好多人都抱怨閱讀卷嘅白話文雖然隻隻字都睇得明，但係終究唔明究竟佢想表達啲乜嘢意思，尤其是係做記敘抒情文嘅時候，唔知作者想表達乜嘢嘅感情，所以唔識答一啲比較艱深嘅長題目。有見及此，今次就想同大家分享下究竟有啲乜嘢方法，可以令到自己快速揣摩到作者想表達嘅感情，從而讓你可以喺更快嘅時間入面對篇章嘅主旨同埋中心思想有更深刻的理解。
其實，要喺一個半鐘頭，其實得九個字，咁短嘅時間入邊你要明白一篇成2000幾字嘅文章嘅中心思想真係唔容易，所以我哋唔係話要完全咁理解作者每一句講啲乜嘢，佢嘅感情變化係點樣，而係要快速大致理解到，因為喺唔夠一個鐘嘅時間入邊，你根本冇可能完全知道作者想講咩，加上你對作者寫作文章嘅時空同背景都唔理解，所以好難代入作者嘅思想。
所以，今次就想同大家分享下點樣喺文章入邊快速領悟到作者感情嘅方法，雖然啲方法絕對冇可能一步登天，或者佢未必可以幫你好準確咁揣測到女朋友究竟諗緊啲咩，但係佢一定可以幫你係咁長篇嘅文章入邊搵到一啲線索，從而整合作者嘅中心思想。
1️⃣ 具情感色彩的字眼
好簡單，一旦見到具感情色彩字眼就highlight 佢，例如係林黛嫚孤獨的理由入面有一段
『你第一次看見他，他坐在客廳的藤椅上，那一組五張，圍著一張藤製圓几，他坐的那張藤椅正對著一架十四吋黑白電視，見你進來，他瞪著小小螢幕的表情沒有絲毫變化。往好一點想，是他電視看得太入神，無法騰出心思向來客招呼；若依你如大和民族般多禮的性子，那麼那不似好客鄉親的行為未免有些詭異。』
如果我一見到佢感情色彩的字眼，例如最後一段嘅「詭異」，我就會即刻highlight佢。透過呢個方法，你就可以好快咁喺每一段搵到佢想表達嘅感情，亦都省略左睇冗長的原文嘅時間。
2️⃣ 尋找含糊嘅句子
每篇文章入邊都一定會有啲好文青嘅句子，類似嘅句子其實大部份時間都係想表達感情，並同中心思想有相當關連，例如係《孤獨的理由》入面有一句
『回家的路雖長總不比人生路漫長。』
呢類型嘅句子好多時候都係表達一啲中心思想，或者需要學生去解釋，所以搵齊佢哋就一定冇死。一旦你搵到呢啲句子，就要嘗試透過呢啲關鍵句子去理解作者嘅睇法，例如去思考究竟長係指咩意思，係指實體上嘅長，定係淨係時間上嘅漫長，透過呢個方法呢你就可以好快速地搵到一啲重點嘅句子，省略左你睇文章嘅時間，騰空更多嘅時間比自己思考。
如果大家仲想知多啲準備中文卷一嘅心得同技巧，可以睇下呢篇【DSE溫習攻略】中文卷一閱讀備戰指南同【DSE中文備戰攻略】10月中文卷一、卷二綜合懶人包。大家亦可以報讀Afterschool提供嘅各款補習課程，好好規劃自己嘅學習計劃！
