【DSE 中文作文】2020 中文卷二寫作題目分析

「中文作文卷佔分咁重，但我又唔知有咩好溫......」← 呢個係好多同學都有嘅疑問。其實，大家可以透過睇多啲唔同嘅作文題目、範例佳作，仲有範文分析去令自己嘅寫作進步。小編個人覺得分析下歷年嘅 DSE 中文作文 Past Paper 就係一個唔錯嘅溫書選擇。

為咗各位 DSE 2021 準考生，AfterSchool 就決定幫大家寫一篇《2020 DSE 中文卷二寫作題目分析》，等大家可以透過呢篇分析，了解下唔同題目嘅特點、相應嘅寫作技巧，同埋點樣透過題目就可推測到考評局嘅評分標準。

中文卷二，即係寫作能力卷。顧名思義，佢考嘅係同學嘅中文寫作能力，並會從文章嘅構思、表達、創作能力各方面對學生進行評核。

簡單嚟講，就係睇下同學：

「卷二寫作能力」佔 DSE 總分嘅比例甚高，往年佔整個中文科嘅 24%。

受疫情影響，根據考評局，2021 DSE 中文科取消咗「卷四說話」，寫作卷所佔嘅比例更大幅上升咗 8%，佔中文科總分 32%。

對 2021 年嘅考生嚟講，寫作卷更加不容有失！

按往年經驗，中文作文卷一般會提供三條唔同類型嘅題目。同學可以從中選其一，然後寫作文章一篇。

中文作文卷最低字數要求為 650 字，如果寫唔夠 650 字係會被扣分。

不過值得注意嘅係，卷二寫作能力並無字數上限，而整份卷嘅考核時間只有一個半小時，所以同學要把握機會，喺有限嘅時間內寫最多嘅字。好現實咁講，字數嘅多少同文章論述嘅飽滿程度係成正比。

當然啦，小編所講嘅字數係指同文章內容緊密相連、同主題息息相關嘅內容，而唔係指湊字數嘅廢話。

既然中文作文咁重要，不如等小編喺度同各位分析下 2020 DSE 所出嘅三條題目，幫大家稍為掌握審題方法，更深入咁了解不同題目類型嘅思考方式。

同往年嘅題目編排有啲似，2020年嘅第一題都係「描寫類」嘅文章，但今年唔單止要記敘一件事，更需要透過對件事嘅描述，表現出人物性格。

收到題目之後，決定揀唔揀呢條題目嘅前提並唔係自己文筆嘅好與壞，而係你有無信心完全理解「嚴以律己，寬以待人」呢個八隻字，以及有無把握諗到一件同呢句描述相關嘅事。

「嚴以律己，寬以待人」呢個描述嘅意思係：對自己嘅要求好嚴格，但係對別人就好寬容。

因為呢個描述分成咗兩部分，所以有啲同學會認為可以用兩個場景，分別展示人物「嚴以律己」同「寬以待人」嘅一面。由於題目無限定淨係可以寫一件事，所以呢種寫法都可以嘅。

不過，小編呢會建議大家喺同一個場景入面，寫晒人物對自己要求嘅嚴格，但對他人犯下嘅錯誤就會十分理解同寬容嘅表現，因為咁樣文章結構會更緊密。

題目仲有一個成日被忽略嘅字眼，就係個「最」字。題目中寫到「在我認識的人中，他『最』能體現」，所以同學亦需要緊扣呢個字眼。但我哋可以點樣突出個「最」字呢？咁就需要透過比較 (例如同身邊其他人嘅行事進行比較)。呢個比較唔需要寫到長篇大論，只需要喺文章入面有意識咁樣勾畫出，例如寫出主角同其他人喺同一情況下嘅處理方式有咩唔同，就已經可以點出呢個「最」字。

題目提到「描述這位人物的言行」，所以行文中敘事嘅重點應該擺喺人物語言同行動描寫上，透過呢啲描寫去反映人物性格。透過觀察唔同嘅範文，我哋可以得知，好嘅描寫文行文都要盡量避免平鋪直敘，以及流水帳或者白描嘅寫法。除此以外，喺呢類寫人嘅文章，人物嘅肖像描寫係必不可少嘅。肖像描寫嘅精髓在於，大家需要描述人物特別具有辨識度嘅外表特徵，令讀者可以透過你嘅肖像描寫，喺腦海入面勾勒出人物嘅形象。

再補充一個小小提醒，由於題目入面用咗「他」呢個字眼，所以穩陣起見，你文中描寫嘅人物最好係一位男性。

建議場景：同學可以寫平日學習生活中常見嘅場景，例如同其他同學一齊做小組功課、參加課外活動，又或者籌備活動嘅過程。呢類唔單止係大家都經歷過嘅事，容易令人產生共鳴，亦同時係一啲容易產生衝突或者出現錯誤嘅場景，較易呈現到主角對於自己要求嚴格，但對他人行為比較寬容嘅表現。

呢一題就係所謂嘅「開放題」，淨係比出一條題目，無規定文體，亦無規定題材。

呢種題目嘅發揮空間好廣，同學可以選擇單純咁寫篇議論文，亦可以選擇用敘事嘅方式帶出對「微笑以對」嘅睇法或者相關嘅議論。

題目嘅描述只得一句話，所以我哋可以拓展「微笑以對」，講下呢個短語嘅引申意思，以「微笑以對」代表一種人生態度，而唔單止只係一個表情咁簡單。「微笑以對」可以指我哋喺惡劣處境中所保持嘅一種樂觀態度，又或者係一種對他人親切嘅態度。

然後再思考，喺乜嘢場合或者景況之下，我哋會表現出呢一種態度。

          面對自己人生嘅低谷嘅時候？

          面對自己生活困境嘅時候？

          面對他人為你造成各種麻煩處境嘅時候？

         他人犯下錯誤嘅時候？ 

若以議論文體書寫，同學可以考慮論述「微笑以對」呢種態度對於人生嘅影響 (可以係正面或者負面)。喺論述之後，同學可以再比一個同「微笑以對」呢種態度有關嘅生活建議，又或者將呢種態度同當今社會嘅狀況勾連，鼓勵同呼籲大家對於生活都應該 / 唔應該採取呢種態度。

若以記敘文體書寫，同學可以參考上面所提到嘅一啲狀況，然後再建構一個事件作為文章主體。喺呢件事嘅框架入面，我哋需要強調「微笑以對」呢四隻字，所以同學不妨採取前後對比嘅寫法。

例如：

先寫寫之前可能會以比較消極嘅態度對待事件，然後描述一個受他人開導，或者受身邊人行為潛移默化嘅情節，之後再講述自己從中所領悟到「微笑以對」嘅態度，而呢種態度又為事件帶嚟咗咩良好嘅影響。

同學都可以喺寫嘅過程入面，運用神態描寫嘅手法，仔細描寫一個微笑，然後呢個微笑可以成為全文嘅線索。咁樣既能夠扣題，亦都可以令文章嘅結構更加緊密。

喺過往唔同嘅中文作文範文入面，我哋都可以觀察到結尾出現「昇華主題」呢個動作。因此，同學不妨喺文章結尾運用「以小見大」嘅寫法，帶出呢種做法對於人生未來嘅規劃有咩影響；又或者喺整個社會層面而言，如果大家廣泛地都採用此種做法，會帶來乜嘢正面嘅影響，最後再回應多一次你自己對該種做法嘅睇法。

 

題目三要求同學書寫議論文。

「送禮之我見」呢條題目需要同學寫出對於「送禮」呢種行為嘅自我見解，即係你自己會對呢種行為有啲咩睇法。其實，呢個只需要同學喺文章入面表達議論嘅時候，寫返多啲「我想」，「我認為」嘅字眼，咁就已經可以扣返「我見」呢個題眼。

面對呢啲有咁多題目解說嘅文段式題目，我哋需要對文段內容字字斟酌，喺文段內容入面挖掘自己可以用到嘅寫作方向，唔好淨係望住條題目，然後大腦一片空白。

以第一句「農曆新年，一心收到親戚送來的禮物」為例，呢一句入面已經可以提到送禮嘅時間、場合，以及送禮原因呢一啲可能嘅思考方向。

從一心嘅評論「每年都送來不合用的東西，不送也罷。」可以分辨到佢應該係一個實用主義者，對於冇實際用途嘅禮物會持負面態度，佢寧願唔收。呢度可以引申嘅方向就係，如果對方係一個理性嘅實用主義者，你送一啲佢唔需要嘅禮物，可以引起對方反感，令送禮嘅效果大打折扣，甚至適得其反；又或者可以諗，如果送對方認為無用嘅禮物，其實係會造成浪費。

比起禮物嘅實用價值，姐姐嘅評論就集中喺禮物嘅數量、禮物本身所包含嘅社交意義，所以我哋可以就禮物本身所包含嘅意義進行議論；弟弟嘅評論就著重於禮物背後所包含嘅情誼，係一啲感情上面嘅感悟。

同學可以根據返上面比出嘅方法逐步分析。大家會發現其實題目入面已經有好多寫作嘅提示。

除咗傳統嘅議論文體以外，呢條中文作文題目仲可以選用夾敘夾議，或者係敘事議論嘅方法書寫，例如用一件自己親身經歷過嘅送禮事件，再就呢件事件唔同嘅發展階段，發表返自己嘅睇法。但係要留意返，對於呢篇文章嚟講，議論嘅段落先係文章嘅主體，敘事嘅描述只係為文章嘅議論服務，所以唔係主體。事件情節嘅鋪排亦需要緊扣你所提出嘅論點，留意返敘述同埋議論嘅比例最好就係五五分，議論嘅部分甚至可以佔六成。