DSE 中史科溫極都溫唔完？考試技巧嚟到中史科又好似不值一提咁？個 5** 又好似這麼近那麼遠？唔怕！等我哋 AfterSchool 同大家講下 5** 中史人嘅育成方式，送大家一份中史必讀筆記啦！ DSE 中史科宏觀策略部署 credit: unsplash @alschim 近年中國歷史科 cut off 走勢 根據 網上資源嘅數據，DSE 中史科 5** 嘅 cut off 已經由 2013 年嘅 72% 上升至 2019 年嘅 77%， 2018 年甚至要 82% 先 5**，比 2013 年高咗 10%！面對咁可怕嘅 5** cut off，一眾中史科考生又應該如何自處呢？ 中國歷史科基本上只考三樣嘢： 一、歷史資料嘅作用同局限 二、評析資料嘅能力 三、對史實嘅認識 只要溫下書同睇熟考評局 Past Paper marking scheme 啲用字，要中史科高分其實唔難。 不過要小心，卷一、卷二嘅難度非常唔同，卷二先係中國歷史科真正嘅難度所在（5 / 5* / 5** 考生嘅分水嶺），所以無論你係只求合格定係想「保 5 奪 **」，卷一都係「一分都不能少」。 喺比重上： 「卷一必答題」：約佔三成 「卷一選答題」：約佔四成 「卷二選答題」：約佔三成 因此，建議同學作答卷一嘅時候，每題平均用大約 45 分鐘作答，一嚟必答題淺白直接，二嚟論述題要寫好多字，三嚟卷一要題題拎 80% 以上先有機會 5**（仲未計卷二可能失手連個 5* 都無埋），所以「避免喺某一題花太多時間」係卷一技巧所在。 HKDSE 中史科 5** 溫書技巧（如何以 Past Paper 嚟寫溫習筆記） credit: unsplash @zhangkaiyv 中史科嘅 Past Paper 大家可以喺我哋 AfterSchool 搵到。 第一，操 Past Paper 係其次，藉由 Past Paper 嘅題目同埋 marking scheme 嚟啟發自己溫書嘅方向先至緊要。考評局嘅答案 往往精簡，所以溫史實嘅時候都係以 point form 為主，以溫中 marking scheme 嘅 point 為大前提，與其無的放矢，不如精準到位。 第二，諗下平時自己嘅答卷結構，每段都一定包括「論點、資料、史實、解說、小結」等要素，所以當你攞起中史科 Past Paper 嘅時候，可以用唔同顏色嘅螢光筆 highlight marking scheme 嘅各個要素，就可以睇到自己溫書時有無遺漏。 第三，應先整理每個課題嘅論點，再記具體史實例子用嚟論證。中國歷史科嘅範圍好廣闊，所以每個課題都唔應該溫太耐（當然大熱門除外），無時無刻都要記得用 marking scheme 式嘅精簡 format 嚟寫自己嘅溫習筆記。 DSE 中國歷史必答題題目攻略技巧 credit: unsplash @oriento 必答題考核嘅範圍好廣，不過即使面對唔熟悉嘅課題，只要適當運用答題技巧亦可以攞到一定嘅分數，因為必答題嘅設題目的就係送分，只需要單刀直入咁出 point 就已經命中 marking scheme，而嗰啲 point 就係考評局嘅中史科慣常用語，大家可以參考返考評局嘅中國歷史科教師研討會簡報。 「史料分析類」答題方法 分析完考評研討會簡報後，我哋知道回答中史科「資料用處和局限」嘅題型時，可以由編者身分、出版年份同資料性質嚟分析資料。 例如，2013年問當代人寫歷史嘅優點同局限，只要大家出兩三個 marking scheme 嘅 points 就得，好似係「資料較少因時間流逝而失真 」、「未必全面反映事實真相」等。 呢類題目嘅答案千篇一律，只要背定 Past Paper marking scheme 就已經輕鬆解決。 「史實補充類」答題方法 根據 2019 年嘅考評分析，「援引史實」嘅題目好睇大家操得熟唔熟 Past Paper，能唔能夠快速咁拆解題目嘅給分位，以及精確咁落史實， 例如第1題 (a) (iii)： 「根據資料一、資料二和資料三，西周如何通過兩次分封促成疆土開拓及民族摶成？試援引史實，加以解釋。(8分)」 同學要一眼就睇得出分數分佈：「疆土開拓」同「民族摶成」兩方面各佔 4 分。 「疆土開拓」方面： 人名+封國 + 目的為 1 個 point 取1分，共 4 個 points 拎 4 分 「民族摶成」方面： 措施 + 目的為 1 個 point 取 2 分，共 2 個 points 拎 4 分 因此，緊扣題目嚟俾史實並且推論已經全取 8 分，背太多例子落答卷並唔係好事，因為浪費時間之餘，又無助得分，而呢啲「拆題技巧」喺之後卷一卷二論述題嘅部分就顯得更加重要。 DSE 中史科卷一、卷二論述題題目攻略技巧 credit: unsplash @rosalindjchang 論述題朝代分佈、題目設計和答題結構 朝代分佈方面，中國歷史科卷一選答題出題範圍有愈嚟愈闊嘅趨勢，同學喺中國歷史嘅各個朝代間唔好過分偏讀，溫歷代皇帝嘅施政內容要睇埋治國思想；溫民初革命更加要背熟埋晚清政局，寧願個個課題都識少少，都唔好完全跳過某一個課題唔溫。 題目設計方面，基本上中史論述題只有五種題型：觀點題、因果題、比較題、評論題同埋主因題，等我哋 AfterSchool 同大家逐一講解相應嘅答題結構啦！ 觀點題 首先要睇下題目中有無「你同意嗎」呢句，如果有嘅話就係評論題。跟住就係搵出需要印證嘅觀點，搵錯咗係會離題架。 例如 2020 年第 2c 題要求考生援引史實印證資料三嘅說法，而資料三其實係談論利弊，因此題目本身係要求考生就三項措施：鹽鐵酒專賣、平準法、均輸嘅利弊嚟作答，唔係問成個新經濟政策嘅措施。 因果題 「A 如何導致 B」嘅思維訓練同學們喺中史科都做唔少，呢啲題目相對直接，只要同學仔針對性咁做解說同史實補充就得喇。 例如 2012 年第 3a 題問資料嘅內容如何有利漢武帝嘅統治，資料嘅內容係「因」，有利咗武帝統治係「果」，同學就需要用資料 + 史實進行解釋，疏理出當中嘅因果關係。 比較題 重點係搵出可以比較嘅角度或範疇，謹記要喺同一標準下先做到比較異同，同埋分析到邊樣係更重要因素。 例如 2019 年第 2b 題問南朝士族衰落嘅原因邊樣更重要，就要喺同一標準上比較兩者，例如「政治方面，君主奪取士族的政治權力較士族不思進取更重要」，每段都要做比較。 評論題 題目出現「你同意嗎」就要俾返立場，你可以「同意 + 駁論」或「先破後立」，但無論揀邊種答法都一定要加駁論，無嘅話會低分。 例如 2015 年第 6 題問「你是否同意蔣介石的看法？」，考生需要按照蔣介石嘅睇法嚟俾立場，無論認唔認同國民黨失敗嘅原因係「政治的缺失」、「經濟的恐慌」同「內部組織的鬆懈」都好，都必須詳細演繹呢三方面嘅論點，再諗其他原因嚟做立論或者駁論。 主因題 題目會出現「最」、「唯一」等字眼，喺分析論題嘅眾多原因時，須透過同一衡量標準判斷出 A / B / C / D 邊個係「最關鍵原因」，可以話係成個中國歷史科最高難度嘅題目考法。 例如 2013 年第 5b 題問鴉片戰爭係咪導致英法聯軍之役嘅主因，我哋會將佢同其他原因做比較，從而同意或者反對佢係主因。要說明佢係或者唔係主因嘅方式五花八門，最重要嘅係每段都要將主因同其他原因做比較。以呢題為例，其他原因就係亞羅號事件、法國神父被害事件等。 credit: unsplash @onesummerday11 中國歷史之「根據資料」回答技巧 解說資料嘅技巧簡單嚟講就係「抄 + 解釋」，先要睇啱資料講咩將佢抄落嚟，再用解說嚟將資料同史實連結，大原則係唔好無視資料或者斷章取義，而解說部分最好同之後嘅史實部分有關聯，等考官唔好覺得段落嘅每個部分之間太割裂。 中國歷史之「根據史實」回答技巧 補充史實嘅技巧在於：一、扣題；二、史實要夠具體；三、解釋個史實。 點為之具體史實呢度就唔多講喇，呢樣野係睇大家夠唔夠勤力背書。史實部分最緊要記得唔好背得太開心寫太多，時間緊迫，推演論點時唔好寫得太深入，避免顧此失彼。 ******睇完篇文係咪知多咗 DSE 中史科嘅答題技巧呢？我哋 AfterSchool 會一直同大家同行，一齊征服中史 5** 呢道高牆！
