【DSE中文卷三】中文綜合格式全攻略

吾同中文 | Maychu
吾同中文 | Maychu 2020-8-18 33,034

平時上堂嘅時候,都會問學生想我講邊一份paper,又或者想做邊份paper嘅練習。我喺入面聽得最少嘅答案就係中文卷三 - 聆聽與綜合能力。

問返學生點解,得返來嘅答案一般係:

  • 「嘩,唔想做中文綜合啊,又悶又多嘢寫。」 
  • 「做嚟做去都係得個少少分數,不如做其他仲好啦!」 
  • 「有時間做綜合不如寫多篇作文啦!」 
  • 「卷三次次都寫唔曬,寫到個人好灰。。。」 
  • 「咪又係一個寫字鬥快嘅比賽,我輸硬啦,寫字咁慢。」

但係,如果你問我邊份卷最容易拎到5**,我一定會答你,係卷三。我會喺呢篇文章分享DSE中文綜合語境意識、整合拓展嘅升級技巧,用最簡易嘅思路令大家迅速掌握綜合卷嘅得分關鍵。除此之外,我仲整合咗五大常見嘅中文卷三格式,釋除同學對綜合卷嘅恐懼,為各位打造2021年中文DSE嘅奪星之路!

 

1. DSE中文卷三比重及歷年cut off

根據考評局公布嘅各卷嘅分數分佈,卷三所佔嘅比例係高達18%,只係比卷二作文少6%,但拎呢18%嘅難度係遠遠低於作文個24%。所以,我地又點可以輕易放棄中文卷三呢?

我地一齊睇下究竟中文卷三要做到幾多percent先可以拎到5以上嘅成績,根據2019年嘅中文卷三cut off,拎到7成以上嘅分數就會保證有level 5以上了。

7成?!可能大家會覺得7成呢個數字聽落好誇張。其實,識得「拆件攞分」,成件事就變得簡單。

部分

比重

語境意識

10分

整合拓展

16分

見解論證

14分

表達組織

10分

卷三嘅評分標準分成4個部分,分別係語境意識10分,整合拓展16分,見解論證14分,表達組織10分,夾埋就50分。

語境意識如果格式正確,行文語氣正正常常,就可以拎到六分以上;到表達組織,只要你篇文章有頭有尾,中間寫個普通嘅過渡段,語句通順,都應該可以拎到6分以上。呢兩個部分夾埋已經攞到12分,你只需要再拎23分就已經係7成分數。

我當年做綜合練習嘅時候,都係依循住呢個思路,篇文章嘅最高分數試過爆seed上到去45/50分,係接近9成嘅分數,而正常發揮都會維持係37至40分嘅水平。

 

2. DSE中文卷三常見實用文格式

語境意識最重要一環、大家咨詢度最高嘅一定係中文卷三格式。中文綜合格式正確係突破Level 5關口嘅基本條件,所以以下提供咗幾款常見嘅中文卷三格式比大家溫習一下:

中文綜合專題文章格式

標題

置中

文末

個人署名,寫在右下角;先寫名字,再寫身份。

日期

寫於下款的下一行,頂格寫。

 

中文綜合投稿格式

標題

置中

內文

交代寫作背景或者撰文動機,不必自我介紹,然後就入正文

署名

頂格寫

 

中文綜合演講辭格式

上款

對聽眾地位的順序稱呼

引言

說明演講的原因及開場白

正文

演講的主要部分,可按內容分段。

結尾

表達謝意

署名

不需要寫署名

 

中文綜合建議書格式

上款

收訊者的稱謂

內文

置中標題,正文可以點列方式表達。

下款

寫在右下角,寫提建議者名字。

日期

寫於下款的下一行,頂格寫。

 

中文綜合書信格式

自薦信

上款

收信人的稱呼+尊鑒

首段

自我介紹+從(資料來源)得悉(機構)招募(職位/角色)

結尾

表達希望被錄取的展望

祝頌語

寫在結尾的下一行,「祝」字隔兩格,祝頌語嘅內容要喺下一行頂格寫。

下款

寫在右下角,先寫寫信人職位/稱呼,下一行再寫寫信人名字,名字後面加「啓/謹啓」。

日期

寫於下款的下一行,頂格寫。

 

公開信

2018年令眾考生乍舌嘅公開信,都係屬於書信嘅一種,包含:

上款

收信人的稱呼

祝頌語

寫在結尾的下一行,「祝」字隔兩格,祝頌語嘅內容要喺下一行頂格寫。

下款

寫在右下角,先寫寫信人的職位/稱呼,下一行再寫寫信人名字。

日期

寫於下款的下一行,頂格寫。

 

一定有同學咁問:「如果咁啱冇背到嗰個格式點算?」

其實中文卷三格式除咗背,都可以參考考評局。因爲考評局都好驚大家唔識中文綜合格式呢家野,所以會喺第二段錄音末尾提醒大家少少格式同語氣嘅注意事項。

DSE 2018年中文卷三為例,呢一年題目要求同學以「學生會學習日工作小組主席」寧樂行嘅身份,撰寫公開信一封,向全體同學介紹走出教室應有嘅兩種學習態度等等。錄音稿裏面話「以工作小組的身份」、「二月份之内交稿」,就係考評局比同學嘅提示。首先提咗你要以邊個身份寫,仲提埋你要寫日期同寫幾時。所以,就算文體陌生,都可以從錄音搵到關於中文綜合格式嘅線索!

背完格式係唔係就滿分呢?當然唔係啦。要知道考評局嘅信條就係字字珠璣,即但凡喺卷上出現嘅文字,或錄音裏面提過嘅內容,都有可能係補充語境意識嘅重點。

再講,中文綜合格式只係一個框架,太多細節冇包含到。比如話,我地背嘅格式有無同我地講要呼籲d咩?有無叫我地喺最後多謝邊個?明顯無啦。所以,唔可以一本通書讀到老。同學仔,要識得聽考評局比嘅提示啊!
 

3. DSE中文綜合語境意識

除咗綜合格式,語境意識上相信大家都比較擔心措辭語氣,因為感覺好虛。不過,當然有規律可以依循啦。例如如果聆聽錄音提示你行文語氣要「莊重得體」,你就唔可以寫口語,唔可以故作搞笑,唔可以比人地一種高高在上嘅態度。

語境意識講到尾都係考核同學對真實情境嘅還原度,只要平時多d思考對老師、對平輩、對上司等唔同角色嘅態度,語氣就會掌握得當。

當然,中文卷三嘅語境意識又豈只語氣同格式?首尾段嘅背景、目的、呼應、展望等都係攞分位!

 

4. DSE中文卷三綜合整合拓展星級技巧

好多人對中文卷三都會有個誤解:整合拓展等於將聆聽內容同資料內容抄晒落去。但當份卷派返落嚟,就會發現整合拓展好似已經抄齊嘢,都只得一半分數。原因係,你只係做咗整合,冇做到拓展。

之前我未清楚咩叫拓展嘅時候,都會陷入同大家一樣嘅困境。事實上,拓展只不過係喺你地所抄內容嘅基礎上,再行多一步。

何況,同前幾年嘅 Past Paper 相比,近兩三年嘅中文綜合卷喺題目部分已經將拓展方向寫出嚟,只係大家唔識得點樣利用。繼續用DSE 2018中文卷三為例,拓展方向就係「該態度對於走出教室學習的重要性」。咩意思呢?即係佢希望你寫呢兩種學習態度對於走出課室學習有咩好處。

譬如閲讀材料入面嘅第一個態度「熱心發問」同活動「知錯能改:釋囚人士樂分享」呼應,一般同學會將資料入面「熱心發問」呢一欄嘅內容全部抄晒落去,然後覺得自己已經講咗個重要性。

可惜世事邊有咁輕鬆?尤其以考評局陰濕嘅作風,就算佢大發慈悲話比你聽拓展方向,佢都會要求你去再諗多一步。

例如,可以諗下釋囚人士分享會有咩特色需要學生有好奇心同勇於發問?發問之後學生可以有咩得著?如果係我,就可能會答:保持好奇心、勇於發問能令同學活躍講座氣氛,讓釋囚人士根據問題去展開更深入的闡述,揭開他們的內心世界以及日常生活,使同學增加對社會小衆的瞭解。

其實你會發現,一個方面嘅論述,如果中point 其實都係一句起兩句止嘅事,唔需要長篇大論。

 

5. DSE中文聆聽及綜合能力卷三建議時間分配

中文綜合卷各部分

時間分配

首段及尾段

~10分鐘

整合拓展

~35分鐘

見解論證

~40分鐘

 

中文卷三時間得1個半鐘,如果真係唔夠時間完成綜合卷點算呢?當考試時間去到最後十分鐘,你應該判斷到自己做唔做得切。如果你預計無可能寫完成個見解論證,咁我建議你及時收手,直接寫結尾,令綜合格式完整。

因為若然你中文綜合格式唔完整,唔單止會影響表達組織嘅分數,仲會扣埋語境意識嘅分數。
表達組織好大機會落到中下品,大概4分;語境意識都有機會落到中下品,又係4分,夾埋得8分,同我喺文章開首講嘅「有頭有尾,格式語氣正常,就會拎到十二分」相差4分,亦有可能因爲咁樣同Level 5+失之交臂。

即使你用盡呢10分鐘去草草寫多一個見解論證,你都未必可能從中拎多4分。但係,呢十分鐘絕對夠你去寫一個完整嘅結尾。兩者相比,當然係拎返有渣拿個四分比較划算。

 

6. DSE中文綜合卷常見問題

Q:係唔係寫得多就一定會好高分?係唔係要瘋狂加紙先可以拎高分數?

A:記得之前我學生有比我睇過佢地同學寫嘅中文綜合範文,淨係見解論證就已經寫滿一張學校單行紙。我覺得係一個錯誤示範,先唔講考試你根本無可能寫到咁長,再講考評局都無期望過學生係寫咁多。對考評局嚟講,中point就已經係拎到全部分數。
以我自己應考經驗為例,我成份中文綜合只係用咗一本答題簿再加一至兩張紙,都已經有45/50嘅分數,但呢個係正常字速嘅同學都寫到嘅份量。

 

Q:見解論證係咪同「吹水」差唔多?使唔使比好多例子?

A:中文卷三嘅見解論證唔係純「吹水」,有一定框架嘅,同通識嘅建議題好類似。
先寫好建議實施嘅步驟,然後指出問題所在,再寫嗰個建議如何解決問題,用一個實例作為論據。
至於需唔需要海量例子,其實要明白嘅係考試時間得一個半鐘,唔容許我哋對文字多加雕琢,又或者舉大量嘅例子。你寫一百個例子,同寫一個解說得好完備嘅例子,都係拎一樣嘅分數,就係7分。

 

Q: 係表達組織方面,我係唔係需要修飾我嘅句子,用多d修辭?

A: 其實,表達嘅基本要求係語句通順,表達清晰,修辭並唔係一個需要特別關注嘅位。所以,最緊要就係用簡單且通順嘅句子表達段落內嘅邏輯關係。
好多時候,同學選擇放棄中文卷三,係因為被「字數多」、「唔夠時間」等迷思fake咗。而今日教大家係語境意識搶分、係表達組織留神、精簡整合拓展,我就係為咗講比大家聽:綜合唔使多字都可以精準奪分!

免費 DSE 電子報
定期為 30,000+ 中學生送上實用 DSE 資訊和資源
吾同中文 | Maychu

吾同中文 | Maychu

教學與我並生,吾同中文齊一