每逢 11 月至 12 月都係芸芸學子預備及遞交大學申請嘅高峯期，當中大家最熟悉嘅申請途徑必定非 JUPAS（聯合招生辦法）莫屬。（想知多啲關於JUPAS嘅資料可以㩒呢度！）但係唔知大家又熟唔熟悉 Non-JUPAS 嘅世界呢？
其實 JUPAS 同 Non-JUPAS 由細節到收生嘅要求都十分唔同。透過Non-JUPAS途經申請大學嘅程序同要求係比較繁複，而且有好多必須留意嘅事項，若然各位申請嘅學生一唔細心謹慎，就有機會浪費個張辛辛苦苦用血汗青春換來嘅成績表！
有見及此，小編今日就分享一啲資料適用於HKU/ CUHK/ UST/ CityU/ PolyU/ HKBU/ LingU/ EduHK/ MUHK，等大家可以知多啲關於 Non-JUPAS 嘅世界喇！
目錄
什麼是非聯招招生辦法（Non-JUPAS）？
Non-JUPAS 主要係俾唔符合 JUPAS 最低資格（即係 HKDSE 香港中學文憑考試無考獲33222嘅成績或者冇參加過高考/中學文憑試，而且不符合中六優先取錄計劃資格的人士）而設，又或者 修讀資助或自資嘅學士學位課程嘅人士 以及 修讀非 DSE 考評制度嘅人士報讀 JUPAS 下的學位課程 而設。
唔經 JUPAS 嘅報名者需要向個別嘅大學提交申請，而唔似 JUPAS 咁，可以透過 1 份報名表格就能同時報讀各大院校之課程。換句話說，經直接收生報讀 2 間大學的課程，就得需分別向 2 間大學申請，遞交至少 2 份申請表格。
大部分大學都會對係網上報名嘅申請人收取比較便宜嘅報名費。一般嚟講，除咗網上交易平台常用的信用卡外，通常都會接受申請人以外的信用卡帳戶，或者以銀行轉帳嘅方式支付報名費用。
咩人需要透過非聯招招生辦法（Non-JUPAS）申請大學？
簡單嚟講，透過 Non-JUPAS 申請大學嘅同學主要有 3 種，包括選修 IB (International Baccalaureate) 嘅同學，正在就讀 Asso/ HD (Higher Diploma) 嘅同學以及香港境外就讀嘅學生(International Students)。
而小編今次撰寫嘅文章中心將會注重正在就讀 Asso/HD (Higher Diploma) 嘅同學。
報名非聯招招生辦法（Non-JUPAS）嘅時間表
1） 挑選心儀嘅大學同有興趣嘅 Major／學系 （報 Non-JUPAS 期間，9月至1月）
係填寫志願（Program Choice）或者撰寫個人自述（Personal Statement）前，各位同學一定一定，必須必須要諗清楚自己有興趣嘅大學同想發展嘅職業範疇。上到大學唔代表唔洗讀書，而一間大學嘅校風，環境同文化都係啲可以影響學習效率嘅因素，所以各位同學可以由以上三個元素開始入手諗下自己對邊間大學有興趣，繼而再挑選自己心儀嘅 Program 同 check 下佢嘅入學要求及準則。當然除咗讀書以外，擴闊自己嘅眼界同擴闊社交圈子都係十分重要，所以同學們都可以依以上三個準則衡量各間大學！（想知多啲關於大學嘅生活可以㩒呢度!）
當你已經清楚自己嘅喜好同有清晰嘅目標，咁當你撰寫你嘅個人自述（Personal Statement）時一定可以寫出一篇更加有說服力同感染力嘅自我簡介，同時亦可以用嚟當作面試 (Interview) 時嘅自我介紹，一舉兩得，令考官對你嘅印象更加深刻！
2）考IELTS （為某部分大學嘅收生要求）（報Non-JUPAS期間，9月至1月）
雖然並唔係每一間大學嘅收生要求都需要學生具備 IELTS 成績，但係 IELTS 貴為國際間認可嘅英語水平考核權威，有國際權威嘅成績揸手一定可以增值你嘅履歷同為你嘅說辭添加說服力，用流利嘅英文輕鬆攞 offer！
小編就建議各位可以係 sem 頭得閒啲嘅時候快啲考咗佢！（想知多點樣令英文進步嘅同學可以睇下《坐港鐵學英文》，《詞彙永遠豐富、內容永遠新穎既秘訣》）
3）向各大學遞交入學申請 （簡稱：報 Non-JUPAS，9月至1月）
報 Non-JUPAS 係可以報晒9大,亦可以同時收到多個 offer。但係值得各位同學注意嘅係每間大學可以申請嘅科目嘅限制數量同報名嘅 deadline 都唔同，而且各部門會獨立處理學生既報名。所以理論上一心只係想入返大學嘅，唔理讀咩科嘅話，可以漁翁散網，報埋每間大學其他有啲興趣嘅科，起碼一旦你心儀嘅 offer 落空咗都仲有個 Plan B 墊住，Plan B offer都係 offer! 報名嘅時間由最早 11 月至最遲 7 月不等，
小編將會係下面整合一個時間表俾各位參考各大學 Non-JUPAS 申請 deadline 嘅日期。
4）出席面試（Interview）（通常12月尾至1月尾就陸續收到邀請）
好多大學都係根據你 GPA 嘅高低去決定俾唔俾 Interview 嘅機會你，所以簡單嚟講，GPA 就係面試的入場卷， 你嘅 GPA 越高，有 interview 嘅機會就越大，你有 offer 嘅機會亦相對更大。
5）收 Offer (通常由3月至到5月)
通常由 3 月至到 5 月都係收 offer 嘅高峯期，所以到時各位同學記得 check 實自己個 Mailbox 啦。收唔到嘅同學都唔需要太擔心，因為去到開學其實都仲有機會！(因為有好多人俾咗幾個 offer嘅留位費，但係只要一過咗七月同八月嘅學生注冊期，就會有唔少 offer 派翻出黎！)
希望以上嘅時間表可以令各位同學更熟悉申請 Non-JUPAS 期間可以預料嘅事項 :)
報名 Non-JUPAS 的普遍步驟
- 大部分嘅申請入學系統都要求大家先註冊一個帳號，方便大家提交你嘅申請同檢視申請狀況或更改你嘅申請資料。
- 選擇申請類別，記得一定要選擇『非聯合招生辦法 (Non-JUPAS)』以及想申請既學年，之後選擇想報讀嘅科目。
- 提供相關的學歷及履歷證明文件
- 重複檢查你將會遞交嘅資料同提交申請
- 透過該大學所列明既付款途經，為你嘅 Non-JUPAS 申請繳費
- 當你完成以上嘅步驟，應該會收到一封 online 嘅確認信，證明你嘅 Non-JUPAS 申請已經被接納同正在被處理中！祝大家好運！
**以上步驟以CityU 嘅 Non-JUPAS 申請系統為例**
**每間大學嘅申請方法都有所出入，所以小編係度羅列嘅都係啲普遍嘅申請程流程與資料，確實嘅申請程序以該大學所註明為準**
報名 Non-JUPAS 常見問題
1）我可唔可以同一時間報 JUPAS（聯招招生）同 Non-JUPAS？
答：唔可以！大部分院校都只會接受一方面嘅申請，所以同學們千祈唔好同時間係兩個途徑一齊申請入大學。
2）HD升大學難唔難？
答：相比起 DSE 會比較容易, 因為 HD 考試會列齊範圍, 努力温嘅話好易拎 B+ 以上, GPA 穩攞 3.3。
3) CGPA幾多先會有UGC嘅interview？
答：CGPA 至少要有 3.2 先有機會攞到 interview 嘅機會
4) 點樣先可以有多啲機會入三大？
答：最起碼 CGPA 有 3.4，但喺要提醒大家如果想穩入三大, 記得報 Senior intake, 即係由 Year1 讀起, 就算你 CGPA 爆4, 報咗 Senior, 都唔一定有 interview 嘅機會。
【2024更新（2025未出！）】各大院校的非聯招招生辦法（Non-JUPAS）報名資料及網址
1. 香港大學 HKU Non-JUPAS
- 申請費用：HKD$450
- 最多可申請科目數量：5個首輪
第一輪評估申請截止時間為2023年11月15日中午12:00（香港時間）。進一步申請將繼續接受至2024年8月22日中午12時（香港時間），並將視乎名額供應情況而滾動考慮。 入圍候選人可能會被邀請參加筆試和/或面試。不優先考慮任何特定的高等教育機構。
**(港大入學處稱會不定時審視第一階段落選嘅申請當該申請更新了最終的成績。換言之有機會喺 2 月中後繼續俾 offer 俾第一階段申請。簡單嚟講，各位同學考完 final 記得一定要快啲 upload你嘅成績去申請入學系統！)**
第一輪成功的申請者將於2023年12月下旬左右收到申請結果通知。
- 繳交學費（如成功申請）：2024年9月尾
香港大學官網申請Non-JUPAS網址：按此
相關網站：
2. 香港中文大學 CUHK Non-JUPAS
Senior Entry
- 申請費用：HKD$450
- Advance Offer 申請截止日期：2023年11月16日
- Regular Offer 申請截止日期：2024年2月20日
中文大學官網申請Non-JUPAS網址（Senior Entry）：按此
First Year Entry
- 申請費用：HKD$450
- Advance Offer 申請截止日期：2023年11月16日
- Regular Offer 申請截止日期：2024年2月20日
中文大學官網申請Non-JUPAS網址（Year 1 Entry）：按此
3. 香港科技大學 UST Non-JUPAS
- 申請費用：HKD$450
- 早期申請截止日期：2023年11月21日
- 早期申請結果公佈：2023年12月下旬
- 主輪申請截止日期：2024年1月9日
- 主輪申請結果公佈：2024年2月下旬
- 第二輪申請截止日期：2024年6月30日
科技大學官網申請Non-JUPAS網址：按此
4. 香港理工大學 PolyU Non-JUPAS
Senior Entry
- 申請費用：HKD$450
- 早期申請截止日期：2023年09月21日
- 早期申請結果公佈：2023年11月16日
- 主輪申請截止日期：2023年11月17日
- 主輪申請結果公佈：2024年2月06日
香港理工大學官網申請Non-JUPAS網址（Senior Entry）：按此
First Year Entry
- 申請費用：HKD$450
- 早期申請截止日期：2023年09月21日
- 早期申請結果公佈：2023年11月16日
- 主輪申請截止日期：2023年11月17日
- 主輪申請結果公佈：2024年2月06日
香港理工大學官網申請Non-JUPAS網址（Year 1 Entry）：按此
*Poly U 對提交既資料有好多 format 上嘅要求，必須留意清楚！*
5. 香港城市大學 CityU Non-JUPAS
*City U有啲科目不開放本地申請（Link係呢到：可申請科目表）
Senior Entry
- 申請費用：HKD$450
- 早期申請截止日期：2023年11月15日
- 早期申請結果公佈：2023年12月
- 主輪申請截止日期：2024年01月
- 主輪申請結果公佈：2024年01月15日
香港城市大學官網申請Non-JUPAS網址（Senior Entry）：按此
First Year Entry
- 申請費用：HKD$450
- 早期申請截止日期：2023年11月15日
- 早期申請結果公佈：2023年12月
- 主輪申請截止日期：2024年01月
- 主輪申請結果公佈：2024年01月15日
城市大學官網申請Non-JUPAS網址（Year 1 Entry）：按此
6. 香港浸會大學 HKBU Non-JUPAS
- 申請費用：HKD$350（本地生）/HKD$450（非本地生）
Non-local non-mainland applicants
Local and Mainland applicants
|
| ||
|---|---|---|---|
| Early Round | 27 Sep 2023 - 10 Nov 2023, 11:59 pm | ||
| Main Round | 11 Nov 2023 - 31 Jan 2024, 11:59 pm | ||
| Extended Round | 1 Feb 2024 - 31 May 2024, 11:59 pm |
Local and Mainland applicants
|
| ||
|---|---|---|---|
| Main Round | 27 Sep 2023 - 3 Jan 2024, 11:59 pm | ||
| Extended Round | 4 Jan 2024 - 31 May 2024, 11:59 pm |
浸會大學官網申請Non-JUPAS網址：按此
7. 香港嶺南大學 LingU Non-JUPAS
- 申請費用：HKD$200
- 申請日期：2023年09月27號起
- 早期申請截止日期：2023年12月06號
- 主輪申請截止日期：2024年5月15號
- 最後公佈所有申請結果日期：2024年7月26號
嶺南大學官網申請Non-JUPAS網址：按此
8.香港教育大學 EduHK Non-JUPAS
- 申請費用：HKD$300
Senior Entry
| Date | Event |
|---|---|
| 29 September 2023 | Application Opens |
| 30 November 2023 | Closing Date for Early Round Applications |
| 15 January 2024 | Closing Date for Main Round Applications |
| 16 May 2024 | Closing Date for Application
|
| Late July 2024 | Programme Registration |
| August 2024 | New Student Orientation |
| September 2024 | Commencement of Academic Year 2024/25 |
香港教育大學官網申請Non-JUPAS網址（Senior Entry）：按此
First Year Entry
| Date | Event |
|---|---|
| 29 September 2023 | Application Opens |
| 15 January 2024 | Closing Date for Main Round Applications |
| February – March 2024 | Main Round Admission Interview(s) / Subject Test(s) |
| 16 May 2024 | Closing Date for Application
|
| May – July 2024 | Second Round Admission Interview(s) / Subject Test(s)
|
| February – August 2024 | Announcement of Admission Offer (on a rolling basis) |
| Late July 2024 | Programme Registration |
香港教育大學官網申請Non-JUPAS網址（Year 1 Entry）：按此
9. 香港都會大學 HKMU Non-JUPAS
- 申請費用：HKD$300（本地生）/ HKD$515（非本地生）
- 申請日期：2023年10月01號起
- 首輪申請結束日期：2024年3月31號
- 面試日期：視乎課程而定
- 次輪申請結束日期：2024年07月19號 (下午五時)
- 公佈申請結果日期：2024年9月2號前
都會大學官網申請Non-JUPAS網址：按此
報 Non-JUPAS 不能不知嘅貼地貼士及注意事項
GPA Requirement (普遍 3.2 – 3.8 以上）
每間大學同 Major 都對 GPA requirement 都有唔同嘅要求及準則，小編就建議去睇返心儀嘅學科係官網上以往嘅收生要求同坊間討論區或 Offer reference 再作分析。
綜合大部份過來人同 Lecturer 嘅經驗：
| 分數 | 穩陣程度 |
| 3.8–4或以上 | 穩入三大／神科 |
| 3.3–3.8 | 基本上都穩陣入到大學 |
| 3–3.3 | 最基本要求，而且可能需要考慮埋Interview / IELTS等條件，或比較遲會收到Offer |
| 3或以下 | 需要考慮非UGC課程 (非政府資助學士課程), 如自資課程（top-up) |
**以上資料只屬參考，並未經專業分析及各大學證實**
Transcript 大學成績表
Transcript 其實就係各大專院校嘅正式成績表，上面會寫曬你現有所有學期嘅 Grade。一般嚟講，報 Non-JUPAS 時只係需要睇你頭 1－2 個 sem 嘅 Grade。提提大家，呢份成績表需要去同學所屬嘅院校嘅 office /網頁買，並唔可以由自己 print。有啲院校並不會提供即日印 transcript 嘅服務，所以大家記住切勿臨急抱佛腳！
Reference letter 推薦信
Reference Letter 係 Lecturer 或者大學嘅教職員專寫比你嘅推薦信。如果該 Lecturer 嘅專業領域係同報讀學科相關，你有人無，就會係報名嘅時候成為重大助力 ╴幫你係龍爭虎鬥嘅亂局中脫穎而出。
Personal Statement 個人簡介
同學報 Non-JUPAS 時，需要寫一份 Personal statement 向所報嘅學系嘅入學處人員介紹自己，作為成績及Interview以外嘅補充資料。內容通常都包含介紹個人性格、自己比其他人嘅優勝之處、想報讀該學科原因同相關知識／經驗等等。（小編準備咗緊一篇更加詳細講解 Personal Statement 嘅文章，即撳入嚟睇！）
你不能不知道的注意事項！
剛修讀完第一年 Asso (副學士)/ HD嘅同學
係修讀咗一年 Asso(副學士)/HD 課程後，同學只可以報讀 Year 1 課程，學位通常比較少。因為院校好難單憑一個 sem 嘅成績決定收生，所以會睇埋 DSE 成績。而且，部分大學例如 UST 同中大都唔接受第一年就走嘅學生。
剛修讀完第二年Asso(副學士)/HD嘅同學
修讀 Asso(副學士)/HD 同學嘅慣常做法係第二年走，而學生可以跟據自己嘅志向同學系上分別選擇報讀 Year 1 或者 Senior Entry (Year 2/3) 課程。多數人都會直接接住讀 Year 3，令到畢業嘅年份同當初 JUPAS entry 一樣。
點樣可以有靚啲嘅 GPA？
帶眼識人！
通常你嘅身邊都會充斥著學霸／ 摺友／ free rider，所以你嘅首要任務係認清你想同邊種人挽！相信睇到呢篇文章嘅你哋都係有上進心，而且十分之希望可以踏入大學校園嘅熱血小伙子，所以醒目嘅你就記得一定要同啲學霸或者有共同目標嘅兄弟姊妹一齊向目標奮鬥，互相鼓勵，過3爆4！
上堂專心主動啲，輕鬆靚 grade！
上堂嘅時候最好就專心同主動啲、答多啲問題，有疑問就即刻搵 lecturer 問。係佢地面前留低個好印象，除左比較容易會有靚 Grade 之外，更加隨時有機會獲得推薦信（Reference letter)，作為報 Non-JUPAS 嘅附加文件，對你嘅入 U 之路提供莫大嘅加成！
實用大法助你Group Project搵好隊友！
上堂嘅時候除咗專心聽 Lecturer 講嘢，其次就係專心搵 project mate。有潛質嘅好隊友通常都出沒喺前排頭一兩行（俗稱爆四位），原因係因為通常坐到禁前嘅都係啲好有幹勁升返上去、好留心聽書嘅人！
溫書要溫得醒，咁先溫得勁！
最基本就梗係溫足 Professor 俾你嘅 material 同上堂專心聽書啦！如果啲嘢唔係好識嘅話其實可以搵 Professor 清 concept架，千祈唔好怕！因為子曰：『師者，所以傳道授業解惑也』，所以老師嘅天職其實就係要幫學生解惑，溫故而知新，彼此學習，共同進步。
其次就係要識搵 Source！大多數Source都可以喺網上搵到，但係可惜有啲就要俾錢開 account 先可以 access 到。另一個方法就係問你嘅師兄師姐！相信佢哋征戰沙場，身經百戰，都係全靠佢哋個Source Bank傍身。正所謂薪火相傳，小編相信各位只要肯開口向前輩謙虛學習，前輩們必定傾囊相助！
最後就係記得一定要操卷！有Past Paper就一定要做！因為通常啲Professor都會跟番類似嘅模式出卷，所以只要熟讀題型同做法就一定輕鬆攞A！
咩係IELTS？！
IELTS，全稱為國際英語測試系統（International English Language Testing System），是著名的國際性英語標準化水平測試之一，部分學校會將IELTS成績列入收生要求。
考試會分為Reading, Writing, Listening & Speaking 4份卷。各卷分為1－9分，大學普遍要求整體分級達6－7分不等，各分卷需達6分或以上。
係香港，同學可以透過英國文化協會（British Council）同IDP兩間機構報考。兩間價錢都係＄2,150，而成績嘅有效期為兩年。但係原來IELTS又有分期款，各位唔好考錯呀！
IELTS考邊款？！點樣考？！
- Academic （學術組別）
如果想喺本地或海外升讀大學包括（non-jupas) 就需要考academic。如果想之後去exchange就更加需要！內會比較深入所以認受性較高，日後就業時僱主亦較著重。
2. General Training
主要移民海外用，試題較基本，大學唔會睇。
操練方法
坊間有好多IELTS嘅參考書同past paper，但係又唔知做邊本好但係報考嘅時候機構亦會提供少部分嘅練習，所以小編強烈推薦各位操練Cambridge English，IDP，British Council同IELTS.org提供嘅練習。為咗方便大家，小編亦隨函附上一啲links等大家可以下載佢哋嘅練習（係頁面嘅最低可以搵到）。同學們亦可以去Youtube睇吓坊間對IELTS嘅分析，幫助自己更認識IELTS嘅考核系統。
Interview點算好？萬事俱備，只欠東風？！
當你已經招募咗神隊友，升晒lv(溫好書)，攞晒神裝(Reference Letter)，打造埋神劍(Personal Statement)，再騎埋汗血寶馬(靚Grade)，咁終極之戰已經近在咫尺。現在就只欠東風－Interview (面試)！
Do your Research 做好你嘅資料搜集！
如果想獲得最全面同貼地嘅一手資料，就一定要去Info Day! 因為到時會有讀緊該Major嘅學生喺度回答你嘅問題，所以你可以借呢個機會問下佢哋當初嘅入學分數，溫習及面試經驗以作自己參考同分析。其次就係記得要上網睇下該學系嘅資料，廢事入學處職員問起嘅時候自己口啞啞！
Prepare Self-intro 預備好自我介紹
正所謂好嘅開始就係成功嘅一半，所以大家一定要好好準備面試時嘅自我介紹，務求令考官眼前一亮。而小編認為各位可以由介紹個人性格起步。用一啲引人入勝嘅個人故事作切入點，繼而用啲正面嘅詞匯介紹自己嘅性格，再帶出自己申請該學系嘅原因。當你嘅起承轉合如流水般暢順同前文後理都合理無誤，咁相信你已經解決咗最難個關，因為後面嘅問題通常考官都係根據你之前嘅回答而問嘅，只要你唔自打嘴巴，基本上都輕鬆過關。即使考官問啲比較挑戰性及牽涉個人睇法嘅問題，如分析題，時事題或創意題，同學們亦不用擔心，只要大家真係對該學系做足資料搜集，同時保持冷靜思考，勇敢作答，基本上考官都會收貨，因為呢啲題目都冇真正嘅對與錯。簡單嚟講，同學們對該學系嘅認識同熱情就係你回答呢啲問題嘅指路明燈！
Manners maketh Man 君子坦蕩蕩
相信各位對Group Interview都唔會陌生，但係各位值得留意我哋唔係講緊DSE嘅說話考試，所以Group Interview嘅大方向係應該保持禮貌，並且理性地論證自己嘅意見，並唔需要過份執著於反駁對方嘅論點或者為咗面面俱圓而強行達成共識。相反好似『君子』咁，保持思緒鎮定，冷靜自信表達自己嘅意見就可以了。其次，同學們亦唔需要特登搶先發言。若然同學都未準備好自己嘅論點就發言，咁樣除咗會喺發言嘅時候顯得唔夠說服力同弱勢更加令考官覺得你未準備好你嘅Interview。所以大家記得要諗清楚整合好，先至好發言！如果你禁啱同其他同學一齊發言嘅話，記得一定要保持風度，俾對方發言先！Manners maketh Man!
Have confidence 挺一個自信的笑容
雖然Interview本身應該是一個嚴肅的事情，但係interview普遍來說，係一個俾雙方認識彼此嘅機會，從而讓雙方衡量對方究竟係一個點嘅人，而小編相信無人會鍾意一個愁眉苦面嘅人。因此保持笑容，挺起胸膛，勇敢自信地回答對方嘅問題絕對唔係破壞緊一場嚴肅嘅interview，而係建立一個良好嘅交談氣氛，令對方更容易理解你嘅出發點，而唔係處處為難你！即使遇到啞口無言嘅問題，只要你自信合理地講出你嘅睇法，並且承認自己缺乏該方面嘅認識，考官唔一定會扣你分，仲有可能會加你分添！所以笑一笑，世界更美妙，成功入U呱呱叫！
最後希望各位喜歡小編嘅分享，嚟緊仲會出有關Non-JUPAS唔同方面嘅分享，希望可以幫到各位同學順利入U。有啲資訊其實考JUPAS嘅同學都十分適用，所以各位同學記得share俾你哋同學，一齊向目標努力。加油！
總結
綜合各院校嘅資料，可見大部份首輪Non-JUPAS嘅申請截止日期都定係11月至1月較早的時間，而首輪通常都會offer多啲嘅學位，但收生門欖就各大院校嘅科目各有參差，建議各位都係同該學系嘅師兄師姐收下風會穩陣啲。但係即使錯失首輪申請嘅同學都無需太擔心，因為次輪申請嘅學位並唔會好似大家想像中咁限量。好多同學都申請多間大學，所以其實佢哋放返出嚟嘅學位就會成為次輪俾大家嘅offer喇！ 講到最後，各位同學記得唔好放棄，搵個有共同目標嘅朋友一齊努力讀書，衝GPA，登上夢想嘅山峰！加油！要寫Personal Statement？可以睇下AfterSchool嘅《【Non-JUPAS】Personal Statement 全攻略》。
重要參考資源
- Non-JUPAS offer整合表（由AfterSchool提供）
- Non-JUPAS offer參考天書 （由Goop提供，連結在網頁最底）
重要IELTS練習分享
Cambridge English:
IELTS.Org Sample Question:
British Council Practice Tests:
IDP IELTS Tests:
**此文章有部份參考其他網誌的分享並純屬 Blogger 個人分享，並不代表本AfterSchool立場。**
其他DSE資料庫
