【2021 JUPAS 放榜】一文睇清JUPAS公佈結果注意事項!

AfterSchool
AfterSchool 2021-8-6 4,248
JUPAS 改選完冇耐,過多陣就到聯招放榜嘅大日子啦!點交 JUPAS 留位費?AfterSchool 同你喺呢個漫長等待中,睇定公佈結果當日要做嘅準備啦!
JUPAS 改選完咗冇耐,過多陣就到 JUPAS 放榜嘅大日子啦!係咪等結果等到頸都長呢?咁多位考生一定會緊張,究竟 check 咗結果之後要做咩?冇結果點算好?
唔鍾意個 offer 點算?唔駛咁擔心,AfterSchool 同你喺呢個漫長嘅等待中,睇定公佈結果當日要做嘅準備啦!到時一定安心好多!
 

聯招放榜 Timeline (懶人專用)

日期時間重要事項
12/8 (四)09:00公佈 JUPAS 結果
13/8 (五)17:00前 交留位費
18/8 (三)09:00公佈 Appeal 結果
19/8 (四)09:00 - 18:00 遞交重新考慮入學申請
26/8 (四)09:00公佈重新考慮入學申請結果
30/8 (一)09:00公佈補選結果
2/9 (四)09:00公佈第二次補選結果

JUPAS 公佈正式遴選結果

時間:8月12日(四)上午 9 點
公佈途徑:JUPAS 網站、9 間 JUPAS 參與院校嘅網站、致電大學聯招處 2334 2330
課程取錄資格:教資會資助課程 (UGC-funded)/公大自資課程/SSSDP「資助計劃」課程
到時出咗結果,各位同學們會落入 4 種情況
  1. 接納 offer
  2. 接納 offer + 等緊 appeal 結果
  3. 放棄 offer
  4. 收唔到 offer
接落嚟,等小編同大家逐一講解下唔同情況有咩注意事項啦!
credit: unsplash @Andrew Neel
credit: unsplash @Andrew Neel
 

接納 Offer 嘅考生

留位費費用、繳交期限

如果你收到 JUPAS offer,亦願意接受個 offer,記得一定要交留位費! 唔好遲!唔好遲!唔好遲!(重要嘅事要講三次!) 遲咗交錢就無咗個 offer 㗎啦!
留位費為 HKD 5000,考生必須喺 8月12-13日 (17:00) 之內繳交。

交留位費途徑 1:網上繳費靈 (PPS)

唔接受電話繳費。學生必須登入 JUAPS 帳戶用 PPS 交費。以下係可以繳交留位費嘅時段:
  • 8月12日(四):12:00-23:59
  • 8月13日(五):00:00-17:00
注意:聯招嘅網上系統會喺每日 03:00-06:00 暫停開放
用 PPS 成功繳交留位費後,會即刻收到確認通知。

交留位費途徑 2:eBanking 服務

只適用於私人戶口。電子銀行服務只適用於匯豐銀行、恒生銀行及東亞銀行
匯豐銀行、恒生銀行
  • 8月12日(四)09:00-19:30 交費,同日 22:30 起收到確認通知;
  • 8月12日(四)19:31-23:59 和 8月13日(五)00:00-17:00 交費,8月13日(五)22:30 起收到確認通知。
東亞銀行 (較遲收到確認通知)
  • 8月12日(四)09:00-23:59 交費,8月13日(五)09:00 起收到確認通知;
  • 8月13日(五)00:00-17:00 交費,8月14日(六)09:00 起收到確認通知。
交咗錢,件事未完㗎,要收到確認通知先得!所以諗住用 eBanking 交留位費嘅考生,小編建議各位同學最好即日交錢,早啲收到確認,會保險啲~ 
用 eBanking 交留位費,收到確認通知嘅最早時間:
8月12日(四)22:30 起
可以最早收到確認通知嘅選擇:
匯豐銀行、恒生銀行:8月12日(四)09:00-19:30 交費

交留位費途徑 3:現金 (東亞銀行)

唔接受支票付款/自動櫃員機轉賬。
以下係透過銀行交留位費,各時段嘅確認通知日程。
  • 8月12日(四)09:00-23:59 交費,8月13日(五)09:00 起收到確認通知;
  • 8月13日(五)00:00-17:00 交費,8月14日(六)09:00 起收到確認通知。
喺東亞銀行交留位費,無論用 eBanking 定現金存款,收到確認通知嘅時間都冇分別的!
* 更多交留位費資料輸入嘅詳情,可以睇返 JUPAS 正式遴選結果頁面。


接納 Offer + 申請咗 DSE 成績覆核嘅考生

如果你收到 JUPAS offer,同時等緊 DSE 成績覆核結果,又對個 offer 唔反感,小編一律建議 accept 咗佢先!一日結果未出,你一日都唔會知 appeal 得成唔成功。
假若你 appeal 唔成功,但又冇接納到 JUPAS 派畀你嘅 offer,咁你就乜都冇㗎啦!
但假若你 appeal 成功,無論你係收唔到 offer/接納咗 offer,你都會獲得第 2 次嘅改選機會 (聯招稱之為「重新考慮入學申請」)。可參閱 JUPAS 網站

重新考慮入學申請

時間:8月19日(四)09:00-18:00
喺呢一輪申請,Appeal 成功嘅同學可以揀去修改/唔修改先前嘅課程選擇。
原本收唔到 offer 嘅同學,可以再次改選,意味住同學或者有機會入到大學!
接納/放棄咗原先 offer 嘅同學,可以交重新考慮入學申請,修改課程選擇,博下可唔可以派到另一個較高次序嘅 offer!
source: JUPAS 網站
source: JUPAS 網站
 

重新考慮入學申請結果公佈

時間:8月26日(四)上午 9 點 
想 accept offer 嘅同學,記得記得一定要喺同日 (26 號) 17:00 前登入 JUPAS 帳戶按「接納」
如果你之前收到 offer、交咗留位費,呢一輪獲配俾你嘅結果,將會直接取代你舊果個。就咁上返 JUPAS 個網 accept 就 ok!如果你錯過咗接納新 offer 嘅時間,咁你嘅 offer 將會維持不變。
如果你之前收到但放棄咗 offer,呢一輪成功嘅話,你可以再次得到 offer!想接納 offer,除咗要喺 JUPAS 個網 accept,仲要記得喺限期內交 $5000 留位費!
如果你係之前收唔到 offer,成績覆核之後喺呢一輪獲得 offer,恭喜晒!!都係嗰句,想接納 offer,除咗要喺 JUPAS 個網 accept,仲要記得喺限期內交 $5000 留位費!
注意:JUPAS 呢輪結果嘅留位費,只能透過 PPS/現金 (東亞銀行) 繳交

source: JUPAS 網站
source: JUPAS 網站


放棄 Offer 嘅考生

如果你收到 JUPAS offer,不過你唔滿意/有更好嘅選擇可揀/有其他打算,當然可以直接無視個遴選結果啦。但如果你滿意你收到嘅 offer,記得要快啲交留位費!過咗指定限期 (即 8月13日 17:00) 都未交留位費嘅話,就會當你放棄 offer!想再經 JUPAS 系統入大學,就要等下個學年㗎啦。

credit: unsplash @Jeswin Thomas
credit: unsplash @Jeswin Thomas
 

收唔到 Offer 嘅考生

正式遴選收唔到 offer,Appeal 成功之後嗰輪「重新考慮入學申請」又無 offer,唔好灰心住!如果喺正式遴選、重新考慮入學申請後,仍然有學額剩,呢啲學額會撥去補選。收唔到 offer 嘅同學將會落入補選,而補選通常會有 2 輪(按情況而定)。
第一、二輪補選 accept offer 嘅流程,同上面「重新考慮入學申請」嗰個完全相同,只係日子唔同咗,所以小編唔多講啦。留位費方面,都係只能透過 PPS/現金 (東亞銀行) 繳交。

第一輪補選

時間:8月30日(一)上午 9 點 
接納 offer、交留位費嘅期限:8月30日(一)下午 5 點前

第二輪補選

時間:9月2日(四)上午 9 點
接納 offer、交留位費嘅期限:9月2日(四)下午 5 點前

如果喺第二輪補選都未有 offer,而 9 間 JUPAS 參與院校或 SSSDP「資助計劃」院校仲有空缺學位,有關院校會再考慮呢批同學。(小編按:唔好等啦。即使有 offer,都唔會係你最想讀嘅。為咗一個學額格硬讀,何苦呢!)

credit: unsplash @Chang Duong
credit: unsplash @Chang Duong

詳細講咗咁多 JUPAS 公佈結果嘅流程,令小編諗返起自己當時咩都唔清唔楚,認真有啲騰雞... 希望你睇完呢篇可以安心啲~ 祝大家都順利入到自己嘅 A1!無論結果如何,都記住一句:條條大路通羅馬!
 

JUPAS 放榜常見問題

Q:JUPAS 幾時公佈正式遴選結果?
A:8月12號,朝早 9 點。
Q:點樣交留位費?
A:交留位費有三種途徑:PPS、eBanking、現金。
Q:留位費有冇繳交期限?
A:除咗正式遴選有 2 日時間交錢,其他結果公佈全部都要同日下午 5 點前繳交。
Q:唔鍾意個 offer,有冇得遴選多次?
A:冇,除非 appeal 成功。
Q:DSE Appeal 成功,有冇得遴選多次?
A:有。一旦 appeal 成功,即可進入重新考慮入學申請,改多次 choice,遴選多次。
Q:DSE Appeal 成功,幾時再排 choice?
A:8月19號,09:00 至 18:00 可以交多次 choice。
Q:DSE Appeal 成功,改咗choice,幾時公佈結果?
A:8月26號,朝早 9 點。
Q:收唔到 offer,係咪真係無㗎啦?
A:唔係㗎,仲有兩輪補選機會。
Q:補選幾時公佈結果?
A:第一輪補選 8月30號公佈結果,第二輪就 9月2號。

以上資料僅作參考,最終以 JUPAS 網站公佈為準。
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool