考 DSE 唔操 M1 M2 Past Paper？傻啦，操卷對熟習考試框架同答題技巧好重要，連數學延伸選修單元都唔例外！但點搵到 / download 到 M1/ M2嘅 Past Paper？搵到又應該點操卷、操 Past Paper？ 今次 AfterSchool 就邀請咗 賭Sir @ 杜氏數學 回答以上呢啲 M1/ M2 同學仔常見問題！ 喺考評局合法下載 Past Paper credit: @somemeans 想合法咁獲得 Past Paper，除咗課金畀考評局，買佢哋出版嘅實體 PP 之外，其實仲有一個聰明嘅辦法，而且特別適合 M1 同 M2 嘅學生！ 就係去考評局個網，下載佢哋官方自己公開出嚟嘅「考生表現示例」： （英文版）https://www.hkeaa.edu.hk/en/hkdse/hkdse_subj.html?A1&1&4_25 （中文版）https://www.hkeaa.edu.hk/tc/hkdse/hkdse_subj.html?A1&1&4_25 由於 M1 同 M2 只需要考一份 Paper，所以考評局放出嚟嘅示例，已經係全份試卷喇！如果你擔心自己會受檔案裏面嘅作答影響，我建議你下載只係拎 Level 1（第一級）嘅示例，因為裏面嘅作答大部份都係錯嘅，唔會造成劇透。 點樣操 DSE M1/ M2 PP？ credit: @ijeab 首先宏觀地講吓：點樣操 DSE M1 M2 Past Paper 最幫到自己？ 千祈唔好忘記，操 Past Paper 嘅唯一目標，係為咗「發掘自己唔識嘅嘢」，你擬訂嘅所有備試策略同心法，都要圍繞住呢個重點。 好多同學都誤信咗學校老師，話咩「M1/M2 操 X 年 PP 就包你拎 X grade 㗎啦」—— 考試唔係打機，打怪升 LV 儲經驗值，你要重視＆改善返啲失分位，先至可以發揮 Past Paper 嘅價值。 考試嘅時候，失分，當然唔好；但操卷嘅時候，失分，絕對係好事 —— 因為呢個就係你操 Past Paper 想發生嘅事。有啲同學淨係揀啲自己識嘅題目嚟做，唔識嘅題目就安慰自己 DSE唔會再出，呢種諗法係必死無疑，並無得著。 有咗呢個明確嘅唯一目標，你自然亦都唔洗擔心 Past Paper 應該幾時操？太早會唔會「嘥咗」啲 Past Paper？因為答案係：你越早開始就越好，做晒咁多年又再重覆做多轉，每做一轉都等如你將海水倒入濾水器，清除自己嘅不足，清吓清吓，海水就變清水，你亦會越做越少錯。 有見及此，操 Past Paper 嘅最佳方法，就係不斷做，同時不斷將失分位糾正，唔好期望自己操一次就識，千祈唔好高估自己有過目不忘嘅超能力，一字記之曰：「做！」見一條做一條，啱嘅由佢，錯嘅記錄低，學返識佢，然後繼續做做做做做做做做做做…… *我嘅 YouTube 頻道有一條影片，係講「正確使用 Past Paper 的方法」，條片只有 2 分 38 秒，你可以睇吓： DSE M1 Past Paper 操卷心得 （一）前半部要快而準 DSE M1 嘅前半部份雖然係高階數學，但其實只係閹割版，內容唔多，令出題變化亦都唔多。操卷嘅時候，呢一部份要對自己有極高嘅要求，唔單亦要計啱，仲要做到「快而準」先至好滿意，尤其是 Differentiation 同埋 Integration 呢啲微積分嘅操作，最好透過操練令自己一望就知點起步，然後拎起枝筆無間斷寫寫寫，直至計出答案，兼夾用 CASIO3650P 驗算答案！ （二）後半部要學睇文 M1 嘅後半部份係概率及統計，講到尾就係考 Probability，只不過 DSE 主張數學應用，於是總係會花一大篇文章，去包裝 Probability 嘅內容。有見及此，你操卷嘅時候，要當自己做緊中文嘅閱讀理解，或者英文嘅 reading 卷，極度小心地挑出重要嘅字眼，喺我嘅課程裏面，我稱之為「考試方言」，例如：consecutive（連續）一字，足以扭轉整條 Probability 嘅題目！ （三）唔使做舊制 Past Paper DSE M1同 CE Maths 或者 AS Math and Stat 其實絕不相似，題目淺嘅太淺，深嘅太深，甚至Out of Syllabus (Out C)，風格啱啱好嘅題目其實少之又少，我強烈建議舊制卷可以不理。更加重要嘅係：DSE 雖然話就話係新制，但新新吓依家都唔新啦，已經有返咁上吓歷史，淨係 DSE 嘅 Past Paper 其實已經好足夠。想體驗考試嘅話，報吓坊間啲好嘅 DSE 操卷班仲化算，起碼唔使嘥時間調查邊啲題目太深或者太淺。 DSE M2 Past Paper 操卷心得 （一）對答案前自己屈計數機驗算先 DSE M2 有個好大嘅 BUG 位，就係幾乎所有題目都可以用 CASIO 計數機驗算，以我報考嗰年為例，我交卷之前已經鎖定咗 94% 嘅分數，淨低嘅分數雖然無辦法完全肯定，但得返 6% 咁少，我金睛火眼逐步人手 Check 都唔使花好長時間。不過，你要記住：呢種屈機驗算嘅能力，係要學習嘅、要練熟嘅、要習慣嘅。若然你平時操卷一做完就心急對 Marking Scheme，你就無機會練習。 （二）留意自己處理 Trigonometry 嘅能力 M2 有個隱藏 BOSS，貫穿所有 Topics，萬一你學唔好，你所有 Topics 都會攞唔足分，我講緊嘅係 sin cos tan csc sec cot 嗰啲 Trigonometry 三角比！ 你操卷嘅時候，遇到卡關，或者做完發現錯，唔好馬上歸咎於嗰個課題，例如 IN 錯數，就以為自己 IN 數能力未夠。你一定要再睇真啲，究竟錯嘅係乜——會唔會只係錯咗 Trigonometry 嘅運算？或者遺忘咗 Trigo 一啲公式嘅功能？要搵啱病因，先至可以對症下藥！ （三）搵同學互相改卷 M2 題目可以出到好短，但你嘅作答通常都好長，仲要一堆次方、一堆份數、一堆好難辨識嘅符號……因此，好多同學自己改自己嘅卷，都會高估咗自己嘅分數，直至到畀其他人改卷，先至返回殘酷嘅現實 —— 由於字體衰、唔整齊、邏輯表達混亂，其實好多分數都唔應該畀自己。因此，平時操卷都最好有一雙別人的眼睛，公正地幫自己評分，搵同學嘅話可以互相改，又或者如果有老師肯改，就更加好啦！
