【2025 DSE 考生須知】考試前最後準備！必備應考物品Checklist

辛苦咗咁耐，嚟到 2025 DSE 考試嘅大日子啦！喺考試前夕，你需要知道到底要帶咩去應考 DSE！做好全面準備，先唔會白費之前溫習嘅努力！AfterSchool 特登喺度幫大家整合咗 「DSE 應考物品 checklist」，提提大家 DSE 要帶啲咩，教各位同學仔點做好應試準備。收音機、耳機、准考證等呢啲物品都一定要帶齊，千祈唔好大意！

准考證係考 DSE 最重要嘅應考物品，就等同於入試場嘅入場證，冇帶有機會考唔到試㗎！同埋，千祈唔好貪玩同准考證打卡，有機會被取消考試資格！

身份證同准考證同樣重要，冇帶有機會冇得考試㗎！

考需要計數嘅科目，記得要準備好適用於 DSE 嘅計數機，考評局標志要清楚，機身亦唔可以有書寫痕跡。如果有好多 formula 要記，不妨係考試前將程式入落計數機先，考試就方便好多啦！

(小編以前有同學考 LS 通識嗰陣冇計數機，然後佢就。。。所以大家帶定計數機實無壞，千祈唔好貪一時之方便！)

記得檢查自己考場係紅外線考場定非紅外線考場。

如果係紅外線考場，只需要帶備插頭直徑 3.5 毫米並有 2 個絕緣環嘅耳機接駁試場提供嘅接收器，手提電話附送嘅耳機普遍唔適用於 DSE 聆聽考試。

如果係非紅外線考場，記得帶合適 DSE 嘅收音機，例如 SONY 收音機 （Sony SRF-S84）或者 Philips 收音機 （Philips AE1530），都係唔少考生中意用嘅 DSE 考試收音機型號。BTW 記得仲要帶埋駁到收音機嘅有線耳機呀！千祈唔好帶錯無線藍芽耳機呀！

黑/藍原子筆、間尺、塗改帶、鉛筆同擦膠等基本文具一定要準備好啦！

特定科目例如視藝科，記得帶齊畫具、參考資料呀！

記得帶足夠嘅現金同八達通，作爲交通費用 (有現金喺身，有咩事都可以搭的士啊嘛)。

方便揾路同向人求助，但入到考場記得熄機呀！最好就 set 靜音 + 勿擾 + 飛航模式，先再熄機。

考場冷氣可能比較大，帶件外套就唔怕太凍影響考試表現啦！順便帶埋紙巾，以備不時之需。

因為疫情，所以教育局要求學校停用飲水機，大家記得要帶水啊！另外因為部分科目嘅考試時間比較長，同學仔可以帶定少少食物，喺休息時間食（小編以前考 DSE 嗰陣，成日都聽到隔離位個肚響......）。

一！定！要！帶！口！罩！
(小編冇嘢補充)

1. 確認考試日期同時間，寧願早到好多，都一定唔可以遲到！
2. 確認考試地點，唔好去錯考場呀！(考試前一日就已經要 check 清楚)
3. 前一晚要有充足嘅睡眠，養足精神考試！
4. 唔好太擔心，放鬆心情反而可以展示最好嘅狀態！

相信各位 2025 DSE 嘅同學仔呢刻都非常緊張，希望呢篇 blog 可以提到大家做足試前準備，幫到你哋更順利應考 DSE啦！

睇完呢個 checklist 就唔使擔心因爲大頭蝦而影響考試表現啦！加油！

延伸閱讀：
1. 【DSE Timetable】2025 DSE 考試時間表及重要日子