「神科」除咗我地熟悉嘅港大/中大 Medicine，其實仲有其他課程例如物理治療、城大獸醫、幼兒教育等！人望高處，所以今次 AfterSchool 就整合咗各大神科嘅收生分數、收生要求、起薪人工及出路，俾大家趁依家了解多啲、等自己 Aim high fly high! 香港大學 - 內外全科醫學 Bachelor of Medicine and Bachelor of Surgery (MBBS) HKU 以其醫學院聞名，人稱神科嘅 HKU Medicine 收生要求更係全校最高，所以差唔多係每年狀元嘅必選！根據 2019/20 學年收生分數，醫科以最佳 6 科成績（Best 6）計算（不設加分制）收生分數中位數為 38 分。另外，同學仲需要通過面試先入到！ 同大部分科目唔同，HKU Medicine 學士課程修讀年期需要六年時間，比普遍其他科目長。畢業後需要再多一年實習，所以簡單嚟講，需要七年時間先有資格執業做醫生！不過根據公務員總薪級表，醫生嘅起薪點為總薪級表的第 32 點，有$70,465，高過其他職業好多！ 香港大學 - 牙醫學 Bachelor of Dental Surgery 除咗醫科，港大牙科同樣都係大學神科！同 HKU Medicine 一樣，牙醫學士課程修讀時間長達六年，同需要進行面試先有機會入讀！喺 Best 6 計分制下，就算同學仔嘅主科或中文唔叻，都仲有機會入讀㗎！而根據 2019/20 學年收生分數，HKU Dental 收生中位數係 38 分。同樣，牙醫人工嘅起薪點相當可觀，係公務員薪酬表嘅第 30 至 44 點 ($64,270 - $110,170)！ 香港大學 - 藥劑學 Bachelor of Pharmacy (BPharm) 同樣喺 Best 6 嘅計算下，HKU 藥劑學學士收生分數中位數為 34 分，比法律系更高！除咗港大，中大亦有提供藥劑學課程，以最佳 5 科嘅成績計算，中位數大約為32分。 想成為藥劑師嘅同學仔，除咗需要完成藥劑學課程，更要進行實習同通過香港藥劑法例丶藥劑執業和藥理學嘅筆試㗎！藥劑師人工亦相當吸引，以現時衞生署招聘藥劑師嘅起薪點為例，有大約 $53,000。除咗醫院，藥劑師亦可以喺社區藥房、藥廠、衞生署等機構搵到合適嘅崗位㗎！ 中文大學 - 內外全科醫學 Bachelor of Medicine and Bachelor of Surgery （圖片來源：中文大學網站） 中大醫科亦係唔少狀元們嘅選擇，甚至有研究指出有六成未來醫生都喺中大畢業 ！根據中大最新公布嘅 2020/21 年度醫學士課程收生成績要求，2020 年內外全科醫學士嘅七科成績收生中位數為 43 分，而環球醫學領袖培訓專修組別更高達 47 分。 中大醫學課程特別嘅係，學院有個暑期研究實習計劃，一年級和二年級的醫科學生有機會喺生物醫學學院的科學家指導下，進行為期兩個月嘅研究㗎～ 科技大學 - 工商管理學（環球商業管理）Global Business (GBUS) 除咗醫療科，科大嘅 gbus 同樣都被譽為神科。學制為四年，但同 BBA 唔同嘅係，工商管理學 Global Business 學士課程除咗要識唔同嘅經濟商業理論，仲要修讀法律課程例如 Business Law、Company Law，同埋風險管理、會計等課程，所以目標係要學生成為一個好 All Rounded 嘅商業人才，包括口才、管理、準備財務報表等等。 除咗分數，面試係入學重要嘅一環。除咗知識，主要考核學生嘅溝通技巧、團隊合作和邏輯思考等方面。而且每年競爭亦非常激烈，只有 25 - 28 個學位㗎咋！ 更吸引嘅係，畢業後就業率高達 95%！畢業生嘅出路通常都係喺投資銀行例如 JP Morgan、Goldman Sachs 工作，而人工起薪點大約為 $40,000。 理工大學 - 物理治療學 Physiotherapy 現時 Poly 係香港唯一提供物理治療課程嘅大學，以考生最佳六科成績計算，而收生平均分數為 34.2 分。而身為「Poly 三寶」其中之一嘅 PT 就被譽為 Poly 嘅神科～ 人工方面，一級物理治療師（Physiotherapist I）月入約為 $51,095 至 $74,515，而物理治療學初畢業嘅學生，就合符資格入職二級物理治療師，入行人工起薪點為每月 $28,725 。 除此之外，東華學院亦有開辦物理治療學(榮譽)理學士課程，藉此紓緩人才短缺。同 Poly 一樣，課程為四年制。收生要求就比 Poly 同科稍低，平均收生分數為五科逾 22.5 分，並需要進行面試篩選。 目前香港人口老化問題日益嚴重，香港物理治療師人手供不應求。政府更推算 2030 年香港最少會欠缺超過 900 位物理治療師！鑑於社會對物理治療師的需求獎會愈嚟愈高，估計 PT 嘅出路同就業前景都相當明朗啦～ 城市大學 - 獸醫 Veterinary 相信有唔少鍾意動物、又愛心爆棚嘅同學仔都對讀 Vet 有興趣！不過依家唔使去外國讀啦～ 城大亦有提供獸醫學士學位課程。除咗喺香港執業之外，城大獸醫嘅資格喺內地、東南亞、澳洲及紐西蘭等地方都受認可，所以前景出路都唔錯！ 以大學學科「4+2」計算，城大獸醫平均收生分數為 34 分。根據以往數據顯示，新入行獸醫嘅人工平均為 3 萬元，累積大約 3 年或以上經驗之後，月入可達 $100,000，十分可觀！ 教育大學 - 幼兒教育(JS8404) Bachelor of Education (Honours) in Early Childhood Education 教大幼教係 EdU 最熱門嘅課程，雖然分數同人工唔算特別「神」，但出路比較明確同穩定之餘，收生要求仲唔算特別離地，所以係唔少學生嘅心儀科目～ 教大幼教 Best 5 嘅平均分數為 21 分，但只有大約 49 個學位，所以競爭都大㗎！ 除咗教大，其他大學包括浸會大學(BU)、公開大學(OU)、中大(CU)都有提供幼兒教育嘅課程。就算唔讀學士課程，教大幼兒教育亦有High Diploma 高級文憑課程 (JS8507)，Best 5 平均分為 17 分，減低 bachelor degree 嘅競爭激烈程度！ 人工方面，根據香港教育專業人員協會嘅最新資料，2020/21 學年幼稚園教師起薪約為 $22,790，頂薪就係 $40,530～ 浸會大學 - 傳理學 Bachelor of Communication (Hons) BU傳理系都係一個聞名職場嘅學系，對傳媒工作有興趣嘅你可以考慮下！唔好以為非三大就好易入呀，名額有限，自然競爭激烈！兩個專修嘅計分都係中英+ 3 科收分，前者收生分數平均為 22.43，而後者為 24.06分。侵大傳理學之下更有兩個專修可以揀，分別係動畫及媒體藝術專修同電影電視專修。 然後，2021 年開始BU傳理系開咗新嘅課程 JS2350-傳理學學士 – 新聞主修同 JS2360-公關及廣告主修，學額分別為大約 40 個，有興趣嘅同學仔可以試下啦！ 讀傳理，做傳媒人雖然係主流（即係採訪記者、編輯、電視記者、電台DJ等）但亦有其他出路，例如同communications有關嘅廣吿設計同公關等。雖然稱唔上係專科，但都係一門專業嚟㗎！ 最後，講到考大學，小編想提提同學仔記得要睇清楚【DSE Timetable】DSE 考試時間表及重要日子 ，mark 返低重要日子！今年 Timetable 真係有好大改動，大家一定要睇清楚啊！
