根據統計數據， 2019 年 DSE 中文卷二（作文卷）有 25% 嘅同學都揀咗題三《談讀書無用》！想知道點樣抓住議論文技巧重點，跟貼考評局文憑試官方要求，喺四分之一人之中脫穎而出？咁就即刻睇以下呢篇blog， 等小編教你由零開始構築一篇結構嚴謹嘅議論文，跟住嚟做仲唔一 take 過攞 5**！ 今次 AfterSchool 幫你整理咗 2019 年考評局中文文憑試卷二題三《談讀書無用》評分參考同結構分析，內容節錄自考評局評卷報告同中文科教師會議簡報。小編仲會透過範文例子，同大家分析下 2019 中文 DSE 卷二奪星嘅秘訣～ 大家一齊嚟學嘢啦！ 2019 DSE 中文卷二（寫作）第三題題目《談讀書無用》 俗語說「萬般皆下品，惟有讀書高」，也有人說「讀書無用」。試寫作文章一篇，談談你對「讀書無用」的看法。現今社會，不少人懷疑讀書的作用和價值，故有「讀書無用」一說。本題希望考生能對讀書之作用和價值加以反思，並抒述個人見解。 考評局中文卷二作文結構分析 命題立意 「現今社會，不少人懷疑讀書的作用和價值，故有「讀書無用」一說。本題希望考生能對讀書之作用和價值加以反思，並抒述個人見解。」歷年中文文憑試卷二第三題通常要求同學寫議論文，而議論文嘅寫作要求包括： 立論：是否認同「讀書無用」一說 論述重點 選取材料 論證闡述 結論 立論 立場不拘，可以贊成，可以反對，亦可以寫視乎情況，指出有時候「讀書」未必有用，有時候卻有用，視乎不同嘅因素，例如目的、方式或社會環境等。當同學想選用「視乎情況」嘅寫法時，除咗要留意所提出嘅不同情況或者場合，亦要明確咁寫出自己嘅立場。「視乎情況」嘅寫法並唔意味住你可以做牆頭草，呢種寫法只不過係將唔同嘅案例或者情況進行分類，然後再指出喺唔同嘅情況之下，呢種講法是否成立。另外，大家亦可以寫自己喺某特定情況之下，會贊成定反對呢種講法。 舉個例子，你可以講喺學術研究嘅領域入面，如果想拎到更高嘅成就，從讀書入面掌握嘅知識就會非常有用，因為佢哋係你往後進行更深入研究嘅基礎；但如果你想講一啲比較實際，需要實用技能嘅行業，例如扎鐵等等賣力氣嘅行業時，咁從讀書所掌握嘅知識就未必會有用，因為呢啲行業所需要嘅並唔係書本上嘅知識，而係你身體力行嘅付出。 引入部分，同學嘅不妨先反思「讀書無用」一說之出現，並由歷史、社會、以及文化入手，亦可提出針對建議等，但必須論及「讀書無用」一說。若先界定「讀書」和「用」，就可以藉此說明讀書學習所得嘅知識或能力能否對個人以至社會發生作用。 再用返啱啱舉出嘅兩個例子，我哋將題目入面嘅「讀書」界定咗「喺學校嘅學習」，然後喺呢個過程入面「獲取嘅書本上關於理論嘅知識」，而「是否無用」嘅評定準則我就將佢限定咗係「是否能夠滿足職業所需」。 同學需要留意返，「無用」係一個對於某種行為嘅評價，所以我哋需要證明呢種評價會否成立。為咗令我哋嘅判定更加有跡可循，我哋需要設立一個判定嘅「準則」。 例子：如果佢能夠達成某啲方面嘅好處，例如對我哋為人處事係有幫助嘅，或者可以對糾正社會風氣有好處嘅，就可以被判定為有用。 我哋需要喺文章入面清楚寫出，自己係就住乜嘢準則進行判定，同埋判定嘅結果係咩，咁樣做先係真正回應咗題目。 另外，同學還需要審題。好多同學會將關注點擺咗喺「萬般皆下品，唯有讀書高。」嘅呢句論述入面，然後文章集中對呢句說話發表意見。呢種寫法其實係離題。因為，同學再細心閱讀一下題目，題目嘅要求係談談你對「讀書無用」嘅睇法。「萬般皆下品，唯有讀書高。」呢個說話其實並不等同於「讀書有用」，呢句說話嘅側重點其實係讀書呢種行為喺古代社會中嘅地位，當中強調讀書呢種行為喺眾多行為或職業入面，地位最高。呢句說話其實並無提到讀書是否有用，亦無稍微流露出佢想評價讀書是否有用嘅意向。 題目嘅要求，係要求我哋就住「讀書無用」呢個論述進行評論，由你來評價讀書呢種行為是否有用。所以，頭一句「萬般皆下品，唯有讀書高。」唔係題目要求，只係考評局比出來嘅一句幫助我哋思考嘅論述。所以我哋要從呢個句子入面穩到同題目要求相關嘅寫作方向，而唔係將呢個句子當作我哋嘅寫作題目。 以下喺考評局對一啲關鍵概念嘅說明，僅供參考之用： 1.「讀書」 在學校學習 為取得證書或資歷的學習過程 閱讀書籍 「讀書」一詞應與「學習」有密切的關係。 2.「讀書無用」 「讀書」對個人的幫助不大的原因 一般人認為作用不大的原因 從生活累積的「經驗」更可貴 學位泛濫 3.「用」 與所「學」關係密切 學習的知識不同，其用也不同。 4.「知」與「用」 學習所得的「知識」→「內化得著」→「用處」 例如：「實用的知識或技能→取得學位資歷→修讀課程考取會計師資格」 考評局比出呢啲關鍵概念嘅說明，其實都說明佢非常重視「界定題目重要字眼」呢種作法。議論文嘅問題字眼往往都會比較空泛，可以包含好多唔同層面嘅內容，所以對於一篇好嘅議論文嚟講，有一個完全貼合你往後論述重點嘅「字眼定義」係非常重要嘅。「字眼定義」可以清楚咁話比考官聽，你往後會著重喺乜嘢層面嘅描述。最重要嘅係，你可以話到比自己聽，你往後要針對啲乜嘢概念或者層面進行論述，避免自己寫文嘅時候離題。 同學可以喺文章開首，已經可以寫低唔同嘅字眼嘅定義。 論述方式 相對於記敘抒情文，雖然議論文嘅論述對於文筆嘅要求無咁高，但同學都可以喺開頭或者尾段嘅開首部分用上一啲設問句。呢個做法既可以令文章嘅脈絡更加清晰，等讀者更加專注閱讀，仲可以令文章嘅修辭更加豐富。 議論文仲需要同學運用唔同嘅論證手法進行論述。同學仔要了解各論證手法嘅定義，同埋運用時需要留意嘅地方。喺寫作嘅時候，大家亦要提醒返自己，需要運用唔同嘅論證方法。 另外，有一樣想要提醒同學嘅：可以用到古今嘅名人例子固然非常好，但如果喺考試時候比較緊張，一時三刻諗唔起，同學不妨可以考慮用下設例，甚至係生活入面具有代表性嘅實例。其實，只要你嘅論述係足夠飽滿嘅話，呢啲設例同實例一樣可以起到同名人古例一樣嘅用處。 選取材料 質同量都喺非常重要嘅。 好多同學都會問，寫議論文嘅時候係唔係寫得越多例子就越好？ 答案係未必。 如果你嘅例子論述飽滿，同文章論點緊緊相連嘅，時間允許嘅情況下，例子就當然係多多益善啦。 喺考評報告入面，由等級一至等級五其實都有大量論據，但兩者嘅分數就相差甚大，成因可能喺例子同道理嘅聯繫牽強、展述不足、內容空洞。例如等級一嘅卷二示例所用例子並非喺「量」唔充足，而喺「質」唔夠。相反，高分範文所提及嘅例子質量就非常高啦！咁點樣先算係好嘅例子？大家諗例子嘅時候不妨思考下： • 例子是否相關或恰當？ • 你是否真正了解呢個例子嘅內容？ • 例子的闡述是否飽滿？ 如果同學嘅例子做到多角度思考，質量互補，內容會更豐富，更易提高論說嘅質素同立意。 論證闡述 意指論點及論據闡述及說明有關看法。一般而言，同學每段都需要 1. 論點（主題句） 2. 論據（語例或者事例） 3. 闡述（說明例子如何支持主題句成立） 除咗例子須恰當(取材)、論據要可以支持結論、說明闡述須具體豐富，大家亦要循序漸進地說明例子同主題句嘅邏輯關係，解釋你嘅立場。表現優異嘅考生有明確立意明確，舉例恰當，闡述飽滿，以層層遞進嘅例子深化概念，拓展人們對主題嘅思考，說服他人同意自己嘅立場。 結論 表明立場，重申前文所述嘅論點。我哋通常會喺呢段將文章立意升華，提升至對人生、對世界嘅反思嘅層次，亦可以以問句作結，帶出此議題嘅複雜性同爭議性。 中文卷二題三作文分析 & 全文結構範例 論述重點 在於精準意念，且能層層深入探討 一、何謂讀書，以及指出判定是否無用的準則 二、指出讀書是否無用的原因 三、指出讀書的真正意義 四、提出對待讀書的正確方法（從讀書中得益） 圍繞著四大問題討論之。 範文例子 定義 「萬般皆下品，惟有讀書高」：古人認為社會上各種職業都比不上讀書人，讀書人可以擠身到社會的上流階層，而且古時以科舉取士，讀好書更是入仕的重要途徑。 「讀書」：從書本以及老師的教導中，獲得理論上的知識 「讀書無用」：讀書沒有實際用處，不能為我們提供現實中的成功。 主旨 人們需要明智地讀書，讀書的真正意義在於融會貫通，而非死記硬背，否則便難以了解書中的真正含意，更遑論是用在生活之中了。 正論一： 讀書人才有所成就，雖然是舊有論點，但也不無道理。讀書不僅限於理論，也能夠為生活實際帶來參考。讀書能夠為我們提供理論知識，同時在閱讀古人的佳作，又或者是一些教人為人處事的書籍時，也能夠為我們在社會中做人做事，作為實際的參考。 正論二： 讀書無用更是一種極端論調，當中所論述的對象是迂腐而且不懂變通的人，他們只明白書本的表面含意，而不懂變通。 再用「真正的讀書應該是如何來」進行反駁。 可以舉出的例子： 不懂變通的人：孔乙己，高分低能的學子。 真正的讀書：韓愈《師說》中提出的「解惑」及「小學大遺」等相關觀點。 正論三： 要從書中領悟到「修身，齊家，治國，平天下。」的真理，需要明白讀書的真正用處是令我們明智，也可以從讀書的過程磨練自己的意志，令自己在未來更加容易獲得成就。 可以舉出的例子： 唐太宗：以史為鏡，可知興替。（從史書中得到治國之道，避免重蹈覆轍，對國民有利。） 提出如何正確讀的建議： 除了樂於讀書，更加要懂得選擇好的書，才能有修身之效用。 讀書更要懂得思考，學思並重，才能成功理解，化為自身的智慧。 結論 肯定讀書的價值，呼籲讀者在讀書時應該採取應當的態度和方法。 名言例子 知道好多同學都學識更多名言例子，豐富自己嘅中文作文內容。所以喺度收集咗一啲同呢條題目相關嘅中國名言例子，希望可以幫到大家啦！不過最好就唔好淨係死背，大家可以喺背嘅同時，思考下你會點樣應用呢啲名言例子落篇寫作度。 書中自有黃金屋，書中自有顏如玉。（俗語） 腹有詩書氣自華，讀書萬卷始通神。（蘇軾） 讀書破萬卷，下筆如有神。（杜甫） 學而不思則罔，思而不學則殆。（《論語》） 問渠哪得清如許，為有源頭活水來。（朱熹） 讀書忌死讀，死讀鑽牛角。（葉聖陶） 讀萬卷書，行萬里路。（劉彝） 路漫漫其修道遠，吾將上下而求索。（屈原） 夫以銅為鏡，可以正衣冠；以史為鏡，可以知興替；以人為鏡，可以明得失。（唐太宗） 以上就係 2019年 DSE 中文卷二寫作能力題目三《讀書無用》嘅分析，希望大家可以有所得著啦！ ********** 講起中文卷一閱讀卷，好多同學都表示唔識將白話文分段、睇唔明文言文，考試時寫咗一大段答案，都係拎唔足分... 想喺閱讀卷攞到好成績，除咗要溫書之外，其實你需要掌握以下呢 3 個技巧： 1. 白話文歸納段意技巧 2. 文言句意推測技巧 3. 5** 答題框架 嚟緊我會舉辦「免學費」嘅《DSE 中文：卷一閱讀 5** 攻略班》，課堂上教大家點樣運用呢 3 個技巧，保證你本身語文功底幾差都好，都可以提升返唔少分數 ! 快啲 click 下面個 box 報名啦！ DSE 2022 嘅同學仔👇 DSE 中文：卷一閱讀 5＊＊ 攻略班 (2022 DSE) 靜研中文 83%off $300 $50 DSE 2023/ 2024 嘅同學仔👇 DSE 中文：卷一閱讀 5＊＊ 攻略班 (2023/24 DSE) 靜研中文 83%off $300 $50
