【DSE 冷門選修科】倫理與宗教讀咩?出路係點? ERS 溫習心得分享!

AfterSchool
AfterSchool 2021-8-11 734
倫理與宗教係自修生水泡科?易高分?考試溫習筆記/補習點搵?AfterSchool 一文帶你了解 DSE ERS 考試範圍評分準則、大學出路、讀書心得、溫習tips!
倫理與宗教 ERS (Ethics and Religious Studies) 呢一科相信對唔少人都好陌生,但其實佢都係 DSE 文憑試裡面其中一個選修科嚟㗎!
AfterSchool 今次同大家介紹一下倫理與宗教,會講到 DSE 範圍、題目參考、出路、教學資源,小編亦都分享咗一啲讀呢科嘅學習心得,希望幫到每個考慮緊選科 / 自修緊呢科嘅你啦!
(注:以下嘅卷二宗教部分會以基督宗教做例子)
  

DSE 倫理與宗教-考核範圍

根據教育局,「倫理與宗教」係一個學習唔同有關人生意義、價值觀、目標等問題嘅科目,從而發展學生嘅洞察力,令同學可以喺道德、精神生活,或獨立自主判斷方面有所得益。就咁睇呢科嘅名,大家應該唔難估到呢一科喺 DSE 分為兩大部分倫理學同埋宗教傳統兩份卷。
課程組成部分考試範圍及內容考試時間
第一部分:
倫理學

(卷一佔50%)
主要會學習唔同嘅規範倫理學導論,著重探究唔同價值觀點樣形成嘅,同埋學習用唔同邏輯思考根據做判斷。 

甲部 :規範倫理學 (15%)
設有 4 題短題目,須選答其中 3 題,每題 5 分。

乙部:個人及社會問題 (40%)
設有 4 題,須選答 2 題。題目為論述題及引導性的論述題,每題 20 分。

1 小時
45分鐘
第二部分:
宗教傳統

(卷二佔 50%)
(以下選一個單元修讀) 
單元一:佛教/單元二:基督宗教

單元一: 佛教
(全卷分甲、乙兩部分,共答 3 題,每題 20 分)
:佛教歷史 (2 題答 1 題)
:佛教教義及佛法實踐 (4 題答 2 題)

單元二: 基督宗教**
(全卷共 5 題,須選答 3 題,每題 20 分)

**可以帶合規格嘅聖經入試場考試,同學可以貼 label 喺聖經裡面

1 小時
45 分鐘


第三部分:
宗教體驗

(校本課程)
呢個部分主要畀學生透過體驗學習活動,從實踐裡面學習一系列圍繞宗教嘅教導,同埋呢啲教導同人類共同經歷之間嘅關係。老師可指導學生去反思呢啲學習經驗同埋有關嘅背後意義。

(以下選一個單元修讀)
單元一:學會服務及從服務中學習/
單元二:從不同宗教禮儀中學習 

/
滑動查看更多

小編經驗:DSE ERS 讀書分享

小編中學有讀過呢科,等我分享下當時嘅讀書經驗啦!
第一部分「倫理教育」通常會先學習倫理學嘅一啲基本概論。同學會從唔同嘅倫理角度去分析、看待「道德」呢個詞彙,思考唔同倫理分析角度背後有乜嘢優缺點等等,而角度包括「康德同韋伯新教倫理角度」 、「義務論」、「功利主義」、「美德價值論」等倫理學派別。
學生之後就會應用呢啲唔同嘅倫理角度去分析一系列嘅倫理問題,包括醫療 / 醫學倫理、商業倫理、性倫理、環境倫理、生物倫理、生態倫理、動物倫理等唔同方面較有爭議性嘅議題。當牽涉需要判斷「是否道德」嘅問題,都會係呢一科討論嘅焦點。
常見嘅議題包括:安樂死、器官移植、同性婚姻 / 同性戀、人權等。
至於第二部分,因為小編考基督宗教部分,咁就分享多啲呢部分嘅經歷啦。第二部分,學校通常會根據佢嘅宗教背景幫你做決定。基於小編嘅母校係天主教學校,自然就揀咗基督宗教部分啦!無論天主教 / 基督教學校,兩者都會考同一個部分,不過人名方面,分卷會有唔同顯示。呢份卷主要修讀耶穌出世前同天主有關嘅重要時間、耶穌生平以及耶穌曾經展示過嘅神蹟等等。
如果大家會喺學校選修呢一科,老師會帶你哋做埋「信仰實踐」部分。小編以前嘅老師,就帶咗我哋去參觀天主教教堂,會學到教堂裡面唔同地方嘅功用,建築裡面嘅唔同設計同背後原因等等,真係大開眼界。如果你係自修生,相信就唔需要進行呢類活動啦。

ERS 倫理與宗教-Past Paper 題目參考

credit: unsplash @Partick Fore
credit: unsplash @Partick Fore
宗教部分通常日校就冇得畀你揀,咁我就用卷一「倫理部分」嘅題目做例子啦。
無論你係猶疑緊揀咩選修嘅中三學生,定係諗緊好唔好自修倫理與宗教嘅自修生或重讀生,睇完下面啲 Past Paper 題目例子,如果你鍾意呢啲題目,咁呢科肯定啱你心水!

DSE Past Paper 卷一甲部:倫理學理論考試範例

例子A:
解釋下點解喺道德判斷嘅過程入面,保持一個開放嘅態度係好重要嘅。(5分)
例子B:
由價值理論嘅角度解釋點解平等對今日香港係一個好重要嘅價值。(5分)
 

DSE Past Paper 卷一乙部:倫理學道德議題分析範例

例子C:
根據報導,有一間國際嘅品牌就喺香港落廣告去宣傳豆腐食品,個廣告裡面有一句:「只要你鍾意嘅話,隨時都可以食我豆腐㗎。」有人覺得呢句說話用詞唔恰當,因為「食豆腐」喺香港嘅廣東話語境裡面都性含義,意味著喺言語同埋行為上面對女性作出冒犯。亦都有人認為製作廣告嘅人其實應該享有創作自由,上面嘅用語都係一句笑話,唔使太過認真。
試下從商業理論嘅角度去評論以上兩個觀點。(20分)

例子 D:
有一項研究發現,美國人通常都會認為婚外性行為相比起離婚喺道德關係上面更加令人難以接受。你同唔同意呢個講法呢?
試下由倫理學嘅角度說明一下。(20分)


小編經驗:DSE ERS 溫書小貼士

由以上嘅 Past Paper 範例題目可以睇到,卷一倫理學部分好著重你透過唔同嘅倫理學角度同原則去分析一啲社會上面嘅議題。所以你必須清楚咁了解每一個倫理學分析角度嘅意思,果啲角度分析背後嘅理據等等,透過多角度分析,從而建構個人觀點與立場。
小編強烈建議大家要有時事觸覺多多留意社會喺道德上面有爭議性嘅時事,並且自己嘗試用唔同嘅倫理學角度去分析,久而久之就會培養到相應嘅倫理學 sense!如果同學仔得閒嘅話就一定要嘗試不斷練習寫文,因為一條題目價值 20 分,真係每一題對成分卷好重要,不容有失。
因此練習手速係好重要嘅一部分。小編建議每一條題目至少要寫到四到五段,段段都要有 point 由唔同嘅倫理角度出發同埋分析。同時要有前言同埋結尾,令成篇文嘅結構更加完整。
credit: unsplash @Julie Ricard
credit: unsplash @Julie Ricard
 

讀倫理與宗教有咩出路?咩人啱讀?

根據最新 2021 DSE 嘅數據,應考倫理與宗教嘅人數為 734 人,只佔全港 DSE 考生人數約 1.5%。呢一科真係好少人讀,好多人會唔知呢科係咩,或者覺得無乜出路。但係,讀呢一科絕對有著數!
因為你嘅競爭對手少好多,變相更易突出自己,從而攞到更好嘅成績。最重要嘅係,呢一科嘅合格率極高,2021 DSE 有 90% 嘅同學攞到 Level 2 或以上嘅成績!考呢一科接近 94% 嘅同學仔都選擇用中文作答,對英文較遜色嘅同學都有優勢。所以,呢一科都有唔少自修生揀嚟讀㗎~

點解讀倫理與宗教?有咩用?

讀倫理與宗教,可以令你喺有道德爭議嘅議題上明辨是非,同時訓練你多角度、批判思考嘅能力。另外,喺宗教嘅學習裡面,你會更加認識一個宗教嘅背景、起源等,學識尊重唔同宗教、包容唔同宗教背景嘅人,對整個社會嘅多元文化建構嘅作用非常重要。

讀倫理與宗教對大學出路有咩幫助?

呢一科除咗相對容易合格同拎高分,同埋如果你喺大學想讀哲學、神學、宗教研究等唔同範疇嘅學科,相信讀呢科有機會幫到你喺分數上 / 面試上有少少加成。擁有倫理學思維嘅話,其實對文化研究、公共行政、社會工作、人力資源管理等唔同範疇都有幫助。


【自修生留意!】ERS 倫理與宗教-教學資源

唔少日校生或者自修生讀讀下可能會好迷,想另外搵多啲呢科嘅 resources,但可能係太少人讀,無喎!想搵補習名師教下我,都無乜喎!!咁點算好?點解人哋自修到?點做到㗎?!!小編作為讀過呢科嘅過來人,可以俾少少意見你參考~

卷一倫理學可以點溫?

睇返考評局嘅學校資源,你會見到其實無特別推介嘅書籍,所以學校都無咩特別嘅官方教科書教呢科。我學校果時揀咗部分官方教材教我哋,亦有用自家製嘅工作紙作為教學主要材料。因此,小編建議大家先熟讀倫理與宗教嘅官方網上資源,至少要理解呢科係點嘅一回事。
另外,小編大力建議大家操多啲歷年嘅 Past Paper,令自己熟習唔同嘅題型。其實DSE 來來去去都係問差唔多嘅嘢,尤其卷一甲部,所以大家係有得操練嘅,甚至可以背埋答案入去考場添!如果大家唔知點樣答題目 / 寫 essay 係最好嘅話,記得一定要睇考評局放出嚟嘅考生表現示例,再對比唔同 level 嘅示例,從而估到考評局想要咩。
另外網上都有 Youtuber 或者補習老師開始教授倫理與宗教,有免費教學影片,唔係唔睇呀嘛~
 

卷二宗教可以點溫 (基督宗教)?

呢部份就真係比較難去準備。以基督宗教為例,你需要好清楚了解聖經上記載嘅唔同重大事件,唔係嘅話好難答問題。
不過呢份卷好有翻炒嘅感覺,題目望落去雖然唔同,但其實問嚟問去都係嗰啲野,所以唔駛太擔心!相比起倫理卷一部分,真係需要更用心溫~
基督宗教份卷有五條,分別會針對以下五個部分問,如果無時間溫書或者真係有一啲部分唔熟嘅話,都可以有策略咁淨係溫三個課題就 ok:
  1. 舊約背景
  2. 兩約之間背景
  3. 新約背景
  4. 耶穌生平及言論
  5. 初期教會發展

想了解更多倫理與宗教嘅課程大綱同埋內容等嘅資料,可以睇下:
credit: unsplash @Alex Grodkiewicz
credit: unsplash @Alex Grodkiewicz
 

問答環節

Q:倫理與宗教要讀咩?
A:主要讀兩部分:倫理學、宗教傳統。
Q:「倫理學」部份即係讀咩?
A:甲部係「規範倫理學」,乙部係「個人及社會問題 」。
Q:「宗教傳統」部份即係讀咩?
A:可以揀「佛教」、「基督教」其中一個單元修讀。
Q:倫理與宗教 DSE 好易 pass?
A:合格率好高,2021 DSE 有九成人攞到 Level 2 或以上!
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool