【中三選科】文科、理科、商科選elective全攻略+出路指南

AfterSchool
AfterSchool 2020年05月20日
中三選科決定DSE學生嘅前景,究竟點樣先可以揀到合適自己嘅科目組合,讀得開心之餘又可以讀得輕鬆,將來又可以揾到理想出路呢?AfterSchool今次為你整理咗全部elective嘅概覽同升學及就業指南,等你一次搞清楚中四揀咩科!

中三選科決定DSE學生嘅前景,將來嘅出路都係呢一刻決定,所以中三選科可以話係成個 DSE 課程最重要嘅決定。文科、理科、商科三大種類入面嘅科目各有好處,但係出路就大大不同。究竟點樣先可以揀到合適自己嘅科目組合,讀得開心之餘又可以讀得輕鬆,將來又可以揾到理想出路呢?AfterSchool今次為你整理咗全部elective嘅概覽同升學及就業指南,等你一次搞清楚中四揀咩科!

注意:以下所有資料係根據考評局課程及評估指引同埋考評局嘅2022年香港中學文憑考試評核大綱撰寫

中三升中四選科:高中科目elective

中三選科係所有DSE學生嘅必經階段,學生會喺中三第二學期填一份選科表,之後學校就會根據學生嘅成績,確定學生嘅中四選修科目組合,然後將學生派去唔同嘅班別,讀唔同嘅科目。學生最少要揀兩科,最多通常係三科。科目主要分為文科、理科、商科三個種類,呢三個種類嘅內容同畢業後嘅出路都有好大分別,所以揀科前一定要三思而行,絕對唔可以求求其其,如果唔係將來一定會後悔!AfterSchool 就為各位準備揀科嘅中三同學整理咗 DSE 所有選修科目嘅課程內容,考試形式,同埋各科嘅出路,亦會簡介選科過程,希望大家睇完之後可以揀到最適合自己嘅科目!

文科elective

DSE嘅文科主要教授文化、歷史等嘅知識。以下係文科嘅列表同埋每科嘅 focus,考試形式,以及校本評核 (SBA)。

中國文學 Chinese Literature (Chi Lit / C Lit)

課程架構

中國文學嘅課程內容主要係更深入地咁探討及賞析文章,包括近代文學以及古文,必修部分有14篇指定作品,有8個選修單元,分別為:

  1. 作家追踪——自選作家作品選讀
  2. 名著欣賞
  3. 文學專題
  4. 現當代文學作品選讀
  5. 香港文學
  6. 戲劇文學評賞
  7. 文學作品的人物形象
  8. 文學創作——原創或改編

學校亦可開設自擬單元,建議考生選擇2至4個單元學習。

公開考試

中國文學嘅考試分為卷一及卷二,卷一為文學創作,佔總分25%,有兩條題目,任擇其一,比起普通中文嘅寫作卷,中國文學寫作卷嘅題目通常都較開放式,自由度較高,而卷二就係文學賞析,佔總分60%,通常都係課程裏面嘅篇章同其他篇章嘅跨篇比較。而中國文學科嘅 SBA 就係創作練習,佔總分15%,考生要喺中四至中六期間喺散文、詩歌、小說、戲劇四類問題中選擇最少兩類,然後完成創作練習,由任教老師揀出三次創作練習嘅成績交俾教育局。

英語文學 Literature in English (Eng Lit)

課程架構

英語文學都係會更深入咁探討同賞析文章,同埋會有電影賞析。同中國文學一樣,相比正常英文,英語文學會更深入地探討及分析文章,亦有考試範文。

公開考試

考試形式同中國文學亦比較相似,不過卷一嘅 essay 題目會係關於範文,要作3篇同埋佔總分50%,而卷二就係 appreciation,佔總分30%,分為 section A, B, C,每部分揀一題作答,section A 係關於範文嘅 critical analysis,section B 係考範文入面嘅 poetry,section C 就係 unseen poetry。SBA 方面,佔總分20%,考生可以喺 extended essay,analytical review,或者 creative writing 三項中揀一個形式,字數限制2000-2500字。

中國歷史 Chinese History

課程架構

中國歷史都係分為必修部分及選修部分,必修部分係「歷代發展」,分為甲部「上古至十九世紀中葉」及乙部「十九世紀中葉至二十世紀末」,即係由夏商周時代讀到二十世紀末。而選修部分就係「歷史專題」,共有六個,只需選擇一個:

  1. 二十世紀中國傳統文化的發 展:承傳與轉變
  2. 地域與資源運用
  3. 時代與知識分子
  4. 制度與政治演變
  5. 宗教傳播與文化交流
  6. 女性社會地位:傳統與變遷

公開考試

中史嘅DSE考試分為卷一、卷二,不設 SBA,卷一嘅比重係70%,係關於必修部分,有必答題同埋選答題,必答題係資料題 (data-based questions),選答題關於課程甲、乙部各有三題,要分別各揀一題回答。卷二嘅比重係30%,係關於選修部分,六個選修單元各設3題,考生要揀同1個單元中嘅兩題作答。

歷史 History

課程架構

歷史嘅課程大綱如下:

引言:現代世界的孕育

主題甲:二十世紀亞洲的現代化與蛻變

  1. 香港的現代化與蛻變
  2. 中國的現代化與蛻變
  3. 日本及東南亞的現代化與蛻變

主題乙:二十世紀世界的衝突與合作

  1. 主要衝突與和平的訴求
  2. 協作與繁榮

公開考試

歷史嘅考史同中史一樣,分為卷一、卷二,不設 SBA,卷一嘅比重係60%,全部都係資料題 (data-based questions),卷二嘅比重係40%,試卷設7題論述題,即係要寫 essay,任揀兩條作答。

地理 Geography

課程架構

DSE嘅地理課程有7大單元:

  1. 機會與風險 — 居住在災害頻生的地區是否明智之舉?
  2. 管理河流和海岸環境:一個持續的挑戰
  3. 轉變中的工業區位 — 它如何及為何隨時間和空間的變化而改變?
  4. 建設一個可持續發展的城市 — 環境保育與城市發展是否不能並存? 
  5. 對抗饑荒 — 科技是否解決糧食短缺的靈丹妙藥?
  6. 消失中的綠色樹冠 — 誰應為大規模砍伐雨林付出代價?
  7. 氣候變化 — 長期波動還是不可逆轉趨勢?

而地理嘅選修單元就有四個,任揀兩個:

  1. 動態的地球:香港地質與地貌的形成
  2. 天氣與氣候
  3. 運輸發展、規劃與管理
  4. 珠江三角洲區域研習

地理嘅特別之處就係學校會安排讀地理嘅學生進行實地考察,運用課堂上學到嘅知識同技巧。

公開考試

地理嘅考試都係分為卷一、卷二,不設 SBA,卷一係考必修部分,比重75%,分為四部分,第一部分係多項選擇題 (multiple choice questions),第二部分係以實地考察為本嘅必答題,第三部分係數據/技能為本/結構式問題,第四部分就係短文章式問題 (essay questions),卷二係考選修部分,比重25%,分為兩部分,各設4題,考生需要各揀1題,第一部分係數據/技能為本/結構式問題,第二部分就係短文章式問題 (essay questions)。

倫理與宗教 Ethics and Religious Studies

課程架構

倫理與宗教嘅必修部分係倫理學,內有兩個單元:

  1. 規範倫理學
  2. 個人及社會問題

倫理與宗教有兩個選修部分,要各揀一個:

選修部分一:宗教傳統

  1. 佛教
  2. 基督宗教
  3. 孔教 (將於較後日子推行)
  4. 伊斯蘭教 (將於較後日子推行)
  5. 道教 (將於較後日子推行)

選修部分二:宗教體驗 (呢個部分俾學生透過體驗活動學習)

  1. 學會服務及從服務中學習
  2. 從宗教禮儀中學習

公開考試

倫理與宗教嘅考試分為卷一、卷二,不設 SBA,卷一係考必修部分,比重50%,有甲部同埋乙部,甲部係必答題,有4-5題短題目,考規範倫理學,乙部係選答題,4揀2,考個人及社會問題,題目形式係以論述題為主。卷二係考選修部分,比重50%,暫時剩係知道佛教同基督宗教嘅考試形式,佛教分為甲部及乙部,甲部係佛教歷史,兩題揀1題答,乙部係佛教教義及佛法實踐,4題揀兩題答,而基督宗教全卷設5題,揀3題答,特別嘅係基督宗教可以帶合規格嘅聖經應考 (詳情請見教育局倫理與宗教評核大綱附錄一)

理科科目

DSE 嘅理科主要教授科學知識。以下係理科嘅列表同埋每科嘅 focus,考試形式,以及校本評核 (SBA)。

生物 Biology

課程架構

DSE 生物科嘅課程範圍如下:

必修部分:

  1. 細胞與生命分子
  2. 遺傳與進化
  3. 生物與環境
  4. 健康與疾病

選修部分 (4揀2):

  1. 人體生理學:調節與控制
  2. 應用生態學
  3. 微生物與人類
  4. 生物工程

要注意嘅係,生物科除咗以上嘅範圍都好重視科學探究,科學、科技、社會和環境嘅連繫,同埋生物學的本質及歷史。

公開考試

生物科嘅考試都係分為考必修部分嘅卷一,同埋考選修部分嘅卷二。卷一比重60%,分為甲部多項選擇題 (multiple choice questions),及乙部短答題、結構式題目和論述題。卷二比重20%,全部都係結構式試題 (structured questions),由四個選修課題中揀兩個課題嘅題目作答。至於 SBA,就係佔總分8%嘅實驗技巧及能力,同埋佔總分12%嘅探究實驗報告。

化學 Chemistry

課程架構

DSE 化學科嘅課程範圍如下:

必修部分:

  1. 地球
  2. 微觀世界 I
  3. 金屬
  4. 酸和鹽基
  5. 化石燃料和碳化合物
  6. 微觀世界 II
  7. 氧化還原反應、化學電池和電解
  8. 化學反應和能量
  9. 反應速率
  10. 化學平衡
  11. 碳化合物的化學
  12. 化學世界中的規律

選修部分 (3揀2):

  1. 工業化學
  2. 物料化學
  3. 分析化學

揀科嘅同學要注意,化學科都重視科學、科技、社會和環境的連繫,唔係剩係死背爛背,要識得將課堂所學應用喺唔同情況上。

公開考試

化學嘅公開考試形式基本上同生物嘅一樣,卷一考必修部分,佔總分60%,分為甲部多項選擇題同埋乙部短答題、結構式題目和論述題,卷二係考選修部分,佔總分20%要揀自己讀嘅兩個選修單元嘅問題作答。至於 SBA,佔總分20%,需要最少為容量分析 (volumetric analysis) 評核一次、為定性分析 (qualitative analysis) 評核一次,以及為其他實驗評核兩次,學生可以用探究研習 (investigative study) 代替「其他實驗」。如果學生選擇咁做,就需要為「建議」同埋「過程與報告」各進行一次評核。

The Chemist仲分享咗一篇關於Molecule分子 VS Atom原子 VS Ion離子嘅文章可以睇下。

物理 Physics

課程架構

DSE 物理科嘅課程範圍如下:

必修部分:

  1. 熱和氣體
  2. 力和運動
  3. 波動
  4. 電和磁
  5. 放射現象和核能

選修部分 (4揀2):

  1. 天文學和航天科學
  2. 原子世界
  3. 能量和能源的使用
  4. 醫學物理學

物理科同生物科及化學科一樣,都有科學、科技、社會和環境的連繫嘅部分,所以必須要識得將知識運用喺唔同情況上。

公開考試

物理科嘅公開考試模式同化學科一模一樣,卷一考必修部分,比重60%,有甲部多項選擇題 (multiple choice questions),乙部短答題、結構式題目和論述題,卷二考選修部分,比重20%,要答自己揀嘅選修單元。物理科嘅 SBA 比重20%,係評核於實驗作業所涉及嘅一系列技巧嘅表現,考生需要進行指定數目嘅實驗。另外,考生亦都可以設計並進行一個探究研習,以解決某啲現實問題。

綜合科學 Integrated Science

課程架構

DSE 綜合科學嘅課程範圍如下:

必修部分:

  1. 生命之泉
  2. 體內平衡
  3. 短跑科學
  4. 化學世界中的規律
  5. 電的啟迪
  6. 大自然中的平衡
  7. 輻射與我
  8. 基因與生命

選修部分 (3揀2):

  1. 能量、天氣與空氣質素
  2. 持守健康
  3. 化學為民

公開考試

綜合科學嘅考試分為卷一、卷二,卷一比重45%,考必修部分,卷二分甲部同埋乙部,甲部係必修部分嘅多項選擇題 (multiple choice questions),比重15%,乙部係考選修部分,比重20%,考生要揀自己讀嘅兩個選修單元嘅問題嚟答。綜合科學嘅 SBA 分為能力範圍 A 同埋能力範圍 B。能力範圍 A 比重10%,有兩大重點:第一,安排及進行實驗,包括使用適當嘅儀器同埋器材,及以合宜嘅操作技巧嚟進行實驗;第二,作準確嘅觀察及測量。能力範圍 B 比重10%,有4大重點:第一,確定所探究嘅題目,提出適當嘅假設,並以可測試嘅方式將其表達;第二,按所探究嘅題目,設計探究嘅方案;第三,以適當嘅方式記錄及表達數據;第四,解釋實驗結果及作結論。

組合科學 Combined Science

課程架構

DSE 組合科學嘅課程分為物理、化學、生物三部分,學生可以自由選擇兩部分作為本科嘅學習內容,以下為三部分嘅具體內容:

物理:

  1. 力和運動
  2. 波動
  3. 電和磁

化學:

  1. 地球
  2. 微觀世界
  3. 金屬
  4. 酸和鹽基
  5. 化石燃料和碳化合物
  6. 氧化還原反應、化學電池和電解
  7. 化學反應與能量

生物:

  1. 細胞與生命分子
  2. 遺傳與進化
  3. 生物與環境
  4. 健康與疾病

公開考試

喺組合科學嘅考試入面,考生只需要回答關於自己所讀嘅組合 (物理、化學 / 物理、生物 / 化學、生物) 嘅試題,每部分嘅試題比重40%,所以公開考試卷嘅比重係80%。每部分嘅 SBA 比重係10%,所以最後 SBA 嘅比重係20%,物理部分嘅 SBA 考嘅係學生喺實驗作業所涉及嘅一系列技巧嘅表現,化學部分嘅 SBA 考嘅都係學生喺實驗作業所涉及嘅一系列技巧嘅表現,但係就必須最少為容量分析 (volumetric analysis) 評核一次,以及為其他實驗評核一次,生物部分嘅 SBA 分為比重4%嘅能力範圍 A,以及比重6%嘅能力範圍 B,能力範圍 A 係實驗技巧及能力,而能力範圍 B 就係探究實驗報告。

商科課程

DSE 嘅商科主要教授經濟以及商業知識。以下係商科嘅列表同埋每科嘅 focus,以及考試形式,特別嘅係,所有商科均不設校本評核 (SBA)。

經濟 Economics

課程架構

DSE 經濟嘅課程範圍如下:

必修部分:

  1. 基本經濟概念
  2. 廠商與生產
  3. 市場與價格
  4. 競爭與市場結構
  5. 效率、公平和政府的角色
  6. 經濟表現的量度
  7. 國民收入決定及價格水平
  8. 貨幣與銀行
  9. 宏觀經濟問題和政策
  10. 國際貿易和金融

選修部分 (2揀1):

  1. 壟斷定價,反競爭行為及競爭政策
  2. 貿易理論之延伸,經濟增長及發展

公開考試

DSE 經濟嘅考試分為卷一、卷二,卷一比重30%,係考必修部分嘅多項選擇題 (multiple choice questions),卷二分為甲、乙、丙三部分,甲部比重26%,係考必修部分嘅短答題,乙部比重係35%,係考必修部分嘅結構/文章式/資料回應試題,丙部比重係9%,係考選修單元嘅結構/文章式試題,考生只需要喺兩個選修單元中揀自己讀嘅嗰一個嚟回答。

旅遊與款待 Tourism and Hospitality Studies

課程架構

DSE 旅遊與款待嘅課程範圍如下:

旅遊導論:

  1. 旅遊的概念與原理
  2. 本地旅遊業
  3. 會議、獎勵、商務、展覽是旅遊業中的一個界別

款待導論:

  1. 款待業
  2. 住宿業
  3. 餐飲業

地理名勝:

  1. 地理名勝

客務關係及服務:

  1. 顧客服務
  2. 客務關係
  3. 溝通技巧

旅遊與款待業趨勢及議題

  1. 旅遊與款待業的熱門議題
  2. 旅遊業的趨勢
  3. 款待業的趨勢

公開考試

旅遊與款待嘅公開考試分為卷一、卷二。卷一比重45%,分為甲部多項選擇題 (multiple choice questions) 同埋乙部資料回應題 (data-based questions),甲部嘅問題必須全部作答,乙部就設有3條題目,要作答兩題。卷二比重55%,有5條論述題 (essay-type questions),考生只需要作答3題

企業、會計與財務概論 Business, Accounting and Financial Studies (BAFS)

課程架構

DSE 企業、會計與財務概論嘅課程範圍如下:

必修部分:

  1. 營商環境
  2. 管理導論
  3. 會計導論
  4. 基礎個人理財

選修部分 (喺兩個單元中選擇一個):

會計單元:

  1. 財務會計
  2. 成本會計

商業管理單元:

  1. 財務管理
  2. 人力資源管理
  3. 市場營銷管理

公開考試

企業、會計與財務概論嘅公開考試分為卷一、卷二。卷一比重40%,分為甲部多項選擇題 (multiple choice questions) 同埋乙部短題目 (short questions),乙部分為兩部分,第一部分有3-4條必答題,第二部分就有兩條問題,只需揀1題作答。卷二比重60%,係考選修部分,只需要答自己揀嘅選修單元,卷二分為甲、乙、丙三部分,甲部同埋乙部必須全部作答,而丙部只需要喺2條題目入面揀1條嚟答。

其他科目

以下係其他科目嘅列表同埋每科嘅 focus,考試形式,以及校本評核 (SBA)。

設計與應用科技 Design and Applied Technology (DAT)

課程架構

DSE 設計與應用科技嘅課程範圍如下:

必修部分:

學習範疇一:設計與創新

  1. 設計的實踐
  2. 設計考量
  3. 設計傳意

學習範疇二:科技原理

  1. 科技的本質
  2. 生產程序
  3. 系統及控制

學習範疇三:價值與影響

  1. 科技與設計的價值
  2. 歷史與文化的影響
  3. 創業精神及企業方法

選修部分 (5揀2):

  1. 電子
  2. 自動化操作
  3. 設計實踐及材料處理
  4. 視像化及 CAD 模塑
  5. 創意數碼媒體

公開考試

設計與應用科技嘅 DSE 考試分為卷一、卷二,以及 SBA。卷一係考必修部分,比重30%,分為甲部同埋乙部,甲部只設一題專題設計試題,乙部就有三題試題,只需作答兩題。卷二係考選修單元, 比重30%,每個選修單元有3條試題,考生只需要喺自己揀嘅兩個選修單元中各揀兩題作答。設計與應用科技嘅 SBA 係設計作業,比重40%,建議主題由考評局提供,考生需要提交:

  1. 一個可操作嘅實體模型/原型,或一個虛擬立體模型同埋一個可操作嘅局部實體模型
  2. 一個A4或A3尺度嘅設計記錄

健康管理與社會關懷 Health Management and Social Care

課程架構

DSE 健康管理與社會關懷嘅課程範圍如下:

必修部分:

  1. 人生不同階段的個人發展、社會關懷及健康
  2. 本地與全球的健康與社會關懷情境
  3. 回應健康 (護理、推廣及保健) 與社會關懷範疇的需要
  4. 推廣及維持社區內的健康與社會關懷
  5. 身體力行 — 健康推廣、保健與社會關懷

選修部分(3揀2):

  1. 健康推廣與健康護理服務的延伸學習
  2. 社群與社會關懷服務的延伸學習
  3. 健康與社會關懷時事議題

公開考試

健康管理與社會關懷嘅 DSE 考試分為卷一、卷二,以及 SBA。卷一係考必修部分,比重46%,全卷所有題目都必須作答,題目分為甲部短答題 (short questions) 同埋乙部結構題 (structured questions)。卷二係考哂選修部分同埋必修部分,比重34%,分為甲部短答題 (short questions) 同埋乙部議論題 (issue-based questions),甲部嘅問題必須全部作答,而乙部就有3條文題,只須選答兩題。健康管理與社會關懷嘅 SBA 係一份實地學習課業,佔總分20%,考生需要透過參與校内或校外 (例如同健康或社會關懷有關嘅機構) 嘅實地學習活動,獲得實地體驗嘅機會,從而喺健康及 / 或社會關懷議題相關嘅真實情境中計畫、實踐同埋評估其學習。

資訊及通訊科技 Information and Communication Technology (ICT)

課程架構

DSE 資訊及通訊科技嘅課程範圍如下:

必修部分:

  1. 資訊處理
  2. 電腦系統基礎
  3. 互聯網及其應用
  4. 基本程式編寫概念
  5. 資訊及通訊科技對社會的影響

選修部分 (4揀 1):

  1. 數據庫
  2. 數據通訊及建網
  3. 多媒體製作及網站建構
  4. 軟件開發

公開考試

資訊及通訊科技嘅 DSE 考試分為卷一、卷二,以及 SBA。卷一係考必修部分,比重55%,分為甲部多項選擇題 (multiple choice questions) 及乙部結構式試題 (structured questions),全部都係必答題。卷二係考選修部分,比重25%,全部式題均為結構式試題 (structured questions),考生需要作答所有自己嘅選修單元嘅題目。資訊及通訊科技嘅 SBA 比重20%,評核項目包括兩份引導式課業,課業內容着重於開發信息系統中「構思與應用」及「測試與評估」嘅範疇。

Afterschool都有為大家搜集關於DSE ICT選修科,如果想知嘅話可以睇【DSE ICT】Past Paper 操卷攻略、ICT SBA 滿分秘技

科技與生活 Technology and Living

課程架構

DSE 科技與生活有兩個學習範疇,學生需要選擇1個,兩個學習範疇如下:

食品科學與科技學習範疇:

必修部分:

  1. 家庭部分
  2. 營養、飲食與健康的關注
  3. 食品製作科技
  4. 消費者選擇食品的行為及涵義

選修部分 (3揀2):

  1. 飲食文化
  2. 食品科學與科技的延伸學習
  3. 食品研究與開發

服裝、成衣與紡織學習範疇:

必修部分:

  1. 家庭部分
  2. 基本時裝設計
  3. 紡織及成衣科技
  4. 消費者選擇服裝的行為及涵義

選修部分 (3揀2):

  1. 文化與時裝設計
  2. 紡織品與紡織科技
  3. 成衣工業

公開考試

科技與生活嘅 DSE 考試分為卷一、卷二,以及 SBA。卷一係考必修部分,比重30%,由甲、乙、丙三部分組成,甲部係多項選擇題 (multiple choice questions),乙部係設計題 (design questions),丙部係結構題 (structured questions),卷一全部都係必答題。卷二係考選修部分,但係都包括必修部分嘅知識,比重40%,考生只需要作答關於自己揀咗嘅兩個選修單元嘅問題。科技與生活嘅 SBA 包括指定課業同埋專題研習或設計夾兩部分,指定課業比重10%,專題研習或設計夾比重20%

音樂 Music

課程架構

DSE 音樂嘅課程範圍如下:

必修部分:

  1. 聆聽
  2. 演奏 I
  3. 創作 I

選修部分 (3揀1):

  1. 專題研習
  2. 演奏 II
  3. 創作 II

公開考試

音樂嘅 DSE 考試分為必考部分同選考部分,不設 SBA。必考部分嘅卷一係聆聽,比重40%,考核範圍包括西方古典音樂,中國器樂,粵劇音樂,同埋本地及西方流行音樂。卷二係實習考試,比重20%,卷三係作品集,比重20%。選考部分都分為三份卷,考生只需要選考一份卷,比重20%,三份卷分別係專題報告,實習考試,同埋作品集。(DSE 音樂科考試嘅詳細資料請參閱考評局嘅評核大綱)

視覺藝術 Visual Arts (VA)

課程架構

DSE 視覺藝術課程包括兩個範疇,分別係視覺藝術評賞同埋視覺藝術創作,關於兩個範疇嘅詳細資料請參閱考評局視覺藝術課程計評估指引第11頁 (PDF 檔案第18頁)

公開考試

視覺藝術嘅 DSE 考試分為兩份卷,考生只需要考期中一份,比重50%。卷一係「視覺形式表達主題」,卷二係「設計」。視覺藝術科嘅 SBA 要求考生提交一個作品集,比重50%,其中需要包括研究工作簿同埋針對主題嘅藝術作品或評賞研究。(DSE 視覺藝術科考試嘅詳細資料請參閱考評局嘅評核大綱)

如果想知多啲關於DSE VA嘅話可以睇我哋Afterschool嘅另一篇blog【DSE VA】 VA操卷、前期準備大揭秘,仲有歷屆題目庫!
視覺藝術

體育 Physical Education (PE)

課程架構

DSE 體育嘅課程內容有10大部分:

  1. 體育、運動、康樂、消閒與豐盛人生、消閒與豐盛人生:歷史和發展
  2. 人體
  3. 動作分析
  4. 維持健康與活動表現的體適能和營養
  5. 運動與訓練的生理學基礎
  6. 運動創傷、處理與預防方法
  7. 體育、運動及康樂相關、運動及康樂相關心理技能
  8. 體育、運動及康樂的、運動及康樂的社會影響
  9. 運動和康樂活動管理
  10. 體驗

公開考試

體育科嘅 DSE 考試分為三份卷,不設 SBA。卷一係多項選擇題 (multiple-choice questions) 同埋短答題 (short questions),比重42%,卷二係長答題 (long questions),比重18%,卷三係實習考試,比重40%,有關卷三嘅詳細資料請參考考評局嘅評核大綱

中三選科策略

喺交你哋嘅中三選科表之前必須要考慮選科三個準則:興趣、難度、選科出路。但係究竟邊個先至最重要?小編認為,最重要嘅當然係興趣,因為就算揀咗一科好容易讀,出路又廣嘅科目,如果對呢科冇興趣嘅話,都唔會讀得開心,如果讀得唔開心,又點會有心機溫書,考到好成績呢?其次就係科目嘅難度,同學選科嘅時候都需要考慮自己嘅能力,因為科目嘅出路幾好都好,如果自己應付唔到,考唔到好成績嘅話,出路都只會非常有限。最後就係選科出路喇,同學最好當然係揀出路又廣,自己又有興趣,又應付到嘅科目,但係如果搵唔到最理想嘅科目,都儘量揀啲選科出路較廣,或者可以銜接去你嘅 dream job 嘅科目。

文科出路

好多人都覺得,讀文科出路好窄,注定做老師或者作家、編輯等,但係其實文科畢業都可以有好多唔同出路。讀中國文學或英語文學嘅同學,你哋可以讀語言學系、傳理系、翻譯系、社會學系等等,除咗可以教書、寫書之外,仲可以做記者、翻譯、社工等等。讀中史或者西史嘅同學,大學讀完歷史系之後,亦可以繼續進修,或者喺博物館做嘢,甚至參加考古團隊。讀地理嘅同學,大學可以讀地理系,畢業後除咗做地質學家之外,都可以從事城市規劃,同埋旅遊等工作。讀倫理與宗教嘅同學,大學可以讀社會學系、哲學,之後可以讀神學,畢業後做社工、輔導員、神職人員等。所以其實文科生出路並非大家想像得咁窄,大家喺考慮文科出路嘅同時都不妨考慮埋自己嘅興趣啦〜

理科工作去向

 理科生出路其實都好廣,讀完大學唔係一定要做研究。讀 bio 嘅同學大學可以讀 biomedical science (生物醫學) 同埋 biomedical engineering (生物醫學工程) 等科目,並喺畢業後從事相關工作,當然都可以讀醫,但係要注意嘅係,港大醫科要求學生必須修讀 chem,而中大就要求學生修讀 chem 或 bio,所以如果同學剩係讀 bio,就只可以讀中大嘅醫科。讀 chem 嘅同學大學就可以讀 pharmacy (藥劑學) 或者 chemical engineering (化學工程) 等科目,畢業後可以從事藥廠等相關工作,當然都可以讀醫,而且讀 chem 嘅同學港大同埋中大嘅醫科都可以報。讀 phy 嘅同學大學可以讀 astronomy (天文),nuclear physics (原子核物理) 等嘅科目,畢業後可以研究天文,喺核電廠做嘢,甚至加入波音 (Boeing),SpaceX 等公司,研發飛機、太空船等。而讀綜合科學同埋組合科學嘅同學,基本上都可以讀大部分 phy chem bio 學生讀嘅科目,但係就唔能夠讀醫喇。

商科出路

商科前途會比其他科目廣闊,大學亦都有好多同商科相關嘅科目,例如讀 econ 同埋 BAFS 嘅同學大學可以讀會計,BBA (工商管理學) 等嘅科目,畢業後可以加入不同公司工作做會計師,市場營銷,人力資源部等等,甚至係做 iBanker 等。而讀旅遊與款待嘅同學大學或大專就可以讀例如旅遊及款待管理、娛樂事業營運、環境管理等科目,畢業後可以從事有關酒店、航空、旅遊等嘅工作。

其他科目出路

其他科目嘅出路都好廣闊。讀 DAT 嘅同學大學可以讀相關嘅課程,例如電子及電機工程,畢業後可以從事產品設計、室內設計等嘅工作。讀健康管理與社會關懷嘅同學大學可以讀護理、食物營養學、社會學系等科目,畢業後可以做社工、營養師,同買從事同護理相關嘅工作等。讀 ICT 嘅同學大學可以讀電腦或工程等學系,畢業後可以從事相關工作,例如加入科技公司從事 coding 嘅工作等。讀科技與生活嘅同學可以讀大學或大專嘅營養學、時裝等嘅課程,畢業後可以做例如營養師或從事時裝設計等嘅工作。讀音樂嘅同學大學可以讀音樂系,畢業後可以做作曲家、演奏家等。讀 VA 嘅同學大學就可以讀藝術系,畢業後可以從事平面及室內設計、舞台設計、創意媒體等工作。讀 PE 嘅同學大學可以讀體育系,畢業後可以從事同運動產業相關嘅工作。

選科程序

中三選科嘅程序其實非常簡單。每間學校嘅程序都有啲唔同,但係大致上都係如下:

  1. 喺第二學期嘅開頭,學校通常都會派一份選科意向調查表俾同學,收集數據,以便提供一啲能夠滿足大部分同學嘅科目組合。
  2. 學校會派一份正式嘅中三選科表俾同學,同學就要將科目組合根據自己嘅興趣排序,學校通常都會俾同學較長嘅時間仔細思考應該揀咩科。
  3. 完成排序之後,同學就需要將選科表交返俾學校,咁選科程序大致上就完成啦。

同學要記住必須喺 deadline 之前交返份中三選科表格俾學校,如果唔係就好大機會會被派到最少人讀,僅僅開到班嘅科目組合!學校會根據同學嘅考試成績分派科目組合,結果通常都會喺差唔多暑假或暑假嘅時候公布。同學記住留意學校公布,睇吓自己入唔入到心儀嘅科目組合啊!

中三選科測試

同學可以進行 RIASEC 測試 (Holland 職業類型測試),之後去香港輔導教師協會嘅對照表睇吓自己適合讀咩科同埋做咩職業。

RIASEC 測試 (中文版) (做完後有適合你嘅課程及行業建議)

RIASEC Test (English)

RIASEC 與高中選科 <香港輔導教師協會 尋找生命的色彩>

中三升中四選科要考慮問題

Q: 係咪數學好好嘅人先可以讀 physics?

A: Physics 嘅課程對學生嘅數學有一定要求,但係唔一定要數學非常好先可以讀到,只要能夠應付平時數學科嘅課程,physics 對你嚟講應該都唔會太困難,因為大部分題目都係要求識得運用所學嘅公式。但係,如果數底較差,認為數學好難應付嘅同學,就唔建議讀 physics 喇,因為可能會讀得比較辛苦、冇心機。

Q: 中文係咪一定要好 top 先可以讀中國文學?英語文學係咪都係要英文好 top 先得?

A: 中國文學對中文水平當然有一定要求,但係唔一定要係中文最 top 嘅學生先可以讀中國文學,小編亦有中文能力屬於中上嘅同學,雖然中文唔係最 top,但係都揀咗中國文學,都讀得幾開心㗎。英語文學都一樣,其實只要英文唔差,可以去到中上,就應該可以讀英語文學。

Q: 唔讀 M1/M2 係咪好蝕底?

A: M1/M2 對數學能力都有一定要求,如果數底唔好嘅同學,就唔建議讀 M1/M2 喇,但係如果本身數學唔差,又唔抗拒數學嘅話,就建議揀 M1/M2,因為好多大學學科讀 M1/M2 都有得加分,但係就要留意自己想報讀嘅大學學科會唔會指明要讀 M1 定係 M2,如果唔係揀錯咗嘅話就報唔到自己想讀嘅學科㗎喇。

Q: 想讀Law有冇規定一定要讀咩科㗎?

A: Law, 包括LLB或與law有關嘅double degree大學係冇指定DSE選修科目要求,法學院睇嘅係學生喺DSE考到幾多分而決定取錄與否。小編建議同學仔選修啲你有興趣既科,有興趣自然讀得好,喺DSE Best 6(4個核心科+2個最佳選修科) 考到34分嘅就基本上穩入入到 HKU LAW。小編亦都建議大家要讀好語文科,特別是英文,因為讀LAW對英文聽、講、讀、寫都有高要求,入讀後若要讀得好,英文好係必須。

睇完以上嘅科目簡介,相信各為準備揀科嘅中三同學都已經大概知道自己想揀咩科。記住,揀科最緊要係自己對科目嘅興趣,千其唔好因為其他因素而揀咗自己冇興趣嘅科目啊!各位中三同學亦要努力溫書,唔好唔記得考試成績係會影響學校派科㗎!小編最後都祝大家好運,希望各位中三同學都能夠成功揀到自己想讀嘅科目,加油!