【中學面試】Interview 自我介紹、中學面試題目攻略|必學面試技巧!

AfterSchool
AfterSchool 2021-7-20 63,628
中學面試技巧?Interview 自我介紹要點準備?英文面試點算好?AfterSchool 為升中同學搜羅面試問題同面試準備方法,幫助你喺芸芸小六學生裏面脫穎而出!
升中面試可能係好多小學生第一次面對嘅個人面試,而要升讀心儀嘅中學,就一定要過好中學面試 —— 一個可以令你喺芸芸小六學生脫穎而出嘅一關。AfterSchool 小編今日同大家分享關於中一面試嘅資料,包括 Interview 自我介紹、面試技巧、面試問題、面試班等等,希望幫助各位小六學生同家長準備好升中面試!

升中面試早期準備

出席中學開放日、中學舉辦嘅升中資訊日

除咗喺網上睇多啲中學嘅資料,同學同家長都可以由中學舉辦嘅中學開放日升中資訊日,切身了解學校嘅資料、環境、在讀學生表現等等其他重要因素。
親身出席呢啲活動可以俾同學同家長知道,更多唔會喺網上得到嘅資訊。同學亦都可以喺呢啲機會當中,感受一下嗰間中學嘅氛圍,從而判斷嗰間中學係咪一間適合自己嘅學校。

了解中學辦學理念、收生準則

喺選擇中學嘅時候,畢竟喺自行分配嘅階段,每個學生都只可以選擇 2 間小學,所以家長不妨同小六同學一齊睇睇各間心儀中學嘅辦學理念,喺了解完之後,先作出選擇。
同時,為咗增加成功考入心儀學校嘅機會,家長同同學可以留意學校嘅收生準則,再配合同學嘅長處同弱點,先決定要報考邊間中學。我哋睇睇以下情況:
學校收生準則
中學 A50% 小五、小六校內成績
25% 面試表現
25% 小五、小六操行、獎項、課外活動
中學 B25% 小五、小六校內成績
50% 面試表現
25% 小五、小六操行、獎項、課外活動
如果同學對自己嘅面試表現比較有信心,咁同學可能將中學 B 放喺較高志願嘅位置;
相反,如果同學覺得自己嘅學業成績對自己考入心儀中學有利,咁同學可能將中學 A 放喺較高志願嘅位置就會比較好。同學喺報考中學之前記得考慮多方面嘅因素!

填寫報名表格

同學最好親自填寫報名表格,而呢樣嘢可以俾學校感受到同學報讀嘅誠意。
另外,填寫報名表格嘅時候,字體要整潔、美觀,務求令學校對同學留下一個好嘅第一印象
Credit: unsplash @mkvandergriff
Credit: unsplash @mkvandergriff

面試技巧大全!中學想要啲點樣嘅學生?

記得為面試做好充足準備~

中學當然想收一啲有誠意同能力考入去嘅學生,而同學有冇為面試做好準備就充分反映出同學嘅誠意。所以,同學一定要準備好 1-2 分鐘、廣東話、英文、普通話嘅自我介紹。

中英 Interview 自我介紹
同學嘅面試自我介紹可以包括以下嘅 points:
  • 基本個人資料(姓名、小學名稱、住邊區、家庭成員)
  • 自己鍾意嘅科目、原因
  • 平時喺小學嘅職責(例如風紀、班長、制服團隊、音樂與體育隊伍)
  • 平時參與嘅課外活動、參與嘅原因
  • 個人成就(例如獎項)
  • 自己嘅優點、缺點,同埋自己做咗啲咩嘗試改善自己嘅缺點
  • 報讀嗰間中學嘅原因
  • 自己可以為嗰間中學作出嘅貢獻
Credit: unsplash @wonderlane
Credit: unsplash @wonderlane

面試 Dos & Don'ts

升中面試時間唔長,所以同學俾中學老師嘅第一印象尤其重要。所以同學記得要 (1) 保持儀容整潔; (2) 講嘢嘅時候談吐有禮、大方得體; (3) 保持自信、面帶微笑,令你留低一個好嘅印象畀老師。另外,面試前充足嘅休息亦都會幫助你喺見老師嘅時候表現得好啲!
 DosDont’s
禮貌/禮儀面試衣著:整齊小學校服
帶備雨傘、手錶、紙巾
有禮貌(例如同老師、其他考生講唔該)

進入面試場地嘅時候同老師講「你好/早晨/午安」;離開嘅時候講「拜拜/唔該老師」

如果會見老師嘅時候需要有任何文件嘅交手,切記要雙手接收或遞交文件
保持微笑

早 15 分鐘到場,熟習環境
得到面試老師嘅批准後,輕力拉凳坐低;如果老師冇示意同學可以坐低,同學可以有禮貌咁問老師可唔可以坐低

坐嘅時候保持腰板挺直,雙腳唔好擘太大,避免不必要嘅身體動作
只對面試老師有禮貌、微笑
遲到、或剛剛好趕到
參與面試時嘅態度、表現積極、投入:努力參與討論,就算唔識答問題,都嘗試畀一個合理嘅答案,表現出投入參與嘅意願

小組討論嘅時候有適量嘅講嘢次數,期間要聆聽其他考生嘅觀點,並給予回應

控制自己嘅情緒

同老師、其他考生保持眼神接觸

不亢不卑、處變不驚

回答或者發言嘅長度適中
答問題嘅時候,除咗答問題,切記要為自己嘅答案或者諗法解釋

具備獨立思考能力,能夠喺討論或者交談當中表達自己嘅諗法

回應具創意會令老師留下深刻印象!
過分沈默、被動

過分著重主考官嘅反應

搶住講嘢,唔俾機會其他考生

過分想表現自己,小組討論嘅時候,過分攻擊其他考生嘅觀點、太執意爭取討論嘅領導地位

過分吹噓自己

回答面試問題嘅時候背誦預先準備嘅答案

胡亂作答題目(尤其係面對唔識答嘅題目嘅時候)

回答問題或者參與討論嘅時候運用太多助語詞、口頭禪

問一句,答一句
 

疫情下嘅中學面試,有咩要注意?

穿著適量防疫裝備
雖然而家疫情肆虐,但係小編建議要去中學面試嘅同學,穿著適量嘅防疫裝備就足夠。首先,面試嘅時候切忌標奇立異,所以配戴大型口罩未必係最好嘅選擇。
同時,同學如果穿著過多嘅防疫裝備,可能令中學覺得同學唔信任學校嘅防疫措施,反而得不償失。
另一方面,同學對防疫措施唔可以鬆懈,一方面係要保護自己,另一方面係要俾中學知道自己有防疫意識
所以,同學只要正確配戴普通外科口罩、適當時用酒精搓手液清潔雙手,咁就萬無一失!
Credit: unsplash @Gabriel Sollmann
Credit: unsplash @Gabriel Sollmann

面試常見形式

一對一面試 / 二對一面試

一對一或者二對一嘅面試,其中一個設立目的係為咗睇吓學生嘅抗壓能力。小學生去到中學面試難免會緊張,而當學生需要獨自面對唔熟悉嘅老師,講解自己嘅能力同想考入呢間學校嘅原因,呢種緊張、焦慮就更加會升級。
不過,有啲中學會喺呢 part 設立啲好難嘅題目,目的通常都係想測試同學面對難題時嘅反應。所以,同學只要準確表達自己合理嘅諗法,並且展現出投入參與、回答問題嘅意願,咁就應該冇咩大問題。

小組面試

除咗個人嘅面試,小組討論都係常見嘅面試方式,同學都要為呢 part 做好準備。
中學要設立呢嘅面試模式,通常都係想睇睇同學同其他同學中英文嘅交流、溝通嘅能力,同時睇睇同學係咪一個有禮貌、尊重其他同學嘅人。
同學喺小組討論呢 part 要積極投入參加討論,適量同適時表達自己嘅意見。同時,同學要記得呢個係一個小組討論,而小組討論好著重各位同學之間嘅交流。所以,千其唔好為咗得到更多嘅機會而過度爭取發言,甚至打擊其他同學嘅論點,弄巧反拙。
Credit: unsplash @priscilladupreez
Credit: unsplash @priscilladupreez

常見面試題目一覽

個人、生活篇

  • 你點解想讀呢間學校?
  • 你長大之後想做啲咩工作?你長遠有啲咩目標?
  • 你平時參加啲咩課外活動?
  • 你對中學生活有啲咩期望?你會做啲咩去令你嘅中學生活更加充實?
  • 你會點樣適應中學嘅全英文教學?
  • 你覺得自己有啲咩缺點?你付出過啲咩努力去克服自己嘅缺點?
  • 你覺得自己最強同最弱嘅科目係咩?你付出過啲咩努力去克服自己唔擅長嘅科目?
  • 請介紹一個你最好嘅朋友。
  • 請用一種動物去形容自己。
  • 你平時星期六日會同屋企人做咩?
  • 平時你會做啲咩減壓?
  • 請分享意見你喺小學最難忘嘅經歷。
  • 請分享意見你從課外活動/義工活動學到嘅事。
  • 你覺得中學生係咪一定要升讀大學?
  • 你覺得自己係咪一個港童?點解?
  • 你平時會幫手做啲咩家務?
  • 你平時放咗學之後會做咩?
  • 你最鍾意嘅家庭成員係邊個?

社會時事、想法篇

  • 你有冇用社交平台?你覺得社交平台對年輕人有啲咩好處同壞處?
  • 你覺得家長應唔應該限制子女用電話嘅時間?
  • 你覺得家長應唔應該喺子女嘅電話裝 GPS 裝置?
  • 你覺得電子課本應該取代傳統課本嗎?
  • 你有冇試過喺網上識朋友?
  • 你有冇睇報紙嘅習慣?最近有咩新聞令你印象深刻?
  • 香港正係面對人口老化嘅問題,你覺得呢個問題會帶嚟啲咩後果?
  • 你覺得香港邊種污染問題最嚴重?
  • 你覺得科技發達,會唔會影響人同人之間嘅溝通?
  • 如果你嘅生命只係剩返 1 日,你會點樣過呢一日?
  • 你覺得一個優秀嘅學生係具備啲咩條件?
  • 中學生應該談戀愛嗎?
  • 如果要設立一個新嘅節日,你會設立一個咩節日?

閱讀篇

  • 請介紹你最鍾意嘅一本書。
  • 你有閱讀嘅習慣嗎?你平時有冇睇英文書?

思考、創意題

  • 點解阿華田分遇到熱水會溶?
  • 政府想為新嘅 $1500 進行設計,你覺得應該加入啲咩元素?
  • 你會用啲咩動物去比喻自己?
  • 如果你可以確定學校一間新嘅房間嘅用途,呢間會係一間點樣嘅房?

Credit: unsplash @Etienne Giradet
Credit: unsplash @Etienne Giradet

升中面試班——報唔報好?

升中面試競爭激烈,坊間舉辦唔少嘅升中面試班,希望可以幫助小六同學喺中學面試有理想嘅表現。小編整合咗參加升中面試班嘅好處同壞處,同學同家長都可以自己審視一下自己有冇需要參加升中面試班!
好處壞處
升中面試班俾好多機會同學感受面試嘅氛圍,所以同學喺真正面試嘅時候普遍會冇咁緊張

俾小六,甚至小五同學體驗一下中學面試嘅感覺

為同學準備大量面試問題,當中包括各名校嘅升中面試題目,可以俾同學不斷練習回答面試題目
升中面試班往往為同學提供一式一樣嘅面試答案,但機械化嘅答案係升中面試嘅大忌
 

家長可以點樣幫子女準備面試?

家長可以喺屋企為子女進行「模擬面試」——例如扮演主考官,問子女一啲面試嘅必問問題,包括中英自我介紹、想升讀嗰間中學嘅原因。
家長可以就住子女嘅 (1) 回答內容、(2) 儀態、談吐舉止,為子女嘅表現提供改善建議,並且每星期練習,令子女熟習面試嘅要點。
另外,家長亦可以為子女安排小組討論面試嘅機會。家長可以搵搵 3-4 個其他家長嘅子女,組成一個「面試練習組」,主要進行小組討論嘅練習。雖然搵 3-4 個其他小六同學已經足夠,但係如果家長可以搵到就讀唔同小學嘅小六學生,子女或者可以喺練習嘅過程中有更多得著。
Credit: unsplash @cdc
Credit: unsplash @cdc
升中面試係所有小六學生共同面對嘅難題,而小六學生喺呢年除咗面對沈重嘅呈分試壓力、排山倒海嘅功課量、緊湊嘅學習時間表、甚至其他課外活動,仲要額外花時間選擇中學、學習面試技巧、練習面試,實在唔容易。
小編想喺呢度同所有小六同學講聲:加油!中學面試雖然睇落係難過嘅一關,但試諗吓,喺過咗呢關之後,你就可能可以喺自己心儀嘅學校讀書,亦都會有好好嘅中學同學陪你走過中學嘅六年,甚至更長嘅時間。
最後,因為面試表現直接影響升中排位結果,所以準備同應付面試好重要。但係,喺準備面試過程途中,同學可以更了解自己,包括自己想要一個點樣嘅將來、自身性格嘅優點缺點、理想嘅中學生活等等。所以,喺準備面試期間,與其只係諗一啲中學老師會鍾意嘅「標準面試答案」,然後將呢啲冇靈魂嘅答案死記硬背,不如趁呢個機會認識一下自己,組織一下自己嘅諗法,然後喺面試答問題嘅時候,答出一個真誠嘅答案。咁樣對自己嘅面試表現同個人成長都會有好處。

升中面試 Q&A

升中面試可以點準備?
同學同家長可以練習面試嘅必問問題、中英自我介紹。同時,同學都要練習一下面試嘅時候應有嘅態度。
升中面試自我介紹有咩要講?
升中面試自我介紹冇話有咩一定要講嘅,不過大家普遍會喺自我介紹部份講自己嘅基本資料,包括姓名、家庭、所讀小學、課外活動、自己嘅優點缺點、報讀嗰間中學嘅原因。
報唔報中一面試班好?
中一面試班可能可以幫助同學練習中學面試必問對答,但係面試班難免向同學灌輸一啲機械化嘅答案,而機械化答案係面試嘅大忌,所以大家喺報讀有關課程之前,記得好好衡量課程嘅利弊啊。
Credit: unsplash @ramone
Credit: unsplash @ramone
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool

AfterSchool 是一個針對DSE而設的網上補習平台,課程涵蓋多個 DSE 科目,讓同學足不出戶就可以享有優質教學。註冊用戶人達 50,000 人,當中超過四分之一學生為應屆文憑試考生,是全港最大型網上補習平台。