歷屆CE/AL/DSE Past Paper 搜尋攻略+操卷溫書心得

AfterSchool
AfterSchool 2019-11-28 390,368

DSE、AL、CE 各科嘅 Past Paper 對每位DSE 考生嚟講都係必備之物!但係要by topic、by year 咁搵齊佢地就好嘥時間,所以AfterSchool 幫各位同學整合咗邊到可以搵到Past Paper 下載download。另外,我地仲會送上各科嘅操Past Paper 心得同埋溫書Tips 添㗎!

 

歷屆CE/AL/DSE Past Paper 搜尋攻略

DSEPP

相信各位有搵開Past Paper 嘅同學都唔會對呢個網站陌生。佢喺小編個人認為DSE Past Paper 黎講,最方便同較齊全嘅網站。佢唔單止有歷屆DSE Past Paper (包括練習卷、樣本試題) 題目question + 答案answer,亦有齊每一科嘅分卷(e.g. 中文有齊卷一、二、三、四,英文有齊Paper 1,2,3,4)雖然依家暫時只係更新到2017年,但係每一年嘅資源都非常齊全。

另外佢啲Past Paper 可以直接透過DSEPP 嘅網站打開,唔需要另外再喺Google Drive 打開文件,亦唔一定要下載download 個file 檔案落電腦。

包含科目:中文Chinese、英文English、數學Maths、數學延伸單元一M1、數學延伸單元二M2、通識LS、生物Bio、化學Chem、物理Physics、中國歷史Chinese History、歷史History、經濟Econ、地理Geo、企會財BAFS、資訊及通訊科技ICT

語言:中文版 + 英文版English Verision

 

DSE00 

比起DSEPP,喺年份方面黎講,DSE00 呢個網站嘅Past Paper 更為齊全。佢包含曬HKCEE 會考,HKDSE 香港中學文憑試 (2012-2018) 同埋HKALE A-Level 高考嘅試卷,有時仲會有埋坊間嘅Mock卷。不過,佢唔一定有齊所有分卷question 同埋答案marking scheme,同學們亦需要Click 入佢個Google Drive download 下載試題。

包含科目:中文Chin、英文Eng、數學Maths、數學延伸單元一 M1、數學延伸單元二M2、通識Liberal Studies、生物Biology、化學Chemistry、物理Phy、中國歷史Chinese History、歷史Hist、經濟Economic、地理Geography、企會財BAFS、資訊及通訊科技ICT、音樂Music

語言:中文版 + 英文版English Version

除左Past Paper 之外,DSE00 仲有其他資源,例如一啲關於各科cut-off 分數、溫書技巧、Jupas、大學面試Interview、選課等等嘅文章,如果大家有興趣可以睇下。

 

小卒論壇

小卒論壇比起上面兩個網站嘅資源更為齊全,無論係CE、DSE、AL,定係by year、by topic,基本上你想要嘅野都可以搵到。不過真係要「搵」!由於佢係一個論壇,入面嘅資源種類繁多 (有n個版主、版塊、主題、貼文),網站又只係大概咁幫大家分左學術區大專/大學區初中/高中討論區補習專區HKDSE 資源求檔區等,所以同學可能要花啲時間搵下所需要嘅Past Paper。

注意!各位要先免費註冊做網站會員,再回覆貼文,然後先可以睇到啲隱藏內容 (即係大家所需要嘅Past Paper)。雖然好似好煩咁,但係小編認為呢個網站非常有用,建議各位同學都去註冊一下!註冊玩,真係可以download 下載到好多試題㗎!

包含科目:所有主要科目

語言:中文版 + 英文版English Verision

 

香港公共圖書館 (多媒體資訊系統)

想做會考CE 同高考AL 嘅試卷,大家可以去圖書館個網by year 咁搵下有無所需要嘅Past Paper,然後親身去公共圖書館借。不過喺呢個數碼化嘅時代,大家亦可以選擇留喺屋企,利用香港公共圖書館多媒體資訊系統入面嘅「數碼館藏」。「數碼館藏」有一個「香港會考及高考試題特藏」,喺呢個館藏區裡面,圖書館將CE + A-Level 所有科目嘅Past Paper 都scan 成電子書(有題目question + 答案marking scheme) 。 連比較冷門嘅科目,好似德文German 同倫理及宗教Ethics and Religious Studies 都有。雖然e-version 嘅試卷就無去到80年代咁遠,但係大家都可以好輕鬆咁喺度搵到年份較近嘅Past Paper。

包含科目:全部

語言:中文版 + 英文版English Verision

 

考評局

通常比較新嘅DSE Past Paper 真係非常難搵。如果你點都搵唔到,但係又好想做呢啲DSE 試題,可以考慮去考評局買各科嘅考試試題專輯,本野入面有曬試卷、評卷參考同埋考生表現評論。大家亦可以選擇郵購、上網或者親身去考評局嘅兩個辦事處買。(其實有好多中學或者老師都會買考試試題專輯,所以同學喺自己俾錢買之前,不妨問下相關科目嘅老師,睇下有無得借)

包含科目:全部DSE 科目

語言:中文版 + 英文版English Verision


註:以上嘅 Past Paper 資源轉自其他嘅網頁,AfterSchool 並非相關資源嘅持有人。

 

操Past Paper 歷屆試卷心得 + 溫書Tips

DSE 中文 Chinese 操Past Paper心得 + 溫書Tips

HKDSE 中文評核模式

考評局將DSE中文卷主要分為兩個部分:公開考試(DSE)+ 校本評核(SBA)。同學需要迎戰嘅有四份卷,包括:

  • 卷一(閱讀能力)佔全科24%,考試時間為1小時30分鐘
  • 卷二(寫作能力)佔全科24%,考試時間為1小時30分鐘
  • 卷三(聆聽及綜合能力)佔全科18%,考試時間約為1小時30分鐘(實際卷長可能會受試場因素影響)
  • 卷四(說話能力)佔全科14%,考試時間為25分鐘

校本評核(SBA)則有分為兩個部分。因為每間學校嘅校本評核方式都唔同,所以AfterSchool 無法喺呢度詳細介紹,大致上會分為兩個部分:

  1. 必修部分:閱讀活動(佔全科6%的分數)
    閱讀活動並唔係每間學校都係一樣嘅,有啲會叫同學寫閱讀紀錄;有啲都會叫同學寫長達1000字左右閱讀報告。部分學校都會提供建議書單比同學~
  2. 選修部分(兩個單元)(兩個單元共佔全科14%的分數)
    1. 日常學習表現(通常都係計功課分)
    2. 單元終結表現

 

中文DSE 溫書攻略

數數手指原來小編同DSE相隔都已經有一段時間,但都希望以一個過來人嘅身份同同學分享吓自己當時溫中文嘅少少心得〜

DSE中文卷一:閱讀能力

做閱讀理解最重要係分配好時間,尤其卷一多咗範文部分,要喺1小時30分鐘之內做哂3 part確實會好趕。小編建議同學用20分鐘做哂範文部分,剩低嘅時間就按白話文同文言文嘅分數而分配。

小編強烈建議同學要溫熟範文部份,因為呢part只要溫熟佢嘅語譯,中心思想,論證手法等等就可以攞到分,呢30分絕對值得大家投放時間同心機落去。另外小編都明白唔少同學都會好驚面對範文同文言文,但要消除對文言文嘅恐懼最緊要係識得克服!小編個陣溫文言文係會用一本簿仔記低經常出現嘅古詞嘅意思同同義字,久而久之小編就會認得某幾個「老是常出現」嘅字,從而慢慢睇得明文言文同get到佢嘅主旨〜

除咗要溫文言文之外,小編建議同學每個星期都做一份閱讀卷,除咗可以幫你做好時間管理,仲可以幫你了解到考評局嘅評分準則。每做完一份試卷透過對答案,你可以捉到你失分嘅位喺邊同埋考評局畀分嘅原因,每次花呢少少嘅時間就可以幫到你提升你嘅答題技巧同得分。

小編建議同學嘅操卷順序應該係:DSE Past Paper中文閱讀卷 → CE Past Paper。DSE卷應該要全部做哂先,因為係考評局嘅官方試題,而CE Past Paper小編建議大家可以先做咗2007-2011年個啲先,因為2007年之前嘅CE閱讀卷同DSE出題模式有啲唔同,所以參考價值相對唔大,同學有多餘時間先再考慮操。

DSE中文卷二:寫作能力

想當年小編最唔鐘意做嘅卷就係寫作,因為平時冇閱讀嘅習慣令到自己文筆較差,但中六嗰年都堅持每個星期作一篇俾中文老師改,希望喺最短時間改善自己嘅文筆同表達能力。小編建議同學平時除咗睇多啲書,得閒都可能寫吓短文去紀錄低日常生活嘅大小事,相信一段時間後你嘅文筆都會有進步!

而喺試卷時間分配上,同學可以用5分鐘去畫吓mind map可以幫你組織文章結構,如果你想寫敍述文,你就要諗下文章嘅「起承轉合」同中心思想;想寫議論文嘅話要諗下文章嘅立場,每一段用咩論據同點樣論證。呢個方法可以幫你喺作文嘅時候冇咁易離題。

操卷嘅話,同學除咗DSE卷之外,CE嘅寫作卷都應該操埋,因為佢同DSE一樣都有議論文同敍情文嘅文章題型,而考評局CE同DSE寫作卷marking scheme嘅評分準則都差唔多,所以絕對做得過!

DSE中文卷三:聆聽及綜合能力

小編覺得綜合卷係一份好值得大家多溫習嘅卷,因為比較容易上到高分。小編溫呢份卷係會做哂Past Paper同其他免費模擬試卷,會對比自己嘅答案同5**作品,睇吓人哋喺作答嘅時候用咩角度切入,點樣用資料去支持自己嘅point。

雖然2016年開始DSE中文卷三同卷五合併,但兩份卷本質上都冇太大分別,所以小編都幾建議同學可以做埋2016年之前嘅Past Paper,可以俾自己練多啲綜合同聆聽技巧。

DSE中文卷四:說話能力

而說話方面,小編相對會放少啲心機落去,因為小編嘅中學每星期都會有兩堂說話堂,可以成日同唔同學一齊練說話。但小編都好建議同學可以去報聯校說話練習,可以從更多其他學校嘅學生身上學到佢哋思考論點嘅角度同說話技巧。正所謂「知己知彼,百戰百勝」,小編認為同人練說話係操說話最直接最有效嘅方法,當然同學日常生活都應該要睇多啲新聞去豐富自己嘅例子庫,喺適當時間拋出嚟用!

 

DSE 英文 English 操Past Paper心得 + 溫書Tips

HKDSE English 英文考核要求

同學需要喺DSE英文科應考嘅四份卷,分別係:

  1. Paper 1 (Reading) Weighting : 20%,考試時間為1小時30分鐘
  2. Paper 2 (Writing) Weighting:  25%,考試時間為2小時
  3. Paper 3 (Listening & Integrated Skills) Weighting: 30%,考試時間約為2小時(實際卷長可能會受試場因素影響)
  4. Paper 4 (Speaking) Weighting: 10%,考試時間約為20分鐘

英文卷同中文卷都一樣都有SBA,日夜校學生需要交SBA校本評核,SBA佔全科分數15%。自修生無須進行SBA校本評核,自修生SBA嘅分數係根據你英文科DSE考試所得個level,然後再睇全香港考生同你考相同level嘅人嘅SBA分數,再作調整之後,就係你SBA個分。

而喺DSE英文科入面,卷一閱讀理解、卷二寫作、卷三聆聽及綜合都有分Part A同埋Part B;而卷一閱讀理解同卷三聆聽及綜合嘅Part B仲有分B1同B2部分。記住,同學只需要應考Part A (必答)同埋選擇作答 Part B1 或者 Part B2。

B1同B2有咩分別呢?相對而言,B1比B2更加簡單,但係答B1嘅同學要注意,你就算全卷答啱曬都好,你最高只會攞到Level 4;相反你答B2最高就可以攞到5**。不過講到尾,同學應該按照自己嘅能力選擇翻合適嘅試卷。

同學係唔需要B1同B2同時作答,你交卷都淨係交B1或者B2其中一份㗎咋!英文卷操練都係有方法㗎!所以同學唔好淨係盲目咁操練、答題改題啊!

 

溫習DSE英文小貼士及操卷攻略

好多同學都唔知點樣溫英文呢一科以及唔知應該由邊到落手,令到溫習英文科成為一眾考生好困擾嘅事。想當年小編為咗DSE English都下咗唔少苦功,今日就同大家分享吓小編當年係點溫英文啦。

DSE English Paper 1: Reading

小編嗰陣不斷做Reading Paper,做完DSE就會做CE/AL,甚至係其他出版社嘅material。千祈唔好做完份試卷求其剔完答案就算呀,記得每次對卷嘅時候除咗對答案之外,仲要睇吓自己失分嘅地方、點解錯、以及自己同考評局嘅標準答案有咩出入,慢慢你就會捉到考評局想你點答㗎啦〜

小編都有一個貼士,可以幫大家喺做Reading卷嘅時候更快更準。同學喺正式睇文章之前,先快速睇一次試題,而大概估到篇文想講啲咩。而喺閱讀文章嘅時候,可以用唔同顏色嘅螢光筆highlight一啲專有詞(例如人名、數字、組織名等等)同埋特別難嘅字,因為呢啲字有機會係之後問題嘅答案,到時就唔洗嘥時間喺篇文到搵answers。

除咗平時操卷,建議大家睇多啲英文新聞(SCMP、BBC、The New York Times)同埋課外書,雖然一開始會睇得好慢,但只要持之以恆慢慢就可以改善閱謮嘅速度同埋語感。

正如上面都有提及,AL會比CE難而且程度同DSE相若,而AL會比較著重喺Grammar同語感,所以題目大多數都會係summary close同MC題。建議同學可以做咗DSE Past Paper先,然後做2005-2011年嘅AL(幫大家加強語感同理解文章嘅能力),有時間(或者能力相對低嘅同學)可以再選擇做CE Past Paper。

DSE English Paper 2: WritingAnchor

小編都試過喺作文嘅時候會格梗塞一啲好難嘅英文字,以為會有豐富詞彙之效,篇文會好靚同埋可以從中加分。的而且確,如果我哋用啱字嘅話,係可以令到篇文嘅質素有所提升。但如果用錯嘅話,會令到考官對文章嘅印象唔好,就好似早幾年好多人都鐘意用“Every cloud has a silver lining”,有機會令到篇文章被扣分,就真係弄巧反拙㗎啦!所以小編建議大家可以整一本vocab book,閱讀嘅時候寫低你唔識嘅英文字佢嘅中英文解釋、part of speech、例句。當你每一日都攞呢本vocab book複習嘅時候,你嘅詞彙就會越來越多,亦都會更加清楚呢個字到底係乜場合先啱用。

仲有一個攻略係,想當年小編每個禮拜都會作兩篇文比英文老師或者係補習老師批改,之後佢哋會再同我講返篇文有啲咩可以改善,例如係唔通順嘅句子,用錯vocab等等。要留意嘅係學好英文科,由其係Writing都唔可以臨急抱佛腳,建議各位同學唔好等到中六先開始瘋狂作文,由中四開始就要keep住每個禮拜都作一篇文呢個習慣,相信三年之後會對你有一定嘅幫助。

至於操卷方面,除咗做DSE Past Paper之外,同學都可以考慮吓做每年CE Writing Paper嘅Task2 同AL Writing Past Paper,CE嘅Task 2要求考生寫250字,同DSE Task 1要求嘅250字以及題型相若,而AL四選一題目同DSE Task2嘅考試模式都好相似,所以小編認為同學可以以CE Task2 + AL四選一題目呢個組合操練。

DSE English Paper 3: ListeningAnchor

小編認為溫習Listening最緊要係多聽,睇Netflix嘅時候試吓開英文字幕,甚至唔開subtitle,開頭會聽唔切或者聽唔明,但慢慢你就會跟到佢哋嘅語速以及聽得明唔同嘅accent。另外亦都建議大家可以去聽英文電台例如BBC radio,一路聽新聞一路默寫返新聞稿,可以訓練到你jot notes嘅速度㗎!

而係做卷方面,小編建議無論同學揀B1定B2,係Data File搵資料嘅時候都應該用唔同顏色嘅螢光筆間低重點字眼,同埋一啲專有名詞,可以幫你之後做嗰三個tasks都可以慳返啲時間。而時間分配方面建議同學應該按照分數比例去分配時間,平均喺25分鐘內完成一個task,如果字數同分數都多嘅話可以用35分鐘作答。

同學應該要操練哂DSE Past Paper先做AL同CE,CE Part A嘅難度會較為貼近DSE Part A頭三個tasks,而AL Part A因為語速較快同較多資料,難度會比較似DSE PartA後幾個tasks,同學可以由2006年做到2012年,建議同學做完CE再做AL,程度會慢慢加深。

DSE English Paper 4: SpeakingAnchor

小編認為說話卷最重要嘅訓練方法就係日常生活要多講,試吓放膽同同學得閒用英文對話,練英文說話最緊要係唔好怯以及唔好驚講錯。想當年小編每次上自修堂,都會捉住同學練英文Speaking,久而久之變得唔再驚講英文。除此之外,同學亦都可以參加聯校說話練習,唔單止可以了解到其他學校嘅學生水準,仲可以知道自己喺說話方面有咩地方不足,例如係你嘅發音、Grammar同Vocabulary等等。

 

DSE 數學Mathematics 操Past Paper 心得 + 溫書Tips

HKDSE Maths 數學 — 考核要求

根據考評局2021年數學評核大綱,數學卷有分必修同埋選修部分

必修部分有卷一(長答LQ)同埋卷二(選擇題MC):

  • 數學卷一 LQ長答 (考試時間2小時15分鐘,佔全卷65%)
  • 數學卷二 MC選擇題(考試時間1小時15分鐘,佔全卷35%)

選修部分為兩個單元,每個單元只考一份試卷,同學只可報考其中一個單元:

  • 單元一 M1微積分與統計(考試時間2小時30分鐘)
  • 單元二 M2代數與微積分(考試時間2小時30分鐘)

 

溫習 DSE 數學小貼士及操卷攻略

重要!Maths 數學操卷三部曲

成日聽人話唔好「死讀書」,其實亦都唔可以「死操卷」。雖然大家已經有歷屆Past Paper係手,但都唔好咁心急開始操住。眾所周知,DSE唔單止係一個考知識嘅考試,亦係一個玩考試技巧嘅遊戲。喺操歷屆試題之前,不妨留意一下有咩考試技巧,做下其他練習,熟悉下呢個遊戲先。到操卷嗰一刻,一定會事半功倍。

清Concept,記數學公式

喺開始操卷之前,首先一定要清曬所有concept,熟悉所有數學公式。如果喺咩都唔記得嘅情況下操卷,只會浪費咗份試卷 (始終Past Paper 數量有限,唔好咁浪費啊喂)。知道各位同學一直想搵一份最完整嘅數學公式表,所以我地就特登邀請經驗豐富嘅Gary Sir 幫手整理咗一份按照DSE Syllabus by topic 咁排好嘅數學Maths formula sheet 公式筆記。快啲save低啦!

DSE Maths考試Skills

小編作為一個文科人,當年係靠計數機program同考試技巧打數學大佬,最後成功送自己入到大學。所以,喺操卷之前記得入好曬啲program!

另外,講到數學考試技巧,就一定唔可以唔提Paper 2 MC卷。手握MC技巧,分分鐘可以令你升一個level!想知考MC有咩技巧,不妨睇下【DSE Maths MC 全攻略】如何提升答題速度200%? 

DSE 數學操卷攻略

當你部計數機已經入曬啲program,個腦又裝曬啲數學公式同考試技巧時,就係時候開始準備操卷啦!雖然AfterSchool好比心機咁搵埋年代久遠嘅Maths Past Paper比大家參考,但其實真係唔使操曬所有㗎!無論by topic定係 by year,操卷都係有技巧!DSE 至少考6科,如果科科都要操曬咁多年嘅卷,真係分分鐘暴斃……想有效率咁操卷,就一定要避免操卷常犯嘅錯誤。點樣操卷先有用?快啲睇【DSE Maths】數學Past Paper操卷技巧!

其實考好DSE數學科嘅公式好簡單,就係【技巧 + 操卷】。AfterSchool 提供啲考試技巧比你,你自己再付出少少努力,相信各位同學到時一定可以打贏數學呢個大Boss!

 

DSE 通識 LS 操Past Paper心得 + 溫書Tips

HKDSE Liberal Studies 通識教育 — 考核要求

根據考評局2021年評核大綱 通識科分為「公開考試」同「校本評核」兩個部分:

「公開考試」分為卷一 Paper 1 同埋卷二 Paper 2:

  • 卷一「資料回應題」(考試時間2小時,佔全卷50%)
  • 卷二「延伸回應題」(考試時間1小時15分鐘,佔全卷30%)

「校本評核」亦即係「IES 獨立專題探究」(佔全卷20%)

 

溫習DSE LS小貼士及操卷攻略

到底DSE 通識想考你啲咩?

讀通識LS你唔一定要通通都識,但就肯定唔可以咩都唔識!講到尾,讀通識都係為咗考通識,所大家第一樣要知嘅野就係「佢到底考你啲咩?」好多同學以為考通識非常輕鬆,完全唔使溫書,淨係行入試場吹水同寫一大堆廢話。No No No!如果你有咁嘅諗法,你依家嘅處境非常危險,因為通識並無你想象中咁簡單。快啲睇《逐一破解通識四大迷思+教你準備通識考試!》儘早拯救自己嘅生命......

備戰LS溫書攻略

溫考試並唔係一朝一夕嘅事,提早開始準備對大家將來DSE絕對係有好無壞。唔似其他科咁,通識嘅教科書的確望落無咩嘢可以溫,最多比大家背下概念詞Concpet Words。想考好通識又唔知可以點溫?等AfterSchool 送一篇Liberal Studies 通識備戰攻略比大家,等各位同學了解下通識到底係點溫啦。記住!通識絕對唔係食咗本書就會考得好嘅科目嚟㗎!

DSE 通識考試技巧

通識筆試分為卷一 Paper 1 同卷二 Paper 2,兩份卷要注意嘅嘢亦有分別 (大家可以參考下通識Paper 1 同埋 通識Paper 2)。

但同時,兩者對考生都有一啲共同嘅要求:除咗要熟悉唔同嘅議題topic、例子example、概念詞concept words 之外,大家亦要熟悉各類題型、答題框架、格式,包括資料回應題同埋延伸回應題。呢到就有一篇Issac Sir 整理咗嘅通識LS題型+答題技巧全方位筆記。份筆記非常有用,因為只有熟悉各類答題框架同格式,你先可以清晰表現出自己嘅「邏輯思維」。另外,對於無寫開文嘅同學嚟講,考試點樣分配時間絕對係你要知道嘅野!特別係卷一,一開卷就係同時間嘅競賽。時間就係分數!時間控制 Time Management 係非常非常非常重要!

BTW 除咗知道考試要做啲咩之外,大家亦要了解下有啲咩係唔可以做,千祈唔好犯DSE通識大忌啊......

IES 攞高分方法

DSE 通識LS 除咗計算「公開考試」試卷嘅分數之外,大家亦唔好遺忘咗「校本評核」(即係IES) 呢個佔全卷20%嘅部分啊!20% 雖然睇落唔算多亦唔算少,但係其實分分鐘影響你一至兩個grade。其實要做一份幫自己升level 嘅IES 一啲都唔難,你要做嘅嘢只係 set 一條「好題目」同埋係做嘅過程中保持「細膩」。點先算係「好題目」?所謂嘅「細膩」又係咩嚟?

Click入《IES 要細膩才犀利》自己搵答案啦!

 

DSE 生物 Biology 操Past Paper心得 + 溫書Tips

HKDSE Biology (Bio) — 考核要求

根據考評局2021年評核大綱,DSE Biology 生物考試由「公開考試」同埋「校本評核」兩部分組成。

「公開考試」分咗卷一 (必修部分) 同埋卷二 (選修部分):

  • 試卷一 Paper 1 (必修部分) (考試時間2小時30分鐘,佔全科60%)
    • 甲部 Section A:多項選擇題 MC (佔全科18%)
    • 乙部 Section B:短題目short questions、結構式題目structured questions、論述題 essay  question (佔全科42%) 
  • 試卷二 Paper 2 (選修部分) (考試時間1小時,佔全科20%)

「校本評核」即係SBA (佔全科20%)

 

DSE 生物Bio 攻略筆記 

Bio 溫書方法

一個唔識英文嘅人去學英文會學乜嘢先?會學ABC 先,因為簡單而且係所有英文字嘅基礎。唔學ABC基本上就唔使學其他字住。讀Bio 亦係同樣嘅道理,只有由淺入深咁學,由最基本嘅學起,先可以將唔同嘅Topic 融會貫通,了解課題與課題之間嘅關聯。想考好Bio 又唔知點溫?放心,一早有人幫你安排好溫書順序!快啲入嚟睇下 《必學Bio溫書次序—課題歸類法》啦!

生物科操卷攻略

上面幫大家搵咗好多屆Past Paper 翻嚟,但係點樣做先可以發揮佢地最大嘅效用呢?其實操卷都係有方法㗎!好努力但係用錯方法,一切都只會係徒勞無功...... 唔好再浪費寶貴嘅溫書時間啦,入嚟快速睇完《每個讀Bio嘅同學都會有嘅四大迷思》,然後再用正確、有效率嘅方法操卷啦。

Biology 考試技巧

講到DSE Bio 生物考試,就唔可以唔提好多同學嘅死穴 — 實驗題型。但其實呢啲「變幻莫測」嘅題目都只係換湯不換藥,淨係得個樣嚇你。只要溫書嘅時候,放多少少時間去搞清楚實驗基本嘅concept、definition,再分析每題Past Paper 背後出題嘅目的,就可以輕鬆應付到佢地。想再知多啲點樣K.O. 呢類型嘅題目就要睇《BIO實驗題型—三大溫習方法》啦。

 

DSE 化學 Chemistry 操Past Paper心得 + 溫書Tips

HKDSE Chemistry 化學 — 考核要求

根據考評局2021年化學科評核大綱,化學Chem 嘅考試分為「公開考試」同埋「校本評核」兩個部分。

「公開考試」有分試卷一 (必修部分) 同埋試卷二 (選修部分):

  • 卷一 Paper 1 (必修 Compulsory)(考試時間2小時30分鐘,佔全卷60%)
    • 甲部 Section A: 多項選擇題 MC (佔全卷18%)
    • 乙部 Section B: 短題目 short questions、結構體 structured questions、論述題 essay questions (佔全卷42%)
  • 卷二 Paper 2 (選修 Elective) (考試時間1小時,佔全卷20%)

「校本評核」即係SBA,要求同學係學校設計+做實驗,再進行報告 (佔全卷20%)

 

DSE 化學Chemistry 小貼士 Tips

Chem 溫書技巧:背書、清Concept,然後再操卷

如果你成日諗:「明明我已經好比心機咁做卷,點解啲成績都無咩大進步?」咁就可能係你未背熟啲書,或者未搞清啲concept 啦。Molecule分子、 Ion離子、原子Atom 你識分未啊?稀釋(Dilution)嘅概念你又搞清楚未啊?想考好化學Chemistry,就先要打一個好嘅基礎。雖然化學屬於理科,但係要背嘅野一啲都唔少,所以奉勸各位千祈唔好臨考試前一兩個月先走去背書,最好一路學一路背 (因為越早背就越熟)。對於Chem 呢科嚟講,equation 公式、chemical reaction 化學反應、ion 離子嘅顏色,又或者structure 結構等等,就好似支撐住你DSE成績嘅重要根基,無背好基本上就等於無分。

建議大家可以順住個syllabus 咁去背書,由基礎開始,背背定義、清清concept,循序漸進、腳踏實地咁打好基礎。另外亦可以follow 我地instagram 嘅化學Chem 學術台@dse.chemistry,我地會不時分享DSE Chem 必背嘅送分題,快啲follow 啦!。

操卷攻略

喺做DSE/CE/AL Past Paper之前,不妨先做下坊間嘅Mock Paper,又或者做多幾次學校以前嘅工作紙/測驗/考試卷,之後分析下自己邊啲topic特別弱,再集中溫佢地,甚至by topic 咁操卷。喺確保自己所有野都ready嘅時候,先開始操歷屆Past Paper。

同其他科一樣,考化學Chem DSE 都要注意時間控制。比如喺做Paper 1 Section A MC部分嘅時候,就會有好多同學唔小心用多咗時間。所以操卷嘅時候,不妨養成一個set time limit 嘅習慣,規定自己一定要喺某個時間裡面完成幾多道題 (e.g. 50秒要做到1題MC),幫自己建立一個良好嘅時間觀念,到時正式考DSE嘅時候就自然唔會咁慌張。

 

DSE 物理 Physics 操Past Paper心得 + 溫書Tips

HKDSE Physics 物理 — 考核要求

根據考評局2021年評核大綱,DSE Physics 物理考試由「公開考試」同埋「校本評核」兩部分組成。

「公開考試」分左卷一 (必修部分) 同埋卷二 (選修部分):

  • 試卷一 Paper 1 (必修部分 Compulsory) (考試時間2小時30分鐘,佔全科60%)
    • 甲部 Section A:多項選擇題 MC (佔全科21%)
    • 乙部 Section B:短題目short questions、結構式題目structured questions、論述題 essay  question (佔全科39%) 
  • 試卷二 Paper 2 (選修部分 Elective) (考試時間1小時,佔全科20%)

「校本評核」即係SBA (佔全科20%)

 

DSE 物理Physics 小貼士 Tips

Physics 溫書流程 Study Flow

其實溫物理Physics 無咩嘢捷徑,溫書流程大概就係以下咁:

溫書 → 做練習 (e.g. 測驗卷、考試卷、Mock 卷) → 操Past Paper

計埋會考CE 同A-Level嘅試卷,雖然好似望落有好多Past Paper 咁款,但其實對大家最有幫助嘅係DSE 嗰堆。所以小編會建議大家先溫書train 好自己個腦,喺確保你理解所有formula 公式嘅運用之後,再由Physics 書裡面嘅例題、學校工作紙/測驗卷/考試卷、CE Past Paper 開始做起 (有能力嘅可以做埋A-Level),最後先做DSE 試卷,以發揮佢地最大嘅效用。

物理 Phy 溫書攻略

淨做Past Paper 但係唔研究自己嘅弱點係無用嘅。因為到最後,通常大家都會做Past Paper 做到識背曬啲答案咁濟。所以喺操卷嘅過程入面,大家要仔細研究自己嘅錯處。小編建議各位同學可以用手機影低成日錯嘅題目,當整一份電子筆記咁,得閒無聊嘅時候攞出黎望兩眼。望得多就會自然容易記得,考試嘅時候都會比較注意。另外,大家亦可以follow 我地instagram 物理Physics 學術台@dse.phy,我地唔單止會不時post 一啲關於DSE 物理考試syllabus 嘅小貼士,仲有一個Physics 問題收集區,隨時幫各位解答關於DSE Physics 嘅難題。

 

DSE 經濟 Economics 操Past Paper心得 + 溫書Tips

HKDSE Economics 經濟 — 考核要求

根據考評局2021年評核大綱,DSE Econ 經濟科考生只需進行「公開考試」。

「公開考試」分左卷一同卷二:

卷一 Paper 1:必修部分Compulsory 

  • 考試時間1小時,佔全科30%
  • 多項選擇題MC

卷二 Paper 2:必修部分Compulsory + 選修部分Elective 

  • 考試時間2小時30分,佔全科70%
  • 甲部 Section A:必修部分 (佔全科26%) (短題目Short Questions) 
  • 乙部 Section B:必修部分 (佔全科35%) (結構structured /文章式essay-type /資料回應 data response) 
  • 丙部Section C:選修單元部分 (結構structured /文章式essay-type) (佔全科9%)

 

Economics 經濟溫書考試技巧

溫書攻略筆記

想考好DSE Econ 最最最重要係熟悉所有concept。所謂「熟悉」,唔單止要你知道佢嘅存在或者知佢會係邊一課出現,仲要你可以好清楚咁分辨到唔同concept 之間嘅分別。係操歷屆Past Paper 之前,不妨利用學校/坊間嘅mock 卷、練習卷黎溫下書先,透過答短題目、畫圖、做MC去了解自己嘅弱點,之後再by topic或者按題型咁操練自己嘅弱點。另外,喺做完卷對marking scheme 嘅時候,記得留意有乜「得分位」同埋「失分位」啊!

DSE Econ 考試技巧

其實Past Paper 做得多,你就會發現啲題目類型其實差唔多。不妨按照以往嘅marking scheme 幫自己set 個答題框架,到考試嘅時候就可以按照題目嘅內容,塞翻啲岩嘅答案入去,以確保自己唔會漏point。除左set 答題框架之外,大家亦可以參考下呢篇《DSE Econ 名師教你如何係DSE Econ擊敗8成考生輕鬆攞5 or above!》,入面有提到好多同學溫Econ嗰時都會忽略嘅事項,大家亦可以參考埋裡面嘅考試技巧秘笈。

 

DSE 企會財 BAFS 操Past Paper心得 + 溫書Tips

HKDSE BAFS 企業、會計與財務概論 — 考核要求

根據考評局2021年評核大綱,DSE BAFS 考試由「卷一 (必修部分)」同埋「卷二 (選修部分)」組成。

卷一 Paper 1 (必修部分 Compulsory) (考試時間1小時15分鐘,佔全科40%)

  • 甲部 Section A:多項選擇題 MC (60分)
  • 乙部 Section B:短題目 short questions (30分)

試卷二 Paper 2 (選修部分 Elective) (考試時間2小時15分鐘,佔全科60%)

考生只可選擇應考以下其中一項

  • 二甲 2A: 會計單元 Accounting module
  • 二乙 2B: 商業管理單元 Business management module

 

BAFS 溫書考試攻略

不停背書、清concept

溫習BAFS 要由背書做起!建議各位將Paper 1 可以背嘅嘢一字不漏咁食曬落肚,之後操卷嘅時候亦要將不停重複嘅marking scheme 吞埋落肚。不過奉勸各位唔好臨考試前一兩個月先走黎背書,因為咁只係兩個字 ——「嘥氣」。背書呢家嘢越早越好(最好一邊學一邊背啦),因為喺背書嘅過程中,大家可以順便幫自己清埋啲concept,確保自己真係理解各個課題嘅概念。雖然背書好麻煩,但係只要肯背,DSE 分數就有一定嘅保證。喺呢度送大家一份by topic 整理好嘅BAFS Accounting 筆記比大家,希望可以幫各位同學輕鬆一眼望曬唔同topic 嘅重點啦!

Anchor操BAFS Past Paper 技巧

考DSE,操練歷屆試卷就一定走唔甩。其實只要做得多Past Paper (CE+DSE+AL),你就會發現出題嗰個人真係又懶又無創意,出黎出去都係嗰幾個pattern。所以喺操完卷對答案嘅時候,唔好淨係睇自己錯左啲乜,亦要順便留意下不停重複嘅marking scheme 同埋題型。搵到出題嘅pattern 你基本上就已經贏左一半。

 

DSE 歷史 History 操Past Paper 心得 + 溫書Tips

HKDSE 歷史 Hist — 考核要求

根據考評局2021年評核大綱,DSE 歷史考試由「卷一」同埋「卷二」兩部分組成。

卷一 Paper 1 (佔全科 60%,考試時間2小時):

  • 歷史資料題 (會有不同形式嘅歷史資料,包括文獻、統計數據、地圖、漫畫及照片)
  • 要答曬所有題目

卷二 Paper 2 (佔全科 40%,考試時間1小時30分鐘)

  • 有7題論述題,考生只需回答其中兩題
  • 主題甲(三)2 同埋主題乙(四)3b 只會喺卷二出題

 

Hist 歷史溫書考試攻略

溫書小貼士Tips

雖然好多同學都好唔鍾意背書,但係講到讀歷史,背書(特別係背年份)就係一個好重要嘅部分。因為無論係卷一 Paper 1 定係卷二 Paper 2 嘅題目,都好鍾意將問題背景set 喺某一段時期。如果唔係講嗰段時間,無論你寫得幾好,考官都係唔會比分你㗎!

另外各位同學喺溫書嘅時候,可以嘗試將課文內容分成唔同地區咁嚟溫,咁樣對睇題目會好有幫助,例如歐洲、亞洲、美國咁。用分類法去溫書,可以幫你喺考試嘅時候,一望到條題目就好快諗翻起相關嘅論點,留多啲時間俾自己寫文。

同其他科目一樣,想考個好成績嘅話,最重要當然係要做多啲Past Paper 啦。做多啲歷史Past Paper,盡量令自己習慣DSE 嘅考試模式,咁樣對set 一個好嘅作答框架會有幫助㗎!

考試技巧

同每份卷一樣,做歷史卷嘅時間控制time management 非常重要。喺操卷或者考試之前最好分定每part 要用嘅時間,咁樣時間就會控制得好啲。

以下係小編當年考歷史時嘅做法,大家可以參考下:考卷一資料題嘅時候,每一分就要分配2.5分鐘落去,如果超時得太多就會好易做唔切。卷二論述題時,要盡量分配相同嘅時間比個兩條題目,避免太側重其中一方。

另外,做資料題嘅時候,大家要睇住個分數嚟決定寫幾多個point。記住!即使係3分題都要寫兩個point 呀!另外亦都要注意清楚題目字眼,特別係地區或者國家,例如歐洲唔包美國,而超級大國只係指蘇聯同美國咁。


 

DSE 資訊及通訊科技 ICT 操Past Paper 心得 + 溫書Tips

HKDSE 資訊及通訊科技 ICT — 考核要求

根據考評局2021年評核大綱,DSE ICT 考試由「公開考試」同埋「校本評核」兩部分組成。

「公開考試」分為卷一 Paper 1 同 卷二 Paper2:

卷一 Paper 1 必修部分 Compulsory (佔全「公開考試部分」 55%,考試時間2小時)

  • 甲部 Section A:多項選擇題 MC (佔卷一 40%)
  • 乙部 Section B:結構式試題 structured questions (佔卷一 60%)
  • 全部試題都需要作答

卷二 Paper 2 選修部分 Elective (佔全「公開考試部分」 40%,考試時間1小時30分鐘)

  • 選修以下其中一項
    • 2 (A) 數據庫 Databases
    • 2 (B) 數據通訊及建網 Data Communications and Networking
    • 2 (C) 多媒體製作及網站建構 Nultimedia Production and Web Site Development
    • 2 (D) 軟件開發 Software Development

「校本評核」即係SBA (佔全科20%)

 

ICT 溫書考試攻略

溫書策略

喺ICT入面,MC算係最容易升grade 嘅section。你只要細心留意MC卷,就會發現其實佢每年嘅考核內容都差唔多,所以大家要熟悉MC嘅出題趨勢。小編建議同學可以每星期都做一份DSE ICT Past Paper 嘅MC 卷,因為大約做咗5份之後,你就會發現其實年年都差唔多。如果操完都係覺得唔夠高分,大家可以喺對答案嘅時候順便分析以下自己邊睇topic 比較弱,然後by topic 咁操卷

Section B :因為考評局經常將唔同課題嘅問題mix 喺同一個大題,所以會比較難去跟topic去操你比較弱嘅課題。另外,考試時間都比較長,每次操section B都要溫好書先,唔好嘥咗啲時間同埋令自己有挫敗感。每次操完之後都要檢查一下自己嘅答案,中唔中考評局嘅marking scheme。雖然有唔少人都話可以接受嘅答案好廣,唔係全部都有寫喺marking scheme 裡面,但係無人知到時marker諗乜架嘛。所以最好就play safe,認識下考評局要嘅答案,盡量唔好失去分數。小編認識唔少電腦好叻嘅人,但係就係唔識點寫考評局要嘅答案,所以最後都考得唔理想。

考試技巧

按照分數比例,小編建議同學MC 可以預留大約45分鐘、SQ就75分鐘。操卷時一定要記得掌握節奏同睇時間,上到戰場就更有效咁分配時間啦。記得操卷除咗係test下自己對於科目嘅認識外,仲係一個令自己習慣考試節奏嘅重要經驗。記得一定要識掌握節奏,背好內容同考評局要嘅答題模式同風格。

SBA攻略

ICT SBA 校本評核喺根據你嘅Elective (選修部分) 而定嘅,佔整體ICT科20%嘅分數,絕對唔可以忽視,有唔少同學收到老師俾嘅指引就會被佢唔太明確嘅題目搞到頭都痛。每份SBA通常都分兩部份 – Task 1 (Design & Implementation, 構思與應用) 同埋 Task 2 (Testing & Evaluation, 測試與評估 )。兩份Tasks 可以試下用唔同嘅方式去表達,例如Task 1用Word,Task 2就用PowerPoint。為咗令老師睇份SBA 時無咁悶,可以適當地加插唔同嘅tables 同flow charts,等份嘢望落去生動啲。最後,要記得SBA唔係俾考評局mark,而係老師判斷份SBA好唔好,所以如果老師有咩意見或者有比marking rubrics 就一定要跟住去改善呀。

 

****其實以上提過嘅所有技巧、方法都喺由AfterSchool 呢篇《【DSE ICT】Past Paper 操卷攻略、ICT SBA 滿分秘技》嘅blog 度節錄出嚟,如果大家有興趣知道更多關於ICT 攞高分嘅方法,就快啲入去睇下啦。篇blog 唔單止有非常詳細嘅攻略,仲利用咗好多實際例子去幫同學理解DSE 嘅ICT 考試添!

 

DSE 地理 Geography 操 Past Paper 心得及溫書T ips

HKDSE Geography 地理 — 考核要求

根據考評局2021年評核大綱,DSE 地理考試由「卷一 (必修部分 Compulsory)」同埋「卷二 (選修部分 Elective)」兩部分組成。

卷一 Paper 1 (佔全科 75%,考試時間2小時45分鐘):

  • 甲部Part A:MC 多項選擇題 20%
  • 乙部Part B:Fieldwork-based實地考察為本問題 15%
  • 丙部Part C:Data 數據/ Skill-based 技能為本/ Structured 結構式問題 30%
  • 丁部Part D:Short Essay 短文章式問題 10%

卷二 Paper 2 (佔全科 40%,考試時間1小時30分鐘)

  • 戊部Part E:Data 數據/ Skill-based 技能為本/ Structured 結構式問題
  • 己部Part F:Short Essay 短文章式問題 10%

 

地理溫書考試攻略

考地理DSE 其實並唔需要熟讀所有嘅Topic,所以大家喺溫書嘅時候,可以放棄1-2

個自己無咩信心嘅Topic,然後專攻其他內容。以下有地理MC、DBQ 同埋Essay嘅考試溫書攻略,希望可以幫到大家啦!

地理MC 多項選擇題攻略

MC 嚟講最重要就係時間管理 time management。知唔知道點解好多同學做地理卷嘅時候,成日都無時間覆卷,甚至根本完成唔到份卷?答案就係因為花咗太多時間去地圖閱讀 map reading 嗰度!其實map reading 嘅MC 題目真係唔值得大家投資咁多考試時間入去。大家最好就set 定一個time limit 比自己,萬一喺限時之內完成唔到,就撞住啲答案先,之後有時間再翻轉頭慢慢研究。除咗map reading 之外,大家亦要留意考評局好鍾意出嘅MC「陰濕」位。平時操卷嘅時候,各位同學要特別留意自己喺啲咩位成日「被人陰到」,然後mark 低記住。考試嘅時候要非常仔細咁睇題目,千祈唔好白白送分比考評局啊!另外,喺新制之下,MC嘅題目數量雖然少咗一半,但係所佔比重依然一樣。即係話,每一條MC 都佔全科1%!所以大家記得花多啲時間操練MC卷啊!

DBQ 攻略

歷屆地理考試DBQ 嘅答案嚟嚟去去都係咁,所以比起背教科書,其實背marking scheme 可能更加有用。大家只要做得多Past Paper, 都應該會發現一啲經常「翻炒」嘅題目或者答案。喺溫書嘅時候,不妨按topic、按題目咁整理歷屆試題嘅marking scheme,然後背曬佢。假設你背咗6個 points,但係考試嘅時候,就算條題目只係佔4分,你都應該要大包圍咁將背咗 + 啱用嘅嘢寫曬落去,以確保自己唔會漏points。因為有機會要寫好多字,所以無論如何,答DBQ嘅時候都記得要寫!快!啲!

Essay 短文章攻略

好多人覺得Essay 只不過係吹水題,答咩完全係臨場發揮。不過,其實Essay 題都係有得準備㗎!每一個課題topic 都有屬於自己嘅幾個答題框架 (e.g. 大氣圈、水圈、岩石圈、生物圈)。喺答題嘅時候,大家可以跟住個框架放翻適當嘅答案入去。咁樣篇文唔單止望落結構嚴謹,而且可以避免漏point 嘅問題。另外,大家溫書嘅時候要習慣幫每個point 諗定1-2個例子,方便到時考試嘅時候可以好快咁寫到出黎。

 

DSE 中國歷史 Chinese History 操Past Paper心得及溫書Tips

HKDSE Chinese History 中國歷史 — 考核要求

根據考評局2021年評核大綱,DSE 中史考試由「試卷一 (歷史發展)」同埋「試卷二 (歷史專題)」兩部分組成。

試卷一 (佔全科 70%,考試時間2小時15分鐘):

  • 設必答題,涵蓋甲、乙部,佔40分 (預計作答時間55分鐘)
  • 其餘甲部及乙部各設3題,考生須分別各選答1題,佔50分

試卷二 Paper 2 (佔全科 30%,考試時間1小時20分鐘):

  • 設6單元,每單元各設3題,學生從所選的1個單元中選答2題,共答2題完卷,佔50分

 

中史溫書考試攻略

溫書策略

雖然中史DSE 考試出名範圍廣、內容長,但係奉勸各位同學千祈唔好tip 題目tip 得太窄,甚至放棄唔溫習部分內容。因為近年考評局卷一必答題都傾向以跨單元嘅形式出,甚至出好多冷門topic 同題目。為咗避免失去全題嘅分數,同學喺溫書嘅時候,就算時間幾緊迫都好,至少都要將唔係主力溫習嘅範圍睇2-3次,等自己對相關內容有印象。如果唔好彩遇到啲無咩點溫過嘅必答題,都可以靠少少嘅印象、題目資料同答題技巧拯救自己。建議大家溫書嘅時候唔好溫得咁專,可以考慮以板塊為一個溫習單元,跨時代咁溫習。

至於卷二呢啲真真正正考史實嘅題目,大家就真係要好比心機咁背書啦!

考試技巧

卷一必答題其實比較資料主導,考核各位同學嘅演繹能力。想考好必答題,比起背書,其實操練Past Paper + 練好答題技巧更加重要。另外,其實呢部分只要求考生中points、中字眼,所以大家並唔需要非常詳細咁寫答案,盡量以短答嘅方式答題。雖然考評局嘅建議答題時間喺55分,但其實45分鐘應該已經足夠。大家作答嘅時候亦要注意自己嘅答題方向,千祈唔好偏離資料啊!

選答題方面,除咗要求大家中point 之外,評卷員比分嘅時候仲會考慮埋答案嘅「詳細程度」。不過,比起寫得非常詳細但係唔齊point,寫齊point 而無咁詳細嘅得分會比較高。所以各位同學除咗要留意字速同寫詳細啲之外,亦要注意時間控制,唔好過分投資啲時間去某一個論點度

卷二方面,中史嘅考生只需要揀1個單元,然後回答入面嘅其中2條題目。建議大家最好就全面咁溫熟自己會揀嘅嗰個單元,到應考嗰陣有多一個選擇嘅機會,而唔係被逼作答某2條題目。


DSE 中國文學 Chinese Literature 操Past Paper心得及溫書Tips

HKDSE Chinese Literature 中國文學 — 考核要求

根據考評局2021年評核大綱,DSE 中國文學考試由「公開考試」同埋「校本評核」兩部分組成。

「公開考試」部分咗「卷一 (文學創作)」同埋 「卷二 (文學賞析)」兩份卷:

  • 卷一 (文學創作,佔全科25%,考試時間2小時):
    • 共有兩條題目,考生只需要二揀一
    • 作文一篇,文白不拘,字數不限
  • 卷二 (文學賞析,佔全科 60%,考試時間2小時):
    • 共設四題,考生只需要四揀二

「校本評核」(佔全卷15%):創作練習 

 

中國文學溫書考試攻略

卷一攻略

卷一文學創作雖然都係考作文,但評分標準同中文科嘅作文有啲分別。相對於中文寫作卷,文學創作唔單止要求各位扣題,想要攞高分,大家更加要用字精準同識得表達情感。所以考試嘅時候,各位同學可以根據自己嘅體會同感受去揀題目。喺用字表達方面,雖然好多同學都會事先背定一啲靚嘅文句,希望考試嘅時候可以用到,但大家應該避免抄襲

文學創作嘅題目字數較短,限制較少,同學可以發揮嘅空間都比較大,但大家需要留意題目字眼,避免離題。以「過關了」為例,雖然「過關」呢個詞語可以從好多方面入手,但係「了」呢個字眼就限制咗「過關」呢件事發生嘅時間。另外,大家亦都應該避免書寫太過空泛嘅內容,要加入唔同嘅例子去形象化所描述嘅事物

時間控制方面,建議各位喺一開始嘅時候要花大約10-15分鐘去寫大綱。因為文學創作嘅發揮空間較大,好多時候同學寫寫下主線情節會突然分咗心去寫其他枝節位,令成篇文變得好亂。寫大綱唔單止可以幫大家整理好故事嘅主線情節,仲可以避免大家出現太貪心嘅情況,浪費時間寫咗好多多餘嘅嘢。

卷二攻略

卷二通常都係要求大家將屬於同類型文體嘅指定篇章同課外篇章進行比較。所以大家係溫習嘅時候可以按文體溫書,並將內容大意人物性格分類整理,方便喺考試嘅時候應用。呢幾年DSE 中國文學考試所出嘅題目越問越仔細,所以同學更加應該熟讀文章,以確保自己攞到一定嘅分數。另外,大家有時間不妨睇多啲其他文學作品,咁樣唔單止可以幫助提升自己嘅閱讀理解能力,更可以累積詞庫,對卷一文學創作都有好大嘅幫助㗎!

考試嗰陣,大家喺閱讀課外篇章嘅同時,亦要時刻留意文章嘅寫作手法同埋主題思想。喺睇題目嘅時候,仲要留意題目字眼,了解題目要求嘅引文同闡述方向,避免離題失分。

 

DSE 音樂 Music 考試重點

HKDSE Music 音樂 — 考核要求

根據考評局2021年評核大綱,DSE 音樂考試由「必考部分」同埋「選考部分」兩部分組成。

必考部分:

卷一 (聆聽) (公開筆試):

  • 甲部:西方古典音樂 (考試時間75分鐘,佔全科 40%)
  • 乙部:中國器樂、粵劇音樂、本地及西方流行音樂 (考試時間30分鐘,佔全科20%)

卷二 (演奏 I) :校外評核—實習考試 (考試時間30分鐘,佔全科 20%)

卷三(創作 I):校外評核—作品集 (佔全科 20%)

選考部分 (選一卷) (佔全科 20%):

卷四甲 (專題研習):校本評核 (專題報告)

卷四乙 (演奏 II):校本評核 (實習考試) 或 其他認可資格 (約30分鐘)

卷四丙 (創作 II):校本評核 (作品集) 或 其他認可資格

 

 

 

免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool