅細節。
可惜嘅係，當年 DSE 呢題表現一般嘅同學大致上有幾個問題，例如無意識到「律己」同「待人」係兩件完全唔同嘅事、「律己嚴」同「待人寬」之間個對比關係唔明顯、事件記敘太多枝節等。
立意：對「律己嚴、待人寬」美德的理解／體會
同學記得唔好對「律己嚴、待人寬」嘅美德發表任何負面評價，因為咁樣係錯誤理解「美德」呢個詞語 (美德嘅意思係美好高尚嘅品德，值得世人欣賞同效法)，寫錯嘅話可能會被判離題添。
要脫穎而出，就要寫出對呢種美德嘅深刻體會，學習呢種「自己奮發不怠，對人關懷體諒」嘅君子特質。反思嘅部分可以喺記敘、描寫後抒懷議論，亦可以邊抒情、邊議論。
DSE 中文卷二 5** 作文技巧分析
如何深刻地回應 DSE 作文題目《嚴以律己，寬以待人》
credit: unsplash @ro_ka
作文卷要喺審題、取材、立意三方面都完全命中考評局 marking scheme 最核心嘅要求先有機會 5**。
審題
「準確審題」係中文卷二 Lv 5+ 嘅第一步。
好多同學當年就係審錯「嚴以律己」或者「寬以待人」，搞到作文個分局限咗喺 Lv4 -，有啲同學以為外表嚴肅，對人嚴苛就係「嚴以律己」；又有啲同學以為關愛他人、對人友善等於「寬以待人」，連題眼都捉唔住嘅話注定同 Lv5+ 無緣。
取材
「寬」同「嚴」呢個相對概念需要同學用同性質嘅事情嚟做對比，列寫幾種「嚴於律己」嘅情形，再鋪敘幾個「寬以待人」嘅事件嚟對照；如果唔做對比嘅話，個人物形象就會唔夠鮮明，做唔到佳作。
注意！敘事嘅重點係對人物言行嘅描寫，唔好太側重於交代事件嘅前因後果，同時亦要注意景物描寫、反襯等部分嘅詳略分佈。
立意
「抒發個人體會」同「反思自己嘅不足」係基本。
更上一層樓嘅係指出呢種美德係「君子立德」嘅表現，深化主題到「中華文化」嘅層面（當然唔好強行扣連中化啦）。為咗令全文佈局同立意完美配合，考生構思寫作大綱嘅時候應該先諗好個立意昇華，再慢慢諗記敘、描寫同抒情嘅部分嚟配合「立意」。
人物描寫手法 (語言描寫、肖像描寫、動作描寫)
credit: unsplash @timbog80
範文例子：
「允行，我們已經連續練了兩小時琴，要休息一下嗎？」早已疲累不堪的我急忙答應以逃離這片「鋼琴火海」。兩星期後我和一心就要作為音樂系學生，在香港大會堂進行雙人鋼琴演奏，我們為此正在加緊訓練。可惜的是，我和一心琴藝上的差距猶如凡人與天使的距離：一心在學系裹有「鋼琴公主」的稱號，是最優秀的學生，每當她彈琴定能吸引人們駐足傾聽。她靈巧的手指在鋼琴的鍵盤上一旦開始彈奏，便像是把聽眾拉入劇場般使人沉醉，琴聲時而奔放激情、時而委婉細膩，變幻如雲卷雲舒的琴聲緩緩流出，如天鵝湖中央獨舞的公主，令人神往，使人陶醉，這層層泛著漣漪的琴聲伴隨我們一眾師生走過無數春去秋來。「對不起，一心。經常要妳遷就我的進度......」「不要緊，我知道你很拚命練習，謝謝你，允行。」我知道，妳是怕我跟不上才故意放慢彈琴速度的，謝謝妳，一心。
上面個段用咗幾種唔同嘅人物描寫手法：
先用語言描寫以對話入題，再用肖像同動作描寫嚟帶出「我」對一心嘅崇拜，以及我哋之間才能嘅差距，最後直接抒情講出「我」對一心嘅正面評價。成段人物描寫嘅目的就係刻畫一心「鋼琴公主」嘅形象，以及一心識得「寬以待人」。
借事抒情 / 借物抒情 / 詠物抒情 / 緣情寫景
credit: unsplash @ebuenclemente205
範文例子：
看到獨坐客廳一角的鋼琴，我不禁皺起眉頭，憶起多年來練琴的痛苦，為甚麼你總要折磨我？我決定提早出門避開它。往大學的路上我不斷反思自己入讀音樂系的原因，反思為何我會愛上鋼琴，明明它帶給我的只有練習和挫折。來到音樂室門外，當初如此渴求的座位如今在我眼中竟變得一文不值，昔日的熱誠和憧憬難道已在這課室裹消散殞滅了嗎？為何我連課室裹的椅桌和樂器也看不順眼？放下背包，手部的痛楚驅使我找音樂老師訴苦。「老師，我最近練琴練到手痛。」「這是重複性勞損吧，一心從中學開始已出現這種情況，你可以向她請教舒緩痛楚的方法。」甚麼？從中學開始痛？為甚麼這麼辛苦亦堅持彈琴？回音樂室的途中遠遠傳來縷縷琴聲，悠悠揚揚的琴聲從一心指間流瀉而出，似絲絲暖流淌過心間，柔美恬靜卻又令人迴腸盪氣。琴音環繞我的心窩，彷彿在我耳邊輕聲細語她的想法：縱然練琴萬分艱辛，我也不曾埋怨後悔。看見一心在空無一人的課室仍全神貫注地練琴，當日被音樂系取錄的喜悅、一直以來對一心的崇拜、對自己的憤怒，一一湧上心頭。
呢段用咗四種借事同借物抒情嘅手法嚟深化「我」同一心態度上嘅對比：
先用詠物抒情同緣情寫景嘅間接描寫手法嚟帶出「我」「待己寬」，再用借事抒情同觸景生情嚟帶出一心「律己嚴」。
結合埋上一段，不但突顯咗「我」同一心態度上嘅分別，亦顯示出一心有「嚴以律己，寬以待人」嘅美德。
