【Top Up Degree全攻略】一文讀懂咩叫銜接學士學位，入讀方法要求全公開！

中六學生DSE成績唔理想，未達到大學入學要求，除咗Retake之外，學生好多時候都會選擇報讀副學位課程，但始終副學位唔等於大學學士學位，如果學生想攞到大學學士學位，其中一個方法就係報讀Top-Up Degree（銜接學士學位／銜接學位／銜接學士）。Top-up Degree課程唔單止能夠提供多樣化嘅升學途徑，亦有助職場人士提高競爭力。不過好多啱啱接觸到呢類課程嘅人都會有以下嘅疑問：Top-up Degree係啲咩？Top-up Degree有咩入學要求？Top-up Degree嘅認受性如何？AfterSchool 為各位整合咗相關內容，幫助你順利升學！ 甚麼是Top-up Degree（銜接學士學位）？ Top-up Degree又名銜接學士學位或銜接學位，係一種專門為有意升學嘅副學士 (Asso) 或高級文憑畢業生 (High Dip) 而設嘅學士學位 (Bachelor degree) 課程。由於升讀 Top-up degree 課程嘅學生已經持有一定學歷同專業基礎，呢類課程一般會給予入讀學生一定程度嘅學分豁免，佢哋完成學位所需嘅時間會較一般學士學位短，一般只需要1至2年就可以完成並取得學士學位。 Top-up degree亦為已經投身社會嘅畢業生提供提升學歷、增強職場競爭力嘅機會。由於部分銜接學士學位課程允許畢業生兼職修讀，因此 Top-up degree 對有意進修但係唔想辭去工作嘅職場人士嚟講，係一個唔錯嘅 part-time 課程選擇。 Top-up Degree 和 Senior Year Entry 的分別 Top-up degree 同 Senior year entry 係兩種完全唔同嘅教育進修方式。 "Top-up degree" 通常係指一年制 / 兩年制嘅program，報讀 top-up degree 代表學生將會由Year 1讀起，並唔會有所謂嘅Year 2 entry呢種情況出現。Top-up degree 係專為 Asso/High Dip 學生而設，坊間好少人會考完 DSE 就直接報讀 top-up degree。 而 "Senior year entry" 係指學生已經完成咗一定嘅高等教育證書或文憑課程，喺完成呢啲課程後，學生可以直接進入大學嘅高年級（通常係 Year 3 或 Year 4），並開始進行學位課程。呢一種進修方式通常需要 2 至 3 年嘅時間嚟完成學位課程。喺香港，所有大學都提供咗呢種進修方式，令學生可以更快獲得學士學位。 Top-up Degree認受性 Top-up degree 嘅畢業生同其他學士學位嘅畢業生一樣，都持有學士學位學歷。而課程規格、內容、畢業要求方面，Top-up degree同普通Degree大致上相同，不過要留意嘅係坊間並非所有 Top-up degree 都通過香港政府嘅資歷架構認證。雖然有啲冇經過政府資歷架構認證嘅 Top-Up Degree 會比較易入，但係就同普通Degree嘅認受性唔一樣。有意報讀嘅人士需要注意同埋仔細比較。如果想知道有興趣報讀嘅 Top-up degree 有冇獲得資歷架構認證，可以瀏覽資歷名冊網頁，並喺名冊上搜尋學位名稱，了解其認受性。 不過，亦有啲人認為 Top-up Degree 同普通 Degree 相比，副學士課程難度難以統一，導致某啲比較容易進入嘅科系課程內容淺易，學生隨之而容易畢業或容易達到報 Top-Up Degree 嘅資格，因此佢哋可以直接就讀大學課程會對其他學生唔公平，坊間亦有「買offer」嘅問題出現，令到銜接學士學位嘅認受性受到質疑。 另外，如果學生報讀嘅 Top-up degree 課程持有相關行業嘅本地或國際專業機構認可，亦將有助畢業後嘅事業發展。建議喺報讀課程之前詳細瀏覽相關詳情，幫助自己選擇最合適嘅課程。 Top-up Degree資歷架構 獲得政府認證嘅 Top-up Degree 處於資歷架構第五級，位於副學士及高級文憑（第四級）之上，碩士或深造文憑（第六級）之下，同一般學士學位冇分別。喺香港，資歷架構係唔少單位、公司、院校判斷畢業生資質、選擇合適人選嘅重要參照。銜接學士學位畢業生升Master嘅時候學歷水平同一般學士學位 (Bachelor Degree) 擁有同等認可度。 通常八大本部嘅 Top-up Degree 都經過政府資歷架構認證，而部分海外嘅 Top-up Degree 就無經過政府資歷架構認證。 Top-up Degree課程入學要求 由於唔同院校及唔同課程嘅入學要求都有所不同，AfterSchool幫大家整理咗一般較常見嘅要求，俾有意報讀嘅人士作為參考： 完成修讀香港副學士或高級文憑課程，或即將於該學年畢業 成績（GPA）最少達到 2.0 分或以上 中英文達一定程度，例如中文需要喺文憑試中取得第三級，英文就需要在文憑中取得第三級或雅思考試（IELTS）最少取得 6.0 分或以上 海外大學另外需要學生提供個人陳述、推薦信 每所大學嘅收生要求均不同，以上資料只供參考。 學費及資助 首先，八大資助嘅Top-up degree同非八大資助嘅課程，主要有兩個分別。第一就係學費價錢方面，由於八大資助的銜接學士課程，屬於大學教育資助委員會（UGC）認可課程，每年學費同聯招八大課程睇齊，價錢每年只需$42,100。相反，有好多非UGC認可嘅課程，雖然同樣係由八大所開設但不受政府資助，學費好多時都係按學分計算，單係每個學期學費由$53,010至$66,262.5不等，大約係UGC課程嘅學費兩至三倍價錢。即使學費會比原本UGC課程昂貴，但學生資助處亦會供學生申請學費資助。 政府資助方面，有經濟困難嘅學生可以向學生資助處申請「專上學生資助計劃」（FASP）、「專上學生免入息審查貸款計劃」（NLSPS）、「免入息審查貸款計劃」（NLS）或「持續進修基金」（CEF）嘅資助。有興趣了解更加多有關大專院校學費資助嘅同學，可以去《申請 Grant Loan 懶人包》睇多啲！ Top-up Degree課程種類 UGC Top-up degree 課程由教資會（UGC）資助，學費劃一為每年42,100元。課程資歷架構為 QF Level 5，坊間多數稱為Senior Year Entry，學生一般都會直入Year 2/3。而學生畢業後嘅學術資格同透過 DSE 直入4年制 UGC Degree 嘅資格無分別。全港八大每年有5000個位，希望入讀由教資會資助Top-up degree嘅學生要留意，呢5000個學位係由八大唔同 degree programme 一齊share嘅，每科可能最多得十幾個位，所以建議報讀嘅學生至少達到CGPA (Cumulative Grade Point Average) 3.0，而希望入讀3大（即港大、中大、科大）嘅學生則最好達到CGPA 3.5。面試方式通常都係以個人或小組形式進行，面試過程一般以英文作為主要語言，競爭非常激烈。如果報讀學生嘅英文DSE成績只有第二級，一般都會建議選擇重考DSE或報考IELTS以獲取入讀UGC Top-up degree嘅最低要求。唔同課程嘅入學要求都有所不同，詳情請參考選讀課程網站嘅收生標準。 自資Top-up degree 教資會並沒有資助自資Top-up degree課程，學費視乎唔同學校及科目而定，並冇劃一水平，學費通常由$60,000至$150,000不等，課程資歷架構為 QF Level 5，學生畢業後嘅學術資格同透過 DSE 直入4年制 UGC Degree 嘅資格無分別。而自資Top-up degree 嘅CGPA要求比第一類UGC Top-up degree (Senior Year Entry) 低。 海外大專院校與本地大專院校合辦Top-up degree 課程由海外大專院校或與本地大專院校合辦，課程沒有教資會資助，學費視乎唔同學校及科目而定，並冇劃一水平，通常一年學費大概 $100,000 至 $150,000，一般 CGPA 2.0 亦有可能獲得取錄。想報讀呢一類Top-up degree 嘅學生要留意，由於某部份課程並冇經過政府資歷架構認證，學生畢業之後可能未必持有學士畢業嘅學術資格，所以建議學生喺報讀之前經由 iPASS 查詢課程資歷架構，QF Level 5 先等同學士資歷。 香港熱門Top-up Degree院校及課程推介 香港大學專業進修學院 HKU SPACE HKU SPACE Top-up degree 係由香港大學專業進修學院聯同英國、澳洲、馬來西亞等地嘅大學合辦。課程係由海外大學嘅國際學院喺香港本地主辦，課程設置更接近於海外院校，從而能夠保證課程專業水平同國際接軌。 SPACE Top-up degree 課程嘅另一優點在於，佢哋嘅合作學校當中不乏全球排名位列前茅嘅大學，學位嘅含金量更高，例如倫敦政治經濟學院 (London School of Economics and Political Science) 及倫敦大學學院 (University College London) 等。 以當代媒體文化等課程嘅學生為例，佢哋有機會喺第三年到英國留學。學生更有機會進一步申請大學碩士課程。但係報讀學生需要留意嘅係，好多時候因為要銜接當地學制，課程可能屬於三年內完成，所以較難直接入讀第二學年。HKU SPACE嘅專業範圍十分廣泛，課程內容包括文化、傳媒、社會科學、設計藝術、會計、工商管理、航空、食物及營養等，上述課程全受香港資歷架構認可。各專業嘅合作院校都唔同，大家可以根據自己嘅專業背景或興趣選擇排名靠前嘅海外大學所開設嘅課程。 HKU SPACE Top-up Degree 參考學費：HK$81,000 - HK$142,260（視乎專業） 學校網站：https://hkuspace.hku.hk/ 香港中文大學專業進修學院 CUSCS 香港中文大學專業進修學院（CUSCS）同澳洲葛瑞菲斯大學 (Griffith University) 共同開設一年全日制遙距課程，專業主要涉及商業、人力資源管理等。呢啲課程都獲得政府認可，全程由澳洲大學嘅教授教課，並有香港本地導師提供指導及支持。學生仲有機會前往澳洲大學參加外地交流項目，增添海外學習及生活嘅經歷。 往年CUSCS仲同位於南澳阿德萊德嘅福林德斯大學 (Flinders University)、 樂卓博大學 (La Trobe University) 聯辦人類營養學、數碼媒體學士學位課程，不過呢兩大課程近年都較少招生。上述課程全屬於全日制課程，不設兼讀制，而且只需一年就能夠完成。 CUSCS Top-up Degree 參考學費： HK$58,305 - HK$68,305 學校網站：https://www.scs.cuhk.edu.hk/tc 香港城市大學專業進修學院 CityU SCOPE CityU SCOPE 嘅 Top-up degree 課程同港大及中大嘅專業進修學院相似，佢哋未有直接開辦本地嘅銜接課程，而係直接同英國多間大學合作，開辦遙距銜接課程。合作學校包括考文垂大學 (Coventry University)、德蒙福特大學 (De Montfort University)、愛丁堡納皮爾大學 (Edinburgh Napier University) 等。CityU SCOPE Top-up degree 課程領域包括測量學、工程管理、會計與金融、企業管理、市場營銷、資訊科技、社會科學等。當中部分課程同時設全日制或兼讀制。 CityU Top-up Degree 參考學費：HK$81,200 - HK$140,400（視乎具體專業、學分數和學位類型） 學校網站：https://www5.scope.edu/ 香港浸會大學國際學院 HKBU CIE 香港浸會大學國際學院 (HKBU CIE) 開設咗11個自資top-up degree課程，主要向CIE副學士畢業生收生，並銜接香港浸會大學本校嘅學士學位。HKBU CIE top-up degree 嘅特點在於偏向於人文社科，專業涵蓋人文藝術、商科、傳媒、社科各個領域。而且佢哋嘅top-up degree課程多數都喺浸大校本部上堂，接觸更好嘅教學條件及氛圍。不過，由於浸大國際學院嘅銜接學士學位課程中並冇part-time degree，報讀嘅學生並唔能夠一邊工作一邊修學。 學校網站：https://www.cie.hkbu.edu.hk/main/tc/ 香港理工大學專業進修學院 PolyU SPEED PolyU SPEED嘅top-up degree課程大多數係銜接本院校開設嘅學士學位，課程領域包括市場營銷、電機工程、商科、建築工程、測量學等領域總共29種全日制課程。PolyU SPEED 亦同諾桑比亞大學 (Northumbria University)、倫敦大學 (University of London) 合作，開展商務及法律領域10種part-time銜接課程，可選擇嘅範圍相當廣闊。PolyU SPEED 嘅 top-up degree 課程適合社會各類副學士高級文憑畢業生以及同等學歷嘅人士報讀。此外，喺相關領域已獲得高級職位或專業認可嘅人士，亦有機會成功入學。PolyU SPEED 收生要求比較寬鬆，尤其適合工作多年、想要提升學歷嘅人士報讀。 學校網站：https://www.speed-polyu.edu.hk/ 香港專業進修學校 HKCT 香港專業進修學校HKCT提供嘅top-up degree課程唔單止包括港專學院打造嘅學士學位課程，佢哋亦有同英國利茲貝克特大學 (Leeds Beckett University)、巽德蘭大學 (University of Sunderland) 聯合開設銜接學士學位項目。港專開辦嘅課程大多數係全日制，修讀年限會因專業設置同個人學歷基礎而有所不同。 HKCT開設嘅銜接學士學位課程涵蓋社工、運動管理及訓練、電腦學、平面設計等嘅專業，課程門類相對其他院校較少，亦唔太適合想part-time修讀文憑嘅人士。 學校網站：https://www.hkct.edu.hk/tc 香港科技專上書院 HKIT 香港科技專上書院 (HKIT) 現時主要同英國西倫敦大學 (University of West London) 及格林多大學 (Wrexham Glyndwr University) 合作聯合開辦一年制嘅遙距 top-up degree 課程，課程包括商業、犯罪學、酒店管理同會計等專業，全部課程均受資歷架構認可。主要面向政府認可嘅高級文憑同副學士課程畢業生收生，亦允許有相關工作資歷嘅人士遞交申請。HKIT開辦嘅課程安排較有彈性，分為一年全日制或兼讀制，因此適合職場人士在職修讀。報讀學生亦可以申請香港自資免入息審查資助計劃資格 (NMTSS)，資助後課程費用可低至$42,900港元。 學校網站：https://www.hkit.edu.hk/tchk/index.php 職訓局才晉高等教育學院 VTC SHAPE VTC SHAPE的Top-up degree課程與CityU SCOPE相似，與多間英國和澳洲大學合作，但對於本身就讀HKDI或其他IVE分校的同學，會更容易升讀和銜接。與CityU SCOPE不同的是，VTC SHAPE提供更多關於設計方面，例如﹕珠寶、時裝設計等課程。不過，只有資訊科技課程設兼讀制課程。 職訓局才晉高等教育學院 VTC SHAPE開設嘅Top-up Degree課程種類多達48種，涵蓋幼兒教育、社工、工程等熱門專業，合作院校包括考文垂大學 (Coventry University) 、西英格蘭大學 (UWE Bristol) 等九所英國及內地高校，係VTC高級文憑同副學士學位文憑畢業生嘅重要升學途徑。課程係喺IVE分校開展，有經濟壓力嘅學生可以免去海外留學更高昂嘅生活開銷，並喺一年到一年半時間內取得海外院校嘅榮譽學士學位。 SHAPE top-up degree 參考學費：HK$63,900 - HK$209,300（多數落在HK$60,000-97,000之間，具體費用視乎具體專業） 學校網站：https://cpe.vtc.edu.hk/tc/member_institutions/shape.html 除咗以上介紹嘅院校之外，本地亦有其他唔同院校開辦Top-up degree俾學生報讀，如果想了解更加多有關香港開設嘅top-up degree院校及課程，可以到 iPass經評審專上課程資料庫 搜尋適合你嘅課程。 Top-up Degree Q&A Q：究竟Top-up degree有冇用？ Top-up degree有冇用，係好多學生選擇院校時嘅一大顧慮。從提高專業知識、增長見識、提高競爭力嘅角度嚟講，top-up degree課程當然有用。不過，由於現今社會上好多年輕人都持有學士學歷，學生所修讀嘅學位能唔能夠令佢獲得更好嘅就業機會，好大程度上係取決於佢嘅學校排名、學業成績、綜合能力等多方面因素。 Q：Top-up degree同一般學士學位有咩分別？ Top-up degree同一般學士學位嘅最大分別在於，銜接學士學位可以通過學分轉移嚟縮短修讀年限，而一般學士學位就採用統一修讀年限。所以如果你喺一啲院校官網見到同一學位有學制唔同嘅兩門課程，咁就代表佢哋分別係top-up degree同一般學士學位。 Q：我讀嗰科有冇政府學費資助？ 所有以自資形式修讀本地全日制自資高級文憑專上課程嘅同學，都可以透過專上學生資助計畫，申請助學金及/或貸款。

【Top Up Degree全攻略】一文讀懂咩叫銜接學士學位，入讀方法要求全公開！

下載AfterSchool

追蹤AfterSchool