「請勿靠近車門」 「請不要靠近車門」 “Please stand back from the doors.” 嘟嘟嘟嘟嘟嘟嘟…… Hello~ 我係Jeremy，主修語言學，而家係大學助教——對於學習英文，我既理念係：坐車可以留意乘客廣播、聽歌要聽埋歌詞、去自修室溫書要睇晒中英規例…唔好錯過任何一個係日常生活學英文既機會。相信好多同學仔對上面幾句都耳熟能詳。無論你係返學、放學，去shopping定係去補習，你都好大機會要坐港鐵。同時，當你有做DSE或者以前嗰啲會考past paper，都會知道Listening個處境有時會用咗我地身處既香港。讀到高中、作為香港人嘅你地，又識唔識得串同讀晒咁多個港鐵站既英文名？識唔晒唔緊要，睇下呢篇小貼士幫唔幫你啦！ 今次想同大家分享下，其實港鐵站既英文名，可以分開幾類既：譯音、半中半英同埋全英。你可以當呢啲站係你既朋友仔，咁就會易啲記佢地嘅名架喇。 地鐵站名—譯音 首先，第一類係最直接既譯音式，好似坐你隔離叫林一心，英文咪係Lam Yat Sum。呢堆朋友既名應該係最易記──你識用廣東話讀佢地既中文名，就大概都串到佢地既英文名。其中一位跟唔足中文讀音既朋友，相信大家當然非常熟悉佢，而且佢都幾MK⋯無錯佢就係『旺角』，英文名係Mong Kok，而唔係Wong Kok。 另一位特別少少既朋友，就係『粉嶺』──明明係兩個字，英文名變左一個，好似doing, eating, studying咁樣：Fanling。講到Fanling，好容易就會令大家聯想到fan呢個英文生字，a fan可以解一把扇或者一把風扇，亦都可以解一個「粉絲」。但千奇要記住：如果你去街撞到G-Dragon，你唔好講”I am your fans!”呀！明明你只係一個人，英文黎講你係a fan…更加唔好話”I am your fan屎”啦！ 地鐵站名—半中半英 唔知你身邊會唔會有朋友，係勁鍾意講野嗰陣加插英文字架呢？可能連佢地個名都係咁。明明叫王允行，正式英文名就係 Wong Promfrey 。係呀，以下呢幾個朋友仔就係咁，我地可以叫佢地做半中半英： 大埔墟 Tai Po Market 九龍塘 Kowloon Tong 旺角東 Mong Kok East 地鐵站名—全英 最後，以下呢個圈子既朋友仔，啲英文名真係英文名…我地可以稱之為全英。可能要花啲時間記熟佢地。不過，而家你望緊佢地既時候，都可以學下英文咁。 大學 University : 如果佢唔係一個站名，就係一個你好想入到既地方。如果你目標係想入大學，除左要考好DSE之外，仲要記住…雖然呢個英文字，係U字開頭，無錯係響音（a, e, i, o, u），但佢比較特別，係讀做”you” – 咁即係個音唔係響音啦。呢個時候，grammar上就係”a university”。不過，其他u字頭既字，好似underwear，就要用返an underwear喇。 馬場 Racecourse 九龍灣 Kowloon Bay 鑽石山 Diamond Hill 太子 Prince Edward 黃埔 Whampoa 佐敦 Jordan 金鐘 Admiralty 中環 Central： 堅尼地城 Kennedy Town 香港大學 HKU 銅鑼灣 Causeway Bay 炮台山 Fortress Hill 北角 North Point：呢個字既讀音，可能好多同學仔都會讀錯左做porn，咁會變左個笑話架喇！porn應該唔少同學仔都知係咩；記住正確讀音係”p-oi-nt” 鰂魚涌 Quarry Bay 欣澳 Sunny Bay 奧運 Olympic 九龍 Kowloon 香港 Hong Kong 機場 Airport 康城 LOHAS Park 迪士尼 Disneyland Resort 海洋公園 Ocean Park 海怡半島 South Horizons：呢個比較新既站名，可能都唔係成日出現係大家既生活度。但”horizons”呢個字幾好用架。無論你做Writing定Integrated Skills，都有機會要寫乜乜乜幫到你擴闊視野──如果你覺得AfterSchool呢個平台幫到你擴闊視野，你可以話：This platform broadens my horizons. 重點係，你既視野唔係得一個，係好多個，所以記住要有s！ 希望大家睇完呢個分享，會認識多左我地香港既地鐵站名。一次過要記晒咁多個名，可能係有點吃力…唔緊要！你可以一日記兩三個，尤其係自己屋企附近既站名，跟住Whatsapp考下朋友仔，好快你就會見證到自己原來學識咗好多架喇。對於今次分享有咩意見，可以係下面留言俾我地或者Whatsapp話俾我地聽。你地既意見好重要！講完地鐵站名，下次我會講下香港唔同既公共設施既名，好似博物館——公開考試既Reading, Listening同Speaking都出現過架。
