【2024 DSE 考生須知】考試前最後準備!必備應考物品Checklist

AfterSchool
AfterSchool 2023-9-15 35,003
2024 DSE 開考啦!Afterschool特登提提大家做好最後準備,更為同學整合DSE應考物品checklist,收音機同耳機等物品都記得帶齊呀!
辛苦咗咁耐,嚟到 2024 DSE 考試嘅大日子啦!喺考試前夕,你需要知道到底要帶咩去應考 DSE!做好全面準備,先唔會白費之前溫習嘅努力!AfterSchool 特登喺度幫大家整合咗 「DSE 應考物品 checklist」,提提大家 DSE 要帶啲咩,教各位同學仔點做好應試準備。收音機、耳機、准考證等呢啲物品都一定要帶齊,千祈唔好大意!

應考物品 Checklist

准考證

准考證係考 DSE 最重要嘅應考物品,就等同於入試場嘅入場證,冇帶有機會考唔到試㗎!同埋,千祈唔好貪玩同准考證打卡,有機會被取消考試資格

身分證正本

身份證同准考證同樣重要,冇帶有機會冇得考試㗎!

入好 program 嘅計數機

考需要計數嘅科目,記得要準備好適用於 DSE 嘅計數機,考評局標志要清楚,機身亦唔可以有書寫痕跡。如果有好多 formula 要記,不妨係考試前將程式入落計數機先,考試就方便好多啦!
(小編以前有同學考 LS 通識嗰陣冇計數機,然後佢就。。。所以大家帶定計數機實無壞,千祈唔好貪一時之方便!)

DSE Radio 收音機 + 耳筒

credit: Akshay
credit: Akshay
記得檢查自己考場係紅外線考場定非紅外線考場。
如果係紅外線考場,只需要帶備插頭直徑 3.5 毫米並有 2 個絕緣環嘅耳機接駁試場提供嘅接收器,手提電話附送嘅耳機普遍唔適用於 DSE 聆聽考試。
如果係非紅外線考場,記得帶合適 DSE 嘅收音機,例如 SONY 收音機 (Sony SRF-S84)或者 Philips 收音機 (Philips AE1530),都係唔少考生中意用嘅 DSE 考試收音機型號。BTW 記得仲要帶埋駁到收音機嘅有線耳機呀!千祈唔好帶錯無線藍芽耳機呀!

文具

黑/藍原子筆、間尺、塗改帶、鉛筆同擦膠等基本文具一定要準備好啦!

特定科目用具

特定科目例如視藝科,記得帶齊畫具、參考資料呀!

記得帶足夠嘅現金同八達通,作爲交通費用 (有現金喺身,有咩事都可以搭的士啊嘛)。

手提電話

credit: CardMapr.nl
credit: CardMapr.nl
方便揾路同向人求助,但入到考場記得熄機呀!最好就 set 靜音 + 勿擾 + 飛航模式,先再熄機。

外套 + 紙巾

考場冷氣可能比較大,帶件外套就唔怕太凍影響考試表現啦!順便帶埋紙巾,以備不時之需。

水 + 少量食物

因為疫情,所以教育局要求學校停用飲水機,大家記得要帶水啊!另外因為部分科目嘅考試時間比較長,同學仔可以帶定少少食物,喺休息時間食(小編以前考 DSE 嗰陣,成日都聽到隔離位個肚響......)。

口罩

credit: Markus Winkler
credit: Markus Winkler
一!定!要!帶!口!罩!
(小編冇嘢補充)

最後溫馨提示

1. 確認考試日期同時間,寧願早到好多,都一定唔可以遲到!
2. 確認考試地點,唔好去錯考場呀!(考試前一日就已經要 check 清楚)
3. 前一晚要有充足嘅睡眠,養足精神考試!
4. 唔好太擔心,放鬆心情反而可以展示最好嘅狀態!
相信各位 2024 DSE 嘅同學仔呢刻都非常緊張,希望呢篇 blog 可以提到大家做足試前準備,幫到你哋更順利應考 DSE啦!

睇完呢個 checklist 就唔使擔心因爲大頭蝦而影響考試表現啦!加油!
 
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool

AfterSchool 是一個針對DSE而設的網上補習平台,課程涵蓋多個 DSE 科目,讓同學足不出戶就可以享有優質教學。註冊用戶人達 50,000 人,當中超過四分之一學生為應屆文憑試考生,是全港最大型網上補習平台。