對於考緊DSE嘅你嚟講，每一分每一秒都係極寶貴！為咗慳時間有唔少同學更加情願瞓少啲都要讀多啲書，結果就梗係得不嘗失啦！上次就同大家講咗少少有關睡眠嘅基本知識同重要性，今次想講多少少睡眠背後嘅科學同提升睡眠品質嘅方法！ 考試就話有神技姐，原來瞓覺都有？！ Sleep cycle?每個半鐘為一個循環 唔知你有無試過晨早流流比人嘈醒，即係你明明訓左好多，都會覺得成個人勁勊、個頭好似想爆炸咁？掉翻轉，有時起身又會覺得好精神、好有energy。 要解釋呢個現象，首先你要了解sleep cycle。簡單黎講你瞓緊覺果陣其實係不斷經歷緊以下呢幾個步驟： 而正常人平均要完成一個cycle所需嘅時間就係約90分鐘。如果你係個sleep cycle中間突然醒咗，就會出現岩岩上面提到嘅「頭都爆」現象。 了解完sleep cycle後你會發現，每晚嘅睡眠時間最好係6小時/7.5小時/9小時。但係你入睡都要少少時間。而研究顯示 一個人平均需要14分鐘先可以入睡 但呢樣野實在係因人而異，大家可以作參考去調整自己嘅睡眠時間。 點解成日都瞓唔著？ 首先，每個人都有自己嘅生理時鐘，大腦會透過傳送唔同訊號，去話你知你而家身體嘅狀況。而係晚上適當嘅時候，我地嘅身體會透過釋放出一種叫melatonin嘅賀爾蒙，去幫助我地入睡。問題係由於科技越黎越發達，我地嘅生活已經離唔開手機，特別係唔少同學溫書果陣都會用電腦，而呢D電子螢幕係會釋放出一種叫藍光(blue night)嘅光線，去壓抑我地身體去製做幫助睡眠嘅melatonin，搞到你成日都訓唔著。 入睡小Tips 瞓前半粒鐘唔好用手機/電腦 既然手機/電腦會搞到我哋瞓唔著，咁最直接嘅方法就喺瞓覺前唔好用佢哋。早少少上床，睇下今日學過嘅嘢又或者計劃下聽日要做咩，準備入睡。 確保你瞓覺嘅環境喺100%黑暗 關哂所有燈就一定架啦，但係如果你住嘅環境真喺好難做到100%黑暗，不妨平平地十蚊雞買個眼罩瞓覺嘅時候用。 開Night Mode 其實而家幾乎所有手機/電腦都有得開Night Mode，簡單黎講佢地會自動喺晚上將你螢幕嘅顏色慢慢變黃，一黎等你隻眼無咁勊，二黎可以減少藍光嘅釋放，幫你入睡！ 總結 睡眠幾乎佔我哋人生三分一嘅時間，所以千奇唔好忽略有關睡眠嘅細節。以上嘅內容唔少都喺參考一本叫”Sleep Smarter”嘅書，入面除咗用一D淺白嘅語言去解釋睡眠背後嘅科學外，作者Shawn Stevenson更加分享咗23個睡眠相關嘅tips比大家。如果大家有時間不妨買本黎睇下！
