【DSE ICT】Past Paper 操卷攻略、ICT SBA 滿分秘技

有唔少學生都會選擇 ICT (資訊及通訊科技) 作為佢哋嘅 elective，但係讀咗陣就發現呢一科同想像嘅完全唔一樣！邊個話用下電腦就攞星？！其實超多嘢背同理解，SBA仲要唔知點做⋯ 考試想上網搵資料又好少嘢睇喎。今次 AfterSchool 小編就整合咗呢份 ICT 操卷攻略同 ICT SBA 滿分秘技，希望幫到大家啦～

ICT 嘅 Paper 1就包含咗 MC (Section A) 同 Structured Questions (Section B) 兩部分，同學共有 120 分鐘去完成整個 Paper 1。按照分數比例，小編建議同學 MC可以預留大約 45 分鐘、SQ 就 75 分鐘。所以操卷時一定要記得掌握節奏同睇時間，上到戰場就更有效咁分配時間啦。

喺 ICT 入面，MC 算係最容易升 grade 嘅 section。每年嘅 MC 卷，你只要細心留意就會發現其實佢每年考核嘅內容都差唔多。要熟悉MC嘅出題趨勢，小編建議同學可以每星期都做一份 DSE ICT Past Paper 嘅 MC 卷，做咗大約 5 份之後你就會發現其實年年都差唔多，仲可以知道自己嘅弱點，咁大家就知道要 focus 邊度溫書啦！唔知邊度有歷屆 DSE ICT Past Paper？快啲去《【全港最齊】歷屆 DSE Past Paper 資源庫》睇吓喇！

好似呢一題 2015年 Paper 1 問 Excel formula 嘅，其實每年都會見到～ 考評局經常問關於 Microsoft Office 嘅 Word 同 Excel，其實只要多啲用電腦跟住 notes 開 Office 嚟用同埋試下 Word 用啲 Excel formulas，就輕鬆入腦！

又好似呢啲問 parity bit，其實每年都有問，而且都唔難去理解㗎～

如果唔夠時間嘅話，你可以淨係做一兩份，根據你經常錯嘅 MC 題目做返唔同年份相同嘅題目，操到熟同令到自己至少有啱 30 題！

Section B 就比較難去分課題去操，因為考評局經常將唔同課題嘅問題 mix 喺同一個大題。所以會比較難去跟 topic 去操你比較弱嘅課題。因為考試時間都比較長，每次操 section B 都要溫好書先，唔好嘥咗啲時間同埋令自己有挫敗感。DSE ICT syllabus 有以下 5 大課題，作為考生嘅你又應該溫咩先呢？

小編我認為首先一定要溫咗 Unit A 嘅內容，尤其是 Office 嘅應用同 Excel functions，因為比較容易同埋每年都一定會考。Unit A 其中嘅一補碼 (one’s complement) 、二補碼 (two’s complement)、上溢錯誤 (overflow error) 可能會比較難消化，小編建議 skip 咗先，遲啲先溫。

之後先就溫 Unit B (hardware)、Unit C (internet)。溫到攰可以溫下 Unit E (social implications) 啲吹水嘢，唔駛背同理解咁多 technical 嘅嘢，當係俾自己個腦休息下先haha。

最後先打大佬：Unit D (basic programming concepts)。小編認為呢個最難，有唔少 logic 上嘅 computer science 內容，例如 for loop 等要 dry-run 嘅 program。數理麻麻嘅可能會比較難去理解。

雖然 DSE 卷每次都會提供 SQL commands 同  spreadsheet functions，但係千祈唔好鬆懈以為唔駛花時間背！你一定要理解每一個 commands、operators 同 functions嘅意思同用法，呢版只係輔助你咋。

個人認為 section B 要做至少 3 份 past paper 先可以知道自己唔熟邊個課題。每次操完之後都要檢查下下自己嘅答案，中唔中考評局嘅 Marking Scheme。雖然有唔少人都話可以接受嘅答案好廣，唔係全部都有寫喺 Marking Scheme裡面，但係無人知到時 marker 諗乜㗎嘛。所以最好就 play safe，認識吓考評局要嘅答案，盡量唔好失去分數。小編認識唔少電腦好叻嘅人，但係就係唔識點寫考評局要嘅答案，所以最後都考得唔理想。

建議大家做完千祈唔好唔要自己嘅答案！每一個錯誤都唔可以忽略，一定要知道正確答案，咁下次先唔會再犯呀嘛。

Elective modules 有分以下四個唔同嘅課題，唔知你讀邊課呢？

小編我 elective 係讀 2A database 嘅，所以可能未必幫到咁多位同學仔。如果讀 2A 嘅同學仔又想盡快升 grade，我建議大家喺屋企用 Access 直接起一個 database，越多資料越好。你亦可以跟住 past paper 嘅題目起個 database，跟住問題試下寫啲 SQL commands。唔識就可以睇番 marking scheme 理解返個意思同背佢嘅 format。做得多自然唔會大驚。除咗要記 database 同 SQL 外，仲要背埋 ER diagram、database development stage 同 personnel 等內容啊～ 

ICT SBA 校本評核喺根據你嘅 Elective module (選修部分) 而定嘅，佔整體 ICT 科 20% 嘅分數，絕對唔可以忽視，有唔少同學收到老師俾嘅指引就會被佢唔太明確嘅題目搞到頭都痛。小編當時收到指引之後不禁講咗句「究竟佢要咩啊⋯」，最後都好彩攞咗滿分，所以各位唔駛咁慌張，小編盡量俾啲貼士你啦～

每份 SBA 通常都分兩部份 – Task 1 (Design & Implementation, 構思與應用) 同埋 Task 2 (Testing & Evaluation, 測試與評估 )。我個人比較建議兩份 Tasks 都可以試下用唔同嘅方式去表達，所以我就決定 Task 1 用 Word，Task 2 就用 PowerPoint。目的就係希望老師睇得舒服啲同有新鮮感。

先講 Task 1 構思與應用，你一定要想像自己由零開始設計同開發老師要求你嘅系統或服務。Introduction 最簡單就係由六個 W 開始，Who (邊個係使用者？)、What (設計啲咩系統？)、When (幾時會用？)、Where (喺邊度實行？)、Why (點解要設計？)、How (你將會點樣設計同實行？)。

每個題目都有唔同要求，以我 Database 為例，老師要求要講系統嘅資料同 database normalisation、schema、SQL 等。我就會超詳細咁講述我設計系統同 Database 嘅過程，同埋 mention 埋老師要嘅內容。有啲人會話 SBA 長度唔係越長越好，但係我認為當你唔知點樣中老師要嘅嘢時，盡量寫多啲會好過漏 point。

同埋為咗令自己 SBA 冇咁悶，我會選擇適當地加插唔同嘅 tables 同 flow charts，希望生動啲。

最後，一定一定要有一個整齊嘅 Table of Content (目錄)，咁老師就可以輕鬆睇到你 SBA 嘅靚靚 Structure 啦。就算內容無咁整齊，一個好嘅目錄絕對挽救到唔少分。

之後就係 Task 2 ，講得測試同評估就梗係要不停 Test 呢個系統再作出改善。我曾經聽過一位朋友講「吓，我 Task 1已經好完美喎，仲可以點改善？」。但係就算你覺得點完美都好，都要格硬諗啲嘢去改善佢！

先測試下你整嘅系統，諗下用戶有可能會做嘅 actions 裏面有咩係錯誤嘅輸入，而系統有機會識別或識別唔到。全部都試下之後記錄返入，小編我就整咗大約 25 個測試啦。之後就講下點樣解決系統嘅問題。

最後，就可以根據你份指引嘅 key factors (考慮項目) 嘅方向再改善你嘅 SBA 系統。同上邊差唔多，解釋你之前 SBA 喺個方面嘅問題，再講下你會點樣改善令到你嘅作品喺個方面達到標準。最後就加返個總結同參考資料嘅 List，咁就完整啲啦。

同 Task 1 一樣，我都建議加插目錄，同埋一啲 screenshots、影片、圖片、tables 同 flow charts 等，令到份 report 靚靚仔仔，睇起上嚟都舒服啲～ 但係要記得 SBA 唔係俾考評局 mark，而係老師判斷份 SBA 好唔好，所以如果老師有咩意見或者有比 Marking Rubrics 就一定要跟住去改善呀。希望各位 SBA 可以齊齊攞高分！！

希望呢份 ICT 攻略幫到大家啦。記得操卷除咗係 test 吓自己對於科目嘅認識外，仲係一個令自己習慣考試節奏嘅重要經驗。記得一定要識掌握節奏，背好內容同考評局要嘅答題模式同風格。各位 ICT 嘅同學仔加油啊～ 仲唔快啲去操 past paper？即去 AfterSchool 整合嘅《【全港最齊】歷屆 DSE Past Paper 資源庫》搵試卷啦！