做DSE中文卷一果陣，明明睇得明篇文，但偏偏就拎唔足分😭操又唔識操，溫又唔識溫。但原來中文閱讀都有一套溫習同操練技巧！
今次AfterSchool搵到DSE中文Straight 5**嘅 dsefreegiveaway，同大家分享究竟佢中文卷一閱讀係有乜溫習攻略！希望大家見到中文死亡之卷嘅時候，可以沈著迎戰！
DSE中文閱讀卷—：攞唔到分嘅原因
Photo by Nik Shuliahin on Unsplash
DSE中文閱讀嘅白話文篇章一向都係同學嘅弱點，通常大家都會話「我睇得明篇文，但係答唔到啲問題。」尤其是啲題目真係好空泛，究竟點樣先可以攞到分呀？
今日就同大家分享我考DSE嘅時候點溫中文卷一嘅白話文，同埋點樣去準備答題嘅方式。
破解迷思：睇得多書，唔代表考得好卷一
先講要點樣溫白話文先，坊間有好多人話睇多啲書就可以考白話文考得好，所以就叫你去睇魯迅、小思之類嘅書，但係其實你睇得多書並唔會直接導致你考得好，因為睇呢啲書其實對你嘅答題技巧係完全冇幫助。
DSE中文閱讀卷—：白話文溫習指南
Photo by John Jennings on Unsplash
多做白話文練習
對我來講，最重要嘅就係要做多啲唔同嘅白話文練習。
如果你有補yylam嘅話，yylam嘅閱讀卷係真係好高質。如果你冇嘅話，可以試吓從唔同嘅渠道獲得呢啲卷啦，亦都可以喺書店買出版社嘅Mock卷來做。但係做咩卷都好，個大前提係你要完成晒所有嘅Past Paper先。
掌握正確操練Past Paper嘅方法
究竟我自己點樣操閱讀卷嘅past paper呢，其實我係做完咁多年嘅past paper之後，我會
- 將每年同類型嘅題目作整合，
- 再對比番每年嘅Marking，
- 搵出該題型嘅答題方法同埋步驟。
例如：感情類型嘅題目，要解釋作者或者文中嘅角色點解會對某個某種事物有特別嘅感情嘅時候，就有兩個步驟：
- 先反推測作者或該角色過去的經歷，以及佢嘅人生觀；
- 解釋點解佢會有呢一種感情
除咗呢類型嘅題目之外，其實當你對比每一年嘅pastpaper之後就會發現，每種題型其實考評局都有固定嘅搭法，以及答題框架，只係依着每年文章嘅內容稍作更改。因此只要你可以整合每年出過嘅題型同佢背後Marking嘅得分原因，並加以學習，你嘅答題能力就自然會提升。
進階操練卷一嘅方式
更加進階嘅方法就係自己出返一啲閱讀卷嘅題目：題目取材上唔一定需要用文學作品，簡單至係日常生活當中，使用平日所見嘅新聞報章黎出題，而對象上就可以考返自己或者考返同學。
例如：你可以搵吓最近嘅新聞，從唔同人物嘅發表嘅「語句」當中，反推翻佢就「該事件」有啲乜嘢睇法，從而增加你對文字嘅理解能力同觸覺。
總括：提升卷一得分嘅三大貼士
無論如何，想提升自己係閱讀卷嘅能力，就要做到呢三點：
第一：一定要多做練習
第二：要提升對文字嘅觸覺同理解
第三：要知道唔同題型嘅答題框架
只要你可以履行以上三條原則，閱讀卷就會考得好！
如果想喺閱讀卷表現出色，就要記住以上三大貼士。記得Past Paper唔係做完就會學到嘢㗎！做完之後都要諗下，記低自己做錯啲乜，唔好再犯大錯先有操卷嘅意思！仲要分析評分準則同埋答題技巧，咁大家嘅卷一分數就萬無一失啦！
當然，AfterSchool點會只有卷一嘅分享呢～想知道卷四點考先可以考得好？超級狀元醒你「說話」小貼士！ ；望到卷二作文嘅題目無從入手？睇下其他名師係點作，從中學習咪得！
