【DSE通識卷二】揀題目時必須考慮嘅三件事

kmc0178
kmc0178 2020-1-22 1,989

喺通識卷二入面,大家通常面對兩種情況

  1. 三題都唔識做
  2. 三題有多過一題想做

所以,今次就想同大家分享下係通識卷二嘅時候點樣選擇題目。選擇題目最主要有三個因素要考慮,第一係題目嘅議題、第二係題目嘅形式即係題型,而以上兩個因素就會構成題目嘅難度。

要選擇最好同埋最適合自己嘅題目,就一定要考慮上述嘅因素,今次就同大家分享下究竟係考慮揀邊條題目嘅時候應該做啲咩。

揀題目要考慮啲咩?

揀題目最重要嘅因素就係你對議題熟唔熟悉,簡單來講,就係你知唔知究竟個題目嘅topic係講啲咩。例如2019年第一條就是講罕有疾病,第二條就是說保育發展。你對呢個topic嘅認識係完全直接咁影響你嘅得分,咁點樣先叫對呢個topic認識係非常之深,從而值得揀依條題目呢?

1) 例子

首先,就係你有冇相關嘅例子,例如係文物保育方面,你知唔知近期香港有啲乜嘢因為發展而未能保育嘅例子?你知唔知香港有啲乜嘢著名嘅古物古蹟?你知唔知香港有啲咩著名嘅古蹟而且係成功活化呢?如果你解答唔到以上嘅問題,咁我建議你都唔好揀呢條題目。因為無論係八分題定12分題,用例子都係非常之重要。所以如果你完全諗唔到任何例子,或者得一兩個例子都唔好揀嗰條題目。

2) 議題認識

除咗例子之外,你仲要睇吓自己對嗰個議題認識有幾深,例如究竟你知唔知呢個議題入邊有啲乜嘢持份者,而依啲持份者對該議題有咩睇法,除此之外,亦都要知道究竟政府有啲乜嘢相關嘅政策係影響緊呢個議題。例如攞返2019年第二條嘅文物保育為例,你知唔知香港政府有一個活化歷史建築夥伴計劃?你知唔知香港有啲咩歷史建築?如果唔知嘅話,你就會好難喺長題目入邊攞到高分。

3) 題型

第二個因素就係題型,你對唔同題型嘅掌握會直接影響你得分嘅難易度。A題同B題嘅題型都要考慮,但係B題嘅題型比較重要,因為佢佔嘅分數係比較多。先講A題,呢題嘅題型大多數都係列出因素、原因,持份者衝突題等等,所以冇太多嘅花臣可以玩,我覺得比較要留意嘅就係原因同因素嘅分別,如果你返唔切依兩樣野嘅分別嘅話,就盡量唔好揀有因素個題難。但呢啲嘢應該係考之前要食晒,所以呢題係唔會影響你揀題嘅抉擇。

再講B題, B題最主要嘅題型有是否同意題,多大程度上同意題等等,我覺得最難嘅係評估,即係Evaluation嘅題目。以評估之下再分評估影響、評估成效及可行性等等,以評估題嘅框架處理上係比較複雜,如果你唔清楚究竟一條評估題嘅答題框架係點樣嘅話,我就唔鼓勵你去揀有評估嘅題型。

總結

總括而言,我自己覺得所有題目上嘅技巧其實應該可以喺考試前處理好晒,即係你唔應該比題型嘅深淺度影響你揀題目嘅決定,應該只係睇究竟你對嗰個主題熟唔熟悉。因為所有嘅題型基本上都係有得溫,除咗一啲新嘅題型你有可能未如果之外,但所有新嘅題型其實都只係舊酒新瓶,如果你認識其他所有嘅題目嘅答題框架,你絕對有能力去搭一條你未見過嘅題型嘅題目,所以最後揀題目都只係睇你對議題嘅熟悉程度, 而唔會睇條題目本身究竟難唔難。



— 睇完dsefreegiveaway嘅分享,仲想知多啲點樣備戰通識?即刻去睇吓《【DSE通識備戰攻略】 備戰通識、考好LS有策略!》,通識絕對唔係無得溫!AfterSchool通識課程等緊你~

免費 DSE 電子報
定期為 30,000+ 中學生送上實用 DSE 資訊和資源
kmc0178

kmc0178