【DSE Econ】DSE 經濟攻略：Money Market 貨幣市場

貨幣市場 Money Market 係 DSE ECON 每年都必出嘅 Topic，MC 同 LQ 加埋可以高達十幾分，佔全卷大約 10%。但我知道好多學生一見到呢類題目嗰陣會直接 skip 咗佢，咁就冇咗 2 個 level !! 唔少同學仔都同我反映過存款創造 (Deposit Creation)、貨幣政策 (Monetary Policy) 等概念複雜難明，一句講晒就係「咩都唔明，咩都唔識點計」。根據考評局數據，Money Market MC 題目嘅命中率可以低至 36%！ 為咗幫大家解決呢個問題，我會喺 AfterSchool 呢篇 blog 幫大家重建貨幣市場嘅概念，從根本糾正錯誤觀念! 一杯咖啡嘅時間解決存款創造問題，同時又可以掌握到貨幣政策對經濟帶來相關嘅影響，最尾仲要有 DSE 經濟冷門題型秒殺表演，咁正嘅嘢，你唔係唔睇到最後啊嘛？ 貨幣市場 (Money Market) DSE ECON 嘅世界入面，貨幣市場單純咁指「貨幣需求 Demand for money」同埋「貨幣供應 Money Supply」，而「利率 Interest Rate」就係兩者均衡後所得出。 換言之，政府可以透過控制貨幣供應去調控經濟，而公眾嘅貨幣需求亦會影響到利率，從而影響經濟。 貨幣需求 (Demand for money) Money demand refers to the desire of holding money (or cash) in hand 貨幣需求是指手頭持有貨幣(或現金)的欲望。 貨幣需求可以分成兩部分: 「交易性」及「資產性」 交易性貨幣需求 (Transaction demand for money, Mt) Mt is the demand for money arising from the use of money in making regular payments. 交易需求即持有貨幣作為一種交易的媒介。 交易性貨幣需求有 3 個常見關係要大家背咗佢: 1. 收入越高，交易性貨幣需求越大 當收入愈多，對正常物品嘅需求就會增加，所以保留作交易用途嘅貨幣就會愈多，反之亦然。 2. 收支越同步，交易性貨幣需求越少。 交易性貨幣需求嘅存在就係因為收支時間差距。如果收支同步，根本就不存在交易需求，因為人要進行交易之時，可以收入抵銷支出，唔需要再額外持有現金。 3. 電子貨幣越普及，交易性貨幣需求越少。 由於電子貨幣越普及，人唔再需要持有大量現金作交易媒介，佢地會將大部分嘅錢存入銀行或電子支付系統，所以交易性貨幣需求減少。 當然啦，有好多原因都會刺激到交易性貨幣需求呢樣嘢，以上三個原因就係 DSE ECON 常出嘅嘢。 交易性貨幣需求嘅圖： 從呢幅圖可以得知，「利率」同「交易性貨幣需求」係冇關係嘅！利率 Interest Rate 嘅變化並唔影響交易性貨幣需求 MT 嘅數量。 資產性貨幣需求 (Asset demand for money, Ma) Asset demand for money is a way to store up purchasing power by holding money that can avoid the risk of capital loss. 資產性貨幣需求是指持有貨幣去保存購買力並避免資本損失的風險。 credit: unsplash @rupixen 「資產性貨幣需求」同「利率」係反向關係，因為當其他投資嘅回報率(即利率)越高，持有「資產性貨幣需求」嘅代價亦越高，持有資產嘅需求就越少，反之亦然。 → 貨幣冇利息收入，亦冇資本損失 (capital loss) 嘅風險 → 其他資產 (如債券) 雖然有利息收入，但亦有資本損失嘅風險 唔明我講乜? 不如想像下，貨幣係你其中嘅一個資產。 名義利率愈高，你其他帶息資產嘅回報率亦會越高。呢個時候你會選擇減少持有貨幣 (因為冇利息)，而轉為持有其他資產。 相反，如果利息好低，你會持有更多貨幣，而唔會投資，因為低利息 (低投資回報率) 唔足以抵銷你嘅風險成本。 所以，資產性貨幣需求嘅圖係向右下傾斜： 資產性貨幣需求顯示了人們對其資產嘅「流動性的偏好」： 資產性貨幣需求係「提高流動性而持有貨幣」同「增加收入而持有其他資產 (例如債券)」之間存在嘅一個取捨 (tradeoff)。 所以資產性貨幣需求並唔係指「人們持有貨幣，去預備購買資產」！呢個 Term 嘅嘅重點在於「風險與回報嘅關係」。 貨幣需求線 貨幣需求線亦稱為「流動性偏好曲線」，係「交易性貨幣需求」 + 「資產性貨幣需求」(Md = Mt + Ma) 貨幣需求曲線係由「交易性貨幣需求曲線 Mt」同「資產性貨幣需求曲線 Ma」組合而成，所以你哋會見到呢條曲線係冇同 Y-截距相交，意味著無論個利率有幾高都好，我哋都要保留一部分嘅錢作「交易性」用途，而其餘部分都係跟返「資產性貨幣需求」而定。 所以你會見到，我哋個名義利率由 5% 上升至 10% 時，貨幣數量會由 Qm1 下降至 Qm2。 題目例子 (貨幣需求 Money Demand) 問題： 下列哪幾項會增加貨幣的需求？ ( 1 ) 信用咭越來越普及。 ( 2 ) 收入上升。 ( 3 ) 利率下降。 ( 4 ) 債券價格下降。 A. 只有 ( 1 )、( 3 ) B. 只有 ( 1 )、( 4 ) C. 只有 ( 2 )、( 3 ) D. 只有 ( 2 )、( 4 ) 解釋： (1) 信用卡等電子支付系統愈普及，交易性貨幣需求下降，因為啲人唔需要拎咁多錢進行交易。 (2) 收入上升，交易性貨幣需求上升，MD 增加。 (3) 利率下跌，資產回報率下跌，資產性貨幣需求上升，MD 增加。 (4) 債券價格與名義利率成反比關係，所以利率會上升，資產回報率上升，資產性貨幣需求下降。 所以呢一條答案好明顯係 C！ 貨幣供應 Money Supply Money supply = Cash held by non-bank public + Deposits 貨幣供應 = 非銀行公眾持有的現金 + 存款 credit: freepik 香港的貨幣供應 The Money Supply of Hong Kong 香港嘅貨幣供應定義有三個：M1 M2 M3。考評局通常會問貨幣喺呢三個供應之間嘅變化，所以大家記得三個都要背晒！ 貨幣供應定義一 (M1) M1 = C + DD C = 公眾持有的現金；DD = 活期存款 → M1 = 貨幣作為「交易媒介」。由於金融系統中流轉嘅貨幣唔可以用嚟交易，所以唔包喺 M1 度。 貨幣供應定義二 (M2) M2 = M1 + SD + TD + CoDLB SD = 儲蓄存款； TD = 持牌銀行的定期存款； CoDLB = 持牌銀行的可轉讓存款證 → M2 = 貨幣為一種「儲存價值工具」，係比較廣義嘅貨幣供應。 貨幣供應定義三 (M3) M3 = M2 + TDRLB + TDDTC + CoDRLB + CoDDTC TDRLB = 限制持牌銀行的定期存款； TDDTC = 接受存款公司的定期存款； CoDRLB = 限制持牌銀行的可轉讓存款證； CoDDTC = 接受存款公司的可轉讓存款證 → M3 = 都係視貨幣為一種「儲存價值工具」，但除咗 M1、M2 之外，佢亦包括一啲流通性較低嘅貨幣 (一啲較難喺短時間內轉換成現金的貨幣)，係香港最廣義嘅貨幣供應。 credit: jcomp 心水清嘅同學睇完上面就知道，M1 M2 M3 係按「流動性」去劃分。 另外，其實仲有一個 Term 叫 M0，即係「貨幣基礎 (Monetary Base)」 或者「高能貨幣 (High-Powered Money)」 M0 = C + R C = 公眾持有的現金；R = 銀行儲備 (Banking Reserve) M0 係反映「中央銀行貨幣發行數量」，而貨幣供應好多時都係佢嘅幾倍，因為會有存款創造。 題目例子 (貨幣供應 The Money Supply) 問題： 小明從商業銀行的儲蓄戶口提取 $600 000，然後將 $500 000 存於一有限制牌照銀行的戶口內，餘下的 $100 000 則留在家中。上述事件的即時後果是 A. 貨幣供應定義一 (M1) 會增加 $100 000。 B. 貨幣供應定義二 (M2) 會減少 $600 000。 C. 貨幣供應定義二 (M2) 維持不變。 D. 貨幣供應定義三 (M3) 會增加 $500 000。 解釋： M1： 增加 $100 000 係因為 $100 000 則留在家中，令現金增加。 M2：商業銀行入面有 $500 000 去咗有限制牌照銀行的戶口內，呢個操作係會令 M2 減少$500 000，而唔係 $600 000，所以 B、C 係錯。 M3：維持不變，因為冇錢流出或流入香港貨幣體系入面，所以 D 係錯。 所以答案係 A。 「存款創造」與「銀行倍數」Deposit creation and the banking multiplier credit: abimagestudio 存款創造一直都係學生嘅大大大 boss！要拆解存款創造，有一啲 Terms 係各位一定要識嘅，包括： 儲備 (Reserves) = 銀行持有的現金和流動資產 貸款 (Loan) = 銀行借出的存款 存款 (Deposits) = 顧客存入銀行的金額 法定儲備比率 (Required Reserve Ratio) = 政府要求銀行保留作現金的最低比率。 實際儲備率 (Minimum Reserves) = 銀行實際持有的儲備水平。銀行在日常經營時，其保留儲備可能會高於或低過政府的最低要求。 部份儲備制度 Fractional Reserve System 銀行喺收到嘅存款入面，要保留某個百分比嘅存款作為現金儲備以應付客戶提款，不准借出。 所以，成個存款創造嘅過程就係: 貸款創造貨幣 當現金存入銀行後，銀行的儲備會相應增加。 因銀行只需保留最低儲備，所以多餘的超額儲備將會全部被借出。 由於公眾不會持有現金，即沒有現金流失，所以借出的貸款最終會再次存入銀行系統。 由於存款再增加，銀行的儲備和貸款亦會再增加。這過程會不斷重複，直到銀行系統再沒有超額儲備為止。 最後，可增加最大的總存款就等於最初的存款乘以銀行倍數。 情況就係好似下面幅圖咁: 但最初嘅存款最多可以變大幾多呢? 呢樣就要睇最大銀行乘數，你會見到呢幅一開始個存款係 $100，但最後變動 $400，最大銀行乘數就係 4，條公式係 1/RRR。好多時我哋做題目嘅時候都一定要搵到呢個㗎。 存款創造貨幣例子 Deposit creation example 以下我將考評局嘅題目拆細成 3 Part ，方便大家一步一步學下點樣計「存款創造」。 銀行系統的資產負債表 資產 Assets ($) 債務 Liabilities ($) 儲備 (R) 1000 貸款 (L) 3000 存款 (D) 4000 Q1. 假設銀行系統並不持有超額儲備，法定儲備比率是多少？ 由於銀行系統並不持有超額儲備，所以現時嘅儲備比率就係法定儲備比率。 法定儲備比率 = 1000/4000 = 0.25/ 25% Q2. 假設公眾持有 $500 現金，貨幣供應是多少？ 貨幣供應 = 非銀行公眾持有的現金 + 存款 = $500 + $4000 = $4500 Q3. 假設公眾減少持有現金，例如，將 $100 存入銀行系統，最高存款額和最高貨幣供應分別是多少？ 最高存款額 = (1/法定儲備比率)*儲備 = (1/0.25)*1100 = 4400 最高貨幣供應 = ($500 - $100) + ($4400) = $4800 貨幣政策 Monetary Policy credit: biancoblue 啱啱同大家講過貨幣市場可以決定名義利率，而名義利率又可以影響經濟，所以中央銀行就會透過控制貨幣供應和利率去達到某啲經濟目標。 擴張性貨幣政策 Expansionary monetary policy 透過增加貨幣供應，從而達到增加國民收入或減少失業。 當金融當局 (monetary authority) 增加貨幣供應去降低利率時，借貸成本降低，投資會增加。呢個時候，計劃總支出會上升並因而提升均衡國民收入。 收縮性/緊縮性貨幣政策 Contractionary monetary policy 這是一項通過減少貨幣供應從而達到降低國民收入或降低通脹嘅政策。 當金融當局 (monetary authority) 減少貨幣供應去提高利率時，因為借貸成本增加，投資會減少。呢個時候，計劃總支出會下跌並因而降低均衡國民收入。 Monetary Control 貨幣控制 中央銀行到底點樣控制到貨幣供應呢? DSE ECON 經常考以下呢三政策： 法定儲備比率 Required reserve ratio 「法定儲備比率」同「貨幣供應」成負關係。 公開市場操作 Open market operation (OMO) OMO 係指中央銀行「買賣政府債券」。 貼現率 Discount rate (或再貼現率 Re-discount rate) 貼現率係指中央銀行向商業銀行放款時所收取嘅利率，即商業銀行將「票據」(bills of exchange) 向中央銀行貼現時嘅利率。 題目例子 (Monetary Control 貨幣控制) 問題： 假設貨幣需求增加，其他因素不變，下列哪些措施能穩定利率? ( 1 ) 降低貼現率 ( 2 ) 降低法定儲備率 ( 3 ) 在公開市場出售政府債券 A. 只有 ( 1 )、( 2 ) B. 只有 ( 1 )、( 3 ) C. 只有 ( 2 )、( 3 ) D. ( 1 )、( 2 )、( 3 ) 解釋： 當貨幣需求增加，利率會上升，依家條題目係想你穩定返個利率，所以大家係要令到利率下降返。 貨幣供應增加，利率下降，所以我哋要搵一個答案係要令貨幣供應增加。 降低貼現率：商業銀行向中央銀行借錢成本下降，貨幣供應上升。 降低法定儲備率：超額儲備上升，貸款上升，貨幣供應上升。 在公開市場出售政府債券：即係中央銀行收返市面上啲錢，貨幣供應下跌。 所以答案係 A. 貨幣供應 VS 通脹 credit: jcomp 同學仔成日都有一個迷思：「咁我不斷增加貨幣供應咪得囉，不斷刺激個經濟增長咁唔好咩 ?」 當我哋不斷增加貨幣供應嘅時候，長期而言，會導致太多貨幣追逐太少物品，形成通脹。通脹嘅出現會令我哋生活成本不斷上升，亦會導致社會有各種損失 (菜單成本、皮鞋成本)！ DSE Econ Past Paper Tips DSE 年年都出「貨幣市場 Money Market」，而且出嘅題目可以又多又深，所以真係要透過強化自己經濟思維建立一套完整嘅答題框架，再透過操練 DSE Past Paper 同埋其他 Exercise. 其實考評局出題套路嚟嚟去去都係咁上下，只要大家充分理解 Econ DSE Past Paper 嘅題問字眼，你就一定可以答啱呢類題目! DSE 經濟 MC Past Paper (Money Market) 2013 DSE Econ MC Q25 2013 DSE Econ MC Q26 2013 DSE Econ MC Q27 2013 DSE Econ MC Q28 2014 DSE Econ MC Q30 2014 DSE Econ MC Q31 2014 DSE Econ MC Q33 2014 DSE Econ MC Q34 2015 DSE Econ MC Q28 2015 DSE Econ MC Q29 2015 DSE Econ MC Q30 2015 DSE Econ MC Q32 2015 DSE Econ MC Q33 2016 DSE Econ MC Q29 2016 DSE Econ MC Q31 2016 DSE Econ MC Q32 2016 DSE Econ MC Q34 2017 DSE Econ MC Q30 2017 DSE Econ MC Q31 2017 DSE Econ MC Q33 2017 DSE Econ MC Q36 2018 DSE Econ MC Q29 2018 DSE Econ MC Q30 2018 DSE Econ MC Q32 我幫大家 list out 由 2013 - 2018 Econ Past Paper 相似問題嗰陣，自己都嚇咗一嚇，因為真係年年都出 4 條或以上，單單 MC 都成10分!! 大家加油！

【DSE Econ】DSE 經濟攻略：Money Market 貨幣市場

下載AfterSchool

追蹤AfterSchool