相信大家都知香港升中競爭好大，唔少家長都會幫仔女報呈分試操卷班，或者買小六、小五呈分試補充練習，務求可以令仔女有好嘅呈分試成績。但如果唔留意呈分試計分法，又或者淨係不斷操練小學呈分試模擬試卷，最後仔女都可能攞唔到最理想嘅呈分試成績！今次就等 AfterSchool 話你知小學呈分試比重同埋呈分試攻略啦！
目錄
什麼是呈分試 (Internal Assessment)?
呈分試係香港教育局根據校內考試嘅成績，去編排全香港小學生嘅排名。根據教育局指示，每間小學需要將每位學生五年級下學期考試嘅成績（又叫小五呈分試成績），同六年級頭兩次考試嘅成績（又叫小六呈分試成績）呈交俾教育局。
教育局會根據小六同小五呈分試成績，去決定同學嘅升中組別。簡單嚟講，就係指教育局會根據呈分試成績去排位，成績越好，組別越高，就越容易派到Band 1 中學啦！
如何計算呈分試比重？
Chris Liverani on Unsplash
小學呈分試每科所佔嘅比重都唔同，俗稱「999632」。其中頭三個「9」係指主科中英數，所佔呈分試比重係9；第四個「6」係指常識科，呈分試比重佔6；最後嘅「3」同「2」分別係指視藝同音樂，所佔呈分試比重分別係3同2。呢個就係一般學校嘅呈分試計分法~
但有個別學校會計算埋宗教同普通話成績，一般嘅呈分試比重分別係2同1。但係每間學校都會有輕微嘅差別，所以大家記得要問清楚學校嘅呈分試計分法啊！
仲係唔太明白？即刻睇睇下面個表格啦！
| 科目 | 呈分試試卷分數 | 呈分試比重 | 呈分試成績分數 |
| 中文 | 100 | 9 | 900 |
| 英文 | 100 | 9 | 900 |
| 數學 | 100 | 9 | 900 |
| 常識 | 100 | 6 | 600 |
| 視藝 | 100 | 3 | 300 |
| 音樂 | 100 | 2 | 200 |
| 宗教（個別學校） | 100 | 2 | 200 |
| 普通話（個別學校） | 100 | 1 | 100 |
教育局呈分試在什麼時候舉行？
小五呈分試
大部分學校嘅小五呈分試都會喺下學期5至6月考。呢個將會係仔女嘅第一次呈分試。
小六呈分試
小六呈分試就會有兩次嘅，分別係小六上學期11至12月同下學期嘅2至3月應考。
要留意：呢三次呈分試雖然每科呈分試比重都唔同，但呢三次嘅呈分試嘅最後成績嘅比重都係一樣嘅~
為什麼呈分試非常重要？
Green Chameleon on Unsplash
呈分試成績直接影響升中派位
唔知大家知唔知原來升中派位都有分自行同統一分配學位呢？如果係選擇自行分配學位，呈分試成績就會顯得好重要，因為校方會睇曬你三次嘅呈分試成績，再同其他同學嘅呈分試成績比較，考慮埋同學嘅特質同課外活動，先會選擇收邊個學生~
簡單嚟講，呈分試成績就係入唔入到心儀中學嘅重要因素！家長如果對仔女嘅中學排名有疑問，不妨睇睇 AfterSchool 嘅《【全港中學排名】2020年香港Band 1名校排名+選校指南》呢篇文章，相信會幫你揀到最適合仔女嘅中學！
校方會檢閱呈分試成績
如果升中派位嘅結果唔滿意，好多家長都會去唔同中學「叩門」，希望可以把握最後機會爭取入到心儀中學嘅機會！但你又知唔知原來「叩門面試」都會好睇重中小學呈分試成績？
原來，呈分試失手除咗影響統一同自行分配學位嘅結果，仲會係「叩門」最睇重嘅因素之一！所以大家緊記一定要好好準備小學呈分試，千其唔好等到呈分試失手嘅時候先嚟後悔啊！
如何準備小學呈分試？
留意呈分試計分法
freddie marriage on Unsplash
首先，呈分試比重係好多家長都會忽略嘅一個範疇，特別係一啲重要嘅呈分試計分法，例如上述嘅「999632」等等，都可能會大大影響仔女最後嘅呈分試成績！
咁點解呈分試比重咁重要？大家一齊嚟睇睇下面嘅表格喇！
| 科目 | 同學A | 同學A呈分試成績 | 同學B | 同學B呈分試成績 |
| 中文 | 90 | 810 | 70 | 630 |
| 英文 | 90 | 810 | 90 | 810 |
| 數學 | 90 | 810 | 90 | 810 |
| 常識 | 90 | 540 | 90 | 540 |
| 視藝 | 70 | 210 | 90 | 270 |
| 音樂 | 70 | 140 | 90 | 180 |
| 總分 | 500 | 3320 | 520 | 3240 |
大家可以見到，雖然同學B嘅成績係比同學A高分，但計完呈分試比重後，最後嘅成績竟然係比同學A低80分！原因就係同學B喺中文科呈分試失手，雖然視藝同宗教都比同學A高分，但因為有呈分試計分法，所以就算同學A喺視藝同宗教嘅呈分試失手，藉住主科「乘九」嘅優勢，都可以比同學B更加高分，更加大機會入到心儀中學~
所以從呢個例子見到，主科「乘九」嘅威力真係好強，亦都暗示咗準備小五同小六呈分試嘅時候，要擺多啲時間落主科嗰到，做多啲呈分試模擬試題，或者參加呈分試操卷班，到最後一定可以攞到好嘅呈分試成績！
作答呈分試試卷時做好時間分配
Crew on Unsplash
「我明明識做架，就係唔夠時間囉！」呢句係咪好熟口面呢？雖然仔女喺小六、小五呈分試之前已經溫曬課本裡面嘅知識，但如果無時間寫落答題簿到，一樣有機會喺呈分試失手~
所以家長喺幫仔女準備小學呈分試嘅時候，不妨提醒吓要注意答題嘅速度，同埋要將簡單、容易嘅課題或者題目做咗先，千其唔好不斷停留喺最難嘅題目嗰度。
喺心態上，家長可以提醒仔女：就算平時操練好多呈分試模擬試題，見過好多唔同嘅題型，但都要留意教育局都會出一啲以前無出過/新嘅題型，到時記得唔好緊張，盡量扣連返喺課本學到嘅概念同知識，相信自己嘅能力。咁樣就可以減少浪費時間，同時又可以展現自己靈活變通嘅能力！
參加呈分試操卷班操練題型
Nick Morrison on Unsplash
如果擔心仔女平時操練唔夠，呈分試操卷班可能係你最好嘅解決方法。操練呈分試試卷的確係呈分試最好嘅準備方法之一，但家長可能搵唔到足夠嘅呈分試模擬試卷俾仔女操練，又驚仔女臨場考試唔熟悉呈分試模式或者題型。
呈分試操卷班就可以一次過解決呢啲問題，因為呈分試操卷班會有唔同科目嘅小五小六呈分試資源，例如模擬試題、歷屆試題同精華筆記，又會有資深導師輔導仔女，教識佢地點樣解題最快，或者點樣表達最清晰~
如果同學仔專心上堂，勤力操練，相信呈分試操卷班一定可以幫你攞到唔錯嘅呈分試成績！
多觀察身邊事物和現象
Aaron Burden on Unsplash
雖然上面提大家要專注操練呈分試試卷，但唔好唔記得其實「生活係最好嘅老師」。其實小學呈分試雖然需要大家操練，但其實多啲記錄生活中嘅趣事或者得著，可以令你喺中文或英文呈分試試卷裡面脫穎而出！例如寫作卷嘅記敘題材都可以係同學生活中發生嘅事同得著。
仲有就係常識科！因為呢科經常會涉及到生活中嘅議題，例如雨水循環、青少年嘅生理改變或者社會議題等等。同學如果平時有留意生活點滴，就算呈分試出啲歷屆試題無嘅題目，都唔會嚇一跳啦！
操練和考試時緊記要檢查答案
fotografierende on Unsplash
呈分試最唔抵嘅就係明明識曬某條題目，但就係錯埋啲唔小心嘅位~ 所以家長要時刻提醒仔女操練嘅時候要預時間檢查答案。簡單嚟講，就係喺操練呈分試試卷嘅時候已經要訓練 「Check 卷」嘅方法，例如數學科要檢查單位同驗算、英文科要練習搵錯別字等等。
如果仔女喺操練嘅時候已經識得預留時間檢查答案，咁喺真正嘅小六、小五呈分試裡面就可以更加準確咁寫到答案！
如果小學呈分試失手怎麼辦？
Eric Ward on Unsplash
首先第一樣嘢：小五呈分試失手一次並唔係世界末日！同埋呈分試成績唔係完全代表一切！
最重要嘅係要明白仔女點解會喺呈分試失手。就等 AfterSchool 列出可能令你呈分試失手嘅原因啦！
- 準備不足，掌握唔到課本內容
- 操練不足，唔熟悉呈分試題型
- 時間管理問題，呈分試嘅時候唔夠時間做
- 無預時間檢查答案，錯好多唔小心嘅嘢
- 情緒管理唔好，太大壓力
- 臨場發揮唔好，過分緊張等等
除咗以上嘅 Points，都仲有其他原因會令仔女發揮得唔好，最重要係要對症下藥，明白仔女難處，進一步改善問題。咁樣喺下一次呈分試就可以發揮得更加好！
如果係最後一次小六呈分試，成績依然唔理想，咁就要調整心態，接受成績唔理想嘅事實！專心準備升中面試同仔女嘅 Porfolio，咁就可以確保面試發揮得好啦！
如果對升中排位嘅過程有疑問，可以參考 AfterSchool 呢篇 《【2020升中派位】一文睇哂自行分配學位、統一派位、叩門策略》了解多啲升中派位嘅過程。
疫情之下教育局呈分試如何安排？
Pille-Riin Priske on Unsplash
肺炎施虐，呈分試嘅原定 schedule 都打亂曬，就等我喺度整理一吓最新嘅教育局呈分試安排啦！
小五呈分試
如果已經考咗小五呈分試嘅同學仔當然無問題啦~ 但如果仲未考小五呈分試嘅你，又或者你係跨境學童，記得留意學校嘅通知，因為校方可以喺任何情況許可下，補返呢次嘅小五呈分試！
另外，如果疫情反覆，實在無辦法舉行小五呈分試，校方會參考學生喺小五上學期考試、過往段考、小測、網上學習、測驗等等嘅成績嚟評估小五呈分試分數。如果有需要，校方會提早通知家長嘅！所以記得雖然係網上課堂，但同學仔都要認真對待每一個測驗！
小六呈分試
教育局會因應疫情嘅變化，俾同學仔喺安全情況下進行小六呈分試~
不過如果對跨境學童嚟講，返學校考試可能唔太可能。如果別無選擇，教育局就會合併「五年級呈分試」同「小六呈分試」，呢兩次呈分試做一次，詳情可以向校方查詢~
喺肺炎疫情下，相信各位同學仔都好辛苦咁準備小五小六呈分試。但記得要平衡返讀書同娛樂，喺不斷操練呈分試試卷嘅同時，都要適當咁放鬆身體，例如做吓運動，行吓山咁。差滿電之後，大家一定可以更有效率咁準備小學呈分試！祝大家呈分試成功！
