香港人一向都好中意去外國留學、工作甚至係移民，不過原來唔係想去就去到㗎喎。唔少國家都有自己嘅英語水平要求，而要獲得呢張入場卷其中一個方法就係考 ielts 喇。但唔係好多人都了解ielts 係咩一回事，更有朋友仔試過唔小心報名報錯咗應考組別添！今日小編就係到為大家拆解吓ielts 嘅考試模式同成績等等嘅疑問，等大家係考前做足準備！ 什麼是國際英語水平測試（IELTS）? IELTS 國際英語水平測試係其中一個全球認受性十分高嘅英語能力測試，每年都會有大約350萬考生考㗎。而報名考 IELTS 主要嘅目的係為咗幫大家申請海外升學同工作所需要用到嘅外國簽證。 以英國為例子，如果你想去英國工作，英國嘅簽證要求係要達到英國內政部認可嘅歐洲語言共同參考架構 (CEFR) ，當中 IELTS 英國簽證及移民考試 (IELTS for UKVI)就係其中一個英國認可嘅測試，適合向英國簽證同埋向移民署直接申請簽證嘅人。 如果去英國讀書留學嘅情況同工作有少少唔同，申請者要透過 IELTS 國際英語測試嘅成績而通過到「安全語言測試」 (SELT)嘅，而普遍嘅英國大學同院校都接受一般嘅國際 IELTS 考試，換句話講你係唔需要參加英國簽證與移民署 (UKVI)嘅 IELTS 英國簽證語言測試（啫係IELTS for UKVI）。 IELTS 同 TOEFL 有咩分別？ 而相信有唔少人同以前嘅小編一樣，對 TOEFL 同 IELTS 都會「傻傻分不清」。 其實 TOEFL 同 IELTS 一樣都係一個好高認受性嘅國際英語水平測試，而且都適用於大部分要簽證嘅國家。而當中佢哋最大嘅分別就係唔同國家會傾向接受邊種測試模式，IELTS 會喺英國、新西蘭、澳洲呢一啲英聯邦國家更有認受性，更加有規定簽證申請只係接受 IELTS 成績；而 TOEFL 就會更加適合用於美國同加拿大呢啲國家啦。大家記得喺報考前要睇清楚學校同當地政府嘅要求，從而揀翻考邊個試咁就唔會擺烏龍啦〜 其實 TOEFL 同 IELTS 嘅考試模式都十分相似，同樣都係會分為 Reading, Writing, Listening & Speaking 4 份卷，而且大家都只係有兩年嘅有效期，要留意嘅係認可 IELTS 嘅政府或者機構一般都唔會接受兩年或以前考獲嘅成績，所以 IELTS 過咗期嘅話你就要再申請多次啦。 IELTS 考試模式 上文所提及嘅 IELTS 英國簽證及移民考試 (IELTS for UKVI) 其實有分唔同嘅類型而且適合嘅對象都有唔同。要了解呢樣嘢就要了解英國簽證政策對象主要分咗三類，分別有 Tier 1（投資者同初創簽證）、Tier 2 （技術簽證）、 Tier 4 （留學簽證）。而當中 IELTS 雅思考試分為 Academic（學術組別）同 General Training（一般訓練組別），分別只係在於 reading 同 writing 卷兩組會有唔同版本。 Academic （學術組別） 不論想喺本地或海外升讀大學包括（non-jupas) 定喺想 exchange 都需要考 academic。Academic 裡面嘅文章基本上都是學術性的性質比較深入所以認受性較高。 General Training（一般訓練組別） 主要移民海外（Tier1&2）用，試題較基本，大學唔會睇。 IELTS 紙筆考試 VS 電腦考試 除咗要知道自己應該要考嘅組別之外，各位亦要選擇考IELTS 紙筆模式考試定係 IELTS 電腦模式考試。兩者考試模式基本上都係一模一樣，同樣有 4 份卷，分別在於聆聽、閱讀及寫作 3 份考卷分別會喺紙筆同電腦上面作答，同埋電腦考卷會更快公佈成績。而會話考試仍會由 IELTS 認可考官面對面進行，試題深淺程度都會同紙筆模式一樣。考生可以自行決定用乜嘢模式考試。 IELTS 試卷 正如上文都有提及過，IELTS 考試都係分為 Reading, Writing, Listening & Speaking 4 份卷。而每一份卷分數由 1 至 9 分，透過計算考生喺四份試卷嘅平均評級，可以得出你嘅整體評級，所以整體滿分都係 9 分。而海外同本土大學普遍要求整體分級達 6 - 7 分不等，各分卷需達 6 分或以上。 (以下試卷以 Academic（學術組別）為標準) Reading 考生需要喺限時 60 分鍾，閱讀 3 篇文章然後完成 40 條題目，而文章內容主要會圍繞對普遍考生有興趣嘅內容，而題目題型分別有 MC 選擇題、短問答 Short Question、Summary Cloze 題、True/False 題等等。 Writing 考生要喺限時 60 分鐘完成兩篇作文。Task 1 考生需要喺大約 20 分鐘內至少寫 150 個字，而試卷要求考生對題目提供嘅資訊包括：圖形，表格，圖表或圖表等等進行描述同分析。而 Task 2 考生需要喺 40 分鐘之內寫至少 250 個字，而題目要求考生討論題目嘅議題、論點或看法而作出論證、評論或反駁等等。 Listening 聆聽卷限時 40 分鍾，其中 30 分鍾為播放聆聽錄音內容，之後有 10 分鍾俾考生整理答案，錄音內容總共有 4 段，每段有 10 條題目，一共有 40 條題目，而每段聆聽錄音只會播放一次。第 1 部分和第 2 部分錄音內容背景主要係關於日常社交。在第 1 部分會有兩個人對話（例如，關於旅行安排嘅對話）。而第 2 部分中只會有一個人講話（例如，有關社區設施嘅講話）。 Speaking 說話卷係考生與考官一對一口試，考試分為三個部分，第一部份考官會向考生詢問一些圍繞考生生活嘅問題，例如家庭，工作，學習或興趣，歷時 4 - 5 分鐘，測試你嘅英文口語會話能力；而在第二部份考官會給您一張任務卡，要求您談論特定 topics。卡片會告訴您應該在談話中包括哪些要點，並指示你解釋主題嘅一個方面。考生有 1 分鐘時間準備演講，之後進行 2 分鐘個人演講，考官可能會再追問 1 - 2 條問題，歷時 3 - 4 分鍾；最後第三部份考官會更深入地討論同第 2 部分嘅主題相關問題，歷時 4 - 5 分鍾。 香港雅思考試機構 & 雅思 IELTS 報名資訊 香港提供 IELTS 考試嘅機構主要有兩間分別係英國文化協會（British Council）同澳大利亞教育國際開發署（IDP），呢兩間都係受英國官方認證嘅 IELTS 主辦機構及官方考試中心，而且兩間價錢都係＄2,150，成績嘅有效期都係為兩年。不過佢哋喺成績發放上都有啲唔同，大家可以因應翻自己嘅需要去報考翻唔同嘅機構啦。 英國文化協會 British Council 英國文化協會現時喺 100 個國家運作，係一個好有公信力嘅英國公營機構嚟㗎。如果想喺 British Council 報考 IELTS 嘅話要留意： 你可以喺考試後第13天嘅早上七點開始，喺網上查閱考試結果。但要留意網上成績只喺留兩個星期，隨後就會被刪除。 考試之後第13日成績單會送遞至你提供嘅香港地址而且費用全免。 考生只會獲發一份成績單。 考生可以喺考試日起計嘅六個星期之內申請覆卷，費用為$900，而考生知道再次批改嘅結果，大約需要四至六個星期。 佢哋提供網上報考同親身報考 IELTS，想知多啲有關英國文化協會British Council嘅考試可以㩒呢到睇睇。 澳大利亞教育國際開發署（IDP） IDP 每月平均都會舉辦超過 20 場 IELTS 考試，而且亦都有網上報考系統，考生可以隨時隨地報考 IELTS。如果想喺 IDP 報名考 IELTS 嘅話要留意： 考生可於測試日後第 13 日喺網上查閱考試結果。但要留意網上成績只喺留到第28，隨後亦會被刪除。 若考生需要於成績發放日的指定時間內領取成績單 考生可於考試日期起的六個星期內申請成績覆核，費用為港$1,000。成績覆核的結果喺一般情況下會喺2-21 日內公佈; 佢哋都有提供網上報考同親身報考 IELTS，想知多啲有關英國文化協會British Council嘅考試可以㩒呢到睇睇。 IELTS 成績喺香港有咩用？ 工作 其實IELTS除咗用嚟申請海外簽證之外，仲可以攞嚟報考公務員同考大學㗎。參考公務員事務局網頁，如果喺 IELTS 整體分級攞到 6.5 分 或以上，並喺同一次考試入面每一項個別分級都攞到唔低過 6 分嘅人士，喺 IELTS 考試成績有效期兩年入面，你哋嘅 IELTS 成績可以等同公務員綜合招聘考試 (CRE) 英文運用試卷二級嘅成績。而持有以上成績嘅各位可以就此決定有冇需要報考英文試卷。 本地升學 而 IELTS 成績喺大學聯合招生辦法（JUPAS）同非大學聯合招生辦法（Non-JUPAS）呢兩個本地升學途徑都用得著，根據考評局嘅基準研究，比較出 2012 年文憑試英國語文科嘅成績同IELTS嘅水平；英文科 DSE 攞 Level 4 對照翻 IELTS 嘅分數會係 6.31 - 6.51;而英文攞 Level 5** 嘅話喺 IELTS 就會係攞 7.51 - 7.77，詳細分數對比可以睇呢到。雖然 IELTS 成績唔能夠喺取替 DSE 英文科成績，但八大院校都會視 IELTS 有好高嘅參考價值，有助校方更了解考生嘅英語水平。不過如果考生係想交 IELTS 成績上去JUPAS嘅話，要記得必須喺三月前（即係未考 DSE 嗰陣）喺 Other Academic Results (Language Subjects) 到填翻 IELTS 嘅分數。 而 Non-JUPAS 嘅話就更加著重學生嘅英語能力，所以 IELTS 成績會係 Non-JUPAS 嘅英語收生條件。想由副學士（asso）升翻上本地 9 間大學以及多間大專院校嘅話，學生都要喺 IELTS 考到 6.0 - 6.5 分先得啦。如果想知多啲有關 Non-JUPAS 報名資訊嘅話，可以睇吓 AfterSchool 嘅【Non-JUPAS】各大學Non-Jupas 2020報名攻略！ 點樣有效咁準備同溫習 IELTS？ 唔少 IELTS 考生因為唔太熟悉 IELTS 嘅考試模式而感到好傍徨，其實坊間可以搵到好多 IELTS 嘅參考書同 mock paper 幫大家重點鍛練 IELTS 唔同試卷嘅應試技巧；另外大家喺報考 IELTS 嘅時侯機構都會派定啲補充練習俾大家，所以各位都可以多加操練有關題型同做好時間分配。除此之外，小編亦都非常推薦大家可以操練 Cambridge English，IDP，British Council HK 同IELTS.org 提供嘅免費 IELTS 練習，隨函附上一啲 link 等大家可以 download 下載佢哋嘅練習Samples（係頁面嘅最低可以搵到）。同學們亦可以去 Youtube 或者 Google 睇吓坊間對 IELTS嘅考試技巧分析，幫助自己更認識 IELTS 嘅考核系統同模式，咁去到正式考試個陣都冇有怕啦！ IELTS Past Paper 分享 Cambridge English: http://www.cambridgeenglish.org/Images/23435-ielts-sample-papers.zip IELTS.Org Sample Question: https://www.ielts.org/about-the-test/sample-test-questions British Council Practice Tests: http://takeielts.britishcouncil.org/prepare-test/free-practice-tests IDP IELTS Tests: http://idpielts.me/prepare-ielts/free-ielts-practice-tests/ 香港雅思常見問題 知道可能各位考生或者有興趣考IELTS嘅同學仔睇完上面嘅資訊可能都仲會有啲疑問，就等小編解答吓大家嘅問題啦！ Q：考 IELTS 有冇話隔幾耐先可以再考多次？ A：冇限制考生重考嘅時間間隔㗎，不論你 IELTS 過咗期或者想重新評估多次自己嘅英文能力，隨時可以再考過㗎。 Q：報 IELTS 嘅截止日期係幾時？ A：每一場 IELTS 考試將會喺於考之前一個星期截止報名，如果個一場喺截止日期之前已額滿，機構就唔會再接受報名，所以小編都建議各位要儘早報名啦。 Q：除咗做 Past Paper 練習之外仲有咩途徑可以幫我準備 IELTS？ A：除咗做練習之外，各位準考生仲可以透過坊間唔同機構報讀 IELTS 準備課程，除咗British Council 同 IDP 都有開雅思課程之外，Wall Street English、EF English Centers、英皇教育、遵理學校等等都有提供各式各樣嘅 IELTS course。呢啲 course 主要係教授 IELTS 嘅應試技巧，例如會同大家重點鍛練喺閱讀文章時所需要嘅推斷技巧 Q：考 IELTS 當日考生要準備啲咩？ A：喺考試當日，考生一定要帶有效身份證或者其他身份證明文件，考生都唔需要帶文具因為試場會提供所有應試所需文具，最重要當然就係考生要準備放鬆嘅心情應考 IELTS 啦。 Q：考 IELTS 當日嘅流程係點樣㗎？ A：開考之前，考生會被影相，而相片會用係成績單上面；然後會掃描考生嘅指紋以確實身份。同時考生都會收到說話卷嘅通知書，而該通知書會列出會話測試嘅確實時間嘅。記得千其唔好遲到考場呀，因為係上午 8:40 後先到達嘅考生，將不獲准進入考場。而且缺席和遲到者已繳測試費用將不獲退回㗎！
