DSE 化學入面有唔少計數題都係每個人嘅惡夢，今次我就想同大家講一講稀釋 (Dilution) 相關嘅 DSE Chem 概念同解題方法！ 喺學習零散嘅新知識之前，有冇諗過需要先建立一個系統性嘅學習模式？我係The Chemist，多年來透過DSE Chem補習幫助學生輕鬆取得大學入場券。想知道我嘅教學理念同往績，即撳：化學補習名師 The Chemist | AfterSchool 到底咩係稀釋 (Dilution)? 將水加入去現有嘅溶液(solution)入面，係呢個過程入面有兩樣嘢會發生： 容量(volume)上升 濃度(concentration)下降 以沖即溶咖啡為例，你加得越多水，杯咖啡嘅容量(volume)就會越大，但相對嚟講個濃度(concentration)都會越嚟越低、越嚟越淡！ M₁V₁=M₂V₂：公式由來 首先我哋知道「摩爾數 (mole number) ＝ M(mol dm⁻³)*V(dm⁻³)」，而個摩爾數 (mole number) 就好比即溶咖啡嘅份量，你落咗一包粉就係一包粉，無論你加幾多水都好，佢都係由一包粉沖出嚟嘅咖啡，唯一改變嘅只係杯咖啡嘅容量同濃度。 由於我哋知道無論你加幾多水落去個溶液 (solution) 入面，個摩爾數 (mole number) 都唔會改變，所以我哋可以整到呢條公式—M₁V₁=M₂V₂！ 常見問法 — 稀釋 (Dilution) 後的濃度 (Concentration) 將 100 cm³ 的水加入至 1.0 M 的 50 cm³ NaCl 溶液後的濃度是多少？ What is the concentration of 1.0 M of 50 cm³ NaCl after adding 100 cm³ of distilled water into the solution? 你已經有M₁同V₁，題目要你計M₂，所以你仲差V₂。而V₂係總容量(Final Volume)，所以： V₂ = 50 + 100 = 150cm³ 再將所有資料代落去條公式： M₁V₁=M₂V₂ ⇒ 1 * 50 = M₂ * 150 ⇒ M₂ = 0.33 M 常見伏位 — 準備指定濃度 (Concentration) 嘅溶液 (Solution) 你而家有 50 cm³, 0.5 M 嘅 HCl，要加幾多水先可以將呢個溶液(solution)稀釋至到 0.1 M 呢？ 好多同學見到會即刻用條公式去計： M₁V₁=M₂V₂ ⇒ 0.5 * 50 = 0.1 * V₂ ⇒ V₂ = 250 cm³ 咁個答案咪係 250 cm³ 囉！但係係錯嘅，因為題目係問你要加幾多水，而你計出嚟嘅 250 cm³ 係佢最後嘅容量，所以你要減翻佢一開始嘅容量 50 cm³ 就會得到 200 cm³ 喇！ 當然呢部分都仲有唔少伏位啦，而且計數呢部分真係太多太多技巧同伏位啦！所以我都會不定期同大家分享更多化學相關嘅技巧！希望幫到大家～
