你有壓力，狀元都有壓力，咁狀元係點樣減壓㗎呢？
我盡量搵左唔同嘅方法減壓，減得黎又盡量唔好浪費自己時間，盡量確保時間都係用得其所。
中六暑假其後差唔多逢假期都去自修室。自修室好處係人群壓力可以令你有比較心態，做得更快，但同時都好容易令你覺得好有壓逼感，所以我會盡量搵方法處理呢種壓力。 通常我都會搵埋一樣有心讀書的好朋友一齊溫書，做戰友，眼訓嘅時候互相車醒大家、食lunch果半個鐘傾下計、之後再一齊chur，心靈上都叫有個支持。 另外我都會帶少量零食去自修室，可能做完一份paper個腦癱瘓就出去啪粒糖／朱古力／energy bar／咩都好，順便呼吸下新鮮嘅空氣，每2-3個鐘好頂唔順就比個15分鐘break自己，鬆下個腦先再對卷／溫書做嘢，頭痛就飲D暖水／食藥。 BTW女仔每個月M到都會好攰，甚至有時會好痛／喉嚨痛／病（我就係）。 中六打後更加要好好愛惜身體，平時已經要戒食／飲凍野同熱氣野，如果你真係戒唔到，至少黎M前一星期開始都要戒（如果唔係真係條路自己揀，______________... 我已經死過好多次…真係真心忠告）。喉嚨痛盡量食番有2,4-dichlorobenzylethanol（或者有其他antiseptics）嘅喉糖，舒緩喉痛同時殺菌消炎，唔好淨飲蜜糖水，更加唔好黎緊M飲／食太多朱古力，朱古力同樣熱氣，容易令妳黎M期間喉嚨痛更嚴重。隨身帶定止痛藥，萬無一失！！至於男仔有咩注意點我就唔太清楚～ 另外我都提過溫全日嘅話，個人建議多數時間9AM溫到7/8PM都好收手（除非太多野趕住溫），剩翻嘅時間同朋友食個晚飯傾下八婆野又好、呻下煩惱又好，咪鬼再溫書／掂D書！！由朝溫到晚會痴線🤬！唔好忘記你仲有幾多日子要捱，唔急於一時啦。食完晚飯如果早（8/9PM）我會去行海皮散步／由自修室步行返屋企（約半小時）當散步，聽下歌，放鬆下，返到去沖涼訓覺，咩都唔好諗，好好休息。 中六返完學又做完pre-mock通常已經好攰，如果未到1/2月我最多會自己操多1/2份paper（係屋企／學校／自修室），對埋答案然後就收工。中間可能會隔餐晚飯，晚飯之前我會每1/2日抽時間跑步（因為果陣太熱愛跑步），如果無時間就係屋企做體能（上Youtube search FitnessBlender/XHIT Daily/HIIT 會見到好多10分鐘內嘅workouts，好省時間但可以出到一身汗），畢竟適量運動可以比精神藥物更有效調節你嘅情緒，同時又維持健康（下省1000字）。 至於煲劇果D個人就唔太建議，始終連續劇成日吊你癮🙄 睇完短期內好難集中，日日都分心，戒得就戒左佢。當然，每個人都有適合自己嘅一套，我果套同你唔同唔代表你果套唔work，最緊要係搵到一個方法幫到你減壓又唔會令你太輕鬆／唔想讀書，等呢套方法陪你捱過DSE。 面對人生一個重要嘅分岔口，有壓力係絕對正常，你亦唔係唯一一個，唔使怕左佢。當然，爆煲嘅時候你或者好難睇到希望，因為你個腦俾人hack左，但凡事俾個機會自己，應承自己做任何事之前，傷害自己之前揾個可靠冷靜嘅朋友睇住自己，唔好俾情緒吞噬。加油！！🙆♀💕1. 長假期／星期六、日
2. 返學日子
