【DSE Econ】經濟學入門概念攻略：機會成本 Opportunity Cost

Econ 抽象概念多的是，你仲記得咩係機會成本 (Opportunity Cost) 嗎？作為基本概念，機會成本喺 DSE Econ MC 成日出現㗎！所以一定要清 concept！今日 AfterSchool 就同大家講解一下「機會成本」呢一個咁重要嘅 topic！ 點解 Opportunity Cost 呢課咁重要？ 機會成本 (Opportunity Cost) 係 DSE Econ 微觀經濟學嘅第一課，相信各位 Econ 嘅同學仔都一早學過！偏偏，好多人都低估咗「機會成本」呢個概念，誤以為背咗定義就等於學識晒...... 其實，機會成本係微觀經濟學 最難 嘅概念！ 點解？因為大家對全部成本 (Full Cost) 概念冇全面充分嘅理解！ source: unsplash @krakenimages 機會成本呢個 Topic 喺 DSE ECON 每年都出 1-2 條 MC，再加 1-2 條 LQ (3-6分)，所以佔分可以高達 10 分！但睇下啲數據，我哋就會發覺呢個大家以為好簡單嘅課題，命中率低至 3X%，所以機會成本 Opportunity Cost 可以話係 DSE ECON 失分大位！ 呢個 Concept 亦涉及唔同 Topics，例如貨幣市場 (Money Market)、國際貿易 (International Trade)、貿易理論 (Trade Theory) 等等，可以話係 DSE Econ 嘅基石。 所以今次我就想幫大家清一清呢個咁重要嘅 Concept，希望各位睇完學識後，喺 DSE Econ 升多一個 Level。 機會成本定義 同「稀少性」(Scarcity) 嘅關係 講定義之前，先同大家講講點解會有機會成本 Opportunity Cost 呢樣嘢。 其實「機會成本」同「稀少性」(Scarcity) 有著不可分割嘅關係。因為稀少性嘅存在，所以資源係有限，令我哋冇辦法喺同一時間，以同樣資源去滿足所有慾望。因此，我哋要喺有限資源入面，選擇先以該資源滿足其中一個欲望，並放棄其他欲望。 當「選擇」出現嘅時候，就會有「機會成本」。 定義 source: unsplash @Timothy Eberly 講咗咁耐，所以到底機會成本 Opportunity Cost 嘅定義係乜？ “Opportunity Cost is the highest-valued option forgone.” 「機會成本指被放棄的選擇中，價值最高的一項。」 其實我相信就算中三嘅經濟學生都會答到呢個定義，但機會成本類題目並唔係單單背條定義就可以！我哋仲要理解埋金錢成本 (Monetary Cost)、時間成本 (Time Cost)、沉沒成本 (Sunk cost) 同全部成本 (Full Cost) 嘅呢類經濟概念。 唔使心急！我跟住會慢慢同大家講解，不過同學可以先試下做下邊呢條入門題目，睇下自己係咪已經理解咗基本概念先。 題目例子 source: unsplash @Honey Yanibel Minaya Cruz Question： 小明升讀大學，可在三科中選讀其一。現根據他的喜好分列如下： 第一喜好： 文學士 第二喜好： 商學士 第三喜好： 理學士 小明升讀大學時，選讀文學士的機會成本是什麼? Answer： 由於小明唔可以喺同一時間選讀三個科目，所以佢需要喺以上三個喜好中作出選擇。根據以上次序，小明會選擇修讀文學士，咁所以小明喺選擇中放棄嘅最高選擇係咩？ 咁明顯就係商學士，而唔係「商學士 + 理學士」或者「理學士」，因為商學士係被放棄嘅選擇中，價值最高嘅一項。 全部成本係啲咩嚟? 全部成本公式 Full Cost = Pecuniary Cost (explicit cost) + Non-Pecuniary Cost (implicit cost) 全部成本 = 金錢成本 (顯性成本) + 非金錢成本 (隱含成本) 非金錢成本 非金錢成本 (隱含成本) 其中一個例子係「時間成本」，即係我想得到嘅嘢必須支付以時間為單位嘅代價。 但大家注意！其實「時間成本」亦可以以金錢計算，例如以所放棄嘅收入計算。 題目例子 「全部成本」呢個概念，基本上大家可以理解為： 首選嘅全部成本 = 首選嘅金錢成本 + 次選嘅價值 都係唔明? 咁不如直接試下做以下呢個例子啦。 Question： source: unsplash @insung yoon 假設你有三小時的閒暇時間，而如何運用這三小時的喜好次序如下： 首選：去戲院看電影 次選：在家看電視節目 第三選：讀經濟學的課本 如果電影的票價是 100 元，則你看電影的機會成本是甚麼? Answer： 全部成本 = 金錢成本 (顯性成本) + 非金錢成本 (隱含成本) = 100 + 在家看電視節目 沉沒成本係啲咩嚟? source: unsplash @Jason Blackeye 雖然考評局表示無須運用「沉沒成本」(Sunk Cost) 一詞，但同學亦要明白沉沒成本係唔計算喺機會成本之內！ 因為計算機會成本嗰陣，往往都要喺今日或未來作出選擇；而沉沒成本係過去所作出決定嘅機會成本，已成事實，冇辦法改變。 所以「沉沒成本」唔係成本嚟㗎，大家一定要注意呢點！ 沉沒成本例子 如果我去 Coffee Shop 用 $40 買杯咖啡飲，呢 $40 蚊就係我買一杯咖啡嘅機會成本 (假設時間成本為 0) ，但係我買完呢杯咖啡，我選擇飲用、送畀人、倒咗佢都唔應該畀個 $40 蚊影響到，因為個 $40 已經畀咗，唔可以收返。 即係個 $40 蚊係買咖啡嘅機會成本，同我選擇點用呢杯咖啡嘅機會成本係兩個唔同概念。 「成本 Cost」同「機會成本 Opportunity Cost」嘅分別 source: unsplash @Markus Winkler 唔少學生問我：其實咩係「成本」(Cost)、「機會成本」(Opportunity Cost)、全部成本 (Full Cost)? 呢一大堆成本其實有啲咩分別? 答案：無分別！！！ 佢哋只係同一個 Concept ，但係有唔同嘅 Terms 啫！所以唔好咁傻豬話「 吓! 乜考全部成本咩？」其實背後都係同一樣嘢嚟！！！ 順帶一提，有同學都會問我： 成本咪成本囉，點解要加機會呢兩個字上去？ 其實係因為機會成本係研究未來嘅決定，未發生嘅嘢，所以有機會呢個字出現。 咁當然要強調多次，其實都係同成本 (Cost) 係無分別嘅。 DSE 經濟學生常犯錯誤 以AfterSchool多年嘅補習平台經驗，好多學生都犯咗以下呢兩大錯誤： source: unsplash @Tadeusz Lakota 錯誤 1：覺得機會成本得一個選項 同學仔成日覺得機會成本得一個選項，但其實有啲情況可以有「多個選項」。 明明啱啱講機會成本就係價值最高一項，又點解無啦啦有多項呢? 呢啲情況通常會出現喺印花類題，一齊睇睇以下例子。 題目： 凡顧客每購物滿 $50，便以一張換物券，換下列物品： 印花（張數） 禮物 40 1 部電話 60 1 部手提電腦 100 1 張酒店門票 小明有 100 張印花。他選擇酒店門票的機會成本是什麼？ A. 1 部手提電腦 B. $5000 C. 一部手提電腦和一部電話 D. 一部手提電腦、一部電話和$5000 解題： 好多學生都誤以為答案就係 A，即係 1 部手提電腦，但係要知道小明係有 100 張印花！佢係可以同時換一部手提電腦同一部電話，所以「多項」選擇就出現咗。 但如果酒店門票、手提電腦、電話都分別要 100 張印花，咁小明選擇酒店門票，就係放棄手提電腦或者電話，因為 100 張印花只可以換到一樣嘢。呢個情況下，如果再問小明選擇搵酒店嘅機會成本係咩，就要視乎返小明嘅 preference 係咩啦，睇下佢到底鍾意手提電腦，定係電話多啲。 錯誤 2：對機會成本價格變化嘅敏感度不足 DSE 仲有一類題目係關於機會成本價格改變。題目會問你喺價格改變後，機會成本到底會上升，定下跌。 呢類題目對好多同學嚟講都有啲複雜，大家記得要打起 12 分精神！ 題目： 假設大明有 3 種水果想買，他的喜好分別如下: 第一喜好： 蘋果 (每個 5 元) 第二喜好： 橙 (每個 5 元) 第三喜好： 梨 (每個 5 元) 解題： 假設橙嘅價格由 $5 下降至 $2.5，而大明喜好不變，橙都係次選項目，咁橙嘅價格下降嗰陣，佢揀蘋果嘅機會成本就會上升 (由 1 個橙上升至 2 個橙)，亦即係話佢放棄嘅嘢多咗。 DSE Econ Past Paper Tips 雖然 DSE 年年都問「機會成本」，但問嘅問題都係大同小異，所以只要真係透切理解背後嘅concept，再透過操練 DSE Past Paper，掌握考評局嘅出題套路，你就一定可以答啱呢類題目。 去到呢度，相信大家都想知有咩 Econ DSE Past Paper 題目可以練習下「機會成本」呢個 Topic！所以AfterSchool喺度同大家推薦幾題出自唔同年份嘅 DSE Econ MC，希望可以幫到各位同學仔！ DSE 經濟 Past Paper (Opportunity Cost) 2012 DSE Econ MC Q2 2013 DSE Econ MC Q2 2014 DSE Econ MC Q1 2015 DSE Econ MC Q2 2016 DSE Econ MC Q3 2017 DSE Econ MC Q4 2018 DSE Econ MC Q3 2019 DSE Econ MC Q3 咁多年機會成本類題目呢，2014 年嘅命中率都比較低，只係得 32%。咁不如就攞呢條作為例子總括以上嘅概念啦。 著名足球隊曼聯到訪香港進行一場友誼賽，比賽的前一天，該球隊發現香港大球場的草地被連場大雨破壞，該隊考慮取消比賽，曼聯繼續在該惡劣草地進行比賽的機會成本會_________因為__________ 上升...球員受傷的機會增加了 上升....球隊很有可能表現差劣 維持不變....球隊已經支付了到訪香港的開支 維持不變...球員在香港所花的時間是相同的 答案係 A，因為惡劣草地會增加球員繼續比賽嘅風險成本。 而 B 唔啱，因為球隊很有可能表現差劣並不影響被放棄的選擇中，價值最高的一項，以及佢係會影響觀賞球賽嘅價值。 而 C、D 唔啱嘅地方，好明顯就係沉沒成本嚟啦，即係個啲支出咗嘅時間同錢，都唔應該影響到佢地繼唔繼續踢。 ---------- 見到AfterSchool分享咁多呢一課嘅 Concept ，大家就知道呢一課其實可以好難！但係好多同學都忽視咗呢一課嘅重要性 ，以為背完定義就天下無敵，但係其實概念就學到一塌糊塗。所以都想借呢次機會正一正大家個概念！ 如果大家想睇更加多概念嘅嘢，就可以留意下更多 AfterSchool 嘅 Blog！

【DSE Econ】經濟學入門概念攻略：機會成本 Opportunity Cost

下載AfterSchool

追蹤AfterSchool