【DSE 中文】0浪費 · 中文Past Paper物盡其用操卷秘籍

AfterSchool
AfterSchool 2020年06月23日
被稱為DSE「死亡之卷」嘅中文科其實得唔夠十年past paper可以操,除咗背範文仲可以點預備閱讀?綜合情景次次唔同,點樣操格式?小編今次就教你點樣做好面對每一份卷一閱讀同卷二寫作、卷三聆聽、卷四說話卷嘅計劃,等聰明嘅你做好操卷前、中、後所有準備,用盡每一份咁珍貴嘅卷!

 

被稱為DSE「死亡之卷」嘅中文科其實得唔夠十年嘅past paper可以操,AfterSchool小編今次就就教你點樣做好面對每一份卷一閱讀同卷二寫作、卷三聆聽、卷四說話卷嘅計劃,等聰明嘅你做好操卷前、中、後所有準備,用盡每一份咁珍貴嘅卷!

  1. 你需要知道的事
  2. 中一至中三 —— 三餘讀書之時
  3. 中四至中六 —— 日不暇給之際
  4. DSE 中文卷一閱讀 —— 酌字斟句
  5. DSE 中文卷二寫作 —— 由表及裏
  6. DSE 中文卷三聆聽及綜合 —— 竹杖化龍
  7. DSE 中文卷四說話 —— 恰如其分
  8. DSE 中文 SBA —— 不可偏廢
  9. 你不知道的事

 

1. 你需要知道的事

無論你喺Form幾都好,只要你喺香港嘅中學生,相信你一定會聽過中文科——「死亡之卷」嘅大名。但喺其實仲有一啲你一定要知道,而老師可能唔會成日提嘅嘢——無錯!就喺各份分卷嘅佔分比重考試時間!!!

以2019年為例,考評局資料顯示在中文科取得3級或以上成績的學生約佔58.2%,換言之有約四成學生中文攞2或以下,無緣取得「3322」大學入場券,難怪咁多學生都聞「中文」色變。

公開考試包括四卷,共佔全科總分百分之八十。校本評核佔全科百分之二十。

眾所周知,閱讀同寫作確實喺中文卷分卷中嘅重中之重,兩者各佔接近四分之一!大家都成日需要操卷嘅聆聽及綜合佔18%,但有無發現經常被大家忽略嘅卷四都佔足足14%,凈喺同聆聽及綜合差4%!

另一方面,小編去到好後來先發現中文SBA足足佔20%,而學校老師喺從來無同我地強調過校本評核喺幾咁重要……於是,小編至今仍然好後悔無放多啲時間去中文SBA,而將時間分咗去IES同補習等等嘅事。同學一定要重視中文SBA課程!

最後,大家都要記得卷一、卷二、卷三都喺一小時三十分鐘,操卷或者自己寫作文都要time好時間啊!

 

2. 中一至中三 —— 三餘讀書之時

三餘讀書 —— 充分利用一切空餘時間讀書

初中嘅你,首先好多謝你願意抽時間閱讀呢篇學術性嘅文章,小編好欣賞你咁主動積極嘅心態!

而呢個正正喺你喺仲打好緊基礎嘅時候最應該做嘅事——多閱讀白話文

兩種要睇嘅文:辭藻優美 & 推理心理

A路線——修辭大師

其實大家喺過往都未必有機會接觸「文學」如果你一向鐘意睇書嘅話,點解唔試下主動睇下文學類嘅書?話唔定一試愛上呢?如果你有啲啲興趣又唔知邊到入手嘅話,可以試下睇下名家作品,例如:朱自清同余秋雨、冰心、老舍等,大家應該可以喺圖書館揾到呢啲名家嘅散文集。

想再chur啲?試下直接揾DSE卷一閱讀能力考材入面出現過嘅作家作品啦!好似2018年林黛嫚《孤獨的理由》,2016年林清玄《紅心番薯》等等。(題外話:2017年劉裘蒂《跑道》,作者寫嗰篇文時僅僅19歲!,不過佢較少作品可以揾到。)

睇呢啲文嘅時候要留意嘅喺描述事件同場景、人物嘅手法,點樣做到流暢又可以自然真摯地帶出情感。

B路線——推理名家

我唔想睇咁多字;文學太高深我唔明;散文都太長,唔想睇。

小編明白你嘅感受,真喺明白。

所以我想推薦你一類有趣嘅文體——短篇小說集

每個故事都只有幾版,通常喺某件事情嘅片段或者喺一個人嘅側寫,結果經常會有令人意想不到嘅轉折。

睇短篇小說集嘅好處首先喺一個故事好短,相信你一定抽到少少時間逐啲逐啲睇曬。其二你可以揀你鐘意嘅故事睇,睇唔曬都無問題,頂多換過第二個作家再睇,減少咗睇「名家」「巨著」嘅心理壓力。

中國近代白話文短篇小說大概發展咗百餘年,呢方面外國嘅經典短篇小說集喺比較多嘅。例如:[阿根廷] 胡里奧·科塔薩爾《南方高速》同[奧地利] 弗朗茨·卡夫卡《卡夫卡短篇小說集》、[法] 居伊·德·莫泊桑著《莫泊桑短篇小說集》。

同學亦不妨去圖書館搜尋「短篇小說集」發掘下新大陸。

睇呢啲翻譯短文嘅目的喺要參透作者寫呢篇岀黎喺想你明白乜嘢道理/有乜感受。一個好嘅作者寫每個片段都喺有佢嘅目的,唔會有多餘嘅句子。就好似推理小說一樣,如果前文多口提到某個人身上有疤痕,一定會喺一個喺後面有助揾出兇手(或者擾亂視線)嘅伏筆。拉翻去平時中文閱讀卷,其實閱讀篇章本身已經經過刪減,留低都會喺有助你理解意境,回答問題嘅部分,即係全部都喺你需要嘅嘢,都喺答題線索

有咗呢個陰謀論之後,希望你會用一定會有線索嘅心態對住篇文嘅表面抽絲剝繭,然後用一定有弦外之音嘅諗法揾埋文章背後嘅情感,咁就完美啦。

 3. 中四至中六 —— 日不暇給之際

日不暇給 —— 事情繁多,不夠時間,來不及做完

高中嘅你,恭喜你,戰爭啱啱開始。

中四至中六都尚有幾年時間,得閒可以望翻以上建議。

如果時間凈翻唔多,都係兩條路:閱讀 & 實戰

A 路線——閱讀白話文/文言文

呢個時候嘅你喺需要向難度挑戰嘅。

白話文方面,小編特別推薦黃仁逵《放風》同劉以鬯《對倒》。

點解會特別推薦呢兩本書?

前者《放風》係散文,將唔同嘅描寫手法濃縮係1200字入面,簡單啲來講你可以當文學類嘅生活小品。後者《對倒》係學習寫作手法,兩條唔同嘅故事線喺同一篇文章裏面交錯出現,看似互不相通,實質上環環相扣。例如,兩個主角係同一個時間做緊同一樣嘢,但係因為性格、性別嘅唔同出現咗少少嘅分嘢,一點一滴嘅改變后後造成左之後不同故事線交織嘅契機。

文言文方面,小編都有推薦,而你必定聽過——蒲松齡《聊齋誌異》!

其他仲有《世說新語》,佢喺由南朝宋劉義慶召集門下食客共同編撰,記載東漢至東晉間的高士名流的言行風貌和軼聞趣事嘅短文集。

呢啲文言文都可以輕易喺網上揾到白話文翻譯,而且相當有趣味性,睇多啲一遇到唔識嘅字就先估,後睇白話文翻譯再估多次,最後查翻文言文字典睇下自己嘅猜測啱唔啱。

B路線——做練習

相信中四中五學校仍然教緊課程內容嘅嘢,中六就抓緊時間比你堂上做past paper,真喺有做閱讀理解嘅機會不多。

小編建議你唔好慳,真喺去書店買大大本閱讀練習翻屋企做。

但喺各出版社嘅閱讀練習良莠不齊,如果你之前做過pp,睇得出邊啲出卷格式同題型喺似歷屆試卷嘅當然最好,唔喺嘅話小編建議你直接問多幾個師兄師姐做過邊本練習邊本好啲,有機會都可以襯學校書展問下中文科老師嘅意見。(希望順利復課……)

頻率方面,一篇閱讀理解大概做半個鐘,同學固定每星期至少做一篇,長遠keep到嘅話對於訓練語感、答題、時間管理都有極大裨益。做完之後一定要check答案,而且所有長答都要逐分逐分咁睇究竟佢要你答到咩,你又漏咗咩細膩細膩嘅情感定線索未掌握到,一次又一次嘅反覆錯誤同思考先會有進步,絕對唔可以做完望住答案tick咗就算。唔好睇少對答案嘅十分鐘,你從中學到嘅分分鐘大過做練習嘅三十分鐘!

4. DSE 中文卷一閱讀 —— 酌字斟句

酌字斟句 —— 酌斟、酌:反覆考慮。指寫文章或說話時慎重細緻,一字一句地推敲琢磨

事前準備:

  1. 前文已詳細描述(睇白話文/文言文、做練習
  2. 準備好「陰謀論」嘅心態(閱讀篇章每個片段都有明確目的,無多餘句子。)
  3. 可以背嘅十二篇範文、主旨、修辭手法名稱、詞類必須要完全記熟(唔可以喺背到嘅嘢失分)

操卷實戰:

1. 時間分配

盡量喺25分鐘完成甲部範文,凈翻65分鐘計翻百分比每題最多用幾多時間。都可以望下呢篇卷一做卷次序參考。

2. 白話文

睇完篇文睇完啲問題試下抽離一下:如果你喺作者,你寫咗咁多嘢到底為咩?

如果寫景嘅,作者喺純粹讚歎景靚,定喺想表達佢嘅思鄉之情,又或者喺好另類地覺得自己喺特立獨行嘅高山、不屑與其他小土丘比鄰為類?(註:出自十二篇範文中《始得西山宴遊記》)

如果寫人,作者喺純粹形容該人品德高尚,定喺仰慕對方,希望自己同佢一樣年少有為?(註:出自十二篇範文中《念奴嬌 · 赤壁懷古》)又或者該人根本喺假想岀嚟,就喺為咗傳遞作者對自願淡泊名利、不隨波逐流嘅美好意象嘅寄託?(註:出自十二篇範文中《青玉案 · 元夕》)

既然出咗做閱讀篇章,同學必須好好體會背後情感同目的,唔好再比文章表面同啲題目誤導你啦!

3. 文言文

睇完篇文一次可以望埋啲題目一次再諗篇文喺咩意思,好多時候問題反而提示你成篇文嘅重點。任何文言字詞唔識都絕對唔好漏空,好似平時英文咁根據前言後語同試下延長個字至少有機會撞啱丫~

 

5. DSE 中文卷二寫作 —— 由表及裏

由表及裏 —— 從表面現像看到本質。

評分項目

最高得分

全卷總分

內容

40分

 

 

103分

表達

30分

結構

20分

標點字體

10分

錯別字

3分

 

事前準備:

  1. 長久以嚟嘅閱讀
  2. 通識嘅邏輯思維可以應用於議論文
  3. 名人事例、名言佳句、諸子百家思想,呢啲喺一路要花心機記去累積落嚟嘅。

操卷實戰:

1. 時間分配

必須要用5-10分鐘諗好成篇文章嘅結構,詳細程度大概喺有齊文章中心想帶出嘅情感/分段/段落大意。議論文嘅話,除咗以上幾樣,仲有諗定每段有咩例子可支持論點。最後留兩分鐘睇全篇文有無錯字同漏字。

2. 內容(40分)

先講第一件事:扣題

寫開題一記敘文嘅你必須將題目嘅每一隻字完整咁喺你嘅文章表達岀嚟。標準做法喺喺題目抓曬時、人、地、事、心情岀嚟,然後寫完結構大意要檢查清楚有無將題目要求嘅每樣嘢留位置放入去,甚至做到貫穿全文。

一邊寫仲要一邊望翻題目隨時檢查自己有無加曬入去。唔好以為重複檢查曬時間或者以為自己記得曬,臨場時間壓力同心理緊張真喺好易忽略以上嘅嘢。

非正式統計,如果題一你真喺扣緊題目(至少show到比考官你有嘗試過),坐4望5一定走唔甩架啦,再上去嘅星星就睇施主運氣同功力啦。

第二件事:議論文/其他文嘅例子

小編喺呢篇【2019 DSE 中文作文】範文分析 - 讀書無用當中提過考評局其實要求例子重量亦重質,質嘅意思喺事例究竟可唔可以支持你想帶出嘅論點,而唔喺僅僅用偏門例子或寫出幾百字名人傳奇事跡就夠。

至於增加量方面,誠然,想做到遇到作文題目就諗到多過三個例子可供選擇喺非常困難的,所以小編誠意推薦【今日佛系讀書心法VIP】韓信:真・萬用神例 1.0,佢教咗你點樣記一個人、一個故事就可以應用到不同題目上。抓住呢個思路,以後睇書睇咩都好都唔單只記住,仲要諗點樣喺唔同角度切入都用得翻岀嚟啊!

3. 表達(30分)

用詞要靚,呢句講到爛曬,不過好真。比較適用於題一記敘文入面可能需要形容景物/人。

對本身中文底唔算特別好,不過寫開議論文嘅小編嚟講,「表達」嘅要求對議論文愛好者要求比較友好——就喺文句通順,符合邏輯。畢竟議論文喺需要說服讀者認同你嘅睇法,所以只要你清晰表達想法,全文結構、論述符合邏輯,其實已經喺良好表達,唔需要每段每句都雕花咁樣用最唔常見最靚嘅字。

不過,包括議論文在內,想表達高分最重要唔喺用詞,而喺修辭手法嘅多樣性。你要記住你要喺90分鐘內用你嘅全力將過往15年所學嘅中文修辭放喺呢篇短短1200字嘅文入面。唔好驚用嘅比喻太過老套,就算「老師的指導像燈塔的光芒為我驅散迷惘的霧霾,照亮我的前程」無乜創意,不過一定加分唔少。俗唔俗,重要咩?

4. 結構(20分)

就記敘文嚟講,「起、承、轉、合」喺最基本嘅故事結構,同學嘅作文大綱必須清晰安排好以上四項元素。

如果同學想再挑戰多啲,可以試下進階版「起、承、轉、偽合、轉、合」

「偽合」咩意思?同學可以留意下好多荷里活電影(尤其是英雄電影),當劇情進展到主線似乎終於解決,主角們重聚,可以開展新人生嘅最高潮之時(偽合),劇情總會突然急轉直下(第二次轉)——幕後黑手其實未解決,主角們重新聚集對抗邪惡,最後劇情先會嚟到真 · 大團圓結局(合)。

喺,無錯,結構又複雜咗,篇文又難寫咗,所以先要大家做多啲練習,小編有好多朋友真喺可以喺DSE臨場寫到以上結構,甚至用倒敘,插敘,第二人稱,時間穿越呢啲結構嘅文。不過,請務必評估自己能力同風險先採用以上險招。

【2019 DSE 中文作文】範文分析 - 讀書無用詳細咁教咗你議論文嘅結構,包括立論同論述、選取材料、論證闡述、結論

呢到想同大家傳授一句心訣——由表及裏。你要做到由表面現像睇到本質,具體嚟講喺由考評局比你嘅題目上升到人生嘅高度,小編就喺靠呢句心訣喺卷二攞到80分嘅高分。

例如:

檸檬茶(題目)→味道先甜後澀,有人喜歡有人不喜,檸檬不能督太多次否則太酸(表象)→人生先甜後苦/人生百態/各人偏好不一/生命中嘅刺激可否太多(題目出比你喺想你答呢個層次嘅本質

(非標準答案,同學可以用呢條舊會考題目一試)

禁區(2018 DSE題目)→物理禁區(eg火山)(表象)→道德禁區(eg基因改造,複製人)(升華)→難以界定、後世才能判定的禁區(eg蘇聯生化武器,其時國民開心振奮望贏得戰役,但後世會界定為違反人性)(層次逐階遞進,而且角度新奇)

小編想講嘅喺,以上結構喺有清晰主題,更有程度層次之分,咁樣結構先會高分。所以事前十分鐘釐清文章結構真喺好重要架!

5. 標點字體(10分)

字體短期內無辦法改太多,大原則喺清晰可辨認。

6. 錯別字(3分)

每個錯別字倒扣0.5分,所以無錯字額外全取3分,要check卷啊!

6. DSE 中文卷三聆聽及綜合 —— 竹杖化龍

竹杖化龍 —— 借指得道成仙

評分項目

最高得分

寫作部分總分

語境意識

10分

 

50分

整合拓展

16分

見解論證

14分

表達組織

10分

事前準備:

  1. 預備好上行、平行、下行嘅上下款、祝頌語、客套說話
  2. 準備好唔同場合嘅說辭(例如演講詞同計劃書就非常唔同)
  3. 預備好將普通一件事上升到喺為咗廣大市民之福,為中華文化嘅承傳,是為竹杖化龍。

操卷實戰:

1. 時間分配

開波用五分鐘睇資料揾資料,mark低邊邊啲資料屬邊part到時方便揾(當然希望你喺播錄音前嘅準備時間都開始睇曬啦)之後就要預備隻手唔可以停唔可以猶豫咁一路寫落去,預7分鐘引言,7分鐘收尾,其他時間均分四份做整合拓展同見解論證每部分各兩段。時間到絕不可以留戀,你難以想象每年有幾多考生飲恨於糾結前段可以做得更好,而完全無時間做最後一段見解論證。總之,快、狠、準

2. 語境意識(10分)

即係引言、結尾同全文用詞,呢一部分喺事前準備可以做嘅,無可能每個場合每個身份都寫一次引言,但你可以揾好多好多嘅卷三真跡睇下咩用詞句式出現率最高,特殊場合又應該點表達,多睇多學自然學到。

3. 整合拓展(16分)

呢一部分喺聆聽可以聽到嘅內容,基本上你要確保你抄到資料落去,然後好好地、充分地、合理地將佢地拓展。

問題嚟啦,即喺點?小編以前補習有個神技喺將你要表達嘅嘢組織做三句一組,三組為之一段。例如喺寫完佢比你嘅活動名/其他→寫題目要你加以連繫展述嘅事物→加少少,一句就好嘅升華。例如2019 DSE,先說明宜居城市特質,再說明有關特質如何締造幸福生活,最後,攞星嘅重點嚟了,就喺講多一兩句幸福生活嘅願景/大同世界/美好設想。唔單只多啲嘢可以寫,仲可以加強語境意識。

4. 見解論證(14分)

呢部分好多時喺要你選定一個方案,然後用你嘅解釋說明原因,正常嚟講需要兩個原因。同樣用翻三句一組,三組為之一段嘅處理手法,亦都不忘做少少升華同贊下中文/世界嘅美好。只要前面幾段至今每段處理得當,做好時間控制寫得完見解論證嘅話,基本上都已經比70%學生做得好。

5. 表達組織(10分)

最後,呢部分喺指格式正確,以上每段分量恰當。有前言,過渡段,整合拓展兩段,過渡段,見解論證兩段,結語。過渡段喺絕對有必要存在的,無過渡段表達組織會失好多分,唔可以偷懶唔寫啊!

 

7. DSE 中文卷四說話 —— 恰如其分

恰如其分——恰:正好。指辦事或說話正合分寸。恰如其分

事前準備:

  1. 把握你每一個可以練習嘅機會
  2. 以前我嘅學校有老師會定期幫中六學生搞呢啲說話訓練,你可以叫老師幫手組織下同監場,畢竟老師比到嘅意見一定喺最好的。中四中五真喺好想做練習都可以問下老師,老師都會歡迎中六同學無咁熟悉嘅你加入,幫佢地感受下陌生同緊張感。
  3. 當然亦可以私下組織,不過好多時中六先會有動力搞,自己搞最重要喺叫你班同學坦白比對方意見,自己都要坦白有咩可以做得更好,咁先進步到,都可以揾個中文成績真喺好嘅大學生幫手比意見
  4. 某補習社/一些平台會有模擬口試,不妨一試,同出面嘅人做口試先有唔同level嘅人。
  5. 臨近口試可以留意邊啲平台(eg AfterSchool)幫手組織各區同學仔自己約出嚟做練習,小編都試過去自己組團,記住注意安全啊!

操卷實戰:

1. 時間分配

你諗到嘅嘢都要寫喺張張notecard到,越發散性思維越好。當然你要準備好一分鐘發言嘅論點,一般黎講立場、論點+短例子x2、再次重申立場喺最佳結構。

2. 闡述、語言(9 分)

扣緊主題,發言清晰有邏輯,主題句,例子,展述,雖然睇落簡單但如果臨場會亂嘅話不妨喺張紙記低埋「首先、因為、所以」,呢啲咁簡單嘅字好可以提到你用岀嚟keep住結構唔亂。

另外,同卷三有啲類似嘅喺,預備好將普通一件事上升到道德層面、人生嘅高度,真喺引發思考,show到你喺一個有深度有邏輯嘅人。

3. 應對、態度(9 分)

基本儀態等等小編唔想提咁多,你可以睇下TED嘅演講家,更加簡單直接嘅喺問你嘅朋友家人平時你講嘢嗰陣會唔會令人好睇唔順眼(?)家人好可能會直接開始鬧(?)你駝背、細聲、講嘢唔望人等等等等。

回應方面,無錯,你首先要以兩三句概括曬上幾個人嘅發言,一句回應,再提到自己觀點。最後拋翻嗰波出去。其實同通識有啲似,一旦你做到即時歸納總結延伸eg 以上幾位同學提到嘅蘋果、橙,其實都喺水果嚟嘅,我覺得都好好食,仲有啲食物都相當美味,例如蔬菜……,同學你嘅分數必定非常高。

4. 運氣

小編識好多好識講嘢、點睇都唔會怯場嘅朋友最後2咗……世事嘅嘢真喺好難講,大家入到去就要記住一生人一次咋,點驚點樣樣都好你喺嗰半個鐘一定喺全場最犀利嘅人!絕對喺!怯就輸一世架啦!

8. DSE 中文 SBA —— 不可偏廢

不可偏廢 —— 偏廢:側重一方,忽略另一方。指兩方面都應同樣重視,不能片面地強調一個方面,而忽視另一個方面。

事前準備:

  1. SBA 佔20%,多過卷三綜合比重
  2. 聽我講,佢好重要,重要過你啲功課(非鼓吹欠交功課,但佢真喺重要過功課)
  3. 努力地理解所有內容,背佢比你嘅閱讀篇章,做資料搜集,用喺呢到嘅成本效益絕對值得

操卷實戰:

  1. 遺憾地SBA嘅資訊好唔透明,只能講每間學校比出嚟嘅教材都唔一樣,而且比分準則好唔同,以下僅為經驗分享,不保證資料正確性。
  2. 以小編僅有嘅記憶嚟講,我哋其中一個單元都喺要背文言文嘅。另一個單元喺有關儒家、道家等諸子百家學說。
  3. 文言文方面大概同平常差不多,百家學說方面,各家嘅哲學思想對於中學生理解嚟講其實都稍微有啲吃力,不過有啲key concepts好似人禽之別、禮、三從四德喺比較清楚嘅,而SBA就喺會出一條考呢啲概念嘅題目/情景,然後要你運用翻呢啲概念加以展述你讚唔讚成嗰件事/你會點處理,原則喺乜。
  4. 雖然有啲難明,但喺我絕對相信網上圖書館有好多資源,想研究喺一定可以搞得清楚,畢竟個單元都喺介紹下,其實並唔深入,只喺怪我當年唔知道SBA佔分咁重……
  5. 20%,開始學嘅時候,一定要加油

9. 你不知道的事

第一件事:小編唔喺中文底好,但最後慶幸中文DSE成績不錯,靠嘅喺邏輯同思考,而唔喺虛無縹緲嘅語感。

小編喺學校中文作文同綜合從來無合格過,作文方面喺因為學校作文規定次次都作我唔擅長嘅題型(唔同題型都要試嘛),綜合就喺因為從來無嘗試理解過上面四部分喺咩,都睇得範文唔夠多。

所以就我而言,我知道議論文對我喺比較友好,後來都專門研究議論文。綜合就喺中六刨補習notes同真跡,可以話綜合喺所有科入面最需要睇範文嘅一份卷,語境同段落結構喺非常講究技巧的,一旦你比心機去揾高文真跡嘅規律岀嚟,其實唔難😊

第二件事,上面標題嘅成語依然唔喺小編中文底好所以識咁多,而喺上網揾同義詞字典揾嘅(……)。如果你願意學習嘅話,網上同所有地方都有數之不盡嘅資源(AfterSchool高質長文持續更新中

最後,小編真喺好希望將自己唔喺中文底好,原本老師預3,自己預4,但喺最後攞到5**嘅經驗分享俾大家,尤其是中間陰謀論同將所有內容升華嘅部分,雖然成日都同自己講話真喺好好彩,但喺而家打曬成篇7500字嘅文先發現自己以前都有重視中文,做過好多嘢,諗落有好多懶人心得。

多謝大家睇曬,歡迎like分享follow加入書籤,希望與大家共勉之!

 

 

相關課程