【學英文心得】到底明星們學英文有咩秘訣呢?

AfterSchool
AfterSchool 2020-8-14 1,784

你知唔知娛樂圈嘅明星除咗唱歌、跳舞同埋演戲,其實佢哋英文都講得嘞嘞聲呢?原來好多明星都冇去過海外留學,全靠自學英文先有今日嘅英語能力。想知佢地有咩學英文嘅秘訣就記得睇落去啦!

日本明星學英文方法

Taka @ ONE OK ROCK

圖片來源:HK01

講到日本搖滾樂界又點可以唔提到ONE OK ROCK呢?ONE OK ROCK嘅作品成功融合了當代美式搖滾同日本道地混合搖滾(Mixture Rock)元素,令佢哋喺幾年間成功打入海外市場。而ONE OK ROCK 嘅主唱 Taka更加係現今日本樂界使用英文演唱嘅代表人物,準確清晰嘅英文咬字同唱腔令樂隊嘅作品更加吸引。

Taka之所以講得一口流利英文全靠自己後天嘅努力,除咗有喺英國短暫留學之外,Taka的英文係喺就學時期喺學校學嘅。而加入咗ONE OK ROCK之後,Taka都會透過聽唔同歐美band嘅歌曲去練習自己嘅咬字同發音。Taka學英文嘅毅力真係令人好佩服,大家絕對唔好錯過呢隊band啊!

福士蒼汰

圖片來源:明潮

有日本「國寶級男神」之稱嘅福士蒼汰不單止靚仔,英文仲講得嘞嘞聲𠻹!原來福士蒼汰嘅「啟蒙老師」係佢初中嘅英文老師,因為當時被老師讚佢嘅英語發音好好聽而令佢對英文產生濃厚興趣。勤力學英文嘅福士蒼汰更喺高中時期買英文vocab book,利用翻學搭車嘅時間背生字,最後令佢成功喺高中就輕鬆pass咗日本英文2級檢定。

為咗進一步磨練自己嘅英文,福士蒼汰更試過自己一個人去紐約寄宿旅遊,英文對話完全難唔到佢!除此之外,福士蒼汰都好鐘意喺工餘時間睇美劇學英文,佢睇美劇嘅時候只會開英文字幕,而且一邊聽一邊確認台詞,如果想知多啲關於學英文嘅方法都可以睇AfterSchool嘅【DSE English】不得不知的英文進步心得 X 操Past Paper攻略

韓國明星學英文方法

RM @ BTS

圖片來源:SCMP

防彈少年團作為世界頂尖嘅KPOP團體,英語交流嘅能力當然係不可或缺啦!當中作為團體嘅英語擔當,隊長RM就講到一口流利嘅英文。喺2018年RM代表防彈少年團喺聯合國大會進行短講,該影片更加喺YouTube破六百萬點閱𠻹!咬字清𥇦發音純正嘅RM經常令人誤會佢曾經喺海外生活,但原來RM全靠自己後天努力先有今日嘅英語實力,咁到底RM係點樣學好英文㗎呢?

原來RM喺7歲已經開始去上英文班,但佢認為最大嘅幫助都係透過睇大量美劇和電影學好英文。而喺佢14歲嘅時候,RM嘅媽媽買咗知名美劇《Friends》影碟畀RM睇,佢習慣第一次先睇韓文字幕,第二次睇英文字幕,之後就唔再開字幕,睇完一次又一次,最後佢睇咗呢套劇一共超過30次,真係夠晒勤力!學生時期嘅RM更憑自學考取多益國際英語考試(TOEIC)800分,咁勵志嘅故事唔知能唔能夠激發到大家學英文嘅決心呢?

娜恩 @ Apink

圖片來源:巴士的報

除咗RM之外,Apink嘅娜恩同樣都係團隊嘅英語代表,英文發音十分標準好聽!原來娜恩由幼稚園就學英文,娜恩之後都有去過短期嘅語文研修。而娜恩更喺初中嘅時候開始每日背100個生字,從來都冇偷懶過㗎!再一次證明只要大家有心努力學好英文,就一定有回報!

中國明星學英文方法

湯唯

圖片來源:網絡

湯唯作為中國著名女演員除咗擁有演技同美貌,仲擁有一口流利嘅英語。接受過多次嘅英文訪談以及喺頒獎典禮用英文致感言辭嘅湯唯到底係點樣做到㗎呢?

原來湯唯學英文嘅契機係喺就讀戲劇名校「倫敦音樂戲劇藝術學院」嘅暑期班發生,起初湯唯連英文單字都睇唔明、基本的對話都有困難,於是湯唯決心要練好英文。留學期間禁止自己說中文、經常向英文老師發問並且將句子錄音,撘車、吃飯、行路,只要一有時間就聽,所以湯唯英文能力突飛猛進並非一朝一夕嘅事,而係靠永不放棄嘅態度先有今日嘅英語實力。

張靜初

圖片來源:LifeStyle Journal

除咗湯唯之外,中國另一位女演員張靜初講英文都非常流利同埋發音標準,甚至有「英語最好嘅國內女星」嘅稱號,並且成為首位登上BBC英文採訪嘅女星。後來張靜初分享自己學英文嘅心得,指自己都係從日常生活中學英文。透過睇外國電影訓練聽力、自己同自己講嘢去練習口語、同背唔同嘅句型,張靜初憑著孜孜不倦,努力增值自己,先令到佢能夠有今日嘅英語實力。

香港明星學英文方法

謝安琪

圖片來源:HK01

要數到又點少得人靚聲甜嘅謝安琪Kay呢?謝安琪曾經喺2012年接受外國傳媒訪問,當中Kay用英文對答自如,令到影片迅速成為城中熱話,當時更令大眾誤會佢曾經喺海外留學,但其實Kay係土生土長嘅香港人嚟嘅!

佢嘅英文咁流利係因為佢對英文嘅好奇心。喺讀書時期Kay好鍾意聽流行曲例如係Hip Hop同Rock,歌詞當中有啲英文生字好深好難明,變相激發起Kay嘅好奇心,想學好英文去理解歌詞,好學嘅Kay喺英文科一直都係考第一,最後仲入埋港大主修美國研究𠻹,認真犀利!

麥明詩

圖片來源:TopBeauty

喺會考考獲10A佳績、劍橋大學畢業嘅麥明詩英文好就大家都知,但究竟麥明詩有咩學英文嘅心得呢?麥明詩喺一次訪問當中就提及到佢細個會比較著緊打好語文基礎,因此佢每日都會睇一本書同作文。以為佢作完就算?Nonono!麥明詩會研究點樣再改善文章,查字典睇吓會唔會有第二個詞語,可以更加精準表達到嗰個意思。

Louisa亦好鼓勵同學仔主動學習Active Learning,喺溫書嘅時候先睇一睇notes大綱,然後再搵一啲練習去考自己,令到溫書記憶加強同埋運用課本知識。 想知道有咩方法提升記憶力?不妨睇埋AfterSchool嘅神奇五感溫書法!幫你提升兩倍記憶力!

台灣明星學英文方法

林依晨

圖片來源:epochtimes.com

台灣著名女演員林依晨唔單止講到一口流利嘅英語,更加考上台灣數一數二嘅國立政治大學,到底佢學英文有咩秘訣㗎呢?原來林依晨同福士蒼汰一樣都遇到一個好好嘅英文老師,因此而引發起林依晨對學英文嘅興趣。佢平時會睇好多英語電影同聽英文流行歌,加上佢每日至少聽一至兩小時嘅英文廣播,不知不覺間就會記熟常用嘅英文詞彙同埋學到俚語(slang),所以林依晨講得一口流利嘅英語並唔係冇原因㗎!

除此之外,林依晨亦都對一班有心考上好嘅大學,或者係有心學好英文嘅同學仔有個少少忠告。學好英文唔單止要多聽多背,仲要作多啲文,就算每一日寫得100字,只要同學係肯寫,假以時日,一定可以喺英文寫作方面有好大嘅進步!

 

以上每位明星都有各自學英文嘅方法同心得,等小編總結翻當中嘅重點啦:

  • 將有興趣嘅嘢融入學英文過程 
  • 善用日常生活空閒時間 
  • 對英文抱有好奇心&自發性
  • 透過Active Learning學英文加深記憶

學好英文並非一朝一夕能夠成功嘅事,一班明星都係全靠自己後天努力先有今日嘅英語能力。佢哋得,你哋都得!加油!!

 

免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool